Au Uianga a te Aronga Tatau

Ka akatukeia ainei to tetai pirianga kia Iehova i te kangakanga anga i te au mea kangakanga komupiuta kino ra?

“Te timata mairā Iehova i te tangata tuatua-tika: kareka te tangata kino,” ta te Ariki ko Davida o Iseraela taito i tata mai, “e tei inangaro i te takinga-kino, kua riri roa tona ngakau iaia.” (Salamo 11:5) Te aite anga i te tuatua o te reo mua no te “riri” ra “tei riro mai ei enemi.” No reira, ko tetai ua atu tangata te inangaro ra i te kino te akariro ra iaia uaorai ei enemi no te Atua. No reira, te uianga ta tatou e inangaro ra i te akamanako, koia oki: Ka akatupu ainei te kangakanga anga i tetai au mea kangakanga komupiuta i tetai inangaro anga te kino ra?

Te akangateitei ra te au mea kangakanga komupiuta kino i te taangaanga anga i te au apinga tamaki. E tereni putuputu ana te reira i te tangata te kangakanga ra i te apinga kangakanga i roto i te tu tamaki anga. Kua akakite mai te makatini The Economist e: “Te irinaki maata nei te vaeau o Marike ki runga i te au mea kangakanga komupiuta ei au apinga tereni anga. Ko etai au mea kangakanga ta te vaeau e taangaanga ra ko te au apinga ou no roto mai i te toa.”

E tika, ko te aronga te kangakanga ra i te au mea kangakanga komupiuta kino ra kare e takino ra i te tangata tikai. Inara eaa ra ta teia iki anga no te tarekareka e akakite maira te ka tupu mai ki roto i to ratou au ngakau? (Mataio 5:21, 22; Luka 6:45) Eaa i reira taau ka taopenga no runga i tetai tangata tei rekareka i te koputa anga, te pupui anga, te tipu anga, e te ta anga i te tangata mea manako ua? Akapeea ra me te akapou ra teia tangata nei i te au ora e manganui i te au epetoma ravarai i te akamerengo anga i taua au anoano kino ra, vaitata rai e te inangaro maata ra i taua au apinga kangakanga? I tetai ua atu tu, ka taopenga ra koe e te akatupu ra aia i tetai inangaro no te kino, mei tetai tangata rai tei akarakara ana i te ainga viivii te tatanu ra i te au anoano tau kore.​—Mataio 5:27-29.

Mei teaa ra te pakari o to Iehova riri no tetai tangata tei inangaro i te kino? Kua tuatua a Davida e “kua riri roa” a Iehova iaia. I to Noa tuatau, kua akaari mai a Iehova i te pakari tikai o tona riri no te aronga tei inangaro i te kino. Kua karanga atura a Iehova kia Noa: “Kua vaitata roa te openga o te tangata katoatoa ra iaku; kua ki oki te enua i te takinga-kino ia ratou; e i na, ka akapou au ia ratou e te enua katoa nei.” (Genese 6:13) Kua takore te Atua mou i tetai ao katoa o te tangata nei no to ratou au tu kino. Kua akaora mai ra aia ia Noa anake ua e tona ngutuare tangata​—toko varu tangata kare i inangaro ana i te kino.​—2 Petero 2:5.

Te au tangata te inangaro ra kia riro mai ei au oa no Iehova ka “tupaki oki ratou i ta ratou au koke ei auri arote, e ta ratou au korare ra, ei tipi tope ïa.” Kare oki e apiiia kia inangaro i te kino, kare ratou e “apii akaou i te tamaki.” (Isaia 2:4) Kia vai rai ei oa no te Atua kare ei enemi nona ra, e mea tau no tatou kia “kopae i te kino, e rave i te meitaki.” Te anoanoia ra tatou kia “kimi i te au, e aruaru atu.”​—1 Petero 3:11.

Akapeea ra me kua piri takere ana tatou ki te kangakanga anga i te au mea kangakanga vitio kino ra? Te anoanoia ra i reira tatou kia akapapu ngaueue kore i te akamareka ia Iehova na te akaatea mai anga mei te ravenga tana e riri ra. Te papu ra e kia pure tatou no te tauturu a te vaerua tapu o te Atua kia akaope i teia ravenga kino i te pae vaerua. Ka rauka ia tatou i te akamutu me akatika tatou i taua au tu mei te au, te meitaki, e te akatere-uaorai kia taangaanga i tetai akakeu anga tu akono tau i te Atua i roto i to tatou oraanga.​—Luka 11:13; Galatia 5:22, 23, NW.