Kopae te Manako Anga Tarevake!

I TE kite mai anga i te tumatetenga, kua rauka i te pateriareka ko Iobu i tetai atoroanga mei tona au taeake e toru ko Eliphaza, Biladada, e Zophara. Kua aere mai ratou i te tangi kapiti atu kiaia e i te akapumaana iaia. (Iobu 2:11) Ko te tangata akakeu maata rava atu e penei ko te mea pakari roa atu o te toru ko Eliphaza ia. Koia te tangata mua tei tuatua e nana te tuatua maata. Eaa te tu manako anga ta Eliphaza i akaata mai i roto i tana au tuatua anga e toru?

I te maara anga i tetai tupuanga ririnui i te tu natura tei tupu ana kiaia, kua karanga atu a Eliphaza: “Kua na mua iaku tetai vaerua i te aere; te maranga ua ra te ii iaku: Kua tu ua iora, kare ra au i kite i tona tu: e turuma ra tei mua i taku mata, kare ua e mu, e te rongo ra au i tetai reo.” (Iobu 4:15, 16) Eaa teia tu vaerua tei akakeu i te manako anga o Eliphaza? Te tu akaapa o te au tuatua tei aru mai te akaari maira e kare te vaerua ko tetai tikai ia o ta te Atua au angera tuatua tika. (Iobu 4:17, 18) Ko tetai vaerua kino ia te reira. Naringa kare, eaa oki a Iehova i ako ei ia Eliphaza e tona nga taeake e rua no te tuatua pikikaa anga? (Iobu 42:7) Ae, kua aere mai a Eliphaza i raro i te akakeuanga a te temoni. Kua akaata mai tana au tuatua i te manako anga akono kore i te Atua.

Eaa te au manako te ka kiteaia mai mei te au tuatua a Eliphaza? No teaa ra ei mea puapinga kia paruru tatou mei te manako anga tarevake? E eaa te au takainga ka rauka ia tatou i te akono kia kopae atu i te reira?

“Kare Tona Au Tavini i Irinakiia e Ia”

I roto pouroa i tana au tuatua e toru, kua oronga atu a Eliphaza i te manakoanga e e kino pakari roa a te Atua e noatu eaa tana au tavini ka rave kare roa e meitaki ana kiaia. “I na, kare tona au tavini i irinakiia e ia,” i karanga ai Eliphaza kia Iobu, “e te karanga nei aia e auouo to tana au angela.” (Iobu 4:18) I muri akera kua karanga atu a Eliphaza i te Atua: “I tona aronga tapu ra, kare aia i irinaki atu; kare oki te au rangi ra i te mea viivii kore ki mua i ona mata.” (Iobu 15:15) E kua ui atu aia: “Te pereperekavana nei ainei te Mana katoatoa i taau ra tuatua-tika?” (Iobu 22:3) Kua ariki rai a Biladada i teia manako anga, no te mea kua karanga aia: “I te marama nei, kare ïa i kakā mai; e te au etu, kare ïa i te mea viivii kore ki mua i [to te Atua] mata.”​—Iobu 25:5.

Ka tau tatou kia paruru kia kore e akakeuia e taua manako anga. Ka arataki te reira ia tatou i te manako mai e e maata roa ta te Atua e umuumu maira ia tatou. Te tamaki ra teia manakoanga i to tatou pirianga tikai kia Iehova. Tei runga ravao, me vare atu tatou ki teia tu akamanako anga, akapeea tatou i te ariuanga me orongaia mai te ako umuumuia kia tatou? E kia ariki akaaka ua i te akatikatikaanga, penei ka ‘riri iora to tatou ngakau ia Iehova,’ e penei ka akamou riri tatou iaia. (Maseli 19:3) Mei teaa tikai te reira i te tumatetenga i te pae vaerua!

“E Riro Ainei ta te Tangata nei ei Puapinga i te Atua?”

Piri vaitata katoa ra ki te manakoanga e e kino pakari roa a te Atua ko te manakoanga e te manako  maira aia i te au tangata nei ei puapinga kore ua. I te toru o ta Eliphaza tuatua e uianga tetai: “E riro ainei ta te tangata nei ei puapinga i te Atua, mei tei pakari e puapinga iaia uaorai?” (Iobu 22:2) Te karanga ra a Eliphaza e e puapinga kore ua te tangata ki te Atua. Mei tera katoa rai, a Biladada i te taumaro anga: “Eaa oki te tangata nei e tikaia mai ei ki mua i te Atua? e eaa te mea e mā ai ta te vaine i anau ra?” (Iobu 25:4) Kia tau ki taua aerenga manako anga, akapeea roa ai a Iobu, e tangata ua nei, i tae oki i te manako e e turanga tuatua tika tona i mua i te aroaro o te Atua?

Tetai pae tangata i teia tuatau nei kua rokoia e te au manako ngakau kino no runga ia ratou uaorai. Te au apinga mei te utuutu angaia i roto i te pamiri, te kite atu anga i te au taomianga no te oraanga, me kore ei aronga takinoia no te makitakita o tetai iti tangata me kore tetai eteniki penei kua akatupu mai i teia. Inara e rekareka katoa ana a Satani e tana au temoni i te takatakai i tetai tangata. Me ka rauka ia ratou i te akakeu i tetai tangata i te manako mai noatu eaa tana ka rave kare roa e meitaki ana ki te Atua Mana Katoatoa, ka kino roa atu aia i te taitaia. Aere rai, ka topa ke atu taua tangata ra, penei ka akatakake mai, mei te Atua ora ra.​—Ebera 2:1; 3:12.

Ka tuku te pakari anga e te au manamanata i te pae kopapa i te au kotinga i runga ia tatou. Ta tatou tuanga i roto i te angaanga Patireia penei e akaraanga meangiti ua me akaaiteia ki ta tatou i rave i to tatou mapu anga, te maroiroi ra rai, e te ketaketa ra rai. Mei teaa tikai te puapinga i te kiteanga e te inangaro ra Satani e tana au temoni ia tatou kia manako mai e ta tatou e rave ra kare e meitaki roa ana ki te Atua! Ka tau tatou kia kopae atu i taua manako anga.

Akapeea i te Kopae Anga i te Manako Anga Papu Kore

Noatu te mamae a te Tiaporo ko Satani i tuku mai ki runga iaia, kua karanga a Iobu e: “E mate ua atu au, kare rai au e pa i te tuatua-tika naku ra.” (Iobu 27:5) No tona inangaro i te Atua, kua ketaketa rai a Iobu i te tamou marie i tona tiratiratu noatu eaa te ka tupu, e kare e rauka i tetai apinga i te taui i te reira. I roto i konei tetai tumu maata i te kopae anga i te manako anga papu kore. Kia rauka ia tatou i tetai marama anga meitaki no to te Atua aroa e kia tatanu i te arikianga ngakau tae no te reira. Ka inangaro katoa tatou i te akaoonu i to tatou inangaro nona ra. Ka akatupuia teia na roto i tetai apii putuputu anga i ta te Atua Tuatua e te akamanako meitaki anga na roto i te pure i runga i ta tatou e tamou maira.

Ei akaraanga, te karanga ra Ioane 3:16 e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai.” E inangaro oonu to Iehova no te tangata i te ao nei, e te akaari maira tona akono anga ma te au tangata i te aere anga o te tuatau i taua aroa ra. Te akamanako anga i runga i te au akaraanga mei taito mai ka tau i te akamaroiroi i to tatou arikianga no Iehova e i te akaoonu anga i to tatou aroa nona, tauturu anga i reira ia tatou i te kopae i te manako anga tarevake me kore te papu kore.

Akamanako ana i te mataara i akono ei Iehova ia Aberahama i te taime o te akapouanga te ka tupu mai kia Sodoma e Gomora. Kua ui atu a Aberahama ia Iehova e varu taime no runga i Tana akavaanga. Kare roa a Iehova i akaari ana i te tu riri me kore te manamanata. Mari ra, tana au pauanga kua akapapu atu e kua akapumaana atu ia Aberahama. (Genese 18:22-33) I to te Atua akaoraanga i muri akera ia Lota e tona pamiri mei Sodoma ra, kua pati atu a Lota kia oro atu ki tetai oire i te pae ua mai e kia oro atu ki te au maunga. Kua pau atu a Iehova: “I na, kua akatika atu au i taau tuatua i tenana, e kare atura taua oire nei taau i tuatua mai ana e mate iaku.” (Genese 19:18-22) Te akatutu maira ainei teia au tataanga ia Iehova ei tutara kino pakari roa, e aroa kore, e te kino tikai? Kare. Te akaari maira iaia i tona tu tikai​—e Ngateitei aroa, te takinga meitaki, te akaaroa, e te marama tikai.

I te akakiteanga i te tarevake o te manakoanga e te kimi apa ra te Atua e kare roa e tangata meitaki kiaia ko te au akaraanga ia o Aarona, Davida, e Manase o Iseraela taito ra. Kua apa a Aarona no te au tarevake kino e toru. Kua maani aia i te puakatoro auro, kua piri atu ki tona tuaine ko Miriama i te aviri anga ia Mose, e kua poka i te akatapu e te akangateitei i te Atua i Meriba. Noatu rai, kua kite a Iehova i te meitaki i  roto iaia e kua akatika iaia i te tavini ua atu rai ei taunga maata e tae ua atu ki tona matenga.​—Exodo 32:3, 4; Numero 12:1, 2; 20:9-13.

Kua rave te Ariki ko Davida i te au ara kino i tona tutaraanga. Kua kapitiia mai te akaturi, te parani anga i te mate o tetai tangata meitaki ua, e te rave anga i tetai tareanga tureia. Inara, kua kite a Iehova i to Davida tataraaraapa e kua aru tiratiratu ki te koreromotu o te Patireia na te akatika anga iaia kia tutara ei ariki e mate ua atu aia.​—2 Samuela 12:9; 1 Paraleipomeno 21:1-7.

Kua akatu te Ariki o Iuda ko Manase i te au atarau kia Baala, kua maani i tana au tamariki tamaroa kia pati na roto i te ai, kua akamaroiroi i te au angaanga purepure, e kua akatu i te au atarau no te akonoanga pikikaa i roto i te au paepae o te iero. Inara, i tona akaari mai anga i te tataraanga ngakau tae, kua akakore a Iehova i tana ara, kua akarangatira mai iaia mei te tuikaa, e kua akaoki akaou atu kiaia i te taoonga ariki. (2 Paraleipomeno 33:1-13) E au angaanga ainei teia o tetai Atua e kare roa tetai tangata e meitaki roa ana kiaia? Kare roa!

Te Akaapa Pikikaa Uaorai tei Apa

Kare i te mea poitirere kia tatou e ko Satani te akatutuanga maata tikai o taua au tu tana e akaapa ra ia Iehova. E kino tikai a Satani e te kino pakari. Te kite meitakiia ra teia mei te angaanga no te atinga tamariki te piri atura ki te akamori pikikaa i te au tuatau i topa. Kua tau te au Iseraela apoteiti i ta ratou au tamariki tamaroa e te au tamaine i roto i te ai​—e apinga kare i o mai ana ki roto i te ngakau o Iehova.​—Ieremia 7:31.

Ko Satani, e kare ko Iehova, te kimi apa ra. Te karanga ra a Apokalupo 12:10 ia Satani e ko “te akaapa i to tatou au taeake . . . , tei akaapa ia ratou ki mua i te aroaro o to tatou Atua i te po e te ao.” I tetai tua ra, no runga ia Iehova, kua imene te tata taramo: “Naringa koe, e Iehova, e akairo ana i te au ara nei, e te Atu, koai te ka mou? Tei ia koe ra te akakore i te ara.”​—Salamo 130:3, 4.

Me Kore Rava te Manako Anga Tarevake

Mei teaa tikai te akamaruanga ta te au vaerua ora i kite i te tiria mai anga te Tiaporo a Satani e tana au temoni mei te au rangi ra! (Apokalupo 12:7-9) I muri akera, kare e rauka akaou i teia au vaerua kino i te tamanata i te au angaanga a te pamiri angera a Iehova i te rangi ra.​—Daniela 10:13.

Ka rekareka te aronga o te enua nei a te tuatau ki mua te vaitata ua maira. Kare e roa atu ana, ka eke mai tetai angera mei te rangi mai ma te taviri o te vaarua takere kore ra e e pirianganaoa maata tei tona rima ka tapeka ia Satani e tana au temoni e ka uri atu ia ratou ki raro i te vaarua takere kore no te angaanga kore. (Apokalupo 20:1-3) Mei teaa tikai te akamaruanga ta tatou ka kite mai me tupu ana tera!

I taua taime ra, kia paruru tatou i te patoi i te manako anga tarevake. Me kite ake tatou e te torotoro aere ua maira te au manako tarevake e te papu kore i roto i to tatou manako, kia inangaro tatou i te kopae i te reira na te akamou anga i to tatou au manako ki runga i to Iehova aroa. I reira ‘te au o te Atua e akamaroiroi mai i to tatou ngakau e to tatou manako.’​—Philipi 4:6, 7.

[Tutu i te kapi 26]

Kua kopae a Iobu i te manako anga papu kore

[Tutu i te kapi 28]

Kua kite a Lota e e Ngateitei marama tikai a Iehova