Kia Aaere Marie Mei ta Iesu Karaiti Rai i Aaere Ei

“Ko tei karanga e te vai rotai ra aia [ma te Atua] e tau katoa ia aia uaorai kia aaere marie mei [ta Iesu] rai i aaere ei.”​—1 IOANE 2:6, NW.

1, 2. Eaa te ka o mai ki roto i te akara tikai anga kia Iesu?

“E ORO tatou ma te tamou marie i te taemoemoanga tei tukuia maira ki mua ia tatou nei,” i tata ai te apotetoro ko Paulo, “ia tatou e akara tikai ra ki te Rima Rave Maata e te Akaoti i to tatou akarongo, ko Iesu.” (Ebera 12:1, 2, NW) Te aru anga i te arataa o te tu akarongo mou ka anoanoia kia akara tamou tatou kia Iesu Karaiti.

² Te reo mua no te tuatua “akara tikai ra,” mei tei taangaangaia i roto i te au Tuatua Tapu Ereni Kerititiano, ko te aiteanga “kia akaaere i to tetai manako ma te kore e tamanamanata” “kia akara ke mei tetai apinga okotai kia rauka ai i te kite atu i tetai mai,” “kia akara tamou ki runga.” Te akakite ra tetai tataanga: “I te atianga ka apai ke te tangata oro Ereni i roto i te ngai tarekarekaanga i tona manako mei te ngai taemoemoanga e te re tana e akakoro ra, e ka uri atu ei i te reira ki runga i te urupu e matakitaki maira, ka marie tona viviki. Ko te reira katoa te ka tupu ki te Kerititiano.” Ka riro te au tamanamanataanga ei arai i to tatou tereanga ki mua i te pae vaerua. E akara tikai tatou kia Iesu Karaiti. E eaa ta tatou e akara ra i roto i te Rima Rave Maata? Te tuatua Ereni no te “rima rave maata” ko te aiteanga e “arataki maata, tetai te rave ra i te aratakianga i roto i tetai ua atu apinga e te akanoo i te akaraanga.” I te akara tikai anga kia Iesu ka anoanoia te aru i tana akaraanga.

3, 4. (a) I te aaere anga mei ta Iesu Karaiti rai i aaere ei eaa te ka umuumuia mei ia tatou? (e) Eaa te au uianga ka tau tatou kia akamanako?

³ “Ko tei karanga e te vai rotai ra aia [ma te Atua] e tau katoa ia aia uaorai kia aaere marie mei [ta Iesu] rai i aaere ei,” e akakite ra te Pipiria. (1 Ioane 2:6, NW) Kia vai rotai rai tatou ma te Atua na te akono anga i ta Iesu au akauenga mei iaia i akono i ta tona Metua ra.​—Ioane 15:10.

⁴ No reira, ko te aaere mei ta Iesu rai i aaere ei te umuumuia maira kia akara vaitata tatou iaia ei Arataki Maata e kia aru vaitata tatou i tona au takainga vaevae. Ko te au uianga puapinga kia akamanakoia i roto i teia tu nei koia oki: Akapeea ra a Karaiti i te arataki anga ia tatou i teia tuatau? Akapeea ra te aru anga i te tu o tana aaere anga i te akakeu anga ia tatou? Eaa ra te au puapinga o te tamou anga ki te akaraanga ta Iesu Karaiti i akanoo ei?

Akapeea a Karaiti i te Arataki Anga i Tana Au Pipi

5. I mua ake i tona aere anga ki te rangi, eaa ta Iesu taputou i maani ei ki tana au pipi?

⁵ I mua ake ka aere ei ki te rangi, kua mama atu a Iesu Karaiti tei akatu akaouia mai ki tana au pipi e kua tuku atu i tetai angaanga puapinga na ratou. Kua akakite aia: “E teianei, ka aere kotou, e akariro i to  te pa enua katoa ei pipi.” I taua atianga ra kua taputou katoa te Arataki Maata e ka vaitata ua rai aia ia ratou ia ratou e akatupu ra i teia tukuanga angaanga, i te na ko anga e: “I na, tei vaitata ua ra au ia kotou, e tae ua atu ki te openga o [“te akatereanga o te au mea nei,” NW].” (Mataio 28:19, 20) Akapeea ra a Iesu Karaiti i te vaitata ua anga ki tana au pipi i teia tuatau openga o te akatereanga o te au mea nei?

6, 7. Akapeea ra a Iesu i te arataki anga ia tatou na te taangaanga anga i te vaerua tapu?

⁶ “Na te akapumaana ra, na te vaerua tapu, ko ta te Metua e tono mai ma toku ingoa,” i akakite ei a Iesu, “nana e apii mai ia kotou i te au mea katoa, ka akakite akaou mai oki kia kotou i te au tuatua katoa, taku i karanga atu kia kotou na.” (Ioane 14:26) Na te vaerua tapu, tei tonokia mai i roto i te ingoa o Iesu, e arataki e e akamaroiroi ia tatou i teia tuatau. Te apii maira te reira ia tatou i te pae vaerua e te tauturu ia tatou kia marama i te “au mea oonu rai o te Atua ra.” (1 Korinetia 2:10) Pera katoa, te au tu akono i te atua no “te aroa, te rekareka, te au, te akakoromakianga roa, te takinga meitaki, te meitaki, te akarongo, te maru, te akatere-uaorai” e au “ua o te vaerua.” (Galatia 5:22, 23, NW) Ka rauka ia tatou i te tatanu i teia au tu nei, ma te tauturu a te vaerua tapu.

⁷ Ia tatou e apii ra i te au Tuatua Tapu e te tauta kia taangaanga i ta tatou e apii ra, ka tauturu mai te vaerua o Iehova kia maata to tatou kite pakari, te kite karape, te marama, te kite, te akavaanga tau, e te tu kite manako. (Maseli 2:1-11, NW) Ka tauturu katoa mai te vaerua tapu ia tatou kia akakoromaki i te au timataanga e te au manamanata. (1 Korinetia 10:13; 2 Korinetia 4:7; Philipi 4:13, NW) Te akoia maira te au Kerititiano kia ‘tamā ia ratou uaorai i te au viivii katoa o te kopapa e te vaerua, ma te akaope marie i te akonoanga tapu i te mataku anga atu i te Atua.’ (2 Korinetia 7:1) Ka rauka ainei ia tatou te akono tikai i ta te Atua au umuumuanga no te tu tapu, me kore te tu ma, ma te kore te tauturu a te vaerua tapu? Tetai o te au ravenga e taangaanga ana a Iesu ei arataki ia tatou i teia tuatau koia oki ko te vaerua tapu, ta te Atua ko Iehova i akamana i tana Tamaiti kia taangaanga.​—Mataio 28:18.

8, 9. Akapeea a Karaiti i te taangaanga anga i te “tavini akono meitaki e te pakari” ei oronga i te aratakianga?

⁸ E akamanako ana i tetai mataara ke mai e arataki ana a Karaiti i te putuputuanga i teia tuatau. I te tuatua anga no runga i tona parutia e te openga o te akatereanga o te au mea nei, kua tuatua a Iesu: “Koai tikai te tavini akono meitaki e te pakari tei akamanaia e tona pu ei akono i tona ngutuare tangata, i te oronga i ta ratou kai i te tuatau tau? E ao to taua tavini e pera ra i te taeanga mai o tona pu. Tika tikai taku e tuatua atu kia kotou na, e akamana Aia iaia ki rungao i tana au apinga katoa.”​—Mataio 24:3, 45-47, NW.

⁹ Ko Iesu Karaiti te “pu.” Ko te pupu Kerititiano akatainuia i te enua nei te “tavini.” Kua orongaia na teia pupu tavini e akono i ta Iesu au apinga i te enua nei e te oronga anga i te kai i te tuatau tau. To roto i te Pupu Akaaere, ko tetai pupu akaaere tau meangiti ua mei roto mai i te pupu katoa o te “tavini akono meitaki e te pakari,” te tavini ra ei komono no te pupu tavini. Ko ratou te akaaere ra i te angaanga tutu aere i te Patireia i te ao katoa e te tua aere i te kai pae vaerua i te tuatau tau. Te arataki ra i reira a Karaiti i te putuputuanga na roto i te “tavini akono meitaki e te pakari” tei akatainuia ma tona Pupu Akaaere.

10. Mei teaa ra to tatou tu ki te aronga pakari, e no teaa ra?

¹⁰ Tetai akakiteanga ke mai o ta Karaiti aratakianga koia oki ko te “au apinga oronga ua i roto i te tangata nei”​—te aronga pakari Kerititiano me kore te au akaaere. Kua orongaia mai ratou no “te akatikatikaanga i te aronga tapu ra, no te angaanga orometua, no te akamatutu anga i te kopapa o Karaiti.” (Ephesia 4:8, 11, 12, NW) No runga ia ratou, te akakite ra a Ebera 13:7: “E akamanako i to kotou au arataki, ko tei tuatua mai kia kotou i te tuatua a te Atua: e aru atu i to ratou akarongo, ma te manako i te openga o ta ratou tuatua.” Na te aronga pakari e apai ra i te aratakianga i roto i te putuputuanga. I te mea te aru ra ratou ia Iesu Karaiti, kua riro to ratou akarongo ei mea tau kia aru. (1 Korinetia 11:1) Kia akaari tatou i ta tatou akameitakianga no te akanoonooanga o te aronga pakari na te  akarongo anga e te kauraro anga ki teia “au apinga oronga ua i roto i te tangata nei.”​—Ebera 13:17.

11. Na teea au mataara ra e arataki nei a Karaiti i tana au pipi i teia tuatau, e eaa te o maira ki roto i te aaere anga mei iaia rai?

¹¹ Ae, te arataki nei a Iesu Karaiti i tana au pipi i teia tuatau na roto i te vaerua tapu, i “te tavini akono meitaki e te pakari,” e te aronga pakari o te putuputuanga. Ta tatou aaere anga mei ta Iesu rai i aaere ei ka o mai te marama anga i tana mataara no te arataki anga e te kauraro anga ki te reira. Te umuumu katoaia maira tatou kia aru i te tu o tana aaere anga. “I kapikiiaʼi oki kotou,” i tata ai te apotetoro ko Petero, “i mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae.” (1 Petero 2:21) Na teea mataara te aru anga i ta Iesu akaraanga apa kore i te akakeu anga ia tatou?

Ei Tu Tau i te Taangaanga Anga i te Mana

12. Eaa te tuanga o ta Karaiti akaraanga ka tau tikai te aronga pakari i roto i te putuputuanga kia akamanako?

¹² Noatu kua rauka ia Iesu te mana akaaite koreia mei tona Metua, e tu tau ra tona i te taangaanga anga i te reira. Ka tau te katoatoa i roto i te putuputuanga​—te au akaaere tikai​—kia kiteaia to ratou “tu tau i te au tangata ravarai.” (Philipi 4:5, NW; 1 Timoteo 3:2, 3) I te mea e tuanga mana rai to tetai aronga pakari i roto i te putuputuanga, e mea puapinga kia aru ratou i to Karaiti takainga tapuae i te taangaanga anga i te reira.

13, 14. Na roto i teea mataara te aronga pakari me aru ia Karaiti ia ratou e akamaroiroi ra i etai ke kia tavini i te Atua?

¹³ E akamanako ua ana a Iesu i te au kotinga o tana au pipi. Kare roa aia e umuumu maata atu ana mei ia ratou i te ka rauka ia ratou kia oronga. (Ioane 16:12) Kare e maro ia ratou, kua akamaroiroi ra a Iesu i tana au pipi kia ‘uapou ua atu ia ratou uaorai’ i te rave anga i to te Atua anoano. (Luka 13:24) Kua rave aia i teia na te arataki anga e te akakeu anga i to ratou ngakau. Mei te reira rai, kare te aronga pakari Kerititiano i teia tuatau e tamataku ana i etai ke kia tavini i te Atua na roto i te taakama me kore i te apa. Mari ra, e akamaroiroi ana ratou ia ratou kia tavini ia Iehova no te aroa iaia e no Iesu, e pera katoa no to ratou tangata tupu.​—Mataio 22:37-39.

¹⁴ Kare roa a Iesu i taangaanga tarevake ana i te mana tei orongaia mai kiaia na te akatere anga i te oraanga o te tangata. Kare katoa aia i akanoo ana i tetai au turanga taea koreia e kare katoa i akanoo ana i te au ture tumatatini. Ko tana ravenga koia oki ko te akakeu i to ratou ngakau ki te au kaveinga turuturu i te au ture tei orongaia mai na roto ia Mose. (Mataio 5:27, 28) I te aru anga ia Iesu Karaiti, e kopae ana te aronga pakari i te maani anga i te au ture puapinga kore ua me kore i te maro atu i to ratou uaorai au manako. Te au mea no runga i te kakau e te akamaneaanga me kore i te tarekareka e te tamataora, e tauta ana te aronga pakari kia taeria te ngakau na te taangaanga anga i te au kaveinga akono i te Atua, mei tei akakiteia mai i roto ia Mika 6:8; 1 Korinetia 10:31-33; e 1 Timoteo 2:9, 10.

Kia Aroa e kia Akakore Atu

15. Akapeea a Iesu i te ariu anga atu ki te au tu apikepike o tana au pipi?

¹⁵ Kua akaruke mai a Karaiti i te akaraanga kia aru tatou na roto i te mataara i akono ei aia i te au tu apikepike e te au tarevake o tana au pipi. E akamanako ana i e rua tupuanga mei te po openga mai iaia i te enua nei ei tangata. I muri ake i te tae anga atu ki Getesemane, rave iora Iesu kua “arataki katoa atura aia ia Petero, ia Iakobo, e ia Ioane” e kua akakite atura kia ratou “e ara.” I reira, “aere atura aia ki mua itio, tipapa iora ki raro i te one, pure iora.” I te oki anga mai, kua kite aia e “te moe ra ratou.” I akapeea atura a  Iesu? Kua tuatua atu aia e: “Kua tika oki i te vaerua, te parukaua nei ra te kopapa.” (Mareko 14:32-38) Kare i karo riri atu ia Petero, Iakobo, e Ioane, kua akaari ra aia i te tu aroa! I taua po rai, kua uuna a Petero ia Iesu e toru taime. (Mareko 14:66-72) Akapeea ra a Iesu i te akono anga ia Petero i muringao? “Kua ora tikai rai te Atu, e kua akakite mai kia Simona [Petero].” (Luka 24:34) “E mama atura aia kia Kepha,” e karanga ra te Pipiria, “e oti ki te ngauru ma rua.” (1 Korinetia 15:5, NW) Kare i manako akariri, kua akakore ra a Iesu i te ara a te apotetoro tei tataraara e kua akamaroiroi atu iaia. I muringao ra, kua oronga a Iesu i tetai au apainga maata na Petero.​—Angaanga 2:14; 8:14-17; 10:44, 45.

16. Akapeea tatou me aaere mei ta Iesu rai i aaere ei me akataitaia mai to tatou au taeake akarongo ia tatou me kore me rave tau kore mai ia tatou na tetai au mataara?

¹⁶ Me akataitaia mai to tatou au taeake akarongo ia tatou me kore me rave tau kore mai ia tatou no te tu apa ua o te tangata nei, kare katoa ainei tatou e tau kia aroa e kia akakore atu mei ia Iesu rai? Kua akamaroiroi a Petero i tona au taeake akarongo e: “Ei ngakau tai to kotou ravarai, i te aroa katoa anga, ei aroa taeake ra, ei ngakau maru, ei ngakau taunga. Auraka e tutaki atu te kino i te kino, e te akakino i te akakino: ei mea ke ra, ei akameitaki ta kotou; kua kitea oki e, ko te mea ïa i karangaiaʼi kotou, kia rauka ia kotou te meitaki.” (1 Petero 3:8, 9) Akapeea me kare tetai tangata e akono mai ia tatou mei ta Iesu rai, e kare e inangaro i te aroa mai me kore i te akakore mai i te ara? Noatu rai e apainga ta tatou kia tauta atu rai i te aru ia Iesu e te ariu atu mei iaia rai.​—1 Ioane 3:16.

Tuku i te Au Mea o te Patireia na Mua

17. Eaa te akaari maira e kua tuku a Iesu i te rave anga i to te Atua anoano ki te ngai mua i roto i tona oraanga?

¹⁷ Na roto katoa i tetai mataara ke mai, ka anoanoia tatou kia aaere mei ta Iesu Karaiti rai i aaere ei. Ko te akakite anga i te tuatua meitaki o to te Atua Patireia tei apai i te ngai puapinga maata roa atu i roto i to Iesu oraanga. I muri ake i te tutu anga ki te vaine Samaria vaitata mai ki te oire ko Sikara i Samaria, kua akakite a Iesu ki tana au pipi: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” (Ioane 4:34) Kua riro te rave anga i te anoano o tona Metua ei tauturu ia Iesu; ei akamatutu, ei akamerengo, e ei akaoraora iaia mei te kai rai. Ka riro ainei te aru anga ia Iesu na te rave tamou anga i to te Atua anoano i te arataki atu ki tetai oraanga meangiti ua te puapinga e te merengoanga?

18. Eaa te au akameitakianga tei tupu mai mei te akamaroiroi anga i te tamariki kia rave i te angaanga tavinianga?

¹⁸ Me akamaroiroi te au metua i ta ratou tamariki kia piri ki te angaanga tavinianga tamou, e manganui ua atu te au akameitakianga ka rauka mai ia ratou e ta ratou tamariki. Kua akamaroiroi te metua tane o tetai nga tamaiti maanga ia raua mei te tamarikianga mai kia akariro i te angaanga painia ei akakoroanga no raua. I te oti anga ta raua apiianga noa ua nei, kua riro mai rai nga maanga ei nga painia. I te akamanako anga no runga i te rekareka tana i kite no tei tupu, kua tata teia metua tane: “Kare ta maua nga tamaroa i akataitaia ana ia maua. Ka rauka tikai ia maua kia karanga ma te akameitaki e, ‘te tamariki ra, e tuanga ïa no ko ia Iehova ra.’” (Salamo 127:3) E akapeea te tamariki i te puapinga angaia mei te angaanga tavinianga? Kua karanga tetai metua vaine e rima ana tamariki e: “Kua tauturu te painiaanga i taku tamariki pouroa kia akatupu i tetai pirianga vaitata kia Iehova, kua akameitaki atu i to ratou au tu no te apii, kua tauturu ia ratou kia kite e akapeea te taporoporo marie anga i to ratou taime, e kua tauturu ia ratou kia tuku i te au apinga pae vaerua na mua i roto i to ratou oraanga. Noatu kua anoanoia ratou katoatoa kia rave i tetai au akatikatikaanga, kare okotai ia  ratou i tataraapa ana no te arataa ta ratou i iki kia aru.”

19. Eaa te au parani no te tuatau ki mua te ka tau te au mapu kia akamanako marie?

¹⁹ E te au mapu, eaa ta kotou au parani no te tuatau ki mua? Te kimi ra ainei koe kia meitaki roa atu i roto i tetai au ngai angaanga? Me te angaanga ra koe kia rauka tetai ngai angaanga i roto i te angaanga tavinianga? “Kia matakite i to kotou aerenga, eiaa mei ta te kite kore, mei ta te aronga pakari ra,” i ako mai ei a Paulo, “ma te taporoporo marie i te tuatau, no te mea e tuatau kino teia.” Kua kapiti mai aia e: “E auraka kotou ei manako kore, kia kite ra kotou i to te Atu ra anoano.”​—Ephesia 5:15-17.

Kia Tiratiratu

20, 21. Na roto i teea mataara i tiratiratu ei a Iesu, e akapeea tatou me aru i tona tu tiratiratu?

²⁰ Ko te aaere mei ta Iesu rai i aaere ei ka anoanoia te aru i tona tu tiratiratu. No runga i to Iesu tu tiratiratu, te akakite ra te Pipiria: “Ko te tu ïa aia no te Atua, e kare aia i manako e, e apinga āru kia aite katoa aia i te Atua ra, Kua tuku ke atura ra aia i tona uaorai tu, e kua rave i to te tavini, i te riro anga mai mei te tangata nei te tu: E koia i kitea mei te tangata nei te tu, kua taakaaka iaia uaorai i te akonoanga e tae ua atu ki te mate, ki te mate [“i runga i te rakau tamamae anga,” NW].” Kua mou tiratiratu a Iesu i to Iehova tu ngateitei na te kauraro anga ki to te Atua anoano nona. Kua akono aia e tae ua atu ki te mate i runga i te rakau tamamae anga. Kia ‘okotai o tatou tu ngakau’ e kia kauraro ma te tiratiratu i te rave anga i to te Atua anoano.​—Philipi 2:5-8.

²¹ Kua akaari katoa a Iesu i te tu tiratiratu ki tana au apotetoro akarongo mou. Noatu to ratou au tu paruparu e te apa ua, kua aroa atu rai a Iesu ia ratou e tae ua atu “ki te openga ra.” (Ioane 13:1) Kia pera katoa tatou, auraka e akatika i te au tu apa ua o to tatou au taeake kia akanauru ia tatou kia akatupu i te tu akaapaapa.

Akono i te Akaraanga ta Iesu i Akanoo

22, 23. Eaa ua ai te au puapinga no te akono anga i te akaraanga ta Iesu i akanoo?

²² E tika oki e, ei au tangata apa ua, kare e rauka ia tatou kia aaere tikai i roto i te au takainga tapuae o to tatou Akaraanga apa kore. Inara, ka rauka ia tatou kia tauta i te aru vaitata i tona au takainga. I te rave anga i te reira ka anoanoia tatou kia marama e kia kauraro ki ta Karaiti mataara e arataki ra e kia tamou ki te akaraanga tana i akanoo.

²³ Ka arataki te riro anga ei aronga aru ia Karaiti ki te au akameitakianga e manganui. Ka puapinga e ka merengo maata roa atu to tatou oraanga no te mea te rave tamou ra tatou i to te Atua anoano kare i to tatou uaorai. (Ioane 5:30; 6:38) E akava ngakau meitaki oki to tatou. Ka riro ta tatou mataara e aaere ra ei akaraanga meitaki. Kua pati a Iesu i te katoatoa rava tei roiroi e tei teiaa te apainga kia aere mai kiaia e kia rauka te akaangaroi no to ratou vaerua. (Mataio 11:28-30) Me aru tatou i ta Iesu akaraanga, ka rauka katoa ia tatou i te akaanga i te roi o etai ke na roto i ta tatou taokotaianga atu. Ko tatou, i reira, kia aaere ua atu rai mei ta Iesu katoa rai i aaere ei.

Maara Ainei ia Koe?

• Akapeea ra a Karaiti i te arataki anga i tana au pipi i teia tuatau?

• Akapeea te aronga pakari i te aru anga i ta Karaiti aratakianga i roto i te taangaanga anga i to ratou mana no ko mai i te Atua?

• Akapeea tatou me aru i ta Iesu akaraanga i te akono anga atu i te au apa o etai ke?

• Akapeea te au mapu i te tuku anga i te au mea o te Patireia na mua?

[Au Uianga Apii]

[Tutu i te kapi 23]

Ka tauturu mai te aronga pakari Kerititiano ia tatou kia aru i ta Karaiti aratakianga

[Au Tutu i te kapi 24, 25]

Te aronga mapu, eaa ta kotou au parani e maani ra no tetai oraanga Kerititiano puapingaia?