‘Te Tupu Maata ra to Kotou Aroa’

KUA tupu tetai au numero tumatetenga natura i Tiapani i roto ia 2004. I roto i teia ko te au uriia, au vai puke, e te au ngaueue enua. Kua akatupu kino tikai te reira i te au oraanga e manganui, kapitiia mai te Au Kite o Iehova. (Koheleta 9:11) Teia au kino, ra, te oronga maira te au atianga no te Au Kite i te akaari i te aroa taeake no tetai e tetai.​—1 Petero 1:22.

Ei akaraanga, no te ua maata i roto ia Tiurai, tetai kauvai i rotopu tikai ia Tiapani kua puke i to te reira nga pae. Kua takino te vai puke e tere atu i te 20 are o te Au Kite o Iehova. I roto i tetai Are Uipaanga Patireia, kua kake te vai mei etai tai mita i runga ake i te taua. Ma te viviki, kua piri mai te Au Kite i roto i te au putuputuanga i te pae mai i te tauturu. E au anere ua atu tangata tauturu tei tama i te au are ki i te vari. Kua ma tikai te Are Uipaanga Patireia i te tamaia e kua akaouia i roto e rua ua rai epetoma.

Ia Okotopa 23, kua tupu tetai ngaueue enua te vaito ra e 6.8 i runga i te paunu Richter i roto i taua ngai rai. Mei tetai 40 tangata tei matemate, e tere atu i te 100,000 tangata tei akaateaia mei to ratou au kainga. Kua tipuia te vai, te kati, e te uira. Noatu e 50 kiro mita ua rai te mamao o te ngai i rotopu tikai o te ngaueue, kare te Are Uipaanga Patireia akaouia i kino ana. Kua riro viviki mai te reira e ko te ngai akaangaroi no te tuatau poto ua. Kua viviki te au akaaere Kerititiano i te akara no runga i te tu meitaki o to ratou au taeake irinaki e kua pumaana i te kite mai e kare tetai i kino ana me kore i mate. Maiata rai i tera mai popongi, e ono Au Kite tei rokoia e te vai puke i Tiurai kua oronga maroiroi i te tua kai e te vai i te ngai i kinoia. Nga mea ora i muri ake i te ngaueue enua, kua rauka uaia te au apinga tauturu.

“Kua manako mai te aronga tei rokoia e te au vai puke i te angaanga tauturu no te aronga rokoia e te ngaueue enua ei atianga i te akaari i to ratou arikianga no te tauturu ta ratou uaorai i rauka mai,” i karanga ai tetai akaaere. “Kua angaanga pakari ratou mei te popongi maiata e tae roa atu ki te roaanga po. E mei teaa tikai to ratou au mata i te marama anga ma te mataora!”

Kare te au vai puke e kare katoa te au ngaueue enua e au tamatakuanga ki te tatua no te aroa te kapiti ra te taokotaianga taeake Kerititiano no te Au Kite o Iehova. Tei tuke ra, me tupu ana taua au tumatetenga, ka kite mai te au Kerititiano i ta te apotetoro ko Paulo i akakite ki te au taeake irinaki i roto ia Tesalonia: ‘Te tupu maata ra to kotou aroa ia kotou uaorai e pini ua ake, kua maata rava ïa.’​—2 Tesalonia 1:3.