“Kia Vai Matakite Ua Atu”​—Kua Tae Mai te Ora Akautunga Anga!

“Kia vai matakite ua atu, no te mea kare kotou i kite e eaa te ra e tae mai ei to kotou Atu.”​—MATAIO 24:42, NW.

1, 2. Te akaaite tau ra a Iesu i tona tae anga mai ki teaa?

EAA taau ka rave me kite atu koe i tetai keia te aroro aere ra, te tomo ra i te keia i te au kainga o toou tangata tupu? Ei paruru ei i to aronga akaperepere e taau au apinga, kia vai matakite ua koe. No te mea oki, kare tetai keia e tuku atu i tetai reta i te akakite atu e aea aia e aere mai ei. Ei tuke anga, ka aere itoro marie ua mai aia e kare e tapapaia atu.

² E maata te au atianga, kua taangaanga a Iesu ei akatutuanga i te tu o tetai keia. (Luka 10:30; Ioane 10:10) No runga i te au tupuanga te ka tupu mai i te tuatau openga e te ka tupu mai i tona aere anga mai i te rave i te akautunga anga, kua oake mai a Iesu i teia akamatakite anga: “E tenana, kia vai matakite ua atu, no te mea kare kotou i kite e eaa te ra e tae mai ei to kotou Atu. Inara okotai ra mea ta kotou i kite, naringa te tangata o te ngutuare i kite i te ora ka tae mai ei te keia, kua ara ua aia e kare e tuku i tona are kia keiaia.” (Mataio 24:42, 43, NW) No reira kua akaaite a Iesu i tona tae anga mai ki te tae anga mai o tetai keia​—kare e tapapaia.

3, 4. (a) Eaa te o maira ki roto i te akarongo anga ki ta Iesu akamatakite anga no runga i tona tae anga mai? (e) Eaa te au uianga tei tupu mai?

³ E mea tau te akatutuanga, kare oki i kiteaia te ra tikai ka tae mai ei a Iesu. I mua atu ana, i roto i taua totou rai, kua tuatua a Iesu e: “No runga i taua ra ra e te ora kare e tangata i kite, kare te au angera o te rangi e kare katoa te Tamaiti, mari ua ko te Metua anake ra.” (Mataio 24:36, NW) No reira, kua raurau atura a Iesu i te aronga te akarongo maira kiaia: “Kia vai teateamamao ua kotou ia kotou uaorai.” (Mataio 24:44, NW) Te aronga te akarongo ra ki ta Iesu akamatakite anga kua papa ua, e te vai teateamamao ua ra ia ratou uaorai, noatu e aea aia e tae mai ei ei Rima Rave Akava Anga na Iehova.

⁴ Kua tupu mai etai au uianga puapinga maata: Te akamatakite anake ua ra ainei a Iesu i te au tangata o teianei ao, me te anoano katoaia ra ainei te au Kerititiano mou “kia vai matakite ua atu”? Eaa ra ei mea rapurapu te reira “kia vai matakite ua atu,” e eaa te o maira ki roto i teia?

E Akamatakite Anga Noai Ma?

5. Akapeea tatou i kite ei e te piri maira te akamatakite anga “kia vai matakite ua atu” ki te au Kerititiano mou?

⁵ E tika tikai e mei tetai keia rai to te Atu tae anga mai ki te au tangata o teianei ao, tei kopae i te akamatakite anga no te tumatetenga e aere maira. (2 Petero 3:3-7) Inara, akapeea ra te au Kerititiano mou? Kua tata te apotetoro ko Paulo ki te au taeake irinaki e: “Kua kite pu oki kotou e te aere maira te ra o Iehova mei te keia tikai i te po ra.” (1 Tesalonia 5:2, NW) Kare ekoko anga e i roto i to tatou au manako “te aere maira te ra o Iehova.” Inara te akameangiti ra ainei te reira i te anoano no tatou kia vai matakite ua atu? Ka akara ana e te tuatua ra a Iesu ki tana au pipi: “I te ora kare kotou e manako atu na, ka tae mai ia te Tamaiti a te tangata.” (Mataio 24:44, NW) I mua atu ana, i te raurau anga i tana au pipi kia kimi ua atu i te Patireia, kua akamatakite atura a Iesu: “Kia vai teateamamao rai kotou, no te mea, ei te ora manako koreia e kotou na, e tae mai ei te  Tamaiti a te tangata.” (Luka 12:31, 40) Kare aina e te taka meitaki ra e te manako ra a Iesu i tana au pipi i te akamatakite anga aia e: “Kia vai matakite ua atu”?

6. Eaa ra tatou ka anoanoia ai “kia vai matakite ua atu”?

⁶ Eaa ra tatou ka anoanoia ai “kia vai matakite ua atu” e “kia vai teateamamao rai”? Kua akamarama mai a Iesu: “E rua ia nga tangata i roto i te koro: ka apaiia tetai kareka tetai ka akarukeia; e rua nga vaine i te ngai taviri anga titona: ka apaiia tetai kareka tetai ka akarukeia.” (Mataio 24:40, 41, NW) Te aronga tei vai akateateamamao ia ratou uaorai ka “apaiia,” me kore ka akaoraia, me takoreia te ao akono tau kore i te Atua. Ka “akarukeia” tetai papaki ki te akapouanga no te mea kua aruaru noinoi tikai ratou i to ratou uaorai tu o te oraanga. I te akara anga penei te kapiti maira teia i te aronga tataki tai tei akamaramaia ana inara kare i vai matakite ua atu ana.

7. No te kore anga e kite e aea te openga e tae mai ei eaa ta te reira ka tuku kia rave tatou?

⁷ Kare i kite i te ra tikai no te openga o teia akatereanga o te au mea taito nei te orongaia maira kia tatou nei te tuatau i te akaari e te tavini nei tatou i te Atua ma te manako ma. Akapeea ra? Penei i te akara anga e roa te tuatau ka tae mai ei te openga. Ma te mii, ko etai au Kerititiano tei manako ana i teia tu nei kua tuku atu i to ratou maroiroi no te tavini anga ia Iehova kia meangiti mai. Inara, na roto i ta tatou akatapuanga, e oronga tapupu kore tatou ia tatou uaorai kia Iehova e tavini nona. Te aronga tei kite ia Iehova ra te kite ra e kare aia e mareka mai ana i te akaari anga i te maroiroi i mua ua ake ka tae mai ei te openga. Te kite ra aia e eaa to roto i te ngakau.​—1 Samuela 16:7.

8. Akapeea te inangaro no Iehova i te akakeu anga ia tatou kia vai matakite ua atu?

⁸ No te mea e te inangaro tikai ra tatou ia Iehova, ka kite tatou i te rekareka maata rava i te rave anga i tona ra anoano. (Salamo 40:8; Mataio 26:39) E te inangaro ra tatou i te tavini ia Iehova e tuatau ua atu. Kare i meangiti mai te puapinga o taua manakonako anga no te mea ka tiaki tatou no tetai manga tuatau roa ua ake i ta tatou i tapapa atu ana. Tei runga ravao, kia vai matakite ua atu tatou no te mea te riro nei to Iehova ra ei tupuanga puapinga maata i te akatupu anga i tona akakoroanga. To tatou anoano ngakau tae te akakeu ra ia tatou kia akamareka i te Atua kia akono i te akoanga o tana Tuatua e te tuku anga i tona Patireia ko te mea mua i roto i to tatou oraanga. (Mataio 6:33; 1 Ioane 5:3) Ka akamanako ana tatou e akapeea te vai matakite ua atu anga i te akakeu anga i te au ikianga ta tatou ka rave e te tu e akono ra tatou i to tatou oraanga i te au ra katoa.

Te Aere nei Toou Oraanga Kiea?

9. Eaa ra i anoanoia ai no te au tangata o teianei ao kia kite i te puapinga maata o to tatou au tuatau?

⁹ E manganui te au tangata i teia tuatau te kite ra i te au manamanata kino e te au tupuanga poitirere ua tei riro mai ei au tupuanga i te au ra ravarai, e penei kare ratou e mareka ana i te aerenga e aere ra to ratou uaorai oraanga. Inara, kua kite ainei ratou i te aite anga tikai o te au turanga o teianei ao? Kua kite ainei ratou e te noo nei tatou i roto i “te openga o te akatereanga o te au mea nei”? (Mataio 24:3, NW) Te kite ra ainei ratou e te maata anga o te noinoi, te tu kino, e pera katoa te au mea akono tau kore i te Atua e te akairo maira i teia au tuatau ei “tuatau openga ra”? (2 Timoteo 3:1-5) Te anoanoia ra ratou kia kite katoa i te puapinga maata no teia nei e kia akamanako i te mataara te aere nei to ratou oraanga.

10. Eaa ta tatou ka rave kia papu e te vai matakite ua nei rai tatou?

¹⁰ Akapeea ra tatou? I te au ra katoa te aro ra tatou i te au ikianga te o maira ta tatou angaanga, to tatou oraanga kopapa, to tatou ngutuare tangata, e ta tatou akamorianga. Kua kite tatou i ta te Pipiria e karanga ra, e te tauta ra tatou i te akono i te reira. No reira, e mea meitaki kia ui tatou kia tatou uaorai e: ‘Kua akatika ainei au i te au apiapianga o te oraanga kia taruri ke atu i toku aerenga? Te tuku ra ainei au i te au apiianga a teianei ao, to te reira manako, kia akakite mai eaa taku au ikianga ka rave?’ (Luka 21:34-36; Kolosa 2:8) Te anoanoia ra tatou kia rave ua atu i te akaari e te irinaki ra tatou ia Iehova ma to tatou ngakau katoa e kare e irinaki ua ki runga i to tatou uaorai kite. (Maseli 3:5) Na roto i taua tu, ka rauka ia tatou “tetai mouranga ketaketa ki runga i te ora mutu kore”​—e ora mutu kore i roto i to te Atua ao ou.​—1 Timoteo 6:12, 19, NW.

11-13. Eaa ta tatou ka kite mai mei te au akaraanga tei tupu (a) i to Noa tuatau? (e) i to Lota tuatau?

 ¹¹ E manganui te au akaraanga akamatakite anga te vai ra i roto i te Pipiria te ka tauturu ia tatou kia vai matakite ua atu. E akamanako ana eaa tei tupu i to Noa tuatau. I mua roa atu, kua akapapu te Atua e kia orongaia te akamatakite anga. Inara i te pae mai ia Noa e tona ngutuare tangata, kare te au tangata i akarongo mai ana. (2 Petero 2:5) No runga i teia, kua tuatua a Iesu: “E mei te au ra o Noa ra, koia rai te parutia o te Tamaiti a te tangata ra. Mei ia ratou i mua ake i te vaipuke ra, te kai ra e te inu ra, te akaipoipo ra te tane e te orongaia ra te vaine kia akaipoipo, e tae ua atu ki te ra i tomo ei a Noa ki roto i te araka; e kare rava i akarongo e tae ua maira te vai puke e pou rava akera ratou katoa i te pakokoia, mei koia katoa te parutia o te Tamaiti a te tangata nei.” (Mataio 24:37-39, NW) Eaa ta tatou i kite mai? Me te tuku ra tetai ia tatou i te au manako rikiriki ua​—e te au angaanga ua o te oraanga nei​—kia tamanamanata mai i te au angaanga pae vaerua ta te Atua e raurau maira ia tatou kia tuku ko te mea muaia, te anoanoia ra tatou kia akamanako pakari tikai i to tatou turanga.​—Roma 14:17.

¹² E akamanako, katoa, no runga i to Lota tuatau. E enua puapinga i te pae materia te oire o Sodoma, te ngai e noo ra a Lota e tona ngutuare tangata inara e kino tikai. Kua tono akera a Iehova i tana nga angera kia takore i taua ngai ra. Kua raurau atura te nga angera ia Lota e tona ngutuare tangata kia oro ke mai mei ia Sodoma e auraka e akara ki muri. Kua akamaroiroiia e te nga angera ra, i akaruke ei ratou i te oire. Inara, i te akara anga kare ta Lota vaine i akaruke ana i tona inangaro no tona kainga i Sodoma. No te akarongo kore, kua akara atura aia ki muri, e no tana i rave ra kua ngere iaia tona ora. (Genese 19:15-26) Tei totouia, kua akamatakite atura a Iesu: “E akamaara i te vaine a Lota.” Te akarongo ra ainei tatou ki taua akamatakite anga?​—Luka 17:32.

¹³ Kua akaoraia mai te aronga tei akarongo ki te au akamatakite anga tu-Atua. E tika mou te reira kia Noa e tona ngutuare tangata e kia Lota e tana nga tamaine. (2 Petero 2:9) Ia tatou e akamanako tikai ra i te akamatakite anga i roto i teia nga akaraanga, te akamaroiroi katoaia maira tatou e te karere akaora e vai ra i roto i reira no te aronga e inangaro ra i te tuatua tika. Te akaki ra te reira i to tatou ngakau ki te manakonakoanga papu no te akatupu anga i ta te Atua taputou no te “rangi ou e te enua ou” i te “vai tika anga o te tuatua-tika ra.”​—2 Petero 3:13.

‘Kua Tae oki te Ora Akautunga Anga’!

14, 15. (a) Eaa te o maira ki roto i “te ora” akautunga anga? (e) Eaa te o maira i te ‘mataku anga i te Atua e te akakaka anga iaia’?

¹⁴ Ia tatou e vai matakite ua ra, eaa ta tatou ka tapapa atu? Te akakite maira te puka o Apokalupo i te au takainga tere ki mua i te akatupu anga i to te Atua akakoroanga. E puapinga maata te akarongo anga ki ta te reira e tuatua ra me vai teateamamao ua rai tatou ia tatou uaorai. Te akataka meitaki maira te totou i te au tupuanga te ka tupu mai “i te rā o te Atu ra,” tei akamata mai i te akateronoia anga a Karaiti i te rangi ra i te 1914. (Apokalupo 1:10) Te taki ra a Apokalupo i to tatou manako ki tetai angera tei orongaia te ‘evangelia mutu kore kia tutu aereia.’ Kua akakite aia ma te reo maata: “Ka mataku i te Atua, e akakakā iaia; kua tae oki ki te ora akautunga anga nana.” (Apokalupo 14:6, 7) E tuatau poto ua taua “ora” no te akautunga anga; te kapiti maira te reira i te akakite anga e te tuku anga i te akautunga anga tei akatutuia mai i roto i taua totou ra. Te noo nei tatou i roto i taua tuatau.

¹⁵ I teianei, i mua ake ka ope ei te ora akautunga anga, te raurauia nei tatou e: “Ka mataku i  te Atua, e akakakā iaia.” Eaa te o maira ki teia? Na te mataku tau i te Atua e akakeu ia tatou kia anga ke mai mei te tu kino. (Maseli 8:13) Me te akangateitei ra tatou i te Atua, ka akarongo atu tatou kiaia ma te kauraro marie. Kare tatou e akapou i te taime ma te kore e tatau putuputu i tana Tuatua, te Pipiria. Kare tatou e manako atu e e mea puapinga kore ua tana akoanga kia aere ki te au uipaanga Kerititiano. (Ebera 10:24, 25) Ka akaperepere tatou i te akameitakianga no te akakitekite anga i te tuatua meitaki no te Patireia o te Mesia a te Atua e na te rave maroiroi anga i reira. E irinaki tatou ia Iehova ma to tatou ngakau katoa i te au taime ravarai. (Salamo 62:8) I te kite anga e ko Iehova te Ngateitei i te Ao Katoa e Pini Ua Ake, e akangateitei tatou iaia na te kauraro puareinga anga kiaia ei Ngateitei no to tatou ora. Te mataku tikai ra ainei koe i te Atua e te oronga ra i te kaka kiaia i roto i taua au tu ravarai?

16. Eaa ra tatou ka karanga ai e kua tupu takere te akautunga anga ki runga ia Babulonia Maata tei akakiteia mai i roto ia Apokalupo 14:8?

¹⁶ Te akataka maira a Apokalupo pene 14 i te au tupuanga te ka tupu i te ora akautunga anga. Ko Babulonia Maata, te patireia akonoanga pikikaa o teianei ao, te mea mua i taikuia mai: “Kua aru maira tetai angela i muringao, i te na ko anga e, Kua inga, kua inga taua oire maata ra, ko Babulonia.” (Apokalupo 14:8) Ae, mei to te Atua tumu manako, kua inga takere a Babulonia Maata. I te 1919, kua tataraia mai to Iehova au tavini akatainuia mei roto mai i te tuikaaanga mei te au apiianga e te au ravenga a Babulonia, tei akaaere ana i te au tangata e te au pa enua no tetai au tauatini mataiti. (Apokalupo 17:1, 15) Kua rauka ia ratou i reira i te oronga atu ia ratou uaorai ki te akamaata anga i te akamorianga mou. Kua raveia mei reira mai te tutu aere anga i te ao katoa no te tuatua meitaki no te Patireia o te Atua.​—Mataio 24:14, NW.

17. Eaa te o maira i te aere ke mai anga ki vao ia Babulonia Maata?

¹⁷ Kare e ko te reira ua ta te Atua akautunga anga ki runga ia Babulonia Maata. Kare e roa atu ka tae mai tona akapouanga openga. (Apokalupo 18:21) Ma te tumu anga meitaki, te raurau maira te Pipiria i te au tangata i te au ngai ravarai e: “Ka aere ke mai ana kotou ki vao [mei ia Babulonia Maata] . . . kia kore kotou e riro ei rave katoa i tana ra au ara.” (Apokalupo 18:4, 5) Akapeea tatou i te aere ke mai anga ki vao ia Babulonia Maata? E maata atu te o maira ki te tipu takiri anga i tetai atu au pirianga ma te akonoanga pikikaa. Te vai nei rai te akakeu anga a Babulonia i roto i te au akono anga matauia e te au peu e manganui, i roto i to te ao tu viivii ki te ainga, te akamaata anga i te tamataora te piri maira te akono anga purepure, e te vai ua atura. Kia vai matakite ua atu, e puapinga maata kia oronga tatou i roto i ta tatou au angaanga e te au anoano o to tatou ngakau, te akapapu anga e kua takake mai tikai tatou mei ia Babulonia Maata i roto i te au tu ravarai.

18. I te akamanako anga eaa tei akatakaia mai i roto ia Apokalupo 14:9, 10, eaa ta te au Kerititiano matakite e akamatakite ra kia kopae atu?

¹⁸ I roto ia Apokalupo 14:9, 10, kua akatakaia mai tetai mea ke atu no “te ora akautunga anga.” Kua tuatua maira tetai akera angera: “Ko te akamori i te puaka taae e tona tutu, e te āriki i te akairo ki tona rae, e kare ïa, ki te rima, Ka inu aia i te wina o te riri o te Atua ra.” No teaa ra? E nga akairo “te puaka taae e tona tutu” no te tutaraanga a te tangata, kare raua e ariki ana i te tu ngateitei o Iehova. Te matakite ra te au Kerititiano matakite e auraka e tuku ia ratou uaorai kia akakeuia me kore kia akairoia, i roto i  te tu me kore i te angaanga, te riro anga ei tavini na te aronga te patoi ra i te akakite i te tu ngateitei rava o te Atua mou, ko Iehova. Kua kite te au Kerititiano e kua akanoo takereia te Patireia o te Atua i te rangi, e na te reira e takore i te au tutaraanga katoa a te tangata nei, e ka vai ua te reira e tuatau ua atu.​—Daniela 2:44.

Auraka Toou Tu Manako Rapurapu e Ngaro Ke Atu!

19, 20. (a) Ia tatou e tomo oonu atura ki roto i teia tuatau openga nei, eaa te papu ra ia tatou e ka tauta a Satani i te rave? (e) Eaa ta tatou ka akakoro tikai i te rave?

¹⁹ Ia tatou e tomo oonu atura ki roto i teia tuatau openga, ka pakari mai te au taomianga e te au timataanga. Noatu eaa te roa ia tatou ki roto i teianei akatereanga taito e te tamanamanataia ra e to tatou uaorai tu apa, te rokoia nei tatou e taua au mea ra mei te tu makimaki, te ruaineanga, te takake anga o te aronga tei akaperepereia, te au manako mamae, te mareka kore i te aro atu anga i te tu manako kore no ta tatou au tauta anga kia tutu aere i te Tuatua a te Atua, e te vai ua atura. Auraka rava e ngaropoina e te inangaro maata tikai ra a Satani i te akamaata atu i te au taomianga ta tatou e aro atura kia akakeu ia tatou kia tuku ua i te au​—kia akamutu i te tutu aere i te tuatua meitaki me kore kia akamutu i te aru anga i te au turanga a te Atua. (Ephesia 6:11-13) Kare e ko teia te tuatau kia akangaro atu i to tatou manako anga rapurapu no runga i te au tuatau e noo nei tatou!

²⁰ Kua kite a Iesu e ka rokoia tatou e te taomianga maata kia tuku i te au, no reira aia i ako mai ei ia tatou e: “Kia vai matakite ua atu, no te mea kare kotou i kite e eaa te ra e tae mai ei to kotou Atu.” (Mataio 24:42, NW) E tenana, kia vai matakite ua atu tatou ki te tuatau e noo nei tatou i roto i te aere anga o te tuatau. Kia matakite ua atu rai tatou i te au ravenga a Satani te ka akakeu ia tatou kia akamarie mai me kore kia akamutu ua. Kia akatika i reira tatou i te tutu aere anga i te tuatua meitaki o te Patireia o te Atua ma te maroiroi e te akakoro anga maata tikai. E teianei, kia tamou ua rai tatou i to tatou tu manako rapurapu ia tatou e akarongo ra ki ta Iesu akamatakite anga: “Kia vai matakite ua atu.” Na te rave anga i te reira, ka apai mai tatou i te akangateitei anga kia Iehova e ka riro mai ko tetai aronga tei rauka mai te manakonako anga no tana au akameitakianga mutu kore.

Akapeea Koe me Pau?

• Akapeea tatou i kite ei e te piri maira ta Iesu akamatakite anga “kia vai matakite ua atu” ki te au Kerititiano mou?

• Eaa te au akaraanga akamatakite i roto i te Pipiria te ka tauturu ia tatou “kia vai matakite ua atu”?

• Eaa te ora akautunga anga, e eaa te raurauia maira kia rave tatou i mua ake ka ope ei te reira?

[Au Uianga Apii]

[Tutu i te kapi 23]

Kua akaaite a Iesu i tona tae anga mai ki te tae anga mai o tetai keia

[Tutu i te kapi 24]

Te vaitata mai nei te akapouanga o Babulonia Maata

[Au Tutu i te kapi 25]

E akatika i reira tatou i te tutu aere anga ma te maroiroi maata e te akakoro tikai