Ko Iehova “Tei Tutaki Mai i te Aronga i Kimi Tikai Iaia”

“Ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.”​—EBERA 11:6.

1, 2. Eaa ra etai au tavini o Iehova i putoto ei i te au manako papu kore?

“E KITE au no Iehova vaitata nei e 30 mataiti, inara kare roa au i manako ana e e mea tau kia kapikiia ko te reira,” i aaki mai ei a Barbara. * “Noatu e i painia ana au e e manganui te au akameitakianga ke, i te akara anga kare tetai o te reira e akariro ana kia irinaki au ma toku ngakau e kia kapikiia ra ei Kite.” Kua akakite mai a Keith i te au manako mei te reira rai. “I tetai au taime e manako ana au e kare e tau ana no te mea e manganui te au tumu i mataora ai te au tavini o Iehova, inara kare au e mataora ana,” i karanga ai aia. “Kua taki atu teia ki te au manako ngakau apa, i te akakino roa atu anga i te au tumu ra.”

² I topa akenei e i teianei, e manganui te au tavini akarongo mou o Iehova tei putoto ana ma taua au manako. E akapera ana ainei koe i tetai taime? Penei ka taitaia koe mei tetai manamanata ki tetai manamanata, i te akara anga e te rekareka ua ra toou au taeake irinaki i te oraanga, rangatira e te mataora. Tei tupu mai, penei ka manako koe e kare i rauka mai ia koe to Iehova mareka anga e kare katoa e tau kia manakoia mai e ia. Auraka e viviki ua i te manako e ko teia te turanga. Te akapapu maira te Pipiria kia tatou e: “Kare oki [a Iehova] i akavaavaa, kare oki i akakino, i te tairoanga o tei tairoia ra: kare oki i uuna i tona mata iaia; kia kapiki ra aia kiaia ra, kua akarongo maira aia.” (Salamo 22:24) Te akaari maira taua au tuatua totou no runga i te Mesia e kare a Iehova e akarongo  ua maira ki tona aronga akarongo mou ua mari ra ka tutaki katoa mai ia ratou.

3. Eaa ra tatou kare i paruruia mei te au taomianga o teia akatereanga o te au mea nei?

³ Kare tetai tangata i paruruia mei te au taomianga a te akatereanga o te au mea nei​—kare rai te au tangata o Iehova. Te noo nei tatou i roto i tetai ao te tutaraia nei e to Iehova enemi maata, ko Satani te Tiaporo. (2 Korinetia 4:4; 1 Ioane 5:19) Kare i paruru temeioia ana, ko te tika, e takete maata te au tavini o Iehova na Satani. (Iobu 1:7-12; Apokalupo 2:10) No reira, e tae akera ki to te Atua tuatau akonoia, te anoano nei tatou kia “akakoromaki i te mate” e te “tamou marie tikai i te pure,” i te irinaki anga e te manako maira a Iehova ia tatou. (Roma 12:12) Auraka tatou e tuku ua atu ki te manako e kare tatou e inangaroia mai ana e to tatou Atua, e Iehova!

Te Au Akaraanga Taito no te Akakoromaki

4. E oronga mai i etai au akaraanga no te au tavini akarongo mou o Iehova tei akakoromaki i te au turanga taitaia.

⁴ E manganui te au tavini taito o Iehova tei akakoromaki i te au turanga taitaia. Ko Hana, ei akaraanga, kua “tumatetenga rava tona ngakau” no te mea kare aia i anau tamariki ana​—e turanga tana i manako ra e te aiteite ra i te akangaropoinaia anga e te Atua. (1 Samuela 1:9-11) Te arumakiia anga a Elia e te ariki vaine kino ra ko Iezebela, kua mataku aia e kua pure atu kia Iehova: “Kua oti ua; e teianei, e Iehova, ka rave mai koe iaku; kare oki oku e meitaki maata i toku ai metua ra.” (1 Ariki 19:4) E penei i manako ana rai te apotetoro ko Paulo i te apainga maata no tona tu apa i tona akakite tika anga e: “Kia anoano au i te rave i te mea meitaki ra, te vaitata ua nei te kino iaku i reira.” Kua tuatua katoa aia: “Aue oki au ko te tangata mate maata e!”​—Roma 7:21-24.

5. (a) Akapeea a Hana, a Elia, e Paulo te tutakiia anga? (e) Eaa te akapumaana ka rauka mai ia tatou mei te Tuatua a te Atua me te putoto ra tatou i te au manako ngakau papu kore?

⁵ E tika, kua kite ana tatou e ko Hana, Elia, e Paulo ra kua akakoromaki pouroa ana i roto i ta Iehova angaanga, e kua tutaki maata mai Aia ia ratou. (1 Samuela 1:20; 2:21; 1 Ariki 19:5-18; 2 Timoteo 4:8) Noatu rai, kua putoto ana rai ratou i te au tu katoa o te au manako ngakau tangata ra, te kapiti anga mai i te aue, te taitaia, e te mataku. Kare tatou e poitirere, i reira e, i tetai au taime e au manako papu kore to tatou. Inara, eaa ra taau ka rave, me te akatupu maira te au apiapi o te oraanga kia akamanako koe e me kua inangaroia tikai koe e Iehova? Ka rauka ia koe te pumaana mei te Tuatua a te Atua. Ei akaraanga, i roto i te atikara i mua akenei, kua uriuri ana tatou i te tuatua a Iesu e kua tatauia e Iehova “te rauru oki o to kotou na upoko.” (Mataio 10:30) Te akakite maira taua au tuatua akamaroiroianga e te manako tikai maira a Iehova i tona au tavini tataki tai. E akamaara, katoa, i ta Iesu akatutuanga no te au manu rikiriki. Me te kite maira a Iehova i tetai o taua au manu rikiriki te topa ra ki runga i te enua, eaa atura i reira aia ka kopae ei i toou manamanata?

6. Akapeea te Pipiria i riro mai ei e tumu anga no te pumaana ki te aronga te maroia ra e te au manako papu kore?

⁶ Ka rauka tikai ainei ia tatou tangata apa nei i te akaperepereanga i roto i nga mata o Tei Anga ririnui katoa maira, te Atua ra ko Iehova? Ae! Ko te tika, e maata te au irava Pipiria te akapapu maira kia tatou i teia. Me akamanako tatou i teia au irava, ka rauka ia tatou i te tuatua i te au tuatua a te tata taramo tei akakite mai e: “I rotopu i toku nei manako mirimiri-ngata i roto iaku nei, na to akapumaana e akarekareka mai i toku vaerua.” (Salamo 94:19) E akamanako ana tatou i etai o teia au tuatua akapumaana mei te Tuatua a te Atua te ka tauturu ia tatou kia ariki rekareka maata tikai e te akaperepereia ra tatou e te Atua e ka tutaki mai aia ia tatou ia tatou e rave ra i tona anoano.

Ta Iehova “Apinga Meitaki Rava Ra”

7. Eaa te totou akamaroiroi anga ta Iehova i oronga na roto ia Malaki ki te iti tangata kino ra?

⁷ Kua tupu mai tetai turanga kino i rotopu i te ngati Iuda i te rima anere mataiti M.T.N. Kua ariki te kau taunga i te au manu tau kore e te oronga anga i teia ei au atinga ki runga i ta Iehova atarau. Kua akaari te au akava i te tu papakitai. E maata te ravenga purepure, te pikikaa,  te akavare pikikaa, e te akaturi. (Malaki 1:8; 2:9; 3:5) Ki teia iti tangata kino tikai nei ra, i tuatua ai a Malaki i tetai totou umere. Kare i roa ana, ka akaoki akaou mai a Iehova i tona au tangata ki roto i tetai tu marekaia. Ka tatau tatou: “E ka riro ratou noku, te tuatua mairā Iehova Sabaota ra, i te rā i akatakaia e au ra, ei apinga meitaki rava ra; e naku e akaperepere ia ratou, mei te tangata e akaperepere i tana uaorai tamaiti kia tavini atu kiaia ra.”​—Malaki 3:17.

8. No teaa ra i taangaangaia ai a Malaki 3:17 i roto i te kaveinga ki te aronga maata rava?

⁸ E akatupuanga no teia tuatau te totou a Malaki te piri atura ki te au Kerititiano tei akatainuia e te vaerua, tei riro mai ko te iti tangata pae vaerua o te 144,000. E “ei apinga meitaki rava ra” tikai taua iti tangata ra, me kore “e au tangata no tetai apinga takake,” kia Iehova. (1 Petero 2:9, NW) Kua riro katoa ta Malaki totou ei akamaroiroi anga ki te “aronga maata rava,” te “tu ua anga ki mua i te terono, e ki mua i te Punua-mamoe, ma te kakau teatea i te kakau anga.” (Apokalupo 7:4, 9) Kua riro mai ratou ei anana okotai ma te aronga akatainuia, i raro ake i te Tiaki okotai, ko Iesu Karaiti.​—Ioane 10:16.

9. Eaa ra te au tangata o Iehova i riro ei “ei apinga meitaki rava ra” kiaia?

⁹ Akapeea a Iehova i te akara anga i te aronga tei iki i te tavini iaia? Mei tei kiteaia ia Malaki 3:17, te akara ra aia ia ratou na roto i te tu te akara ra tetai metua tane aroa i tana tamaiti. E akara ana i te au tuatua manea i tona akataka anga mai i tona au tangata​—“ei apinga meitaki rava ra.” Kua uriia e tetai au urianga taua tuatua ra “naku tikai ra,” “taku apinga akaperepere maata roa atu,” e “taku au poe.” Eaa ra a Iehova ka akara ai i te aronga tei tavini iaia ei meitaki rava ra? Okotai oki mea, e Atua ariki rekareka oki aia. (Ebera 6:10) Te akavaitata maira aia e te akara maira ei meitaki rava i te aronga te tavini ra iaia mei roto mai i te ngakau.

10. Akapeea a Iehova i te oronga anga i te paruru anga no tona au tangata?

¹⁰ Ka rauka ainei ia koe i te akamanako i tetai apinga akaperepere naau uaorai taau i akara ana ei apinga meitaki rava ra? Te rave ra ainei koe i te au takainga i te paruru i te reira? Te rave nei rai a Iehova i te reira ma tana “apinga meitaki rava ra.” E tika rai e, kare aia e paruru ana i tona au tangata mei te au timataanga e te au tumatetenga katoa o te oraanga. (Koheleta 9:11) Inara ka rauka e ka paruru a Iehova i tona au tavini akarongo mou i te pae vaerua. Ka oronga aia i te maroiroi kia ratou ta ratou e inangaro ra i te akakoromaki anga i tetai ua atu timataanga. (1 Korinetia 10:13) No reira, kua akakite a Mose ki te au tangata taito o te Atua, ki te ngati Iseraela e: “Kia ketaketa, e kia maroiroi roa, . . . ko to Atua oki ko Iehova, koia uaorai te aere katoa nei i vaitata ia koe; kare aia e akaruke ia koe, kare e taka ke ia koe.” (Deuteronomi 31:6) Te akono meitaki ra a Iehova i tona au tangata. Kiaia ra, “ei apinga meitaki rava ra” ratou.

Ko Iehova te “Tutaki”

11, 12. Akapeea te ariki rekareka anga ia Iehova i roto i tana tuanga ei Tutaki no tatou i te tauturu anga ia tatou kia autu atu i te au manako ekoko ra?

¹¹ Ko tetai akapapu anga te akaperepere ra a Iehova i tona au tavini koia oki te tutaki maira aia ia ratou. Kua akakite aia ki te ngati Iseraela e: “Ei timata anga te reira iaku nei i tenana, te tuatua mairā Iehova Sabaota ra; i te kore anga au i te kiriti anga i te au māramārama o te rangi ra, ka riringi atu ei i te apinga maata ua atu, kare e ngai e o ei, ei meitaki no kotou.” (Malaki 3:10) Ae, i te openga ra, ka tutaki mai a Iehova i tona au tavini ma te ora mutu kore. (Ioane 5:24; Apokalupo 21:4) Te akaari maira teia tutaki anga puapinga maata i to Iehova aroa maata e te takinga meitaki. Te akaari katoa maira te reira e te  akaperepere tikai ra aia i te aronga tei iki i te tavini iaia. Te apiianga i te akara ia Iehova ei Tutaki aroa ra ka rauka i te tauturu ia tatou kia autu atu i tetai au manako ekoko no runga i to tatou turanga ma te Atua. Ko te tika, te raurau maira a Iehova ia tatou kia akara kiaia ei Tutaki! Kua tata a Paulo e: “Ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.”​—Ebera 11:6.

¹² E tika, te tavini ra tatou ia Iehova no te mea no to tatou inangaro iaia​—kare anake ua e no te mea e te taputou maira aia i te tutaki mai ia tatou. Noatu rai, te tamou piripiri anga ki to tatou ngakau i te manakonakoanga no tetai tutaki anga kare i te mea tau kore ua me kore kare i te tu noinoi ua. (Kolosa 3:23, 24) No tona aroa ia ratou e te tuku teitei anga i te puapinga ki runga ia ratou, na Iehova i rave na mua e i tutaki mai i te aronga i kimi tikai iaia.

13. Eaa ra te akanoonooanga no te oko e ko te akapapuanga maata roa atuia o to Iehova aroa ia tatou?

¹³ Te akakiteanga maata roa atu i te puapinga tikai o te tangata ra i roto i to Iehova nga mata ra koia oki te akanoonooanga no te oko. Kua tata te apotetoro ko Ioane: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Te akanoonooanga no te atinga oko o Iesu Karaiti te patoi tikai ra i te manako e e puapinga kore ua me kore kare tatou e inangaroia mai i roto i nga mata o Iehova. E tikai, me kua tutaki a Iehova i tetai tutaki anga maata no tatou​—te oronga mai anga i tana Tamaiti anau tai ra​—papu tikai e te inangaro maira aia ia tatou.

14. Eaa te akaari maira e akapeea a Paulo i te manako anga i te oko?

¹⁴ No reira, me tupu mai te au manako papu kore i roto ia koe, e akamanako i te oko. Ae, e akara i teia apinga orongaia mai ei akanoonooanga naau uaorai no ko mai ia Iehova. Kua rave te apotetoro ko Paulo i te reira. E akamaara i tana i karanga ana: “Aue oki au ko te tangata mate maata e!” Inara kua tuatua ua mai rai aia e: “E akameitaki au i te Atua i te mea e ora i to tatou Atu ra ia Iesu Mesia,” ta te apotetoro ko Paulo i karanga e, tei “aroa mai iaku, e kua oronga mai iaia uaorai noku.” (Roma 7:24, 25; Galatia 2:20) I te tuatua anga i teia, kare a Paulo e akapaapaa ra iaia uaorai. Te irinaki ua ra aia e te akaperepere maira a Iehova iaia ei tangata tataki tai. Mei ia Paulo ra, kia apii katoa koe i te akara anga i te oko ei apinga orongaia mai naau uaorai no ko mai i te Atua. Kare a Iehova i te Akaora ririnui ua mari katoa ra ei Tutaki aroa rai.

Kia Matakite i te “Ravenga Pakari” a Satani

15-17. (a) Akapeea te Tiaporo i te taangaanga anga i te au manako papu kore? (e) Eaa te akamaroiroi anga te ka rauka ia tatou mei te tupuanga o Iobu?

¹⁵ Noatu rai, penei e mea ngata ia koe i te irinaki e ko te au akapumaana akauruia tei kiteaia i roto i te Tuatua a te Atua te taangaanga tikaiia ra kia koe. Penei ka manako koe e te tutaki no te ora anga e tuatau ua atu i roto i te ao ou a te Atua ra e apingaia te ka rauka i tetai ke, inara kare koe e tau roa ana no te reira. Me ko teia toou manako, eaa taau ka rave?

¹⁶ Kare ekoko anga e kua matau koe i te akoanga a Paulo ki to Ephesia: “E kakau i te rakei katoa a te Atua ra, kia tika ia kotou kia patoi i te ravenga pakari a te diabolo ra.” (Ephesia 6:11) Me akamanako tatou i ta Satani au ravenga, penei ka viviki ua te au mea mei te apinga materia e te tu tau kore i te manakoia e te tika ra. Kua akapuereere teia au timataanga i te au tangata e manganui a te Atua i te tuatau taito e i to tatou tuatau nei. Inara, auraka e ngaropoina ia tatou i tetai atu ravenga pakari a Satani​—te tauta anga aia i te akapapu ki te tangata e kare ratou e inangaroia mai e te Atua ko Iehova.

¹⁷ E tu karape to te Tiaporo i te taangaanga anga i taua au manako i te tauta anga aia kia anga ke atu i te tangata mei te Atua. E akamaara i te au tuatua a Biladada kia Iobu: “Eaa oki te tangata nei e tikaia mai ei ki mua i te Atua? e eaa te mea e mā ai ta te vaine i anau ra? I na, i te marama nei, kare ïa i kakā mai; e te au etu, kare ïa i te mea viivii kore ki mua i tona mata: Ka tangaʼi oki i te tangata nei, e toke ïa! e te tamaiti a [“te  tangata ra,” NW], e toke oki ïa!” (Iobu 25:4-6; Ioane 8:44) Ka rauka ainei ia koe i te akamanako e mei teaa tikai te kino i taua au tuatua ra? No reira auraka e tuku ia Satani kia akaparuparu ia koe. I tetai tua, kia matakite i ta Satani au angaanga kia rauka oki ia koe te mataku kore e te maroiroi i te tamaki pakari katoa atu anga i te rave i te mea tika. (2 Korinetia 2:11) Ko Iobu ra, noatu e kua akatikatikaia aia, kua tutaki a Iehova i tona akakoromaki anga na te akaoki akaou mai anga kiaia e taki rua apinga katoa ra i tei ngaro iaia ra.​—Iobu 42:10.

‘E Maata Atu a Iehova i to Tatou Ngakau’

18, 19. Akapeea te Atua i ‘maata ai i to tatou ngakau,’ e na roto i teea tu i ‘kite ei aia i te au mea katoa nei’?

¹⁸ E tika tikai, e mea ngata te akakore atu i te au manako akamaroiroi kore me kua aka oonuia teia. Inara, ka rauka i to Iehova vaerua i te tauturu marie mai ia koe kia uri i te “au punanga ketaketa ki raro . . . tei akateitei kia kore e rauka te kite i te Atua.” (2 Korinetia 10:4, 5) Me akakoko mai te au manako papu kore i te taomi ia koe, e akamanako i te au tuatua a te apotetoro ko Ioane: “Ko te mea teia e kite ei tatou e, no te tuatua-mou tatou, e e kore ei to tatou ngakau e mataku i mua iaia. Kia akaapa mai oki to tatou ngakau ia tatou, e maata te Atua i to tatou ngakau, e kua kite aia i te au mea katoa nei.”​—1 Ioane 3:19, 20.

¹⁹ Eaa te aite anga o te tuatua “e maata te Atua i to tatou ngakau”? I tetai au taime, penei ka akaapa mai to tatou ngakau ia tatou, me kite tikai mai tatou i to tatou tu apa e te au tu paruparu. Me kore penei no te ngai i aere mai ei tatou, i manako maata ai tatou i te manako papu kore no tatou uaorai, mei te mea rai e kare a tatou apinga nei e arikiia mai e Iehova. Te akapapu maira te au tuatua a te apotetoro ko Ioane kia tatou e e maata atu a Iehova i te reira! Te kite maira aia i to tatou au tarevake i topa e te kite maira i to tatou tu tikai. Te kite katoa maira aia i to tatou au akakoroanga e te au manako. Kua tata a Davida e: “Kua kite oki aia i to tatou tu; te manako ra aia e, e one tatou nei.” (Salamo 103:14) Ae, e kite meitaki atu to Iehova ia tatou i to tatou kite anga ia tatou uaorai!

“Ei Korona Manea” e “ei Pare Ariki”

20. Eaa ta te akaoraanga o ta Isaia totou e akaari maira e akapeea a Iehova i te manako anga i tona au tavini?

²⁰ Na roto i te peroveta ko Isaia, kua oronga a Iehova ki tona au tangata taito ra i te manakonakoanga no te akaoraanga. I to ratou tuikaaia anga i Babulonia, ko teia oki te akapumaana e te akapapu anga ta teia aronga taitaia e anoano ra! I te akara anga ki mua ki te tuatau ka oki atu ei ratou ki to ratou enua, kua akakite a Iehova e: “E riro oki koe ei korona manea i te rima o Iehova, ei pare ariki i te rima o toou Atua ra.” (Isaia 62:3) Ma taua au tuatua, kua akakakau a Iehova i tona au tangata ma te ngateitei e te manea. Kua rave katoa aia i te reira ki tona iti tangata Iseraela pae vaerua o teia tuatau. Mei te mea rai e te mou ra aia ia ratou i te ngai teitei kia akaperepereia mai e te katoatoa.

21. Akapeea e rauka ai ia koe te irinaki anga e ka tutaki mai a Iehova i toou akakoromaki anga akarongo mou?

²¹ Koi akatupu maataia teia totou nei ki te aronga akatainuia, te akatutu maira te reira i te tu ngateitei ta Iehova i tuku ki runga i te aronga katoa te tavini ra iaia. No reira, me tupu mai te au manako ekoko, e akamaara e e noatu eaa te tu apa, e puapinga tikai koe “ei korona manea” e “ei pare ariki” kia Iehova. No reira e rave ua atu i te akarekareka i tona ngakau na te kimi anga tikai i te rave i tona anoano. (Maseli 27:11) Na te rave anga i te reira, te papu ra ia koe e ka tutaki mai a Iehova i toou akakoromaki anga akarongo mou!

[Tataanga Rikiriki i Raro]

Maara Ainei ia Koe?

• Akapeea tatou i riro ei “ei apinga meitaki rava ra” kia Iehova?

• Eaa ra i puapinga maata ai i te akara ia Iehova ra ei Tutaki?

• Eaa te “ravenga pakari” na Satani ra kia matakite tatou?

• Na roto i teea mataara e “e maata te Atua i to tatou ngakau”?

[Au Uianga Apii]

[Tutu i te kapi 26]

Ko Paulo

[Tutu i te kapi 26]

Ko Elia

[Tutu i te kapi 26]

Ko Hana

[Tutu i te kapi 28]

Te vai ra i roto i te Tuatua a te Atua te au manako akapumaana anga e manganui