E Aaere ma te Atua, e Kokoti i te Meitaki

“Te ruru ua ra ratou i te matangi, e e matangi uriia ta ratou ka kokoti.”​—HOSEA 8:7, NW.

1. Akapeea ra tatou me aaere ma Iehova?

E MEITAKI atu no tetai tere na roto i tetai ngai kino me e arataki kite tikai tetai i te taki i te mataara. E mea meitaki tikai kia aaere ma taua tu arataki ra i to te aere ua atu ko tatou anake rai. I tetai au tu, te akaari maira teia i te turanga e noo nei tatou i roto. Inara, kua inangaro a Iehova, i te arataki ia tatou na roto i te metepara maata o teianei ao kino. E mea pakari roa no tatou kia aaere ma ia i to te timata atu i te akatere i to tatou uaorai au takainga. Akapeea ra tatou me aaere ma te Atua? Na te aru anga i te aratakianga tana i oronga mai i roto i tana Tuatua.

2. Eaa te ka uriuriia i roto i teia atikara?

² Kua uriuri te atikara i mua ake i te nuku akatutuanga tei kiteaia i roto ia Hosea pene 1 ki te 5. Mei ta tatou i kite, tei roto i taua nuku ra tetai au apiianga te ka tauturu ia tatou kia aaere ma te Atua. I teianei ka uriuri tatou i tetai au manako maata o te pene 6 ki te 9. * Ka tauturu maata roaia kia akamata na roto i te akara akaou anga i teia au pene e a.

Akara Poto Akaou Anga

3. E akakite poto ua mai i te au mea i roto ia Hosea pene 6 ki te 9.

³ Kua tono a Iehova ia Hosea kia totou tikai ki te patireia tai ngauru kopu o Iseraela. Ko taua patireia ra, tei kite katoaia e ko Epheraima tei tapaia i te ingoa o tona kopu maata, kua ariu ke mei te Atua. Te akaari maira a Hosea pene 6 ki te 9 e kua akaari ua te tangata i te tu tiratiratu kore na te aati anga i te koreromotu a Iehova e te rave ua anga i te kino. (Hosea 6:7) Kua irinaki ratou ki roto i te au pirianga o teianei ao e kare i oki kia Iehova. No te mea kua ruru ratou i te mea kino, ka kokoti rai ratou i te mea kino. Koia oki, kua vaitata rava te akautungaanga pakari i te tae mai. Inara tei roto katoa i te totou a Hosea tetai karere akapumaana anga ngakau. Kua akapapuia mai ki te tangata e ka rauka ia ratou kia oki akaou kia Iehova e kia tangiia mai me oronga ratou i tetai akairo o te ngakau tataraara.

4. Eaa te au apiianga tau ta tatou ka akamanako mei te totou a Hosea?

⁴ Mei teia au pene e a o te totou a Hosea, e maata atu ta tatou aratakianga ka rauka mai te ka riro ei tauturu ia tatou kia aaere ma te Atua. Ka akamanako ana tatou e a au apiianga tau: (1) Ka kiteaia te tu tataraara mou na roto i te au angaanga, kare na te tuatua ua; (2) kare te au atinga anake uaorai e akarekareka i te Atua; (3) e mamae ana a Iehova me ariu ke tona aronga akamori mei iaia; e (4) e kokoti ei i te mea meitaki, e ruru tatou i te mea meitaki.

Akapeea te Akaari Anga i te Tu Tataraara Mou

5. Akakite mai i te puapinga maata o tei tuatuaia i roto ia Hosea 6:1-3.

⁵ E maata tikai ta te totou a Hosea e apii maira ia tatou no runga i te tu tataraara e te tangi. I roto ia Hosea 6:1-3, ka tatau tatou: “Aere mai, kotou e te au tangata, ka oki tatou kia Iehova, no te mea nana uaorai i aeae e nana rai tatou e akaora. Nana i papa, e nana rai tatou e takai. Nana tatou e akaora me pou nga ra e rua. I te toru o te ra nana tatou e akatu mai ki runga, e e noo tatou i mua i tona aroaro. Ka kite tatou, e ka aruaru tatou kia kite ia Iehova. Kua akamouia oki tona aerenga mai, mei te makirata ra. E ka tae mai aia mei te ua topa pu ua ki runga ia tatou; mei te ua ou ra e tamauu i te enua nei.”

6-8. Eaa ra te tarevake o ta Iseraela tataraara?

 ⁶ Naai ra i tuatua i te au tuatua tei rekotiia i roto i teia au irava? Kua karanga tetai aronga e na te au ngati Iseraela akarongo mou kore teia au tuatua nei e kua karanga e te tataraara tapikikaa ua ra te au tangata akarongo kore e te akariro ra i to te Atua tu tangi mei te mea puapinga kore ua. Kareka, etai ra, kua karanga e ko te peroveta ko Hosea te tuatua ra, te pati akatenga ra ki te tangata kia oki kia Iehova. Noatu rai e koai tei tuatua i teia au tuatua nei, ko te uianga maata koia oki, Kua oki ainei te patireia taingauru kopu o Iseraela katoatoa kia Iehova, ma te akaari i te tu tataraara tika tikai? Te pauanga koia oki kare. Kua na ko atura a Iehova na roto ia Hosea e: “Eaa ra taku ka rave ia koe, E Epheraima e? Eaa ra taku ka rave ia koe, E Iuda e, kua aite to korua aroa takinga meitaki mei te tumurangi popongi ra e mei te au e peke vave atura?” (Hosea 6:4) Kare e aiteia tetai akakiteanga mei teia no te turanga pae vaerua viivii o te iti tangata o te Atua! Kua vaitata roa te aroa takinga meitaki, me kore te aroa tiratiratu, i te ngaro​—mei te kou popongi e ngaro viviki ua i te iti anga mai o te ra. Noatu kua tapikikaa ua te tangata i te tataraara, kare rai a Iehova tumuanga tau e kite ra no te tangi atu. Eaa ra te manamanata?

⁷ Kare te tataraara a to Iseraela e no roto mai tikai i te ngakau. Te akakite ra a Hosea 7:14 i teia no runga i to Iehova mareka kore i tona iti tangata: “Kare ratou i kapiki mai kiaku no te tauturu ma to ratou ngakau, noatu te aue ua ra ratou i runga i to ratou au roi.” Te kapiti maira te Hos 7 irava 16 e: “Kua oki maira ratou, kare ra ki tetai mea teitei atu”​—koia oki, “kare ki te tu akamorianga ngateitei.” (Tataanga i raro ake) Kare te tangata i inangaro ana i te oki ki te akamorianga ngateitei a Iehova na te rave anga i tetai au tauianga tei anoanoia i te akaoki akaou anga mai i to ratou pirianga ma ia. Tika rava, e kare tikai ratou i inangaro ana i te aaere ma te Atua.

⁸ Te vai ra tetai manamanata ke mai i te tataraara a to Iseraela. Te rave tamou ua atura te tangata i te ara​—te tika, e maata tikai te au tu ara tuke ke, te kapiti maira i te pikikaa, te ta tangata, te keikeia, te akamori itoro, e te akatupu anga i te au pirianga tau kore ki te pa enua. Ia Hosea 7:4, kua akaaiteia te tangata ki “te umu ka ua,” me kore ki te umu a te tangata tunu varaoa, papu e no te au anoano kino e ka ua ra i roto ia ratou. Me akamanakoia atu taua turanga pae vaerua viivii ra, kua tau ainei i reira e kia tangiia atu te tangata? Kare rava! Kua akakite a Hosea ki te iti tangata meameaau e ka ‘akamaara a Iehova i to ratou apa’ e ka “akamanako mari i ta ratou au ara.” (Hosea 9:9) Kare ratou e tangiia atu!

9. Te apii maira ta Hosea au tuatua ia tatou i teaa no runga i te tu tataraara e te tu tangi?

⁹ Ia tatou e tatau ra i te au tuatua a Hosea, eaa ta tatou i mou mai no runga i te tu tataraara e te tu tangi? Te apii maira te akaraanga akamatakite o te ngati Iseraela tiratiratu kore ia tatou e e rauka mai ei te puapinga mei to Iehova tu tangi, ka anoanoia tatou kia akaari mai i te ngakau tataraara. Ka akapeea ra me akaari i taua tu tataraara ra? Kare a Iehova e vare i te roimata e te tuatua  ua. Ka kitea uaia te tu tataraara tika tikai na roto i te au angaanga. E rauka ai kia tangiia mai, ka anoanoia te tangata i tarevake kia akaruke takiri i tona mataara rave ara e kia tarotai mai i tona oraanga ki te au turanga teitei o ta Iehova akamorianga ngateitei.

Kare te Au Atinga Anake ua e Akarekareka ia Iehova

10, 11. Mei tei akaariia mai e te akaraanga o Iseraela, eaa te tumu kare ei te au atinga anake ua e akarekareka ia Iehova?

¹⁰ Teianei ka uriuri tatou i te rua o te apiianga te ka tauturu ia tatou kia aaere ma Iehova. Ko teia ia: Kare te au atinga anake ua e akarekareka i te Atua. Te karanga ra a Hosea 6:6 e: “Ko te aroa takinga meitaki taku [ta Iehova] i rekareka, e kare ko te atinga; ko te kite i te Atua kare ko te atinga karakaratio katoa.” E akara ana e te rekareka ra a Iehova i te aroa takinga meitaki me kore i te aroa tiratiratu​—e tu oki no te ngakau​—e i roto i te kite no runga iaia. Inara penei te umere ra koe e: ‘Eaa ra teia irava i karanga ai e kare a Iehova e rekareka ana i te “atinga” e i te “atinga karakaratio katoa”? Kare ainei taua au mea ra i anoanoia i raro ake i te Ture a Mose?’

¹¹ Kua anoanoia te au atinga e te au atinga karakaratio i raro ake i te Ture, inara e manamanata kino tikai to te au taeake o Hosea. Te akara anga, te vai ra tetai au ngati Iseraela e apai ua ra i taua au tu atinga karakaratio ra na roto i te tu akono Atua akatietie. I taua taime rai, te rave tamou ua ra ratou i te ara. Te akaari ua maira to ratou tu ara e kua ngere to ratou ngakau i te aroa tiratiratu. Kua akaari katoa mai ratou e kua kopae ratou i te kite i te Atua, no te mea kare ratou e noo tarotai ana ki te reira. Me kare e tau ana te turanga ngakau o te tangata e kare e aruaru ana i te arataa tau o te oraanga, eaa i reira te puapinga o ta ratou au atinga? E mea viivii tikai ta ratou au atinga ki te Atua ko Iehova.

12. Eaa te au akamatakiteanga i roto ia Hosea 6:6 no te tangata e noo nei i teia tuatau?

¹² E au akamatakiteanga to roto i te au tuatua a Hosea no te manganui o te aronga aere pure i teia tuatau. Te apai nei ratou i te au atinga karakaratio ki te Atua na roto i te au tu angaanga akonoanga. Inara e meangiti ua, me kore kare ua rai, e mana tikai o ta ratou akamorianga ki runga i to ratou tu i te au ra. Te mareka maira ainei te Atua i taua tu tangata ra me kare to ratou ngakau e akakeu ana ia ratou kia apii i te kite tika tikai nona e te taangaanga i taua kite ra na te ariu ke anga mai mei te au angaanga rave ara? Auraka e tangata e manako e te akarekareka ra te au angaanga akonoanga anake ua i te Atua. Kare a Iehova e rekareka ana i te au tangata e timata ra i te oko i tana akaperepereanga na tetai tu akamorianga tutu ua e kare ra na te akono tika tikai anga i tana Tuatua.​—2 Timoteo 3:5.

13. Eaa te au tu atinga ta tatou e oronga ana, inara eaa te mea tau kia akamaaraia no runga i to ratou puapinga?

¹³ Ei au Kerititiano mou, kia akamaara tatou e kare te au atinga anake ua e akarekareka i te Atua. E tika e kare tatou e apai ana i te au atinga manu kia Iehova. Noatu rai, te ‘apai nei tatou i te atinga, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa.’ (Ebera 13:15) E mea puapinga roa e auraka tatou kia aite mei te au ngati Iseraela rave ara i to Hosea tuatau, i te manako anga e ka rauka ia tatou kia tutaki i te raveanga kino na te apai anga i taua tu atinga pae vaerua ra ki te Atua. E akamanako ana i te akaraanga a tetai mapu tei rave muna ua i te ainga tau kore. Kua akakite aia i muri mai e: “Kua akamaata atu au i taku angaanga tutu aere, te manako anga e na teia e akangaro ua atu i te tarevake.” Kua aite rai te reira ki ta te ngati Iseraela marikonga kore i timata  ana i te rave. Inara, ka ariki ua mai a Iehova i ta tatou atinga akapaapaa mei te mea e kapitiia mai te reira e te akakeuanga tau o te ngakau e te tu akono tau i te Atua.

Ka Mamae Roa a Iehova me Akaruke Tona Aronga Akamori Iaia

14. Eaa ta te totou a Hosea e akaari maira no runga i to te Atua au manako ngakau?

¹⁴ Te toru o te apiianga ka rauka ia tatou mei ia Hosea pene 6 ki te 9 koia oki no runga i to Iehova manako ngakau me ariu ke tona aronga akamori mei iaia. E pakari e te maru to te Atua au manako ngakau. E au manako ngakau rekareka e te akaaroa tona no te aronga e tataraara no ta ratou au ara. Inara, kia kore tona iti tangata e tataraara, ka akautunga pakari aia, ia ratou. No te mea te manako oonu maira te Atua ia tatou, e mea rekareka roa nana me akarongo mou tikai tatou i te aaere ma ia. “Te rekareka ra a Iehova i tona iti tangata,” e karanga ra te Salamo 149:4. Inara, mei teaa ra to te Atua manako ngakau me akarongo mou kore tona au tavini?

15. Kia tau ki ta Hosea 6:7, mei teaa ra te tu o tetai au ngati Iseraela?

¹⁵ I te tuatua anga no runga i te ngati Iseraela akarongo mou kore, kua na ko atura Iehova: “Kareka ratou uaorai, mei te tamariki a te tangata ra, kua aati i te koreromotu. I reira ratou i rave pikikaa ua mai ei iaku nei.” (Hosea 6:7) Te tuatua Ebera tei uriia e ‘rave pikikaa ua’ te aiteanga katoa e “rave akavare ua, (rave) akarongo mou kore ua.” Ia Malaki 2:10-16, kua taangaangaia taua tuatua Ebera ra i te akataka mai i te tu tiratiratu kore o taua au ngati Iseraela akarongo mou kore ra ki to ratou tokorua akaipoipo. No runga i te taangaanga anga i teia tuatua ia Hosea 6:7, te karanga ra tetai tataanga e “e tuatua akaaiteanga no te akaipoipoanga e akatutu maira i to tetai uaorai au tu i roto i te pirianga . . . Ko teia turanga no tetai tei takinoia te pirianga inangaro.”

16, 17. (a) Eaa Iseraela i rave ei no runga i ta te Atua koreromotu ki te iti tangata? (e) Eaa te ka tau ia tatou kia akamaara no runga i ta tatou au angaanga?

¹⁶ Kua akariro a Iehova ia Iseraela ei vaine akatutu nana no tana koreromotu ki te iti tangata. No reira i te aati anga tona iti tangata i te au papauanga o taua koreromotu ra, mei te mea rai i reira e te akaturi ra ratou. Mei te tane akarongo mou tikai te Atua, kareka ra kua akaruke tona iti tangata iaia!

¹⁷ Akapeea ra tatou? Te manako maira te Atua e me ka aaere ainei tatou ma ia me kare. E mea  tau kia akamaara tatou e “ko te Atua te aroa” e te akatukia ra ta tatou au angaanga iaia. (1 Ioane 4:16) Me aruaru tatou i te arataa tarevake, ka akatupu tatou i te mamae kia Iehova e ka akamareka kore tikai iaia. Ka riro te akamaara anga tatou i teia ei paruru ririnui kia kore e tuku ua atu ki te timataanga.

Akapeea Tatou e Kokoti ei i te Mea Meitaki

18, 19. Eaa te kaveinga ta tatou ka kite i roto ia Hosea 8:7, e i akapeea taua kaveinga ra i te tupu tika anga ki te ngati Iseraela?

¹⁸ Ka akamanako ana tatou i te a o te apiianga mei te totou a Hosea​—akapeea tatou e kokoti ei i te mea meitaki. No runga i te ngati Iseraela e te neneva e te puapinga kore o to ratou mataara akarongo kore, kua tata a Hosea: “Te ruru ua ra ratou i te matangi, e e matangi uriia ta ratou ka kokoti.” (Hosea 8:7) Te kite nei tatou i konei i tetai kaveinga tei tau kia akamaara meitaki tatou: E pirianga tika tetai i rotopu i ta tatou e rave nei i teianei e te ka tupu kia tatou i te tuatau ki mua. Akapeea ra teia kaveinga i te akapapu angaia mai e te turanga o te ngati Iseraela akarongo mou kore?

¹⁹ Na te rave tamou anga i te ara, te ruru ra taua au ngati Iseraela i te mea kino. Ka rauka ainei ia ratou i te rave ua atu rai i te reira ma te kore e kokoti i te au openga kino? Papu roa e kare ratou e ora i te akautungaanga pakari. Kua akakite a Hosea 8:13: “Ka akamaara aia [a Iehova] i to ratou apa e ka akautunga i ta ratou au ara.” E ia Hosea 9:17, ka tatau tatou: “E kopae ia taku Atua ia ratou, no te mea kare ratou i akarongo iaia, e e riro oki ratou ei aronga tuitarere i te pa enua.” Ka akapapu a Iehova e kia akautungaia rai te au ngati Iseraela no ta ratou au ara. No te mea kua ruru ratou i te mea kino, ka kokoti rai ratou i te mea kino. Kua raveia ta te Atua akautungaanga ia ratou i te 740 M.T.N., i te autu anga to Asura ki rungao i te patireia tai ngauru kopu o Iseraela e kua arataki atura i tona au tangata ki roto i te tuikaaanga.

20. Eaa ta tei tupu ki te ngati Iseraela e apii maira ia tatou?

²⁰ Te apii maira tei tupu ki taua au ngati Iseraela ra i tetai tuatua mou tumu kia tatou: Ka kokoti tatou i ta tatou e ruru. Te akamatakite maira te Tuatua a te Atua ia tatou: “Auraka e vavare; kare ua te Atua e vare: ko ta te tangata e ruru ra, ko tana ra ïa e kokoti.” (Galatia 6:7) Me ruru tatou i te mea kino, ka kokoti tatou i te mea kino. Ei akaraanga, te aronga e aruaru ra i te tu oraanga tau kore ka kokoti rai ratou i te au openga kavangu. E openga mataora kore te ka tupu no te tangata rave kino kare e tataraara.

21. Akapeea ra tatou e kokoti ei i te mea meitaki?

²¹ Akapeea, i reira, tatou e kokoti ei i te mea meitaki? Ka rauka ua i te pau i taua uianga ra ki tetai akatutuanga ngoie ua. Me ka inangaro te tangata tanu kai i te kokoti i te titona, ka tanu ainei aia i te kerite? Kare rava! E tanu rai aia i tana e inangaro ra i te kokoti. Pera katoa rai, me ka inangaro tatou i te kokoti i te mea meitaki, ka ruru rai tatou i te mea meitaki. Te inangaro ra ainei koe i te kokoti ua atu rai i te mea meitaki​—tetai oraanga mareka ua i teianei ma te manakonakoanga no te oraanga mutu kore i roto i to te Atua ao ou? Me koia ia, e ruru ua atu rai koe i te mea meitaki na te aaere anga ma te Atua e na te noo anga kia rotai ki tona au turanga tuatua tika.

22. Eaa te au apiianga ta tatou i apii mai mei ia Hosea pene 6 ki te 9?

²² Mei ia Hosea pene 6 ki te 9, kua apii tatou e a au apiianga te ka tauturu ia tatou kia aaere ma te Atua: (1) Ka kiteaia te tataraara mou na roto i te au angaanga; (2) kare te au atinga anake ua e akarekareka i te Atua; (3) e mamae ana a Iehova me ariu ke tona aronga akamori mei iaia; e (4) e kokoti ei i te mea meitaki, kia ruru tatou i te mea meitaki. Akapeea ra te au pene openga e rima o teia puka Pipiria i te tauturu anga ia tatou kia aaere ma te Atua?

[Tataanga Rikiriki i Raro]

Akapeea Koe me Pau?

• Akapeea e kiteaia ai te tu tataraara mou?

• Eaa te tumu kare te au atinga anake ua e akarekareka i to tatou Metua i te rangi?

• Mei teaa ra to te Atua manako ngakau me akaruke tona aronga akamori iaia?

• Eaa ta tatou ka ruru e kokoti ei tatou i te mea meitaki?

[Au Uianga Apii]

[Tutu i te kapi 23]

Mei te tumu rangi popongi ra, e ngaro ke atura to Iseraela aroa tiratiratu

[Tutu i te kapi 23]

Kua ka ua te au anoano kino o Iseraela mei te umu ka ua

[Tutu i te kapi 24]

Eaa te tumu i kopae ei a Iehova i te au atinga a tona iti tangata?

[Tutu i te kapi 25]

E kokoti ei i te mea meitaki, kia ruru rai tatou i te mea meitaki