Te Tu Karape no te Akarongo Anga ma te Aroa

“MEITAKI maata no tei akarongo mai.” I karanga ua akenei ainei tetai tangata te reira kia koe? Aue te reira i te akameitakianga tikai! Vaitata rai e akaperepere ana te katoatoa i tetai tangata akarongo meitaki. Na te akarongo meitaki anga, ka rauka ia tatou i te akaora i te au tangata tei taitaia me kore tei akateimaaia ma te au manamanata. E kare ainei te tangata akarongo meitaki e tauturu ana ia tatou kia rekareka i te au tangata? I roto i te putuputuanga Kerititiano, e tuanga maata te akarongo anga ma te aroa no te ‘akamaroiroi atu tetai ki tetai kia maata te aroa, e i te angaanga memeitaki ra.’​—Ebera 10:24.

Inara, e manganui te au tangata, e aronga kite kore i te akarongo. E reka ana ratou i te oronga i te ako, akakite i to ratou uaorai au tupuanga, me kore oronga i to ratou uaorai akaraanga manako e kia oronga atu i tetai taringa akarongo ki ta tetai e inangaro ra i te tuatua. E tu karape tikai te akarongo anga. Akapeea e rauka ai ia tatou i te apii kia akarongo ma te aroa?

Tetai Tumu Puapinga

Ko Iehova to tatou “Pu Ikuiku Maata Rava Atu.” (Isaia 30:20) Ka rauka iaia i te apii maata mai ia tatou no runga i te akarongo anga. E akamanako ana akapeea a Iehova i te tauturuanga i te peroveta ko Elia. Kua mataku ia e te au tamatakuanga a te Ariki Vaine ko Iezebela, kua oro a Elia ki roto i te metepara e kua akakite i te inangaro kia mate atu. I reira kua tuatua atu te angera a te Atua kiaia. I te akataka atu anga te peroveta i tona au mataku, kua akarongo mai a Iehova e kua akaari mai i Tona mana maata. Tei tupu? Kare i mataku akaou ana, kua oki atu a Elia ki tana tukuanga angaanga. (1 Ariki 19:2-15) Eaa ra a Iehova i tuku taime ei i te akarongo ki te au manamanata a tona au tavini? No te mea te manako maira aia ia ratou. (1 Petero 5:7) Ko teia tetai tumu puapinga i te riro mai anga ei tangata akarongo meitaki: E akamanako atu i tetai ke, e akaari i te inangaro tikai i roto ia ratou.

I te raveanga tetai tangata i Porivia i tetai angaanga kino pakari, kua rekareka aia i te rauka mai anga i te akamanakoanga tikai mei tetai taeake irinaki. Kua akataka mai te tangata: “Ko toku taime kino roa atu te reira i roto i toku oraanga. Naringa kare tetai taeake i tuku taime ana i te akarongo mai kiaku kua tuku takere ana au i te au i te tautaanga i te tavini ia Iehova. Kare aia i tuatua maata ana, inara i te kiteanga e e inangaro maata tona i te akarongo mai kua akamaroiroi tikai iaku. Kare au i inangaro ana i tetai pauanga; kua kite ua au eaa taku ka rave. Te inangaro ua ra au i te kite e te manako maira tetai tangata i toku manako. Kua akaora tana akarongo mai anga kiaku kia kore au e apukuia e te taitaia.”

Tetai Akaraanga maata i roto i te tu karape no te akarongo anga ma te aroa koia oki ko Iesu Karaiti. I muri poto ua ake i to Iesu mateanga, e rua ana nga pipi te teretere ra mei Ierusalema ki tetai oire mei tetai 11 kiro mita te mamao. Kare e ekokoanga kua taitaia mai raua. E no reira kua akamata a Iesu Karaiti akatuia i te aaere kapiti kia raua. Kua ui meitaki aia i te au uianga papa meitakiia kia akakite mai i to raua manako, e kua ariu mai te nga pipi. Kua akakite atu raua i te au manakonakoanga ta raua i akamanako atu e te reka kore e te oripu anga ta raua i kite mai i teianei. Kua tangi a Iesu ia raua, e tona akarongo anga kia raua ma te aroa kua akapapa i nga pipi kia akarongo mai. I reira a Iesu i ‘akakite kia raua i te au mea katoa nona ra i roto i te au Tuatua Tapu.’​—Luka 24:13-27, NW.

 Ko te akarongo na mua te mataara aroa kia akarongo mai tetai kia tatou. “Kua akamata toku nga metua e toku nga metua ongai i te patoi i te tu e utuutu ra au i taku tamariki,” i karanga ai tetai vaine Porivia. “Kua riri tikai au i ta ratou au tuatua, inara kua ekoko mai au iaku uaorai ei metua. I taua taime ra, kua atoro mai tetai o te Au Kite o Iehova iaku. Kua akakite mai aia kiaku no runga i ta te Atua au taputou. Inara, ko te tu i ui mai aia i toku manako kua akakite mai kiaku e te inangaro ra teia tangata i te akarongo mai. Kua pati atu au iaia kia aere mai ki roto, e kare i roa ana te akakite ra au i toku manamanata kiaia. Kua akarongo aia ma te akakoromaki. Kua ui mai aia eaa taku e inangaro ra no taku tamariki e eaa te manako o taku tane no runga i te reira. E pumaana tikai i te kiteanga e e tangata tetai i konei iaku te inangaro ra i e marama i toku tu. Iaia e akamata ra i te akaari mai kiaku eaa ta te Pipiria e tuatua ra no runga i te oraanga pamiri, kua kite mai au e te tuatua ra au ki tetai tangata te manako maira i toku turanga.”

“Kare te aroa . . . e kimi i te meitaki nona uaorai,” i karanga ai te Pipiria. (1 Korinetia 13:4, 5) Te akarongo anga ma te aroa, i reira, te akakite maira e kia tuku tatou i to tatou uaorai au inangaro ki te pae. Penei ka umuumu teia i te tamateanga i te tivi, tuku anga te nuti pepa ki raro, me kore te tamateanga te cell phone me te tuatua maira tetai ke kia tatou no runga i tetai apinga maata. Te akarongo anga ma te aroa te aiteanga e kia inangaro pakari tikai i te kite i te au manako o tetai ke. Te umuumu maira te reira kia tapu tatou mei te akamataanga i te tuatua no runga ia tatou uaorai na te karanga anga i tetai apinga mei te, “Te akamaara ra te reira iaku i tetai apinga tei tupu kiaku i tetai taime akenei.” Mei te mea e te meitaki ua ra taua tuatuaanga i roto i tetai pukapuka oaoa ua, ka inangaroia tatou kia tuku i te au inangaro uaorai ki te pae me te uriuri maira tetai tangata i tetai manamanata maata. Ka rauka te inangaro tikai i roto i tetai ke i te akaariia i roto akaou i tetai mataara ke.

Akarongo kia Kite Meitaki i te Au Manako

Kua rongo te au taeake o te tangata ko Iobu mei tetai tai ngauru o tana au tuatuaanga. E tikai, kua tuatua atu a Iobu: “Naringa i akarongo mai tetai i taku!” (Iobu 31:35) No teaa ra? No te mea kare ta ratou akarongo anga i oronga ana i te pumaana. Kare ratou i manako mai ana ia Iobu e kare katoa i inangaro ana i te marama i tona au manako. Papu tikai kare o ratou manako ngakau aroa ei aronga akarongo ma te tangi. Inara kua ako te apotetoro ko Petero: “Ko kotou katoatoa kia aiteite te manako, te akaarianga i te manako ngakau aroa, te raukaanga te inangaro akataeake, te tu akaroa ma te maru, te akaaka o te manako.” (1 Petero 3:8, NW) Akapeea tatou i te akaari i te manako ngakau aroa? Tetai mataara koia oki na te akaarianga i te akamanakoanga no te au manako o tetai ke e te tautaanga kia marama i te reira. Te akonoanga i te au tuatuaanga tangi mei te “e mea tamanamanata tikai te reira” me kore “penei kua manako mai koe e kare koe i marama meitakiia ana” ko tetai mataara ia i te akaari e te manakonako ra tatou. Tetai mataara ke atu koia oki kia tuku ki roto i ta tatou uaorai au tuatua eaa ta te tangata e akakite maira, akaarianga i reira e te marama ra tatou i tana e tuatua maira. Te akarongo anga ma te aroa te aiteanga e kia akamanako meitaki kare ua ki te au tuatua mari ra ki te au manako ngakau katoa te kitea marie ua maira.

E orometua tamou kite meitaki a Robert * no te Au Kite o Iehova. Kua akakite mai aia: “Kua riri mai au i taku angaanga orometua i tetai taime akenei. E no reira kua pati atu au kia tuatua atu ki te akaaere tutaka. Kua akarongo tikai aia e kua tauta i te marama i toku au manako. I te  akaraanga kua marama katoa aia i toku mataku e ka aviri aia iaku no toku tu. Kua akapapu mai te taeake iaku e te meitaki ua ra toku au manako, no te mea kua kite katoa ana rai aia iaia uaorai ma taua au manako ra. Kua tauturu tikai teia iaku kia aere ua atu.”

Ka rauka ainei ia tatou i te akarongo ma te ariki kore anga ki tei tuatuaia ra? Ka rauka ainei ia tatou i te karanga atu ki tetai tangata e te rekareka ra tatou i te akakiteanga mai eaa tona manako? Ae. Akapeea me kua o atu tetai tamaiti mapu i roto i tetai ta i te apii me kore kua oki mai tetai tamaine mapu ki te kainga e kua karanga mai e kua akainangaro aia i tetai tangata? Kare ainei ei mea meitaki atu no tetai metua kia akarongo e kia tauta i te marama eaa te aere ra i roto i te manako o te mapu i mua ake ka akataka atu ei eaa te tu tau e te tu tau kore?

“Te manako i roto i te ngakau tangata, mei te moana ïa,” i karanga ai Maseli 20:5, “e rauka maira taua manako ra i te tangata kite.” Me kare tetai tangata pakari e te kite e akakeuia i te oronga ua mai i te ako anga pati koreia, penei na tatou e pati atu iaia kia oronga mai i tana akoanga. Mei tera rai te turanga me akarongo tatou ma te aroa. Te umuumuia ra te kite meitaki i te kiriti mai te manako o tetai tangata ki vao. E mea meitaki atu i te ui i te au uianga, inara kia matakite tatou e auraka ta tatou au uianga e taii atu ki te au apinga muna. Penei e mea meitaki i te akakite atu e kia akamata mai te tangata e tuatua ra ma te au apinga e ngoie ua ake iaia i te tuatua. Ei akaraanga, penei tetai vaine te inangaro ra i te tuatua no runga i te au manamanata i roto i tona akaipoipoanga penei ka kite ngoie ua mai i te akamata na te tuatuaanga akapeea raua ko tana tane i aravei ei e i akaipoipo ei. Tetai tangata kua paruparu i roto i te angaanga orometua Kerititiano penei ka kite ngoie ua mai i te akamata na te akatakaanga akapeea aia i kite mai ei i te tuatua mou.

Akarongo Anga ma te Aroa​—E Akaaoanga

Te akarongo anga me te riri ra tetai tangata ia tatou e mea akaaoanga ia, no te mea kia paruru ia tatou uaorai ko to tatou tu natura ia. Akapeea tatou i te akonoanga i te akaaoanga? “Ko te tuatua maru ra tei akaanga ke i te riri,” i karanga ai Maseli 15:1. Kia pati aroa atu i te tangata kia tuatua e oti i reira kia akarongo marie iaia e akakite maira i tona mamae ngakau ko tetai mataara ia i te pau atu anga ma te maru.

Te au pekapeka riririri e o putuputu mai ana e rua nga tangata te ripiti ua ra eaa ta raua i tuatua takere ana. Te manako ra tetai e tetai e kare tetai tangata mai e akarongo mai ana. Mei teaa tikai te meitaki me tapu tetai ia raua e kia akarongo meitaki ua! E tika, e mea puapinga kia taangaanga i te tu akatere uaorai e kia akakite atu tetai tangata i tona uaorai manako na roto i te tu pakari e te aroa. Te akakite maira te Pipiria kia tatou: “Ko tei tāpu ra i tona vaa, e pakari tona.”​—Maseli 10:19.

Te kite karape i te akarongo anga ma te aroa kare e aere natura ua mai ana. Inara, e tu karape te reira te ka rauka i te apiiia na roto i te tauta e te maro anga. E kite karape puapinga tikai te reira kia rauka ia. Te akarongo anga meitaki tikai me tuatua mai tetai ke e akakiteanga ia o to tatou aroa. Te apai katoa maira te reira i te mataora kia tatou. Mei teaa tikai te pakari, i reira, kia tatanu i te tu karape no te akarongo anga ma te aroa!

[Tataanga Rikiriki i Raro]

[Tutu i te kapi 11]

Me te akarongo ra, kia tuku tatou i to tatou uaorai au inangaro ki te pae

[Tutu i te kapi 12]

Te akarongo anga me te riri ra tetai tangata e mea akaaoanga ia