“E Tiratiratu Oki To Iehova ra Au Arataa”

“E tiratiratu oki to Iehova ra au arataa, e ko te aronga tuatua tika te ka aaere na reira.”​—HOSEA 14:9, NW.

1, 2. Eaa te tu akamataanga ta Iehova i oronga no te ngati Iseraela, inara eaa tei tupu kia ratou?

KUA oronga a Iehova i tetai akamataanga tiratiratu no te ngati Iseraela i te tuatau o te peroveta ko Mose. Inara, kia tae ki te akamataanga o te varu anere mataiti M.T.N., kua kino roa to ratou turanga e kua akaapaia ratou e te Atua no te rave ara rikarika. Te taka meitaki ra teia i roto ia Hosea pene 10 ki te 14. *

² Kua rokoia oki to Iseraela ngakau e te pikikaa. Te iti tangata o te patireia tai ngauru kopu kua “arote i te kino” e kua kokoti i te tuatua tika kore. (Hosea 10:1, 13) “I to Iseraela tamarikianga, i reira kua inangaro au iaia,” i tuatua maira a Iehova, “e mei Aiphiti maira kua kapiki atura au i taku tamaiti.” (Hosea 11:1) Noatu kua akaora mai te Atua i te ngati Iseraela mei te tuikaaanga i Aiphiti, kua tutaki mai ratou iaia ki te pikipikikaa e te akavareanga. (Hosea 11:12) No reira kua oronga a Iehova i teia akoanga kia ratou: “Ka oki koe ki toou Atua, ma te akono marie i te aroa takinga meitaki e te tuatua tika.”​—Hosea 12:6.

3. Eaa ra te ka tupu kia Samaria meameaau, inara akapeea te ngati Iseraela e tangiia mai ei?

³ E openga kino tikai to Samaria meameaau e tona ariki. (Hosea 13:11, 16) Inara te akamata ra te pene openga o te totou a Hosea ma te patianga: “Ka oki mai ana, E Iseraela e, ki to Atua ra kia Iehova.” Me kimi te ngati Iseraela i te akakoreanga ara ma te tataraara, ka tangi atu i reira te Atua. E tika, ka anoanoia ratou kia ariki e “e tiratiratu to Iehova ra au arataa” e kia aaere na reira.​—Hosea 14:1-6, 9.

4. Ka akamanako tatou i teea au kaveinga mei te totou a Hosea?

⁴ E maata te au kaveinga i roto i teia tuanga o te totou a Hosea te ka tauturu ia tatou kia aaere ma te Atua. Ka akamanako tatou i teia: (1) Te umuumu maira a Iehova i te akamorianga pikikaa kore, (2) e aroa tiratiratu to te Atua no tona iti tangata, (3) ka anoanoia tatou kia manakonako tamou ua rai ki roto ia Iehova, (4) e tiratiratu ua ana to Iehova au arataa, e (5) ka rauka i te aronga ara kia oki kia Iehova.

Te Umuumu Maira a Iehova i te Akamorianga Pikikaa Kore

5. Eaa te tu angaanga ta te Atua e umuumu maira mei ia tatou?

⁵ Te umuumu maira a Iehova ia tatou kia rave angaanga tapu kiaia na roto i te tu ma e te pikikaa kore. Inara, kua riro a Iseraela ei “vine kino” kare e uua. Kua ‘akamaataia te au atarau’ o te au tangata i Iseraela ei taangaanga i roto i te akamorianga pikikaa. Kua patu katoa teia au apoteiti i tetai au poupou​—penei e au pou e a tua tei maaniia ei taangaanga i roto i te akamorianga viivii. Ka ruru a Iehova i taua au atarau ra e ka takore i taua au poupou ra.​—Hosea 10:1, 2.

6. Kia aaere ei ma te Atua, ka anoanoia tatou kia takore i teea tu?

⁶ Kare o te tu pikikaa ngai i rotopu i to Iehova au tavini. Inara, eaa tei tupu ki te ngati Iseraela? Ae, “kua rokoia to ratou ngakau e te pikikaa”! Noatu kua piri ana ratou ki roto i tetai koreromotu ma Iehova ei iti tangata akatapuia kiaia, kua akaapa aia ia ratou no te pikikaa. Eaa ta tatou ka kite mai mei teia? Me kua akatapu tatou ia tatou uaorai ki te Atua, auraka tatou e pikikaa. Te akamatakite maira te Maseli 3:32 e: “E mea viivii oki na Iehova te aronga māro ra, tei te aronga tuatua-tika ra tana muna.” Kia aaere ei ma te Atua, ka anoanoia tatou kia akaari i te aroa “no roto i te ngakau mā, e te akava-ngakau meitaki, e te akarongo pikikaa kore.”​—1 Timoteo 1:5.

 Te Akaari ra te Atua i te Aroa Tiratiratu ki Tona Iti Tangata

7, 8. (a) I raro i teea au turanga e rauka ai ia tatou te rekareka i to te Atua aroa tiratiratu? (e) Eaa te ka tau kia rave tatou me kua rave tatou i tetai ara kino?

⁷ Me akamori tatou ia Iehova na roto i te mataara pikikaa kore e te tiratiratu, ka rauka ia tatou tona aroa takinga meitaki, me kore tona aroa tiratiratu. Kua akakiteia ki te ngati Iseraela marikonga kore: “E ruru i ta kotou uaorai ua ma te tuatua tika; e kokoti kia tau i te aroa takinga meitaki. E ko i te enua ei tanu na kotou uaorai, koi vai ei te tuatau no te kimi ia Iehova e tae ua mai aia i te oronga i te ikuikuanga ma te tuatua tika kia kotou.”​—Hosea 10:12.

⁸ Naringa ua ake te ngati Iseraela i kimi ia Iehova ma te tataraara! Ka rekareka roa aia i reira i te ‘oronga kia ratou i te ikuikuanga ma te tuatua tika.’ Me kua rave tatou uaorai i tetai ara kino, e kimi tatou ia Iehova, ma te pure kiaia kia akakore mai i te ara e te kimi i te tauturu pae vaerua mei te aronga pakari Kerititiano. (Iakobo 5:13-16) Kia kimi katoa tatou i te aratakianga a te vaerua tapu o te Atua, no te mea ‘ko tei ruru i ta tona uaorai kopapa, ka rauka iaia te kino i taua kopapa ra; kareka te ruru i ta te vaerua, ko te ora mutu kore tana e rauka i te vaerua ra.’ (Galatia 6:8) Mei te mea e me ‘ruru tatou i ta te vaerua,’ ka rekareka ua atu rai tatou i to te Atua aroa tiratiratu.

9, 10. Akapeea a Hosea 11:1-4 i tau tikai ei kia Iseraela?

⁹ Ka rauka ia tatou kia irinaki e ka akono ua rai a Iehova i tona iti tangata ma te tu aroa. Ka kiteaia te akapapuanga o teia i roto ia Hosea 11:1-4, i reira ka tatau tatou: “I to Iseraela tamarikianga, i reira kua inangaro au iaia, e mei Aiphiti maira kua kapiki atura au i taku tamaiti. . . . Ki te au itoro o Baala kua apai ratou i te atinga, e ki te au itoro taraiia ra kua akamata ratou i te maani i te atinga karakara. Kareka au nei, naku oki i apii ia Epheraima [te ngati Iseraela] i te aere, te takitaki anga ia ratou ki toku nga rima; e kare ratou i kite e naku i akaora ia ratou. Ki te taura a te tangata kua arataki maira au ia ratou, ki te au tatua o te aroa, e kua riro iora au kia ratou mei te aronga e taki ra i te apainga mei to ratou tanga, e kua apai marie ua maira au i te kai ki tetai e tetai.”

¹⁰ I konei kua akaaiteia a Iseraela ki tetai tamaiti meangiti. Kua apii aroa ua a Iehova i te ngati Iseraela kia aaere, na te takitaki anga ia ratou ki tona nga rima. E kua arataki maira ia ratou ki “te au tatua o te aroa.” Kare e aiteia te pumaana o teia tutu! E akamanako ua ana e ko koe tetai metua e tauturu ra i taau tamaiti kia apai i tona au takainga mua tikai. Te akatoro atura koe i to nga rima. Penei te taangaanga ra koe i te au tatua no taau manga tamaiti kia mou ki runga kia kore aia e inga. I na, mei te reira katoa rai te maru o to Iehova aroa noou. E mea rekareka roa nana kia arataki ia koe ki “te au tatua o te aroa.”

11. Na teea mataara te Atua i ‘riro ei mei tetai e taki ra i tetai apainga’?

¹¹ I te akono anga atu i te ngati Iseraela, ‘kua riro iora Iehova kia ratou mei te aronga e taki ra i te apainga mei to ratou tanga, e kua apai marie ua maira aia i te kai ki tetai e tetai.’ Kua rave te Atua mei tetai e taki ra me kore e opara ra i te apainga ki te atea kia rauka i te manu i te kaikai meitaki ua. I te aati anga ua te iti tangata o Iseraela i ta ratou apainga o te kauraroanga kia Iehova i aere ei ratou ki raro ake i te apainga takinga kino a to ratou au enemi. (Deuteronomi 28:45, 48; Ieremia 28:14) Auraka rava tatou kia topa ki roto i te akatereanga a te enemi maata, ko Satani, e kia kite i te mamae o tana apainga takinga kino. Mari ra, e aaere tiratiratu  ua atu rai tatou ma to tatou Atua aroa.

E Manakonako Tamou ua Rai ki Roto ia Iehova

12. Kia tau kia Hosea 12:6, eaa te umuumuia ra kia rauka ia tatou i te aaere ua atu rai ma te Atua?

¹² Kia aaere ua atu rai ma te Atua, ka anoanoia kia manakonako tamou ua rai tatou ki roto iaia. Kua akakiteia ki te ngati Iseraela: “E ko koe, ka oki koe ki toou Atua, ma te akono marie i te aroa takinga meitaki e te tuatua tika; e kia vai tamou ua rai te manakonakoanga i roto i to Atua ra.” (Hosea 12:6) Ka rauka i te au tangata Iseraela kia oake mai i te akapapuanga no tetai okianga tataraara kia Iehova na te akaari anga i te aroa takinga meitaki, na te taangaanga anga i te tu tuatua tika, e na te ‘manakonako tamou ua rai i roto i te Atua.’ Noatu eaa te roa i te aaere anga tatou ma te Atua, ka anoanoia kia tauta tikai tatou i te akaari i te aroa takinga meitaki, te taangaanga i te tu tuatua tika, e te manakonako tamou ua rai i roto i te Atua.​—Salamo 27:14.

13, 14. Akapeea a Paulo i te taangaanga anga ia Hosea 13:14, te oronga anga mai i teea tumu no tatou kia manakonako i roto ia Iehova?

¹³ Te oronga maira te totou a Hosea tei kapiti mai i te ngati Iseraela i tetai tumuanga takake no tatou kia manakonako i roto i te Atua. “E akaora mai au ia ratou mei te rima o Teoro,” kua tuatua maira Iehova. “E akaoki mai au ia ratou mei te mate maira. E te Mate e, teiea toou pao? Teiea toou pou, e Teoro e?” (Hosea 13:14) Kare a Iehova e akaora mai i te ngati Iseraela mei te mate kopapa tikai i taua taime ra, inara i te openga ka apuku aia i te mate e tuatau ua atu e ka akapuapinga kore ua i tana re.

¹⁴ I te tuatua anga ki te au taeake Kerititiano akatainuia, kua taiku atu a Paulo i te totou a Hosea e kua tata: “E kua riro anake teianei kopapa pe ua ei kopapa pe kore, e teianei kopapa mate ua ei kopapa mate kore, kua tupu ïa te tuatua tataia ra i reira, ‘Kua apukuia te mate i te re i riro ra.’ ‘E te mate e, teiea toou tara? E ade e, teiea toou re?’ To te mate nei tara, ko te ara ïa; e to te ara nei ririnui, ko te ture ïa. E teianei kia akameitakiia te Atua, ko tei oronga mai i te re no tatou, no to tatou Atu ra, no Iesu Mesia.” (1 Korinetia 15:54-57) Kua akatuakaou a Iehova ia Iesu mei te mate mai, i te oronga anga mai i tetai akapapuanga pumaana e ka akatuakaouia mai te au tangata i roto i to te Atua manako akamaaraanga. (Ioane 5:28, 29) E tumu mataora tikai kia manakonako i roto ia Iehova! Inara, e apinga tetai tei kapitiia mai ki te manakonakoanga o te tuakaouanga te akakeu ra ia tatou kia aaere ma te Atua.

E Tiratiratu ua Ana Rai to Iehova Au Arataa

15, 16. Eaa tei totouia no runga ia Samaria, e akapeea ra te totou i te akatupu angaia?

¹⁵ To tatou irinakianga papu e “e tiratiratu to Iehova au arataa” ka tauturu tikai ia tatou kia aaere ua atu rai ma te Atua. Kare te au tangata o Samaria i aaere na roto i to te Atua au arataa tuatua tika. I openga, ka tutaki ratou i tei tupu no ta ratou ara e te ngere i te akarongo i roto ia Iehova. Kua totouia: “E akaapaia oki Samaria, no tona meameaau i tona Atua. E inga oki ratou i te koke. E tipupu rikirikiia oki ta ratou uaorai tamariki, e ta ratou au vaine nui ra e tuakiia ia ratou uaorai.” (Hosea 13:16) Te akaari maira te au rekoti tuatua enua e ko Asura, tei nina ia Samaria, kua rauka ua ia ratou i te rave i taua au angaanga kino ra.

¹⁶ Ko Samaria oki te oire maata o te patireia tai ngauru kopu o Iseraela. Kareka ra, i konei, penei te tou ra te ingoa Samaria ki te katoaanga o taua patireia ra. (1 Ariki 21:1) Kua koropiniia e te Ariki o Asura ko Salamanesera V te oire o Samaria i te 742 M.T.N. Kia inga ra a Samaria i te 740 M.T.N., e maata tikai tona au tangata mamaata tei akataaia  ki Mesopotamia e Madai. Me na Salamanesera V i nina ia Samaria me kore me na tona mono ko Saragona II, te taka kore nei rai. (2 Ariki 17:1-6, 22, 23; 18:9-12) Noatu rai, te tou ra te au rekoti a Saragona ki te akataangaia e 27,290 ngati Iseraela ki te au ngai i te Pae ki Runga o Eupharata e Madai.

17. I to te akariro i to te Atua au turanga ei mea akavaavaa, eaa te ka tau kia rave tatou?

¹⁷ Kua tutaki maata tikai te au tangata o Samaria no tei kore ratou i aru i to Iehova au arataa tiratiratu. Ei au Kerititiano akatapuia, ka rokoia katoaia tatou e te au openga tumatetenga me riro mai tatou ei aronga rave ua rai i te ara, i te akariro anga i to te Atua au turanga ei mea akavaavaa. Auraka rava tatou kia aru i taua aerenga kino ra! Mari ra, e taangaanga tatou i te ako a te apotetoro ko Petero: “Auraka rava ra to kotou mate i te mate ta tangata, e te keia, e te rave tuatua kino, e te akamanamanata ia etai ke ra. Ei mate Kerisitiano tona ra, auraka aia e akama: ka akameitaki ra aia i te Atua i te reira.”​—1 Petero 4:15, 16.

18. Akapeea ra tatou me ‘akameitaki i te Atua’?

¹⁸ Ko tatou ka ‘akameitaki i te Atua’ na te aaere anga na roto i tona au arataa tiratiratu auraka ra na te aere anga na to tatou uaorai arataa. Kua ta tangata a Kaina no te mea kua aere aia na tona uaorai arataa e kare i akarongo ki te akamatakiteanga a Iehova e te vai ua ra te tarangaara e ka rokoia aia. (Genese 4:1-8) Kua ariki a Balaama i te tutaki mei te ariki o Moabi inara kua tauta ma te autu kore i te taumaa ia Iseraela. (Numero 24:10) E kua tamate te Atua i te ngati Levi ia Kora e etai ke atu no te meameaau i te mana o Mose raua ko Aarona. (Numero 16:1-3, 31-33) Papu roa e, kare tatou e inangaro i te aere na te ‘ara tiroa ta tangata o Kaina’ i te aru viviki ua ki roto i “te apa a Balaama,” me kore kia mate i roto i “te taumāro anga a Kora ra.” (Iuda 11) Inara, e ake e ka apa tatou, te oronga maira te totou a Hosea i te akapumaanaanga no tatou.

Ka Tau i te Aronga Ara kia Oki kia Iehova

19, 20. Kua rauka i te ngati Iseraela tei tataraara i te oronga i teea au atinga?

¹⁹ Noatu e kua turori ana i te rave ara kikino ka tau rai te reira aronga kia oki kia Iehova. Ia Hosea 14:1, 2, ka kite tatou i teia patianga: “Ka oki mai ana, E Iseraela e, ki to Atua ra kia Iehova, no te mea kua inga koe i toou kino. Ka apai i ta kotou uaorai tuatua e ka oki mai ei kia Iehova. Ka karanga atu ei kiaia, e kotou te tangata ravarai e, ‘E akakore mai koe i te kino; e ariki mai i te meitaki, e ka oronga atu matou i te tuatua ou a to matou vaa mei te toa puakatoro ou ra.’”

²⁰ Kua rauka i te ngati Iseraela tei tataraara i te oronga ki te Atua i ‘te tuatua ou a to ratou vaa mei te toa puakatoro ou ra.’ E au atinga akapaapaa ngakau tae tikai teia. Kua taiku atu a Paulo i teia totou i tona raurau anga atu i te au Kerititiano kia “oronga ua tatou ki te Atua i te atinga akapaapaa, koia oki, te ua o te vaa ra i te aaki anga ki te katoatoa i tona ra ingoa.” (Ebera 13:15) E akameitakianga tikai kia aaere ma te Atua e kia oronga i taua au atinga ra i teia tuatau!

21, 22. Eaa ra te akaora akaouanga ta te ngati Iseraela ka kite?

²¹ Kua oronga te ngati Iseraela tei akaruke i to ratou aerenga marikonga kore e kua ariu akaou mai ki te Atua i ‘te tuatua ou a to ratou vaa mei te toa puakatoro ou ra.’ I reira ratou i kite ei i te akaora akaouanga pae vaerua, mei ta te Atua tikai i taputou mai. Te karanga maira a Hosea 14:4-7 e: “E akaora [Iehova] i to ratou tu akarongo mou kore. E inangaro au ia ratou no toku uaorai anoano, no te mea kua kore toku riri iaia. E riro oki au mei te au ra kia Iseraela. E puera mai aia mei te riri ra, e e toro tona au aka mei ia Lebanona rai. E mangamanga atura tona au rara, e tona ra tu ngateitei e riro ia mei te tumu orive ra, e tona kakara e aite ia mei to Lebanona ra. E riro akaou ratou ei aronga noo i raro i tona maru. E akatupu oki ratou i te titona, e ka tuputupu mai mei te  vine ra. E tona ra akamaaraanga e aite ia mei te uaina ra o Lebanona.”

²² Te ngati Iseraela tei tataraara ka akaoraia i te pae vaerua e ka rekareka akaou i te aroa o te Atua. Ka riro a Iehova mei te au ou ua ra kia ratou na roto i te tu e ka akameitaki maata tikai aia ia ratou. E rauka oki i tona iti tangata akaoraia te tu ngateitei “mei te tumu orive ra,” e ka aaere oki ratou na roto i to te Atua ra au arataa. I te mea e te tauta tikai nei tatou i te aaere ma te Atua ko Iehova, eaa ra te umuumuia maira ia tatou?

Aaere Atu Rai na Roto i to Iehova Au Arataa Tiratiratu

23, 24. Te taopenga ra te puka o Hosea ki teea totou akamaroiroi, e akapeea ra te reira i te akakeu anga ia tatou?

²³ Mei te mea e ka aaere atu rai tatou ma te Atua, ka anoanoia kia taangaanga tatou i “te pakari no runga maira” e kia tarotai ua rai ki tona au arataa tiratiratu. (Iakobo 3:17, 18) Te tatau ra te irava openga o te totou a Hosea e: “Koai tei pakari, e ka marama aia i teia au mea nei? Tei pakari, e ka kite aia i te reira? E tiratiratu to Iehova ra au arataa, e ko te aronga tuatua tika te ka aaere na reira; kareka te aronga rave ara ra, e inga ia ratou i te reira.”​—Hosea 14:9.

²⁴ I to te aratakiia e te pakari e e te au turanga o teianei ao, ka anoanoia kia tauta tikai tatou i te aaere na roto i to te Atua au arataa tiratiratu. (Deuteronomi 32:4) E 59 mataiti me kore e ara atu to Hosea rave ua anga i te reira. Kua akakite aia ma te akarongo mou i te au karere tu-Atua, ma te kite e ka marama ua te aronga tei rauka te pakari e tei akono meitaki i taua au tuatua ra. Akapeea ra tatou? Me akatika a Iehova ia tatou kia rave i te akakitekite, ka kimi tamou atu rai tatou i te aronga te ka ariki ua mai ma te pakari i tona takinga meitaki aroa ua. E te rekareka roa nei tatou i te rave i teia ma te taokotai pu tikai ki “te tavini akono meitaki e te pakari.”​—Mataio 24:45-47.

25. Ta tatou akamanakoanga no runga i te totou a Hosea ka tauturu ia tatou kia rave i teaa?

²⁵ Ta tatou akamanakoanga no runga i te totou a Hosea ka tauturu ia tatou kia aaere ua atu rai ma te Atua ma te manakonakoanga no te ora mutu kore i roto i tona ao ou tei taputouia mai. (2 Petero 3:13; Iuda 20, 21) E manakonakoanga manea tikai! Ka riro mai taua manakonakoanga ra ei mea tika uaorai me akapapu tikai tatou na roto i te tuatua ma te angaanga e te akakoro tikai ra tatou me karanga tatou e: “E tiratiratu oki to Iehova ra au arataa.”

[Tataanga Rikiriki i Raro]

Akapeea Koe me Pau?

• Me oronga tatou i te akamorianga ma ki te Atua, mei teaa ra te tu o tana raveanga kia tatou?

• Eaa te tumu ka manakonako tamou ua atu ei tatou i roto ia Iehova?

• Eaa te tumu i irinaki papu tikai ei koe e e tiratiratu to Iehova au arataa?

• Akapeea tatou me aaere ua atu rai na roto i to Iehova au arataa tiratiratu?

[Au Uianga Apii]

[Tutu i te kapi 28]

Ariki i te tauturu pae vaerua mei ko i te aronga pakari Kerititiano

[Tutu i te kapi 29]

Te oronga maira te totou a Hosea i te tumuanga tau no tatou kia manakonako i roto i ta Iehova au taputou no te tuakaouanga

[Au Tutu i te kapi 31]

Kia aaere ua atu rai ma te Atua ma te manakonakoanga o te ora mutu kore