Aaere ma te Akarongo, Kare ma te Kite Mata!
Aaere ma te Akarongo, Kare ma te Kite Mata!
“Te aaere nei tatou ma te akarongo, kare ma te kite mata.”—2 KORINETIA 5:7, NW.
1. Eaa te akaari maira e kua aaere te apotetoro ko Paulo ma te akarongo, kare ma te kite mata?
TE MATAITI e 55 T.N. Tetai tangata ko Saula tona ingoa i taua taime ra, e tangata takinga kino i te au Kerititiano, kua pou rai iaia tetai 20 mataiti mei tona ariki anga i te akonoanga Kerititiano. Kare roa aia i akatika i te aerenga o te tuatau kia akameangiti mai me kore kia akaapikepike i tona akarongo i roto i te Atua. Noatu kare aia i kite ana i te au mea tikai o te rangi ki tona mata kopapa, kareka ra e ngaueue kore tona akarongo. I te tata anga ki te au Kerititiano akatainuia, tei rauka te manakonakoanga i te rangi, kua karanga atura te apotetoro ko Paulo e: “Te aaere nei tatou ma te akarongo, kare ma te kite mata.”—2 Korinetia 5:7, NW.
2, 3. (a) Akapeea tatou i te akaari anga e te aaere nei tatou ma te akarongo? (e) Eaa te aiteanga e kia aaere ma te kite mata?
2 Kia aaere ma te akarongo ka umuumuia te irinakianga pu tikai i roto i to te Atua tu kite i te akatere i to tatou oraanga. Kia irinaki papu tikai tatou e kua kite aia eaa te mea puapinga roa atu no tatou. (Salamo 119:66) Ia tatou e rave ra i tetai au ikianga i roto i te oraanga e te taangaanga i te reira, ka akamanako tatou i te “au mea kare tatou e kite ana.” (Ebera 11:1, The New English Bible) Te kapiti maira teia i te “rangi ou e te enua ou” tei taputouia mai. (2 Petero 3:13) Kareka te aaere ma te kite mata, i tetai tua, ko te aiteanga ka aruaru tatou i tetai tu oraanga te akaaere anakeia ra e te au mea ta tatou e kite ra ki to tatou manako pae kopapa. E mea kino tikai teia no te mea ka arataki atu te reira ki te kopae takiri anga tatou i to te Atua anoano.—Salamo 81:12; Koheleta 11:9.
3 Noatu me no te “anana iti” tatou, ma te kapikianga i te rangi, me kore no te “mamoe ke atu,” ma te manakonakoanga i te enua nei, e mea tau kia tamou ngakau tatou tataki tai i te akoanga e kia aaere ma te akarongo, kare ma te kite mata. (Luka 12:32; Ioane 10:16) Ka akara ana tatou e akapeea te akoanga akauruia e aru mai nei i te paruru anga ia tatou kia kore e tuku ua atu ki ta te “navenave poto ua o te [“ara,” NW],” mei te puereere o te noinoi apinga materia, e mei te akangaropoina anga i te openga o teia akatereanga o te au mea nei. Ka akara matatio katoa tatou i te au kino o te aaere anga ma te kite mata.—Ebera 11:25.
Patoi Anga i ‘te Navenave Poto ua o te Ara’
4. Eaa te ikianga ta Mose i rave, e no teaa ra?
4 E akamanako ua ana i te tu oraanga ka rauka, ia Mose, e tamaiti na Amerama. Utuutuia i roto i te uanga ariki o Aiphiti i mua ana, e tikaanga to Mose kia rauka te mana akatere, te apinga nui, e te mana akakeu. Ka rauka ua ia Mose kia manako e: ‘Kua apii meitakiia au i roto i te pakari akangateiteiia o Aiphiti, e e mana maata tikai taku tuatua e te angaanga. Me akapiri vaitata ua au ki te ngutuare ariki, ka rauka iaku i te taangaanga i toku turanga kia puapingaia toku au taeake Epera e takinga kinoia ra!’ (Angaanga 7:22) Inara, kua iki a Mose kia “rave katoa i te mate i te kapiti anga i te au tangata o te Atua.” No teaa ra? Eaa tei akakeu ia Mose kia kopae i te au mea katoa ta Aiphiti e oronga maira? Te pau maira te Pipiria: “No te akarongo i akaruke ei [a Mose] ia Aiphiti, kare i mataku i te riri o te ariki ra: i maroiroi rava atura aia i te akara anga atu iaia, i tei kore e kitea kia akara ra.” (Ebera 11:24-27) Kua riro to Mose akarongo i roto i ta Iehova tutaki mou no te tuatua tika ei tauturu iaia kia patoi i te ara e te raveanga tamou e to te reira navenave poto ua.
5. Akapeea ta Mose akaraanga i te akamaroiroi anga ia tatou?
5 E aro putuputu katoa ana tatou i te anoano kia rave i tetai au ikianga ngata no runga i te au maroanga mei teia: ‘Ka tau ainei kia akaruke au i tetai au angaanga me kore i tetai au tu kare e rotai tikai ana ki te au kaveinga Pipiria? Ka tau ainei kia ariki au i te angaanga te ka rauka mai penei te au puapinga materia inara ka riro ei arai i toku tereanga ki mua i te pae vaerua?’ Te akamaroiroi maira ta Mose akaraanga ia tatou auraka kia rave i te au ikianga te akaata maira i te tu pakari kore o teianei ao; mari ra, e mea tau kia taangaanga tatou i te akarongo i roto i te pakari o “tei kore e kitea kia akara ra”—ko te Atua ko Iehova. Mei ia Mose, kia akaperepere maata roa atu tatou i to Iehova pirianga taeake i tetai ua atu apinga ta teianei ao ka oronga mai.
6, 7. (a) Akapeea a Esau i te akaari anga e kua inangaro aia i te aaere ma te kite mata? (e) Eaa te akaraanga akamatakiteanga ta tatou e kite atura i roto ia Esau?
6 E akaaite ana i te tuke i rotopu ia Mose raua ko Esau, tetai tamaiti a te pateriareka ko Isaaka. Kua inangaro a Esau i te akamerengoanga viviki ua. (Genese 25:30-34) “Kare e ariki ana i te au mea tapu ra,” kua oake atura a Esau i tona tikaanga ei tama mua ei ‘oko no te kaikaianga okotai ua nei.’ (Ebera 12:16, NW) Kare aia i oki i te akamanako eaa ta tana ikianga kia oko i tona taoonga mataiapo ka akatupu ki tona pirianga kia Iehova me kore eaa te ka tupu ki tona uanga no tana i rave. Kua ngere aia i te manakonakoanga pae vaerua. Kua topiri a Esau i tona mata ki te au taputou akaperepere maata a te Atua, te manako anga i te reira ei mea puapinga kore ua. Kua aaere aia ma te kite mata, kare ma te akarongo.
7 Te oronga maira a Esau i tetai akaraanga ei akamatakiteanga no tatou i teia tuatau. (1 Korinetia 10:11) Me aro atu tatou i te au ikianga, noatu te maata me kore te meangiti, auraka roa tatou e vare i te tuatua pikikaa a to Satani ao, tei karanga mai e e rave koe i taau e inangaro ra i teianei tikai. E mea tau kia ui kia tatou uaorai e: ‘Te kitea maira ainei te au tu paruparu mei to Esau rai i roto i te au ikianga taku e rave ra? Ka riro ainei te aruaru anga i taku e inangaro ra i teianei i te tuku i te au mea pae vaerua ki muri? Te takino ra ainei taku au ikianga i toku pirianga taeake ki te Atua e toku tutaki no te tuatau ki mua? Eaa te tu akaraanga taku e akanoo nei no etai ke?’ Me te akaata maira ta tatou au ikianga i te arikianga rekareka no te au mea tapu, ka akameitaki mai a Iehova ia tatou.—Maseli 10:22.
Kopae Anga i te Puereere o te Noinoi Apinga Materia
8. Eaa te akamatakiteanga tei rauka i te au Kerititiano i Laodikea, e no teaa te reira i tau ei no tatou?
8 I roto i te eeuanga ki te apotetoro ko Ioane vaitata atu ki te openga o te anere mataiti mua, kua tuku atu a Iesu Karaiti ko tei akakakaia i tetai karere ki te putuputuanga i Laodikea, i Asia Minora. E karere akamatakite no te noinoi apinga materia. Noatu kua apinga nuiia i te pae materia, inara kua pangikarapu te au Kerititiano i Laodikea i te pae vaerua. Kare i aaere ua atu ma te akarongo, kua akatika ra ratou i te au apinga materia kia akapoiri i to ratou manakonakoanga pae vaerua. (Apokalupo 3:14-18) Mei te reira rai te akakeuanga o te noinoi apinga materia i teia tuatau nei. Ka akaparuparu te reira i to tatou akarongo i te akakeu anga ia tatou kia akamutu i te ‘oro anga ma te tamou marie i te taemoemoanga’ no te ora. (Ebera 12:1, NW) Me kare tatou e matakite, ka riro te “au mea e navenave ei ra” i te takore i te au angaanga pae vaerua e tae ua atu ki te turanga e “pokia atura” ratou.—Luka 8:14.
9. Akapeea te tu mareka ua e te ariki rekareka no te kai pae vaerua i te paruru anga ia tatou?
9 Ko te taviri ki te paruruanga pae vaerua koia oki ko te tu mareka ua kare ra ko te taangaanga pu ua i to teianei ao e te akaapinga nui anga ia tatou uaorai i te pae materia. (1 Korinetia 7:31, NW; 1 Timoteo 6:6-8) Me aaere tatou ma te akarongo kare ma te kite mata, ka kitea ia tatou te rekareka i roto i te parataito pae vaerua i teianei. Ia tatou e kai ra i te kai pae vaerua meitaki, kare ainei tatou e akakeuia ana kia ‘imene i te rekareka ngakau ra’? (Isaia 65:13, 14) Pera katoa, te rekareka ra tatou i to tatou taokotaianga ma te aronga e akaari maira i te ua o te vaerua o te Atua. (Galatia 5:22, 23) E mea puapinga tikai kia rauka ia tatou te merengoanga e te marekaanga i roto i ta Iehova e oronga maira i te pae vaerua!
10. Eaa te au uianga te ka tau tatou kia ui kia tatou uaorai?
10 Tetai au uianga ka tau tatou kia ui kia tatou uaorai koia oki: ‘Mei teaa ra te puapinga maata o te au apinga materia i roto i toku oraanga? Te taangaanga ra ainei au i taku au apinga materia no tetai oraanga tamataoraanga me no te akatupu anga i te akamorianga mou? Eaa te apai maira i te merengoanga maata roa atu kiaku? Ko te apii Pipiria ainei e te kapitianga tau i ko i te au uipaanga Kerititiano, me ko te aere ke anga i te au openga epetoma mei te au apainga Kerititiano? Te akataka ra ainei au i tetai au openga epetoma no te tarekareka kare ra e taangaanga ana i taua taime ra no te angaanga orometua e tetai au angaanga tei piri atu ki te akamorianga?’ Ko te aiteanga i te aaere ma te akarongo koia oki kia angaanga maroiroi tatou i roto i te angaanga Patireia, ma te irinaki pu tikai i roto i ta Iehova au taputou.—1 Korinetia 15:58.
Akara Tamou ua Rai i te Openga
11. Akapeea te aaere anga ma te akarongo i te tauturu anga ia tatou kia akara tamou ua rai i te openga?
11 Ka riro te aaere ma te akarongo ei tauturu ia tatou i te patoi atu i te au manako tangata ua e e mamao te openga me kore kare te reira e tae mai. Kare i aite mei te aronga ekoko tei taitoito i te totou Pipiria, te kite nei ra tatou e te akatupu nei te au tupuanga o te ao i ta te Tuatua a te Atua i totou mai no to tatou nei tuatau. (2 Petero 3:3, 4) Ei akaraanga, kare ainei te tu e te akonoanga o te tangata ravarai e oronga maira i te akapapuanga e te noo nei tatou i roto i “te au rā openga”? (2 Timoteo 3:1-5) Te kite nei tatou ki te mata o te akarongo, e kare te au tupuanga o te ao i teianei i te tuatua enua ua e ripiti nei iaia uaorai. Mari ra, te akanoo ra te reira i “te akairo o [to Karaiti] ra parutia e te openga o te akatereanga o te au mea nei.”—Mataio 24:1-14, NW.
12. Akapeea te au tuatua a Iesu tei rekotiia i roto ia Luka 21:20, 21 i te akatupu angaia i te anere mataiti mua?
12 E akamanako ana i tetai tupuanga i te anere mataiti mua o to tatou Tuatau Noa nei tei aiteite ki to tatou tuatau. Iaia i te enua nei, kua akamatakite a Iesu i tana au pipi e: “Kia akara ra kotou ia Ierusalema i te takako angaia e te au nuku, kua vaitata rava tona pou i reira, kia kite mai kotou. Te aronga e noo i Iudea ra, ka oro ratou ki te maunga i reira; e to roto i te oire ra, ka aere ïa ki vao; e auraka to te au ngai katoa ra e tomo akaou ki roto i te oire.” (Luka 21:20, 21) No te akatupuanga o teia totou, kua takakoia a Ierusalema e te nuku vaeau o Roma i raro ake i te aratakianga a Cestius Gallus i te 66 T.N. Inara kua akaruke poitirere ua te au nuku, i te oronga anga i te akairo e i te tuatau no te au Kerititiano i reira ‘kia oro ki te maunga.’ I te 70 T.N., kua oki akaou mai te au nuku o Roma, kua tamaki atu i te oire o Ierusalema e kua takore atu i tona iero. Kua ripoti mai a Josephus e kua tere atu i te mirioni ngati Iuda tei mate, e e 97,000 tei apainaia ei tuikaa. Kua raveia te akavaanga tu-Atua ki rungao i te akatereanga o te au mea nei o te ngati Iuda. Te aronga tei aaere ma te akarongo e kua akarongo ki te akamatakiteanga a Iesu kua ora atu i te tumatetenga.
13, 14. (a) Eaa ra te au tupuanga e vai maira i mua? (e) No teaa tatou ka vai matakite ua ai ki te akatupuanga o te totou Pipiria?
13 Te vaitata nei rai tetai apinga mei te reira i te tupu i to tatou nei tuatau. Ka o mai tetai au tuanga o roto i te Taokotaianga Enua ki te raveanga o te akavaanga tu-Atua. Mei te au nuku rai o Roma i te anere mataiti mua i akakoroia ei akamou i te Pax Romana (Au o Roma), kua akakoroia rai te Taokotaianga Enua o teia tuatau kia riro ei apinga akatupu i te au. Noatu kua tauta te au nuku o Roma i te akapapu i te turanga meitaki ua i roto i te ao tei kiteaia i te reira tuatau, kua riro mai ko ratou tikai tei akapou ia Ierusalema. Pera katoa i teia tuatau, te akakite maira te totou Pipiria e ka manako te au mana vaeau i roto i te Taokotaianga Enua i te akonoanga ei tuanga tamanamanata e ka takore i te Ierusalema o teia tuatau—ia Kerititome—e pera katoa te toenga o Babulonia Maata. (Apokalupo 17:12-17) Ae, te vaitata roa mai nei te akapouanga o te patireia akonoanga pikikaa katoa.
14 Ka riro te akapouanga o te akonoanga pikikaa ei akairo no te akamataanga o te mate maata. I roto te tuanga openga o te mate maata, ka akapouia te au tuanga toe o te akatereanga o te au mea nei. (Mataio 24:29, 30, NW; Apokalupo 16:14, 16) Ka riro te aaere ma te akarongo ei akamatakite ia tatou no runga i te akatupuanga o te totou Pipiria. Kare tatou e vare i te manako atu e ko tetai rima rave tangata mei te Taokotaianga Enua ta te Atua ravenga no te apai mai i te au e te tinamou. No reira, kare ainei e tau kia akaari mai to tatou tu oraanga i to tatou irinakianga e “kua vaitata te rā maata o Iehova”?—Zephania 1:14.
Te Aaere ma te Kite Mata—Mei Teaa Tikai te Kino?
15. Noatu kua kite ana ratou i ta te Atua au akameitakianga, eaa ra te puereere tei topa atu te iti tangata Iseraela ki roto?
15 Te akatutu maira te au tupuanga kia Iseraela i taito i te kino o te akatika i te aaere anga ma te kite mata kia akaparuparu i to tatou akarongo. Noatu te kite anga i te au mate ngauru tei taakama i te au atua pikikaa o Aiphiti e i te kite anga i te akaoraanga umere roa na roto i te Tai Muramura, kua maani te ngati Iseraela ma te akarongo kore i tetai punua puakatoro auro e kua akamori atura i te reira. Kua rokoia ratou e te mareka kore e kua akaroiroi i te tiaki anga ia Mose, ko tei ‘tavare, e kare rai i aere mai ki raro mei runga mai i taua maunga ra.’ (Exodo 32:1-4) Kua akakeuia ratou e to ratou tu akakoromaki kore kia akamori i tetai itoro e kitea atura e te mata natura. Kua riro ta ratou aaere anga ma te kite mata ei akariri ia Iehova e kua arataki atu ki te tamateangaia o “taua au tangata ra e toru katoa paa tausani.” (Exodo 32:25-29) E mea tangi tikai no tetai tangata akamori ia Iehova i teia tuatau kia maani i te au ikianga e akaari maira i te tu irinaki kore i roto ia Iehova e te ngere i te manako papu tikai i roto i tona tu kite i te akatupu i tana au taputou!
16. Akapeea ra te ngati Iseraela i te tamanamanata angaia e te akaraanga o vao ua?
16 Kua tamanamanata te akaraanga o vao ua i te ngati Iseraela na roto i tetai au mataara tau kore. Kua riro te aaere ma te kite mata ei akarutetetete ia ratou i te mataku i to ratou au enemi. (Numero 13:28, 32; Deuteronomi 1:28) Kua akakeu te reira ia ratou kia akaao atu i te mana orongaia mai e te Atua kia Mose e te akaapa atu no runga i te tu o to ratou oraanga. Kua arataki atu teia tu ngere i te akarongo ki to ratou inangaro maata atu anga ia Aiphiti tei akatereia e te temoni ki te Enua Taputouia. (Numero 14:1-4; Salamo 106:24) Mei teaa ra to Iehova mamae iaia e kite ra i te tu akangateitei kore maata ta tona iti tangata e akaari ra no to ratou Ariki kitea koreia!
17. Eaa tei akakeu i te ngati Iseraela kia kopae i te aratakianga a Iehova i to Samuela tuatau?
17 I te tuatau o te peroveta ko Samuela, kua mou akaou te iti tangata akaperepereia o Iseraela ki roto i te puereere o te aaere anga ma te kite mata. Kua akamata te tangata i te inangaro i tetai ariki te ka kite atu ratou. Noatu kua akaari mai a Iehova e koia to ratou Ariki, kare teia i rava ua i te akakeu ia ratou kia aaere ma te akarongo. (1 Samuela 8:4-9) Ki to ratou uaorai kino, kua kopae neneva ua atu ratou i te aratakianga apa kore a Iehova, i te inangaro anga kia riro mei te au iti tangata takapini aere.—1 Samuela 8:19, 20.
18. Eaa te au apiianga ka kitea mai ia tatou no runga i te au kino o te aaere anga ma te kite mata?
18 Ei au tavini no Iehova i teia tuatau, te akaperepere nei tatou i to tatou pirianga meitaki ma te Atua. Te inangaro nei tatou i te apii e te taangaanga i roto i to tatou oraanga i te au apiianga mei te au tupuanga i topa ki muri. (Roma 15:4) I te aaere anga te ngati Iseraela ma te kite mata, kua ngaropoina ia ratou e ko te Atua te akatere ra ia ratou na roto ia Mose. Me kare tatou e matakite, ka ngaropoina katoa ia tatou e ko te Atua ko Iehova e te Mose Maata atu, ko Iesu Karaiti, te akatere nei i te putuputuanga Kerititiano i teia tuatau. (Apokalupo 1:12-16) Kia matakite tatou auraka kia ariki i te manako tangata no te tuanga o to Iehova akaaerenga i te enua nei. Me akapera tatou ka arataki atu te reira ki te tu akaapaapa e te ngere i te arikianga rekareka no to Iehova au komono e pera katoa no te kai pae vaerua e oronga maira “te tavini akono meitaki e te pakari.”—Mataio 24:45, NW.
Kia Papu i te Aaere ma te Akarongo
19, 20. Eaa ta tatou i akapapu i te rave, e no teaa ra?
19 “E kukumianga ta tatou,” e tuatua maira te Pipiria, “kare ki te toto e te kiko ra, mari ra ki te au kavamani, ki te au tutara o teianei ao o teia poiri, ki te au vaerua ririnui kino i te au ngai o te rangi.” (Ephesia 6:12, NW) Ko te Tiaporo ko Satani to tatou enemi maata. Tona akakoroanga koia oki kia takore i to tatou akarongo i roto ia Iehova. Kare aia e kopae i tetai ua atu tu akanauruanga penei te ka akaturori ia tatou mei ta tatou ikianga kia tavini i te Atua. (1 Petero 5:8) Eaa ra te ka paruru ia tatou mei te akaraanga ua o vao no ta Satani akatereanga? Na te aaere ma te akarongo, kare ma te kite mata! Na te irinaki e te manako papu tikai i roto i ta Iehova au taputou e paruru ia tatou auraka kia tupu te ‘kino ki to tatou akarongo.’ (1 Timoteo 1:19) E mea tau rai, i reira, kia akakoro tikai tatou i te aaere ma te akarongo, ma te manako papu tikai i roto i ta Iehova akameitakianga. E kia pure tamou atu rai tatou e penei kia ora atu tatou i teianei au mea katoa e vaitata mai nei i te tupu i te tuatau ki mua.—Luka 21:36.
20 Ia tatou e aaere ra ma te akarongo, kare ma te kite mata, e akaraanga meitaki tikai to tatou. “I mate katoa oki te Mesia uaorai no kotou,” e akakite maira te Pipiria, “e kua vaoo oki i te akaraanga na kotou, kia aru kotou i tona takainga vaevae.” (1 Petero 2:21) Ka uriuri te atikara e aru mai nei e akapeea tatou me aaere mei tana rai i aaere ei.
Maara Ainei ia Koe?
• Eaa taau i mou mai mei te akaraanga a Mose raua ko Esau no runga i te aaere anga ma te akarongo, kare ma te kite mata?
• Eaa ra te taviri ki te kopae anga atu i te noinoi apinga materia?
• Akapeea te aaere anga ma te akarongo i te tauturu anga ia tatou kia kopae i te manako e e mamao te openga?
• No teaa te aaere anga ma te kite mata i riro ei ei mea kino?
[Au Uianga Apii]
[Tutu i te kapi 17]
Kua aaere a Mose ma te akarongo
[Tutu i te kapi 18]
Te tapu putuputu ra ainei te tarekareka ia koe mei te au angaanga teokaratiki?
[Tutu i te kapi 20]
Akapeea ra te akarongo marie anga ki te Tuatua a te Atua i te paruru anga ia koe?