“No Ko ia Iehova ra te tauturu Iaku”

Te Apai Maira te Akaatinga Uaorai i ta Iehova Akameitakianga

TE AAERE ra tetai tangata na runga i te patikara i roto tikai i te au vao rakau o Cameroon. Kua roa te tuatau, kua aere atu aia na runga i te au mataara puke te vai e na roto i te vari, aro atu anga i te kino e rauka ai i te akamaroiroi atu i tetai ke. Kia apii i tetai pupu akatakakeia, e aaere ana etai i Timipapue e 15 kiro mita na roto i te au kauvai puke te vai, akanoo meitakianga i to ratou au kakau e te au tamaka ki runga i to ratou katu kia kore e mau. I tetai ngai ke atu, kua tu mai tetai vaine i te ora a i te popongi i te atoro e te apii atu i tetai neti i tona ora e va ua mai ana aia i te tuatau popongi roa i roto i te ra.

Eaa te apinga aiteitei i roto i teia au tangata e akono ra i taua au tautaanga? E au orometua tamou pouroa ratou no te Au Kite o Iehova te piri atura ki roto i te angaanga no te apiianga i te tuatua mou Pipiria. Te kapitiia maira te au painia tamou e te takake, au mitinari, au akaaere tutaka, e te au tauatini ua atu aronga tauturu i te au kainga Betela takapini i te ao nei. E kua kiteaia ratou no to ratou tu akaatinga uaorai. *

Akakoroanga Tau Meitaki

Te akarongo ra te Au Kite o Iehova i te akoanga a te apotetoro ko Paulo kia Timoteo: “E akamaroiroi kia vai meitaki rai koe ki mua i te aroaro o te Atua, ei rave angaanga kare e akama anga, e te tika oki i te tua i te tuatua-mou ra.” (2 Timoteo 2:15) Inara eaa te akakeu ra i te au anere tauatini ua atu Kite kia tavini ei au orometua tamou?

Me uiia ana te au tavini tamou eaa ratou i tamou marie ei ia ratou uaorai i roto i ta Iehova tavinianga, e o mai ana i roto i ta ratou pauanga te aroa no te Atua e no te au taeake tangata. (Mataio 22:37-39) E mea tau tikai teia, no te mea me kare te aroa te akakoroanga, e puapinga kore ua te au tautaanga.​—1 Korinetia 13:1-3.

Tavinianga Akaatinga Uaorai

Kua ariki pouroa te au Kerititiano akatapuia i ta Iesu kapikianga: “Me te anoano ra tetai i te aru mai iaku nei, e akaruke aia iaia uaorai e ka apai ei i tona rakau tamamae e ka aru tamou mai ei iaku.” (Mataio 16:24, NW) Kia akaruke ia tatou uaorai te aiteanga kia kauraro puareinga ua e kia aratakiia e te Atua ko Iehova raua ko Iesu Karaiti e tei ia raua te tika ia tatou. No te manganui, kua taki atu teia ki tetai tavinianga akaatinga uaorai i roto i te angaanga orometua tamou.

E manganui te Au Kite tei tauta maata i te akamaata atu i ta ratou tavinianga kia Iehova. E akamanako ana ia Júlia e 56 mataiti i te pakari, e painia tamou i São Paulo, i Paratiri. “Kua ringi mai tetai taeake Tinito i te ui mai kiaku me ka inangaro au i te apii i te reo Tinito,” te maara ra aia. “No toku mataiti, kare au i manako mai ana i te apii i tetai reo ou. Inara i nga mea ra i muri mai, kua ariki au i te akaaoanga. I teia tuatau, ka rauka iaku i te oronga i te au tuatua akamataanga Tuatua Tapu i roto i te reo Tinito.”

Kua ripoti mai te opati manga no te Au Kite o Iehova i Peru: “I roto i te au mataiti ua akenei,  e au anere ua atu painia tamou tei neke atu ki te au ngai kare i tuangaia, akaarianga i tetai tu mataku kore e te akaatinga uaorai. Kua neke atu ratou ki te au taoni mamao tikai e kare e au ngai mako aere i reira e e kotinga ua te au atianga no te angaanga. Te inangaro ra teia au taeake e te au tuaine i te rave i te ka rauka ia kia noo ua ki roto i ta ratou au tukuanga angaanga. Inara tei puapinga roa atu, ta ratou angaanga i roto i te angaanga orometua e akameitakianga ia mei tetai ngai ki tetai. Te ripoti maira te au akaaere tutaka e kua akamataia te au pupu ou ma te tauturu a teia au painia tamou akaatinga uaorai.”

Tetai au Kerititiano kua tuku i to ratou oraanga ki roto i te mate e rauka ai i te tauturu i te au taeake irinaki. (Roma 16:3, 4) Kua ripoti mai tetai akaaere kotinga i roto i tetai ngai tamakianga o Aperika: “I mua ake i te taeria ia te arai mataara openga i rotopu i te au ngai nooia e te au meameaau e tera ra tei akatereia e te kavamani, kua koropiniia maua ko taku vaine i nga akatere vaeau meameau e a e to ratou au tiaki, tei ui mai e koai maua. I te akaraanga i to maua kati akatakaanga, kua kite mai ratou e no ko mai maua i te ngai akatereia e te kavamani, e kua tarotokaka mai ratou. Kua akaapaia au e e tangata aroro. No reira, kua manako mai ratou i te pei atu iaku ki roto i tetai vaarua. Kua akataka atu au e koai maua, e taopenga mai kua tuku ratou ia maua kia aere.” Mei teaa tikai te au putuputuanga i te rekareka anga e kua autu teia nga tokorua akaatinga uaorai i te atoro atu ia ratou!

Noatu te au manamanata kiteaia, te maata ua maira te au pupu orometua tamou takapini i te ao nei. (Isaia 6:8) Te akaperepere nei teia aronga angaanga maroiroi i ta ratou arikianga no te tavini anga ia Iehova. Ma taua tu aiteite rai no te akaatinga uaorai, te akapaapaa nei te au mirioni ua atu aronga ke ia Iehova. Aru mai, kua akameitaki maata aia ia ratou. (Maseli 10:22) Papuia no te akameitakianga e te turuturuanga tamou, te akaata ra taua aronga angaanga pakari i te tu o te tangata tata taramo tei imene e: “No ko ia Iehova ra te tauturu iaku.”​—Salamo 121:2.

[Tataanga Rikiriki i Raro]

[Tataanga i te kapi 9]

“E puareinga roa to toou ra au tangata, i te rā o toou ra mana.”​—SALAMO 110:3

[Pia i te kapi 8]

TE AKAPEREPERE RA IEHOVA I TANA AU TAVINI AKONO

“Kia maroiroi kotou, auraka e ngaueue, kia maata nei te rave anga i te angaanga a te Atu, auraka e tivata, kua kite oki kotou e, kare te mea puapinga kore te angaanga a te Atu, ta kotou e rave na.”​—1 Korinetia 15:58.

“Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na.”​—Ebera 6:10.