E Mea Puapinga Tikai kia Marama i te Au Akairo!

“I te akamataanga kua manako au e e mamae ua te mimiti o ta maua tamaiti ko Andreas. Inara kua kore tona kaki kai e kua kake te vaito piva. Kua kino roa atu te mamae mimiti, e kua manamanata tikai au. I te aere mai anga taku tane ki te kainga, kua apai atu maua ia Andreas ki ko i te taote. Kua akara aia i te au akairo e kua tono tika atu ia Andreas ki te are maki. E kino roa atu te manamanata i to te mamae mimiti ua. Kua turia a Andreas e te maki tui kairoro. Kua rapakauia aia e kare i roa ana kua meitaki akaou.”​—Gertrud, e metua vaine no Tiamani.

PENEI ake e maata te au metua tei kite ua i te tupuanga mei to Gertrud. Ka akara ratou no te au akairo e akaari maira e e maki paa ta ratou tamaiti. Noatu kare e kino ana te au maki katoatoa, kare ra e rauka i te au metua kia kopae i te au akairo o te maki i roto i ta ratou tamariki. Penei ka riro te akara anga no te au akairo e te rave anga i tei tau i te akatupu i tetai aka tuke maata. E mea puapinga tikai te reira.

E tika roa teia i roto i te au mea ke atu i te oraanga kopapa. Tetai akaraanga tau koia oki ko te tumatetenga o te tunami i roto ia Titema 2004 i te au tuanga o te Moana Initia. Kua kite te au akaaerenga kavamani i roto i te au ngai mei ia Autireria e Vaii i te ngaruerue enua maata i te tua tokerau o Tumatara e te kite katoa atura i te kino maata ka tupu mai a muri ake. Inara, kare atu ei e au mataara i reira no te au tangata i roto i te au ngai tei rokoia e te kino e rauka ai me kore e ariu mai ei ki tetai ua atu akamatakiteanga. Tei tupu, kua tere atu i te 220,000 oraanga tei pou.

Au Akairo Puapinga Maata Roa Atu

Ia Iesu Karaiti i te enua nei, kua oronga aia ki te aronga akarongorongo mai iaia i tetai apiianga no te akara anga i te au akairo e te rave anga kia tau rai ki te reira. Te tuatua ra aia no runga i tetai apinga maata roa atu te puapinga. Te ripoti maira te Pipiria: “KUA aere maira te au Pharisea e te au Sadukea kiaia ra, kua pati tapepe maira kiaia i tetai akairo i runga i te rangi. Kua karanga atura aia kia ratou, na ko atura, Kia tae ki te aiai, te karanga na kotou, Kua muramura te rangi, ka rangi marie. E i te popongi ra, Ka uriia akonei; kua muramura oki te rangi e kua takapakapa. E te au pikikaa e, te kite nei  kotou i te tu o te rangi nei; kare ra e kite i te akairo o teianei tuatau.”​—Mataio 16:1-3.

I te taiku anga i “te akairo o teianei tuatau,” kua akakite a Iesu e tika anga tikai ka kite te ngati Iuda e akarongorongo ra iaia i te anere mataiti mua i te tu rapurapu o te tuatau ta ratou e noo ra i roto. Kua vaitata roa to te ngati Iuda akatereanga o te au mea nei i te kite i tetai tauianga maata te ka tupu kia ratou katoatoa. Nga mea ra i mua ake i tona matenga, kua tuatua a Iesu ki tana au pipi no runga i tetai akairo ke mai​—te akairo no tona parutia. Ko tana i tuatua i taua atianga ra e mea puapinga maata tikai ki te katoatoa rava i teia tuatau.