Te Irinaki Tikai ra Ainei Koe e e Tiaporo Tetai?

TE AKATUTU maira te au Tuatua Tapu i te Tiaporo ei peretana tika tikai. Kare te mata o te tangata e kite atu iaia mei taua tumu rai e kare te au mata o te tangata e kite atu i te Atua. “E Vaerua te Atua,” i na te Pipiria ei. (Ioane 4:24) E mea ora vaerua te Tiaporo. Inara, kare mei Tei Anga ra, e akamata anga to te Tiaporo.

I mua roa ake ka anga ai te Atua ko Iehova i te au tangata, e manganui te au mea ora vaerua tana i anga. (Iobu 38:4, 7) I roto i te Pipiria kua tapaia teia au mea vaerua nei ei au angera. (Ebera 1:13, 14) Kua anga te Atua ia ratou pouroa ma te apa kore​—kare tetai ia ratou ei tiaporo me kore ma tetai tu kino. Akapeea, i reira, i rauka mai ei te Tiaporo? Te tuatua “tiaporo” te aiteanga ko “tei akakino” ra e no reira te taikuia ra ki tetai tangata tei akakite i te au pikikaa akakino anga no runga i tetai ke. Te aiteanga o “Satani” ko “Tei Patoi” ra. Mei tetai tangata tiratiratu o mua ana tei akariro iaia uaorai ei keia na te keia anga, kua rave tetai o te au tamariki vaerua apa kore a te Atua ra i te anoano tau kore e te akariro anga iaia uaorai ko Satani te Tiaporo. Te akataka maira te Pipiria i te ravenga no te akaviivii iaia uaorai na roto i teia tu: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara; e kia rave akaopeia te ara ra, anau maira tana ko te mate.”​—Iakobo 1:14, 15.

Kua tupu tikai teia. Te anga mai anga te Atua ko Iehova i nga tangata mua, ia Adamu raua ko Eva, te akarakara ua maira te angera te vaitata ra i te akameameaau i te Atua. Kua kite aia e kua akaue a Iehova ia Adamu raua ko Eva kia akaki i te enua ki te au tangata tuatua tika, te ka akamori i Tei Anga ra. (Genese 1:28) Kua kite teia angera e penei ua ake ka rauka mai iaia ra te akangateitei anga e te puapinga anga. Kua akakeuia e te noinoi, kua akamorimori aia i tei tau ra na Tei Anga anake ra​—te akamori anga a te tangata ra. Kare i kopae ana i taua anoano tau kore ra, kua tatanu teia tamaiti vaerua a te Atua i te reira e akakeuia atura e taua anoano ra kia akakite i te pikikaa e oti akera te meameaauanga. E akamanako ana i tana i rave.

Kua taangaanga te angera meameaau i tetai ovi kia tuatua ki te vaine mua, ko Eva. “Koia ïa,  kua tuatua mai te Atua e, Auraka korua e kai i to te au rakau katoa o te kainga nei?” ta te ovi i ui kia Eva. Te akakite anga a Eva i ta te Atua akauenga e te utunga no te akarongo kore anga ki te reira, kua akakite atura te ovi e: “Kare rava korua e mate: Kua kite oki te Atua e, i te rā e kai ei korua i to reira [te tumu rakau i rotopu i te kainga], ka puera ïa to korua mata, e ka riro korua mei te Atua ra te tu, i te kite i te meitaki e te kino.” (Genese 3:1-5) Te akaapaanga ra e kare te Atua i akakite ana i te tika kia Adamu raua ko Eva. Na te kai anga i te ua o taua rakau ra, tei manakoia ka riro mai a Eva mei te Atua rai, tei iaia te tika anga i te iki i te meitaki e te kino. Ko tera te pikikaa mua i tuatuaia. No te akakite anga i te reira kua akariro i taua angera ra ei akakino. Kua riro katoa mai aia ei patoi i te Atua. No reira te akataka maira te Pipiria i teia enemi no te Atua ra e “ko taua ovi taito ra ïa, ko tei karangaia i te diabolo ra, e ko Satani oki.”​—Apokalupo 12:9.

“E Matakite”

Kua tupu mai te pikikaa ta te Tiaporo i akakite atu kia Eva mei tana rai i parani ana. Te karanga ra te Pipiria e: “E kite akera te vaine e rakau meitaki ei kai, e te taurekareka no te mata, e te rakau anoano oki kia rauka te kite; kua rave iora aia i te kai no rungao ra, kai iora, apai atura oki ki tana tane, e kua kai katoa iora oki aia.” (Genese 3:6) Kua irinaki atu a Eva ia Satani e kare i akarongo ana ki te Atua. Kua rauka katoa iaia ra kia aati a Adamu i te ture a te Atua. Kua autu i reira i te Tiaporo i te akanoo anga i nga tokorua mua ki runga i tetai aerenga meameaau i te patoi anga i te Atua. Mei reira mai, kua taangaanga a Satani i te akakeu anga kitea koreia ki runga ake i te au angaanga a te tangata. Tona akakoroanga? Kia anga ke atu i te au tangata mei te akamorianga i te Atua mou e kia oronga mai i ta ratou akamorianga kiaia uaorai. (Mataio 4:8, 9) Ma te tumu meitaki, i reira, te akamatakite maira te au Tuatua Tapu e: “E akono meitaki, e matakite, te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.”​—1 Petero 5:8.

Mei teaa atura te akaari taka meitaki mai anga te Pipiria i te Tiaporo ra e ei peretana vaerua tika tikai​—e angera tei riro mai ei viivii e te kino tikai! Te takainga puapinga maata ra i te matakite anga tatou koia oki kia kite e te vai tikai ra aia. Inara e maata atu te o maira i to tatou akono meitaki anga e te vai matakite anga. E puapinga katoa kia kore e riro ei kite kore no ta Satani “au ravenga” e no tana au tu no te akavare anga i te tangata. (2 Korinetia 2:11) Eaa tana au ravenga? E akapeea tatou i te patoi ketaketa atu anga i te reira?

Taangaanga ra te Tiaporo i to te Tangata Anoano Akatuangaia Mai

Kua akara ua mai ana te Tiaporo i te au tangata mei te anga mai anga o te tangata ra. Kua kite aia i te tu o te tangata​—tona au anoano, tona au inangaro, e tana au umuumuanga. Kua kite meitaki a Satani e kua angaia te tangata ma tetai anoano pae vaerua, e kua taangaanga kikite te Tiaporo i teia anoano. Akapeea ra? Na te akakite mai anga i te au pikikaa akonoanga ki te tangata. (Ioane 8:44) E tukeke e e oripu ua te au apiianga akonoanga e manganui no runga i te Atua. I toou manako ra toai akakoroanga te inangaro maira i teia? Kare te au apiianga tukeke pouroa e tika ana. Kare ainei, i reira e, kua akapapa takakeia e kua taangaangaia e Satani te au apiianga e manganui a te akonoanga ra kia arataki ke atu i te tangata ra? Ko te tika, te taiku ra te Pipiria iaia ra ko “te atua o teianei ao ra,” te akapoiri ra i te au manako o te tangata.​—2 Korinetia 4:4.

Te oronga maira te tuatua mou tu-Atua i te paruru anga kia patoi atu i te au akavareanga akonoanga. Kua akaaite te Pipiria i te tuatua mou no te Tuatua a te Atua ki te tatua ta tetai tangata vaeau e aao ra i te tuatau taito ei paruru i tona taukupu. (Ephesia 6:14) Me apii koe i te kite no te Pipiria e te akono anga i ta te reira  karere, mei te mea rai e te tatua ra koe i te reira, na te Tuatua a te Atua e paruru ia koe kia kore e akavareia e te au pikikaa a te akonoanga e te au tarevake.

Te inangaro pae vaerua o te tangata ra kua arataki atu iaia ra kia akarakara i te mea kitea koreia. Kua akatuera atu teia iaia ki tetai akaou mai au ravenga akavareanga a Satani. Te taangaanga anga i to te tangata ra inangaro i te kite i te mea tuke e te mea muna ra, kua taangaanga a Satani i te purepure kia akaaere aia i te manganui. Mei tetai tangata opu manu e taangaanga ra i te maunu ei akavare i tana ereere ra, kua taangaanga a Satani i taua au ravenga mei te tauraatua, te akara etu, te ravenga tamoe, te angaanga taunga, te akara i te kapu rima, e te manamana kia akavare e kia opu atu i te tangata takapini i te ao katoa.​—Levitiku 19:31; Salamo 119:110.

Akapeea koe i te paruru anga ia koe uaorai kia kore e opuia e te purepure ra? Te akakite ra a Deuteronomi 18:10-12 e: “Auraka rava tetai e kitea i rotopu ia kotou e apai i tana tamaiti e tana tamaine kia na roto i te ai, auraka ei tauraatua, e te akara tumurangi, e te purepure, e te akarakara, E te kebere, e tei kimi i te vaerua kino, e te peu purepure, e tei ui ki tei mate ra. Ko te aronga katoa oki i rave i te reira au peu e aronga viivii ïa na Iehova; e no te reira au mea viivii i tuaru ei to Atua ra ko Iehova ia ratou ki mua ia koe ra.”

E tika te akoanga a te Tuatua Tapu: Auraka rava e rave i te purepure. Akapeea ra me kua o ana koe i roto i etai ravenga no te purepure e i teianei te inangaro ra i te akamutu? E aru koe i te akaraanga o te au Kerititiano mua i roto i te oire o Ephesia. I te ariki anga ratou i “[“te tuatua a Iehova ra,” NW],” i na te Pipiria ai, “e manganui oki te aronga peu tu ke i apai mai i ta ratou au buka, kua tutungi iora i te ai ki mua i te aroaro o te tangata ravarai.” E aka moni tikai taua au puka. Ko te moni o taua au puka ra e 50,000 te moni ario. (Angaanga 19:19, 20) Inara, kare te au Kerititiano i Ephesia i taroaroa ana i te takore atu i te reira.

Takete ra a Satani i te Au Tu Paruparu o te Tangata

Kua riro mai tetai angera apa kore ko Satani te Tiaporo no te mea kua tuku ua aia ki te anoano no te akangateitei anga iaia uaorai. Kua akakeu katoa aia i roto ia Eva i tetai anoano parau e te noinoi kia riro mai mei te Atua rai. I teia tuatau, e manganui ta Satani e opu ra na te akakeu anga i te manako akaparau i roto ia ratou. Ei akaraanga, te manako ra etai pae e e meitaki atu to ratou iti tangata, te pupu eteniki, me kore te enua i to tetai ra. E tuke tikai teia ki ta te Pipiria e apii ra! (Angaanga 10:34, 35) Te akakite taka meitaki maira te Pipiria e: “I anga [te Atua] i te tangata o te pa enua katoa nei no roto mai i te tangata okotai ra.”​—Angaanga 17:26, NW.

Ko tetai paruru anga tau i te patoi atu i ta Satani akakeu anga i te parau koia oki ko te tu akaaka. Te ako maira te Pipiria ia tatou e “eiaa e maata te manako [ia tatou uaorai], i tei tau iaia kia manako ra.” (Roma 12:3) “E patoi mai te Atua i te aronga nengonengo,” ta te reira e akakite ra, “e oronga maira i te aroa ua i te aronga akaaka.” (Iakobo 4:6) Ko tetai mataara papu  tikai kia patoi atu i te au tauta anga a Satani koia oki kia akaari i roto i toou uaorai oraanga i te tu akaaka e tetai atu au tu tei arikiia mai e te Atua.

Te inangaro katoa ra te Tiaporo i te taangaanga i te tu paruparu o te tangata no te tuku anga i te au ki te au anoano pae kopapa tau kore. To te Atua ko Iehova akakoro anga no te au tangata ra kia rekareka i te oraanga. Me akatupuia te au anoano i roto tikai i te kotinga anga o to te Atua ra anoano, e tu mataora tikai te ka tupu mai. Inara te timata ra a Satani i te au tangata kia akamerengo i to ratou au anoano no te au tu tau kore. (1 Korinetia 6:9, 10) E meitaki atu i te akara mou ki runga i te au mea viivii kore e te meitaki ra. (Philipi 4:8) Na teia e tauturu ia koe kia taangaanga i te akaaere ketaketa i toou au manako e te au manako ngakau.

E Patoi ua Atu i te Tiaporo

Ka autu ainei koe i te patoi atu i te Tiaporo? Ae, ka rauka ia koe. Te akapapu maira te Pipiria kia tatou e: “E patoi atu i te diabolo, e nana e rere ke atu.” (Iakobo 4:7) Noatu e te patoi ra koe ia Satani, kare aia e tuku vave i te au e te akamutu anga i te tamanamanata mai ia koe ia koe e akono ra i te kite i te Atua. Kare, ka tauta akaou te Tiaporo “i tetai tuatau iti” ra. (Luka 4:13) Inara, auraka koe e mataku i te Tiaporo. Me patoi ua atu koe iaia ra, kare e rauka iaia i te akaanga ke ia koe mei te Atua mou.

Inara, te patoi anga i te Tiaporo, te umuumuia ra te kite e koai ra aia e akapeea aia i te akavare anga i te au tangata pera katoa te au ravenga no te paruru anga taau ka rave i te patoi atu i tana au ravenga. Okotai ua tumu tika tikai no taua kite ra​—te Tuatua a te Atua, te Pipiria. No reira kia ketaketa i roto i taau tautaanga kia apii i te au Tuatua Tapu akauruia, e e taangaanga i te reira i roto i toou oraanga i taau i kite mai mei roto mai i te reira. Te mataora nei te Au Kite o Iehova i toou ngai i te tauturu atu ia koe ma tetai apii kare e tutaki anga i tetai tuatau te tau ra kia koe. Auraka e taroaroa i te aravei atu ia ratou ine me kore i te tata atu ki te aronga nenei o teia makatini.

Ia koe e rave ra i te apii i te Pipiria, te anoanoia ra koe kia kite e ka taangaanga a Satani i te patoianga me kore i te takinga kinoanga kia akamutu koe i te apiianga i te tuatua mou mei roto mai i te Tuatua a te Atua. Penei ka riri mai etai o toou aronga akaperepere ra ia koe no te mea te apii ra koe i te Pipiria. Penei ka tupu mai teia no te mea kare ratou i kite i te au tuatua mou umere tei kiteaia i roto i reira. Penei ka aviri atu tetai papaki ia koe. Inara me ka tuku atu ki taua au taomianga ra te akamareka tikai ra ainei i te Atua? Te inangaro ra te Tiaporo i te tamaromaroa ia koe kia akamutu koe i te apii no runga i te Atua mou. Eaa oki koe ka akatika ai kia re atu a Satani? (Mataio 10:34-39) Kare aau kaiou kiaia no tetai apinga. E kaiou ra taau kia Iehova no toou oraanga. No reira, e tauta i te patoi atu i te Tiaporo e te ‘akarekareka i to Iehova ngakau.’​—Maseli 27:11.

[Tutu i te kapi 6]

Kua tutungi te aronga tei riro mai ei au Kerititiano i ta ratou au puka no runga i te purepure

[Tutu i te kapi 7]

E rave i tetai ikianga ketaketa kia apii i te Pipiria