Ta Tetai Ke e Manako Maira ia Tatou​—E Puapinga Maata Ainei?

VAITATA rai e inangaro ana te katoatoa kia akapaapaaia. E maani ana te au tuatua akameitakianga ia tatou kia mataora, oronga mai anga i tetai tu rekareka no te akaotianga. Ka rauka katoa te arikianga i te maani ia tatou kia akameitaki atu i to tatou tu i te rave i tetai apinga. E tuke rai me kite mai tatou e kare tetai au tangata e mareka mai ana ia tatou. Tetai pauanga manako kore me kore tuatua akaapa penei ka takatakai i to tatou tu inangaro. Ta tetai ke e manako maira ia tatou penei ka riro ei akakeu anga maata i runga i ta tatou manako anga ia tatou uaorai.

E mea tarevake i te kopae i ta tetai ke e manako maira ia tatou. Ka puapinga tikai ia tatou na te tuku anga i tetai ke i te akara matatio i to tatou tu. Me akatumuia ki runga i te au kaveinga teitei no te tu akono tau, ka riro te au manako o tetai ke ei akakeuanga no te meitaki, akamaroiroi anga ia tatou kia noo meitaki ua. (1 Korinetia 10:31-33) Inara, te maataanga o te taime kare e tano ana te manako o te papuriki. Akamanako ana i te manako tarevake o te kau taunga maata e tetai atu no runga ia Iesu Karaiti i te “kapiki ua atura ra ratou, na ko atura, E akasatauro i tena, e akasatauro.” (Luka 23:13, 21-25) Te au manako tumuia ki runga i te akakiteanga tarevake me kore akakeuia e te vareae me kore te papakitai penei ka tau kia akakore atu ia. No reira, ka inangaroia tatou i te taangaanga i te akavaanga meitaki e kia ariu mako meitaki atu ki te au manako o tetai ke.

Noai te Manako Puapinga Rava Atu?

Te inangaro ra tatou i te arikianga o te aronga piri vaitata mai kia tatou i roto i te akamori mou. Kapiti mai i roto i teia ko te au mema pamiri tei roto i te akarongo e to tatou au taeake e te au tuaine Kerititiano. (Roma 15:2; Kolosa 3:18-21) Te aroa e te ngateitei o te au taeake irinaki e te “pumaana” i rotopu ia ratou e apinga maata tikai kia tatou. (Roma 1:11, 12) Ma te ‘ngakau akaaka ra te manako akameitaki atu ra tatou i tetai ki tetai, auraka ia tatou uaorai.’ (Philipi 2:2-4) Tei runga ravao, te kimi ra e te akaperepere ra tatou i te arikianga o “te aronga arataki” i rotopu ia tatou​—te aronga pakari i roto i te putuputuanga.​—Ebera 13:17, NW.

Tetai apinga rekareka katoa ra koia oki “ei rongo meitaki oki tona i te aronga ki vao ra.” (1 Timoteo 3:7) Mei teaa tikai te meitaki i te au kopu tangata irinaki kore, te au taeake angaanga, e te au tangata tupu me akangateitei mai ia tatou! E kare ainei tatou e tauta ana i te tuku i tetai akamanakoanga meitaki ma te au tangata ta tatou e tutu aere ra e rauka ai ia ratou i te ariu rekareka mai ki te karere Patireia? To tatou tu i rotopu i te oire tangata ei aronga ma i te tu akono tau, te tuatua tika, e te pikikaa kore te apai maira i te kaka ki te Atua. (1 Petero 2:12) Inara, auraka roa tatou e aati i te au kaveinga Pipiria kia rauka te arikianga mei tetai ke; e auraka rai tatou e akaari i tetai tu pikikaa kia akamareka atu ia ratou. Kia kite meitaki tatou e kare roa e rauka i te akamareka i te katoatoa. Kua karanga a Iesu e: “Naringa kotou no teianei ao, e inangaro mai to teianei ao i tona tikai: no te mea ra, kare kotou i to teianei ao, ko au i iki ia kotou no roto i teianei ao, i riri mai ei teianei ao ia kotou.” (Ioane 15:19) E apinga ainei tetai ka rauka ia tatou i te rave kia rauka i te ngateitei o te aronga te patoi maira ia tatou?

Rauka Anga i te Ngateitei o te Aronga Patoi

“E e makitakitaia kotou e te tangata katoatoa i toku nei ingoa,” i matakite ei a Iesu, “ko te tāpu marie ra e kia tae ki te openga, koia te ka ora.” (Mataio 10:22) Tetai taime e apai mai ana teia  makitakita i te au akaapaanga takinga kino tikai. Penei ka karanga te au opita papakitai o te kavamani ia tatou ei aronga “akameameaau” me kore “takinga kino.” Penei ka rauka i te aronga patoi tuatua tika ua mai i te karanga e e akapupuanga tamanamanata ua tatou te tau ra kia araiia. (Angaanga 28:22) Tetai taime ka rauka teia au akaapaanga pikikaa i te patoiia. Akapeea? Na te aru anga i te akauenga a te apotetoro ko Petero: “Kia papa ua rai i te oronga atu i tetai pauanga ki mua i te katoatoa tei maro mai ia koe i te tumu no te manakonakoanga mei ia koe na, inara te rave kapiti anga ma tetai tu maru e te kauraro oonu.” (1 Petero 3:15, NW) Tei runga ravao, kia taangaanga tatou i “te tuatua tau meitaki te ka kore e akaapaia; kia riro ei te tangata i te tua patoi ra kia akama, ma te kore ana tuatua akakino mai ia tatou.”​—Tito 2:8, NW.

E te tauta ra tatou i te akakore i te kino i runga i to tatou ingoa, auraka roa tatou e taitaiaia me kore e manamanata maata me akakino tau kore ia tatou. Ko Iesu, te Tamaiti apa kore a te Atua, kua akaapaia no te akakino Atua, te akameameaau, e pera katoa te purepure. (Mataio 9:3; Mareko 3:22; Ioane 19:12) Kua akakinoia te apotetoro ko Paulo. (1 Korinetia 4:13) Kare a Iesu raua ko Paulo i manako atu ana i taua akaapaanga e kua angaanga maroiroi ua atu i roto i ta raua angaanga. (Mataio 15:14) Kua kite mai raua e kare roa e rauka ia raua te arikianga o to raua enemi, mei te mea “e te vai ua nei rai to te ao ravarai i raro ake i taua vaerua kino ra.” (1 Ioane 5:19) I teia tuatau, te aro atu nei tatou i taua rai akaaoanga. Auraka roa tatou e mataku me totoa te aronga patoi rikarika i te au pikikaa no runga ia tatou.​—Mataio 5:11.

Te Au Manako te Puapinga Tikai Ra

Ta te au tangata e manako maira ia tatou e maata tikai te au tuke, tei runga ua i te tumu i akapera ei ratou e eaa ta ratou i rongo ana no runga ia tatou. E akapaapaaia ana tatou e te akangateiteiia ra e tetai ke, e akakinoia ana e te makitakitaia ra e tetai atu. Inara, me arataki ua atu rai ia tatou e te au kaveinga Pipiria, e tumuanga tikai to tatou kia mataora e kia noo au ua.

Kua tata te apotetoro ko Paulo: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.” (2 Timoteo 3:16, 17) Ka rauka ia tatou te akaperepereanga a te Atua ko Iehova e tana Tamaiti, ko Iesu Karaiti, na te ariki rekarekaanga i ta te Atua Tuatua ei arataki no tatou i roto i te au mea ravarai. I te openga ra, ko te au manako puapinga roa atu ko taua ra a Iehova e tana Tamaiti. Ta raua e manako maira ia tatou te akaata maira i to tatou tu tau tikai. I te openga iora, tei runga to tatou ora i to raua arikianga.​—Ioane 5:27; Iakobo 1:12.

[Tataanga i te kapi 30]

“E taakamaia ana au e te akapaapaa anga, no te mea te pati muna ua ra au no te reira.”​—TANGATA TATA PEE INITIA KO RABINDRANATH TAGORE

[Au Tutu i te kapi 31]

Te au manako o to tatou au taeake irinaki e puapinga tikai

[Akameitakianga no te Tutu i te kapi 30]

Culver Pictures