E Mea Tika Tikai Ainei te Tiaporo?

EAA ra toou manako no runga i te Tiaporo? Te manako ra ainei koe iaia ei peretana tika tikai te timata ra i te au tangata kia rave i te au mea kino, me kore e akatutu ua aia no te kaveinga kino? E peretana kia matakuia ainei te Tiaporo, me kare ra kia kopaeia aia ei mea manako tamataku ua anga me kore ei tua akamanako ua? Te taikuia ra ainei te tuatua “tiaporo” ki tetai mana ririnui marama koreia i roto i te ao katoa e pini ua ake? E tuatua akairo ua ainei ra no te au tu kino i roto i te au tangata ra, mei ta te aronga apiipii e manganui i teia tuatau e manako ra?

Kare i te mea poitirere e e tuke te au manako o te au tangata no runga i te uianga e koai ra te Tiaporo. E akamanako ana e mei teaa ra te ngata te kitea anga te tu tikai o tetai tangata tei kite i te akapikikaa anga! Ko tera tikai me tauta aia i te uuna e koai tikai aia. Te akataka maira te Pipiria i te Tiaporo ma te reira tu. Te tuatua anga iaia ra e ko Satani, te karanga ra te reira: “Ko Satani oki tei akatutu angela katoa iaia uaorai no te mārama.” (2 Korinetia 11:14) Noatu tona kino, te akaari maira te Tiaporo iaia uaorai e e meitaki i te akavare anga i tetai ke. E me rauka iaia i te akairinaki i te au tangata e e kare aia e vai ana, te tano meitaki ra te reira ki tana akakoroanga.

Koai tikai, i reira, te Tiaporo? I naea e akapeea aia i tupu mai ei? Akapeea aia i te akakeu anga i te au tangata i teia tuatau? Eaa, ua atu i reira, te ka rauka ia tatou i te rave kia patoi atu i taua akakeu anga? Te vai ra i roto i te Pipiria te tuatua enua tika tikai no runga i te Tiaporo mei tona akamata anga mai tikai e te oronga maira i te au pauanga tika ki teia au uianga nei.

[Tutu i te kapi 3]

Mei teaa te ngata i te akataka anga i te tu tikai o tetai tangata te tauta ra i te uuna e koai tikai aia ra!