Kua Tatauia e Iehova ‘Te Rauru o to Kotou Na Upoko’

“Kare oki tetai o ratou ra [manu rikiriki] e ngaro i to kotou Metua kia topa ki raro i te enua. Te rauru oki o to kotou na upoko, kua ope ïa i te tatauia.”​—MATAIO 10:29, 30.

1, 2. (a) Eaa ra a Iobu i manako ei kua akarukenaia aia e te Atua? (e) Te aite anga o ta Iobu au tuatua e kua anga ke ainei aia mei ia Iehova ra? E akataka mai.

“KUA kapiki atu au kia koe, e te Atua, inara kare roa koe i pau mai ana; e me pure atu au, kare koe e akarongo mai ana. Te takinokino pakari mai nei koe iaku; te takinga kino mai nei koe iaku ma to mana katoa ra.” Te tangata tei tuatua i taua au tuatua te mamae maata ra, e kare te reira i te mea umere! Kua ngaro tana au apinga, tana tamariki kua tamateia e tetai tumatetenga maata, e i teianei kua tuia aia e tetai maki kino roa atu. Ko Iobu te ingoa o taua tangata, e kua tataia tona tumatetenga kino ra i roto i te Pipiria ei puapinga anga no tatou.​—Iobu 30:20, 21, Today’s English Version.

² Penei i te akara anga te akaari maira ta Iobu au tuatua e kua anga ke atu aia mei te Atua, inara kare ko te reira te tu. Te tuatua ua ra a Iobu mei tona ngakau taitaia oonu. (Iobu 6:2, 3) Kare aia i kite ana e na Satani i akatupu mai i tona au timataanga, no reira kua manako tarevake ua aia e kua akaruke te Atua iaia. I tetai ake tuatau, kua karanga katoa a Iobu kia Iehova: “Eaa oki koe i uunaʼi i to mata, e i akono mai ei koe iaku ei enemi noou?” *​—Iobu 13:24.

3. Me tupu mai te au tu kino, eaa ta tatou ka akamanako?

³ I teia tuatau, e manganui te au tangata o Iehova te mamae nei i te au turanga ngata ope kore no te au tamaki, te au maro anga a te poritiki me kore te tangata, te au tumatetenga natura, te ruaine anga, te maki, te tu putaua kino roa, e te au arai anga a te kavamani. Penei ake te tupu katoa ra kia koe tetai au tu timataanga. I tetai au taime, penei ka manako koe e te uuna ra a Iehova i tona mata mei ia koe. Kua kite meitaki koe i te au tuatua a Ioane 3:16: “I aroa mai te Atua i to te ao nei, kua tae rava ki te oronga anga mai i tana Tamaiti anau tai.” Noatu rai, me te mamae ra koe e kare i kiteaia mai te rapakau anga, penei ka manako koe e: ‘Te inangaro tikai maira ainei te Atua iaku? Te kite maira ainei aia e eaa au i mamae ei? Te manako maira ainei aia iaku ei tangata tataki tai ra?’

4. Eaa te turanga ta Paulo i akakoromaki te tupu ua ra, e na roto i teea au tu e akakeuia ai tatou e taua turanga ra?

⁴ E akamanako ana eaa tei tupu ana ki te apotetoro ko Paulo. “I tukuia mai tetai tara i roto i taku kopapa nei, e karere na Satani ei pāpā mai iaku,” i tata mai ei aia, i te na ko anga e: “E toru oki aku pati anga atu i te Atu i taua mea ra, kia akataka keia iaku.” Kua akarongo mai a Iehova i tana au pati anga. Noatu rai, kua akakite atu aia kia Paulo e e kare aia e o atu na roto i tetai ravenga rapakauanga temeio. Mari ra, kia irinaki a Paulo ki runga i te mana o te Atua i te tauturu anga iaia kia autu i tona ‘tara i roto i te kopapa.’ * (2 Korinetia 12:7-9) Mei ia Paulo ra, penei te kite ra koe i tetai timataanga e tupu ua ra. Penei e manako ana koe, ‘Ko te aite anga ainei e i te akara anga kare a Iehova i rave ana i tetai mea no runga i toku timataanga ko te aite anga e kare aia i kite mai ana i toku turanga me kore kare aia i manako mai ana iaku?’ Te pauanga papu ra kare! Kua akakiteia  mai to Iehova manako oonu no tona au tavini akarongo mou i ta Iesu i akakite atu ki tana au apotetoro i muri ua ake i tona ikianga ia ratou. Ka akara tatou e ka akapeea e rauka ai i tana au tuatua i te akamaroiroi ia tatou i teia tuatau.

‘Auraka e Mataku’​—No Teaa Ra?

5, 6. (a) Akapeea a Iesu i te tauturu anga i te au apotetoro kia kore e mataku e eaa te ka tupu i te tuatau ki mua? (e) Akapeea a Paulo i te akaari anga i te irinaki anga e te manako maira a Iehova iaia ra?

⁵ Kua rauka mai i te au apotetoro te au mana ririnui roa atu mei ia Iesu, kapiti mai te “mana no ratou, kia tuaru i te au vaerua viivii ki vao, e kia akaora i te au maki ravarai, e te au mate katoa.” Inara, kare te aite anga o teia e ka akarangatiraia mai to ratou aerenga mei te au timataanga e te au turanga ngata. Ei tuke anga, kua akataka tikai mai a Iesu i etai o te au mea te ka tupu kia ratou. Inara, kua raurau atura aia ia ratou: “Auraka e mataku i te ta mai i te kopapa nei, kare te vaerua e mate ia ratou: e mataku ra kotou iaia, ko te tika iaia [“te akapou i te meta e te kopapa katoa i Keena,” NW].”​—Mataio 10:1, 16-22, 28.

⁶ E tauturu ei i tana au pipi kia marama e eaa ratou i kore ei e anoanoia kia mataku, kua oronga atu a Iesu e rua nga akatutuanga. Kua karanga aia kia ratou: “Kare aina e taki rua mea manu rikiriki e okoia i te asario okotai nei? kare oki tetai o ratou ra e ngaro i to kotou Metua kia topa ki raro i te enua. Te rauru oki o to kotou na upoko, kua ope ïa i te tatauia. Auraka mari kotou e mataku, e maata to kotou meitaki i to te au manu rikiriki e manganui.” (Mataio 10:29-31) Ka akara ana e kare a Iesu i kapiti mai ana i te mataku ki te aro anga i te au tu kino ma te irinaki anga e te manako maira a Iehova ia tatou uaorai. I te akaraanga, e irinaki anga to te apotetoro ko Paulo. Kua tata aia: “Ka akapeea oki tatou i teia au tuatua? No tatou te Atua ra, ka tika iaai kia māro mai? Ko tei kore oki i akaperepere i tana uaorai Tamaiti, ko tei tuku ua mai iaia no tatou katoa nei, eaa oki aia e kore ei e oronga katoa mai i te au mea ravarai no tatou?” (Roma 8:31, 32) Noatu e eaa te au akaaoanga taau ka aro atu, te papu katoa ra ia koe e te manako maira a Iehova ia koe uaorai me ka vai tiratiratu ua rai koe kiaia. Ka kite maataia teia ia tatou e akara vaitata ra i ta Iesu akoanga ki tana au apotetoro.

Te Puapinga o te Manu Rikiriki

7, 8. (a) Akapeea te au manu rikiriki i te akamanakoia anga i to Iesu tuatau? (e) I te akara anga, eaa ra a Mataio 10:29 i taangaanga ai i te tu rikiriki roa ake o te tuatua Ereni no te “manu rikiriki”?

⁷ Te akataka meitaki maira ta Iesu au akatutuanga i to Iehova manako anga i Tana au tavini tataki tai. E akamanako ana na mua i te manako no te au manu rikiriki. I to Iesu tuatau, kua riro te au manu rikiriki a ei kai, inara no te mea e akakino ana ratou i te au kai tanutanu ra, e manako maataia ana ratou ei au manu kino. No te maata e te mama ua oki o te au manu rikiriki ra e rua te ka rauka i te okoia mai i raro ake i te  rima tene o teia tuatau. E rua taime i te maata atu o te reira ka rauka i te oko mai kare e a ua mari ra e rima manu rikiriki​—ka orongaia mai tetai akaou manu, mei te mea rai e kare te reira e puapinga katoa ana!​—Luka 12:6.

⁸ E akamanako, katoa ana, no runga i te maata o teia manu noa nei. Me akaaiteia atu ki tetai au manu e manganui, e meangiti tikai te manu rikiriki. Inara, te tuatua Ereni tei uriia ia Mataio 10:29 te taiku tikai ra ki te au manu rikiriki roa ake. I te akara anga te inangaro ra a Iesu i tana au apotetoro kia akamanako i tetai manu meangiti roa atu.

9. Eaa te tumu ririnui tei raveia mai no ta Iesu akatutuanga no te manu rikiriki?

⁹ Te akaari maira ta Iesu akatutuanga no tetai manu rikiriki i tetai tumu anga ririnui: Ko tei akara puapinga kore ua ki te au tangata ra e puapinga maata te reira ki te Atua ko Iehova. Kua akakite katoa mai a Iesu i teia tika anga na te akakite anga mai e te kite maira a Iehova i tetai manu rikiriki e ‘topa ra ki raro i te enua.’ * Te taka meitaki ra te apiianga. Me te kite maira te Atua ko Iehova i te manu meangitika roa ake ra e kare e puapinga roa ana, mei teaa atura te maata i tona manako anga mai no runga i te turanga o tetai tangata tei iki i te tavini iaia!

10. Eaa te aite anga o te tuatua: “Te rauru oki o to kotou na upoko, kua ope ïa i te tatauia”?

¹⁰ Kapiti mai ki tana akatutuanga no runga i te au manu rikiriki, te karanga ra a Iesu e: “Te rauru oki o to kotou na upoko, kua ope ïa i te tatauia.” (Mataio 10:30) Te akakite maata maira teia tuatua poto ua nei e te oonu i te tumu o ta Iesu akatutuanga no runga i te au manu rikiriki. E akamanako ana: Vaitata e 100,000 rauru i runga i te avereti upoko o te tangata. Ko te tuanga maata, i te akara anga aiteite tikai tetai rauru ki tetai, e i te akara anga kare okotai ua rauru ta tatou ka akara atu tikai. Inara, ko te rauru taki tai ra kua kiteaia e kua tatauia e te Atua ko Iehova. Mei te mea e ko teia te tu, e apinga ke atu ainei tetai i roto i to tatou oraanga kare a Iehova e kite mai ana? Papu tikai te marama ra a Iehova i te tu tataki tai o tona au tavini taki tai ra. E tikai, te “akara [maira aia] i te ngakau.”​—1 Samuela 16:7.

11. Akapeea a Davida i te akakite anga i tona irinaki anga i te manako mai anga a Iehova iaia uaorai ra?

¹¹ Kua irinaki a Davida, tei kite maata ana i te turanga ngata, e te kite maira a Iehova iaia. “E Iehova, kua unuunumouia au e koe, e kua kitea oki au,” tana i tata mai ei. “Kua kite koe i toku noo anga ki raro, e toku tu anga ki runga; kua kite koe i toku nei manako i te atea ke.” (Salamo 139:1, 2) Papu katoa ia koe e te kite maira a Iehova ia koe uaorai. (Ieremia 17:10) Auraka e viviki ua i te manako e e puapinga kore ua koe me akaraia mai e to Iehova nga mata katoa ra!

“Ka Tuku ana Koe i Toku nei Roi-Mata ki Roto i Taau ra Āriki”

12. Akapeea tatou i kite ei e te kite pu tikai maira a Iehova i te au tu kino ta tona au tangata e mamae ra?

¹² Kare e te kite ua maira a Iehova i tona au tavini tataki tai ra kareka katoa ra te kite pu tikai ra i te au tu kino o te mamae o te reira tangata. Ei akaraanga, te takinokinoia anga te ngati Iseraela ei au tavini ra, kua tuatua a Iehova kia Mose: “Kua akara tikai au i te mate o toku iti-tangata i Aiphiti; e kua akarongo au i to ratou aue i to ratou au akaaiteite angaanga; kua kite oki au i to ratou mamae.” (Exodo 3:7) Mei teaa ra te pumaana i te kite anga e me akakoromaki tatou i tetai timataanga, te kite  maira a Iehova e eaa te tupu nei e te akarongo maira ki ta tatou au patianga! Te kite tikai maira aia i to tatou mamae.

13. Eaa te akaari maira e te manako tikai maira a Iehova i tona au tavini?

¹³ Te manako maira a Iehova i te aronga tei tomo atu ki roto i tetai pirianga kiaia koia oki kua kiteaia mai no tona au manako no te ngati Iseraela. Noatu e kua tupu putuputu mai to ratou mamae no to ratou uaorai tu marokiakia, kua tata a Isaia no runga ia Iehova: “I to ratou katoa ra au mate kare aia i te enemi.” (Isaia 63:9) Ei tavini akarongo mou no Iehova, ka papu ia koe, i reira, e me mamae koe, te mamae ra a Iehova. Kare ainei teia e akakeu ra ia koe kia aro mataku kore atu i te tu kino e kia rave maroiroi ua atu koe i te tavini iaia ra?​—1 Petero 5:6, 7.

14. Eaa te au turanga te tupu ra te tataia anga a Salamo 56?

¹⁴ Te irinaki anga te Ariki ko Davida e te manako maira a Iehova iaia e te kite tikai maira iaia kua akapapuia mai te reira i roto ia Salamo 56, ta Davida i atu ana i tona oro ke atu anga mei te ariki kino ra ia Saula. Kua oro atu a Davida ki Gata, inara kua mataku aia e ka opuia me kiteaia mai aia e te ngati Philiseti. Kua tata aia: “E anoano apuku ua maira to toku au enemi iaku i te au rā katoa nei; e manganui tei tamaki mai iaku, ma te nengonengo.” No tona turanga kino ra, kua anga atu a Davida kia Iehova. “Te ruri ke nei ratou i taku nei tuatua i te au rā,” i karanga ai aia. “To ratou au manako iaku nei, e kino anake ïa.”​—Salamo 56:2, 5.

15. (a) Eaa ta Davida e karanga ra te pati anga aia kia Iehova kia tuku i tona au roi mata ki roto i tetai ariki me kore ki roto i tetai puka? (e) Me akakoromaki tatou i tetai turanga ngata i roto i te akarongo, eaa te papu ra ia tatou?

¹⁵ Ei reira, mei tei tataia ia Salamo 56:8, kua akakite mai a Davida i teia au tuatua umere: “Kua tatauia e koe toku nei au aerenga; ka tuku ana koe i toku nei roi-mata ki roto i taau ra āriki: kare ainei i roto i taau ra [“puka,” NW]?” Mei teaa ra te akataka anga pumaana no to Iehova manako aroa! Me tei raro ake tatou i te taitaia, penei ka kapiki atu tatou kia Iehova ma te au roi mata. Kua akapera katoa rai te tangata apa kore ra ko Iesu. (Ebera 5:7) Kua irinaki a Davida e te akara maira a Iehova iaia e te maara maira i tona mamae, mei te mea rai e te akonoia ra tona au roi mata i roto i tetai ariki me kore i te tata anga i te reira i roto i tetai puka. * Penei ake te manako ra koe e ka akaki maata toou au roi mata i taua ariki ra me kore i te au kapi e manganui o taua puka ra. Me ko te reira te tu, ka rauka ia koe te pumaana. Te akapapu maira te Pipiria kia tatou e: “Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia.”​—Salamo 34:18.

Riro Anga ei Oa Piri Vaitata no te Atua

16, 17. (a) Akapeea tatou i kite ei e te manako tikai maira a Iehova i te au manamanata ta tona au tangata e aro atura? (e) Eaa ta Iehova i rave ana i te akatika anga i te tangata ra kia rekareka i te pirianga vaitata kiaia ra?

¹⁶ Te tika anga e kua tatauia e Iehova ‘te rauru o to tatou upoko’ te oronga maira kia tatou i etai manako i te tu akara anga e te manako anga o te Atua tei akameitakiia tatou i te akamori. Noatu e ka tatari roa tatou i te ao ou taputouia e kia ngaro ke atu te mamae ravarai ra, te rave nei a Iehova i tetai mea umere no tona au tangata i teia tuatau. Kua tata mai a Davida: “Te pirianga vaitata kia Iehova tei te aronga te mataku ra iaia, pera katoa tana koreromotu, te akatupu ia ratou kia kite i te reira.”​—Salamo 25:14, NW.

¹⁷ “Te pirianga vaitata kia Iehova.” I na, i te akara anga kare taua manako ra e rauka i te au tangata apa! Inara, te pati maira a Iehova i te aronga tei mataku iaia kia riro mai ei au manuiri i roto i tona puakapa. (Salamo 15:1-5) E eaa ta Iehova ka rave no tana au manuiri? Nana i akariro ia ratou kia kite i tana koreromotu, tei tau ki ta Davida. Kua tuatua atu a Iehova kia ratou, i te akaari anga i tana “tuatua ngaro” ki te au peroveta, kia rauka oki ia ratou i te kite e eaa tona au akakoroanga e eaa ta ratou ka rave kia akono rotai i te reira.​—Amosa 3:7.

18. Akapeea tatou i kite ei e te inangaro maira a Iehova ia tatou kia akavaitata atu kiaia?

 ¹⁸ E tika tikai, e ngakau pumaana te reira i te kite anga e ka riro mai tatou tangata apa nei ei au oa piri vaitata no te Atua Tei Teitei, ko Iehova. Ko te tika, te raurau maira aia ia tatou kia rave oki i te reira. “E akavaitata atu ki te Atua, e nana e akavaitata mai kia kotou na,” i karanga ai te Pipiria. (Iakobo 4:8) Te inangaro maira a Iehova kia akavaitata atu tatou kiaia. Ko te tika, kua rave takere ana aia i te au takainga kia rauka mai taua pirianga. Na te atinga oko o Iesu i akatueraia mai i te ngutupa kia tatou nei kia rauka ia tatou tetai pirianga oa ma te Atua Mana Katoatoa. Te akakite maira te Pipiria e: “Te anoano nei tatou iaia, no te mea koia ana tei anoano mai ia tatou nei.”​—1 Ioane 4:19.

19. Akapeea te akakoromaki i te akaketaketa anga i to tatou pirianga kia Iehova?

¹⁹ Te akaketaketa ra taua pirianga me akakoromaki tatou i raro ake i te au turanga kino. Kua tata te pipi ko Iakobo e: “E tuku atu i ta te akakoromaki ra angaanga kia tika rava, kia meitaki rava kotou, ma te apa kore, auraka e ape toe.” (Iakobo 1:4) Eaa te “angaanga” te akatupuia ra no te akakoromaki anga i te turanga ngata? E akamaara i to Paulo ‘tara i roto i te kopapa.’ Eaa ta te akakoromaki anga i akatupu ki tona turanga? Kua tuatua a Paulo i teia no runga i tona au timataanga: “E teianei, e mea rekareka ïa iaku kia akatietie i toku nei paruparu, kia vai marie te maroiroi o te Mesia i runga iaku nei. E teianei e mea rekareka iaku te paruparu, te akakino, te pini, te takinga-kino, e te tumatetenga i te Mesia nei; kia paruparu oki au ra, te maroiroi ra au i reira.” (2 Korinetia 12:9, 10) To Paulo tupuanga ra koia oki kia oronga mai a Iehova i te mana te anoanoia ra​—“te mana maata meitaki” me ka anoanoia​—kia akakoromaki oki aia. Tei rauka mai, i reira, te akapiri vaitata atu anga iaia kia Karaiti e ki te Atua ko Iehova.​—2 Korinetia 4:7; Philipi 4:11-13.

20. Akapeea ra tatou i papu ei e ka turu e ka akapumaana mai a Iehova ia tatou i roto i te tu kino ra?

²⁰ Penei ake kua akatika a Iehova i toou au timataanga kia aere ua atu. Me koia ia, e akamanako ana i tana taputou ki te aronga tei mataku iaia: “Kare rava au e akaruke atu ia koe, kare oki au e taka ke ia koe.” (Ebera 13:5) Ka rauka ia koe i te kite i taua turu anga e te pumaana. Kua tatauia e Iehova “te rauru oki o to kotou na upoko.” Te kite maira aia i to akakoromaki anga. Te kite maira oki aia i toou mamae. Te manako tikai maira aia ia koe. E kare roa aia e ‘akangaro atu i taau angaanga i rave e i toou anoano i tona ingoa.’​—Ebera 6:10.

[Au Tataanga Rikiriki i Raro]

Maara Ainei ia Koe?

• Eaa te au tumu te ka akariro i tetai tangata kia manako e kua akarukenaia e te Atua?

• Eaa te apiianga ta tatou i kite mai mei te au akatutuanga a Iesu no te au manu rikiriki e te tatauia anga te au rauru o to tatou upoko?

• Eaa te aite anga e kua tukunaia te au roi mata o tetai ra i roto i te “āriki” a Iehova me kore i roto i tana “puka”?

• Akapeea tatou e rekareka ai i te “pirianga vaitata kia Iehova”?

[Au Uianga Apii]

[Tutu i te kapi 22]

Eaa ra a Iehova i kore ei i akaatea i to Paulo ‘tara i roto i te kopapa’?

[Tutu i te kapi 23]

Eaa ta tatou ka kite mai mei te akatutuanga a Iesu no te au manu rikiriki?

[Akameitakianga]

© J. Heidecker/VIREO

[Tutu i te kapi 25]

Na te tatau putuputu anga i te Pipiria, ka kite tatou i te akapapu anga e te manako maira te Atua ia tatou uaorai