Te Ngata ra Ainei ia Koe te Akaaere i Toou Manako Ngakau?

NO TE maataanga o tona oraanga, kua kite tikai a Lena i te tu ngata i te akaaere i tona uaorai au manako papu kore. “Kua riro te ainga takingakino i te au mataiti mei toku tamarikianga mai i te takino i tetai tuanga maata o toku tu akangateitei uaorai,” i tuatua ai aia. “Kua manako au e kare takiri oku puapinga.” Kua oki katoa a Simone i te akara i tona mapuanga e kua karanga, “E anga ua a roto i toku ngakau e te irinakianga e kare oku puapinga.” I te akara anga kua totoa ua te tu mataora kore oonu no taua tu manako ngakau ra i teia tuatau. Kua karanga tetai akaaerenga tauturu i te au mapu na roto i te terepaoni e ko te aronga e ringi mai ana ia ratou vaitata rai e apa te “kite putuputu ana i te au tu manako ngakau puapinga kore uaorai.”

Kia tau ki tetai aronga kite, e tupu ana te au manako ngakau tukatau kore me maroia te tangata e etai ke kia manako puapinga kore ua ia ratou uaorai. Penei ka tupu mai taua tu manako ra me karo putuputuia tetai, me maata e me pakari roa te akaapaapa, me kore me takinga kino tau koreia. Noatu eaa te tumu, ka akatupu te openga o te reira i te maroiroi kore e te kino. Kare i roa akenei kua kiteaia mai e tetai apiianga pae rapakau e kare te aronga  manako ngakau papu kore ia ratou uaorai e irinaki ana ia ratou uaorai e etai ke atu, i te takino anga kite kore ua i te au pirianga e te au akataeakeanga vaitata ua. “I tetai tu,” e karanga ra te ripoti no runga i te apiianga, “te ‘akatupu’ ra ratou i te au turanga tei mataku maata roaia atu e ratou.”

I te maata anga i te taime ko te au tangata e manako akapera ra e aronga takinoia e to ratou uaorai au “manako mirimiri-ngata” i karanga ai te Pipiria. (Salamo 94:19) Te manako ra ratou e kare ratou e meitaki roa ana. Me tarevake ua ana tetai apinga, e viviki ua ratou i te akaapa ia ratou uaorai. Noatu me akapaapaa mai etai ke ia ratou no ta ratou angaanga meitaki, kareka a roto tikai te manako ra ratou e mei te pikikaa rai e ka akaari puia mai a muri ake. I te irinaki anga e kare ratou e tau kia mataora, e manganui te topa ana ki roto i te tu takinga kino ia ratou uaorai e kare ratou e maroiroi i te akatano. Ko Lena, tei taikuia i mua ake, kua rokoia e te maki no te tamatepongi iaia no tona ngere oki i te akangateitei iaia uaorai, e kua akakite aia e, “kare e rauka ana iaku i te taui tetai ua atu apinga.”

Kua akakoroia ainei taua aronga e ngata ra i te akaaere i taua au “manako mirimiri-ngata” ra kia manako pera ua rai no te toenga o to ratou oraanga? Ka rauka ainei i te tamaki atu i taua au tu manako ngakau ra? Te akanoo maira te Pipiria i te au kaveinga e te au akoanga tau tei riro ei tauturu i te manganui kia puapingaia i roto i taua tu ngata ra. Eaa tetai papaki o taua au kaveinga ra, e akapeea te reira i te tauturu anga i te aronga e mamae ra kia kite i te rekareka i roto i te oraanga? Ka akamarama mai te atikara e aru mai nei.