Aramakito​—E Openga Kino Ainei?

ARAMAKITO! Te akatu maira ainei teia tuatua i te au tutu o tetai akapouanga maata me kore o te enua e ka ra i te ai? E iti ua rai te au tuatua Pipiria mei ia “Aramakito” rai tei riro mai ei tuanga maata no te tuatuaanga o te au ra ua nei i teianei ao. Kua taangaanga atea uaia taua tuatua ra i te akataka anga i te au tuatau taitaia e aro maira i te tangata. Kua akakiia e te au pitiniti tamataoraanga te manako o te tangata ki te au tutu tamatakutaku o tetai “Aramakito” e aere maira. Kua uuna uaia taua tuatua ra ki roto i te muna e te au manako tarevake. Noatu e maata te au manako no runga i tona aiteanga, kare te maataanga ia ratou e rotai ana ki ta te Pipiria​—te tumu o taua tuatua ra​—te apii ra no runga ia Aramakito.

I te mea te akapiri atura te Pipiria ia Aramakito ki “te openga o teianei ao,” kare ainei koe e akatika e e mea puapinga kia marama meitaki tikai e eaa te aiteanga tikai o taua tuatua ra? (Mataio 24:3) E kare ainei i te mea tau kia uri ki te tumu maata tikai o te tuatua mou, te Tuatua a te Atua, kia kite i te au pauanga no runga i te turanga tikai o Aramakito e eaa te aiteanga o te reira noou e toou pamiri?

Ka akaari mai taua unuunumouanga ra e kare a Aramakito e apai mai i te openga kino, ka akatomo mai ra i tetai akamataanga mataora no te au tangata e inangaro ra kia noo e kia puapingaia i roto i tetai ao tuatua tika ou. Ka akameitaki roaia koe ki te marama meitaki tikai o teia Tuatua Tapu mou ia koe e akamanako ra i te uriurianga no runga i te aiteanga tikai o Aramakito i roto i te atikara e aru mai nei.

[Pia/Tutu i te kapi 3]

EAA RA A ARAMAKITO I TOOU MANAKO?

• E orokoti nukiria

• E tumatetenga no te ao natura

• E tutukianga o tetai apinga o te rangi ki te enua

• E akapouanga na te Atua i te aronga kino