Au Uianga a te Aronga Tatau

Ko te nga papa e rua ainei te apinga ua tei roto i te aruna no te koreromotu, me e au apinga ke atu tetai i roto katoa i te reira?

I te tuatau o te akatapuanga o te iero o Solomona i te 1026 M.T.N., “kare o roto i taua aruna ra mari ra i aua nga papa e rua ra, ta Mose i tuku i reira i Horeba ra, ka papau ei a Iehova i te koreromotu ki te tamariki a Iseraela ka aere mai ei ratou mei Aiphiti maira.” (2 Paraleipomeno 5:10) Inara, kare i akapenei ua ana.

“I te toru o te marama, o to te tamariki a Iseraela aerenga mai mei te enua maira mei Aiphiti,” kua tomo atu ratou i te metepara ra ko Sinai. (Exodo 19:1, 2) I muri akera, kua aere atu a Mose ki runga i te Maunga ko Sinai e kua rauka mai te nga papa toka e rua no te Ture. Kua akakite mai aia: “Kua anga maira au, eke maira au ki raro mei runga mai i taua maunga ra, kua tuku iora au i nga papa ki roto i taua aruna i angaia e au ra; kia vai ua ana i reira i ta Iehova i akaue mai kiaku ra.” (Deuteronomi 10:5) No te tuatau poto ua teia aruna, me kore e vairanga, ta Iehova i karanga kia Mose kia maani kia mou i nga papa toka o te Ture. (Deuteronomi 10:1) Kare te aruna no te koreromotu i papa ana kia taangaangaia aere roa ki te openga o te 1513 M.T.N.

I muri poto ua ake i to ratou akaoraanga mei Aiphiti ra, kua akamata te ngati Iseraela i te urutoe no runga i te kai. E no reira kua oronga mai Iehova i te mana na ratou. (Exodo 12:17, 18; 16:1-5) I taua taime ra, kua ikuiku a Mose kia Aarona: “Ka rave i tetai kapu, ka tuku ei i tetai omera māna ki roto, ka vaoo ei ki mua i te aroaro o Iehova, kia vaio ua ana e ope ua atu to kotou au uki ra.” Te karanga ra te tataanga: “Ko ta Iehova i tuatua mai kia Mose ra, koia oki ta Aarona i tuku i te pae o nga papa kite ra [e ngai vairanga no te au pepa puapinga], kia vaoo ua ana i reira.” (Exodo 16:33, 34) Kare ekokoanga e na Aarona i koikoi mai i te mana i roto i te tia i taua taime ra, te tuku anga i te reira i mua i te Aruna Kite ra ka tiaki roa e oti mai ei ia Mose i te maani i te Aruna e kua tuku atu i nga papa toka i roto i te reira.

Mei tei kite takereia, kua maaniia te aruna no te koreromotu i te openga o te 1513 M.T.N. Kua tukunaia te rakau a Aarona i roto i taua Aruna ra i muri ke roa mai, i muri ake i te meameaau anga a Kora e tetai atura. Kua taiku te apotetoro ko Paulo i “te aruna koreromotu . . . , i reira oki te kapu auro i akakiia i te māna, e te rakau a Aarona i pua ra e nga papa koreromotu ra.”​—Ebera 9:4.

Te mana e akameitakianga ia tei orongaia mai e te Atua i te 40 mataiti teretere anga o te ngati Iseraela i roto i te metepara. Kare i oronga akaouia ana i te “kai [anga] iora ratou i te sitona o te enua” taputou ra. (Iosua 5:11, 12) E akakoroanga tetai i tukunaia ai te rakau a Aarona i roto i te aruna no te koreromotu​—kia akonoia ei akairo me kore ei akapapuanga o tetai uki meameaau. Te akakite maira teia e kua vai ua rai te rakau i reira no te tuatau aere anga i roto i te metepara. I te akaraanga ka tau, i reira, i te taopenga e i muri ake i etai taime i te tomo anga a Iseraela i roto i te Enua Taputouia e i mua ake i te akatapuanga o te iero o Solomona, kua akaateaia te rakau a Aarona e te tia auro no te mana mei roto mai i te aruna no te koreromotu.