“No Ko ia Iehova ra te Tauturu Iaku”

Manganui tei Ariki i ta Iehova Akamorianga

TE AU totou Pipiria te tou ra ki to tatou tuatau te totou ra e ka akaputu atu te au tangata mei te au pa enua ravarai ki ta Iehova akamorianga akateiteiia. Ei akaraanga, na roto i te peroveta ko Hagai, kua akakite te Atua ko Iehova: “E ka akangaueue au i te au pa enua ravarai, e kia aere mai te au mea inangaroia o te au pa enua ravarai ki roto; e ka akaki au i teia are ki te kaka.” (Hagai 2:7, NW) Kua totou a Isaia raua ko Mika e i to tatou tuatau​—“te au rā openga ra”​—ka akamori te au pa enua e te au tangata ia Iehova na roto i tetai tu marekaia.​—Isaia 2:2-4; Mika 4:1-4.

Te akatupuia ra ainei taua au totou i teia tuatau nei? E tuku e na te au tika anga uaorai e akapapu i te reira. I roto anake i te ngauru mataiti i topa akenei, kua tere atu i te 3,110,000 aronga ou tei akatapu ia ratou uaorai kia Iehova i roto e tere atu i te 230 enua. E tikai, e 6 i roto i te 10 Au Kite o Iehova te tavini ra i teia taime nei takapini i te ao kua papetitoia i roto i te ngauru mataiti i topa akenei. I te 2004, ei avereti, e tai tavini akatapu ouia no te Atua tei kapitiia atu ki te putuputuanga Kerititiano i te rua miniti ravarai! *

Mei te anere mataiti mua rai, i teia tuatau “e aronga maata oki tei akarongo, e kua ariu ki te Atu ra.” Mei te mea e kare te maata mai anga i te numero ei akapapuanga uaorai o to te Atua akameitakianga, te oronga maira te reira i te akapapuanga e ‘tei [tona iti tangata] te rima o Iehova ra.’ (Angaanga 11:21) Eaa te arataki ra te au mirioni ua atu ki ta Iehova akamorianga? E akapeea koe uaorai e akakeuia ra e teia akatupuanga?

Kua Rekaia e te Au Tangata Ngakau Tika

I te tuatua tikai anga, kua karanga a Iesu: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” (Ioane 6:44) No reira, taopenga rai, ko Iehova te akavaitata maira te au tangata “i akonoia no te ora mutu kore ra.” (Angaanga 13:48) Ka rauka te vaerua o te Atua i te akaaraara i te au tangata ki to ratou anoano i te pae vaerua. (Mataio 5:3) Tetai akava ngakau tamanataia, tetai kimi anga rapurapu tikai no te manakonakoanga, me kore tetai tumatetenga kino pakari tikai penei ka arataki atu i etai ke i te kimi i te Atua e oti i reira kua kite mai no runga i tana akakoroanga no te tangata nei.​—Mareko 7:26-30; Luka 19:2-10.

E manganui te au tangata tei akapiri mai ki ta Iehova akamorianga no te mea te tauturu ra te porokaramu no te apii anga i te Pipiria a te putuputuanga Kerititiano ia ratou kia kite mai i te au pauanga ki te au uianga te tamanamanata ra ia ratou.

“Me e Atua rai tetai, no teaa ra te au tangata e mamae ua atura rai no te tu tau kore?” Ko te uianga te reira tei tamanamanata tikai ia Davide, e tangata okooko i te apinga akakona i Itaria. Kare ona inangaro tikai i roto i te au mea no te akonoanga, no reira kua ui atu aia i teia uianga teimaa tikai kare atu e tumu ke mari ra ei taumaroanga ua. “Kare oki au i manako ana e ka rauka mai iaku tetai pauanga tau meitaki e te irinaki tikai ia,” i karanga ai aia. “Inara te Kite tei tuatua mai kiaku kua akakoromaki tikai e kua turuturu ma te au irava mei te Pipiria i tana i tuatua mai. Kua riro taua pukapukaanga ei akakeuanga maata tikai ki runga iaku.” I teia tuatau, kua akatikatika a Davide i tona oraanga e te tavini ra ia Iehova.

 Tetai ke ra kua aratakiia ki te tuanga i te enua nei o ta Iehova akaaerenga ei tupuanga o ta ratou kimianga no te aiteanga e te akakoroanga. I te kimianga i te tauturu no tona uaorai au manamanata i te pae ngakau, kua atoro atu tetai taote no te manako i Zagreb, Croatia, i tetai taeake rongonui. Ki tona poitirere, kua oake mai te taote kiaia i te numero terepaoni o te opati manga o te Au Kite o Iehova i Zagreb, e pera katoa i te ingoa o tetai Kite ana i kite ei. “Oi,” i karanga ai aia, “Toku manako ka rauka teia au tangata i te tauturu ia koe. Me ka tono atu au ia koe ki te pure, e au tiki ora kore ua taau ka kite mai ​—kare e tangata e tuatua ra, e e poiri pouroa te au apinga. I toku manako kare e rauka i te pure i te tauturu ia koe. Kua tono ana au i tetai atu aronga maki ki te Au Kite o Iehova, e i toku manako e mea meitaki katoa rai noou.” Ma te inangaro, kua atoro atu te Au Kite iaia e kare i roa ana kua akamataia tetai apii Pipiria kiaia. I roto i nga mea epetoma, kua akakite rekareka taua taote o te manako ra e kua oronga mai te kite o ta te Atua akakoroanga i tetai aiteanga ki tona oraanga.​—Koheleta 12:13.

Me tupu ake ana tetai tumatetenga uaorai, e manganui tei kite mai e ko te tuatua mou Pipiria anake ua te ka oronga mai i te pumaana tikai. I Ereni, kua topa mai tetai tamaiti e itu mataiti i te pakari mei te tauu are o te are apii e kua mate atu. Nga mea marama i muri mai, kua aravei atu nga Kite e rua i tona mama e kua tauta i te akapumaana atu iaia na te uriurianga i te manakonakoanga no te tuakaouanga. (Ioane 5:28, 29) I te reira, kua akamata mai te vaine i te aue. Kua ui atu te nga tuaine: “Me ka inangaro koe i te kite maata atu no runga i te Pipiria, aea e rauka ai ia maua i te atoro atu ia koe?” “Teia taime nei,” i pau mei ei aia. Kua apai atu te vaine ia raua ki tona kainga, e kua akamataia tetai apii Pipiria. I teia tuatau, te tavini pouroa ra tona au pamiri ia Iehova.

Te Piri Maira Ainei Koe?

Taua au tupuanga e tu matauia i tei tupu ra takapini i te ao nei. Te akaputu ra e te tereni ra Iehova i tetai urupu maata mei te au pa enua ravarai no te aronga akamori mou. E manakonako anga mataora to teia pupu i te pa enua no te ora atu anga i te openga te vaitata maira o teia akatereanga kino o te au mea nei e te noo ua atu anga aere roa ki roto i te ao ou tuatua tika.​—2 Petero 3:13.

Ei tupuanga o ta Iehova akameitakianga, teia angaanga akaputuanga aite koreia kare e ekokoanga te tere ra ki mua ki to te reira akaotianga puapinga tikai. (Isaia 55:10, 11; Mataio 24:3, 14) Te piri maroiroi ra ainei koe i roto i teia angaanga tutuanga Patireia? Me te rave ra koe, kia akapapuia koe o te turuturuanga tu-Atua e ka rauka i te tuatua i teia au tuatua a te tata taramo: “No ko ia Iehova ra te tauturu iaku.”​—Salamo 121:2.

[Tataanga Rikiriki i Raro]

[Tataanga i te kapi 9]

“Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.”​—IOANE 6:44

[Pia i te kapi 8]

KOAI TEI MURI I TEIA AKAMAATA ANGA?

“Kia kore a Iehova e patu i te are ra, e angaanga puapinga kore ta te aronga i patu ra.”​—Salamo 127:1.

“Na te Atua ra i akatupu. E teianei, kare a te tanu, kare oki a te tamauu ki te vai; ko te Atua ra ko tei akatupu.”​—1 Korinetia 3:6, 7.