Auraka e Tuku i ta te Tiaporo Ngai kia O Mai

“Auraka e tuku i ta te diabolo ngai kia o mai.”​—EPHESIA 4:27.

1. Eaa ra te manganui i ekoko ei i te vaianga o te Tiaporo?

NO TE au anere mataiti, e manganui te au tangata tei manako ana i te Tiaporo ei mea ora ma te nga tara e te vaevae ngaa i roto i te kakau muramura e te taangaanga ra i te kokai i te uri mai i te au tangata kino ra ki roto i te ai era. Kare te Pipiria e turu ana i taua manako. Inara, kare ekokoanga, kua akatupu mai taua au manako tarevake ra kia ekoko te au tangata e mirioni ua atu i te vai anga o te Tiaporo me kore te manakoanga e te taangaanga uaia ra te tuatua ki tetai kaveinga kino.

2. Eaa etai au tikaanga Tuatua Tapu no runga i te Tiaporo?

² Te oronga maira te Pipiria i te akapapuanga kite mata e te akakiteanga taka meitaki e te vai nei rai te Tiaporo. Kua kite ana a Iesu Karaiti iaia i te ngai vaerua i te rangi ra e kua tuatua atu ana kiaia i runga i te enua nei. (Iobu 1:6; Mataio 4:4-11) Noatu e kare te au Tuatua Tapu i akakite mai i te ingoa mua o teia mea ora vaerua, kua kapiki te reira iaia ko te Tiaporo (te aite anga “Tei Akakino”) no te mea kua akakino aia i te Atua. Kua tapa katoaia aia ko Satani (te aiteanga “Tei Patoi”), no te mea kua patoi aia ia Iehova. Ko Satani te Tiaporo ra kua karangaia e ko “taua ovi taito ra,” i te akara anga no te mea kua taangaanga aia i tetai ovi i te akavare anga ia Eva. (Apokalupo 12:9; 1 Timoteo 2:14) Kua kitea katoaia aia ko “tei kino ra.”​—Mataio 6:13, NW. *

3. Eaa te uianga ta tatou ka akamanako?

³ Ei au tavini no Iehova, kare tatou e inangaro kia aite atu kia Satani, te enemi maata o te Atua mou anake ra. E mea tau i reira kia akarongo atu tatou ki te akoanga a te apotetoro ko Paulo e: “Auraka e tuku i ta te diabolo ngai kia o mai.” (Ephesia 4:27) Eaa ra, i reira, etai au ravenga a Satani kare e tau kia aru atu tatou?

Auraka e Aru i Tei Akakino Maata Ra

4. Akapeea “tei kino ra” i te akakinoanga i te Atua?

⁴ E mea tau kia kapikiia “tei kino ra” ko te Tiaporo, no te mea e akakino tangata aia. Te akakinoanga e tuatua pikikaa ia, e e kino, e e tuatua viivii no runga i tetai tangata. Kua akaue atu te Atua ia Adamu e: “To te rakau e kite ei i te meitaki e te kino, auraka koe e kai i to reira; i te rā e kai ei koe i to reira, ka mate ïa koe.” (Genese 2:17) Kua akakiteia ana teia kia Eva, inara na roto i te ovi, kua akakite atura te Tiaporo kiaia e: “Kare rava korua e mate: Kua kite oki te Atua e, i te rā e kai ei korua i to reira, ka puera ïa to korua mata, e ka riro korua mei te Atua ra te tu, i te kite i te meitaki e te kino.” (Genese 3:4, 5) E akakinoanga tikai te reira i te Atua ko Iehova!

5. Eaa ra a Dioterepe i tau ei kia akaapaia no te akakinoanga?

⁵ Kua akaueia ki te ngati Iseraela e: “Auraka koe e monomono korero aere na roto i to iti-tangata na.” (Levitiku 19:16) Kua akakite mai te apotetoro ko Ioane no runga i tetai tangata akakino i tona tuatau e: “I tata na au i te tuatua i te  ekalesia na; ko Dioterepe ra, ko tei akateitei iaia uaorai ki rungao ia ratou ra, kare aia e āriki mai ia matou. E teianei, kia tae atu au ra, kare e ngaro iaku tana e rave ra, i te tuatua aere anga ia matou i te tuatua akakino ra.” (3 Ioane 9, 10) Te tuatua akakino ra a Dioterepe ia Ioane e kua akaapaia no te reira. Koai ia Kerititiano tiratiratu te ka inangaro kia riro mai mei ia Dioterepe rai e kia aru atu ia Satani, te akakino tangata maata ra?

6, 7. Eaa ra tatou ka inangaro ei i te kopae ke i te akakino atu i tetai tangata?

⁶ E tuatua putuputuia ana te au tuatua akakinoanga e te au akaapaanga pikikaa ki te au tavini a Iehova. “Te tapepe tamou nui marie maira te kau taunga nunui ra, e te au tata tuatua, [ia Iesu].” (Luka 23:10) Kua tapepe pikikaaia a Paulo e te Taunga Maata ko Anania e tetai aronga ke. (Angaanga 24:1-8) E te karanga ra te Pipiria ia Satani e ko “te akaapa i to tatou au taeake . . . , ko tei akaapa ia ratou ki mua i te aroaro o to tatou Atua i te po e te ao.” (Apokalupo 12:10) Ko te au Kerititiano akatainuia taua au taeake tei akaapa pikikaaia i runga i te enua nei i teia tuatau openga.

⁷ Kare tetai Kerititiano e inangaro i te akakino atu i tetai tangata me kore te tuatua anga i te au akaapaanga pikikaa. Inara, ka tupu te reira me kare i rauka ake ia tatou te au tika anga katoa i mua ake ka akaapa atu ei i tetai tangata. I raro ake i te Ture a Mose, te akakite anga i te pikikaa akakoroia ra ka tupu mai te mate no te tangata tei akaapa ra. (Exodo 20:16; Deuteronomi 19:15-19) Tei runga ravao, ko te au mea viivii kia Iehova ra te kapitiia maira te “kite pikikaa, e tuatua i te tuatua pikikaa ra.” (Maseli 6:16-19) Papu, i reira e, ka inangaro tatou i te kopae i te aru atu i te akakino maata i te tangata e tei akaapa pikikaa ra.

Kopae i te Au Ravenga a te Ta Tangata mei Ito Maira

8. Na roto i teea tu i riro ei te Tiaporo ei ‘ta tangata mei ito mairai’?

⁸ E ta tangata te Tiaporo. “E ta tangata aia mei ito mairai,” i karanga ai a Iesu. (Ioane 8:44) Akamata anga ki tana angaanga mua i te anga ke anga ia Adamu raua ko Eva mei te Atua ra, e ta tangata a Satani. Nana i tuku mai i te mate ki rungao i nga tangata mua e ta raua uanga. (Roma 5:12) Penei e mea tau kia kiteia e te oronga uaia ra teia angaanga nei ki tetai tangata, kare e ei kaveinga kino ua.

9. Mei tei akakiteia mai ia 1 Ioane 3:15, akapeea tatou te riroanga mai ei ta tangata?

⁹ “Auraka rava koe e ta ua,” i akakite mai ei tetai o te au Ture Ngauru tei orongaia kia Iseraela. (Deuteronomi 5:17) Te tuatua anga ki te au Kerititiano, kua tata te apotetoro ko Petero e: “Auraka rava ra to kotou mate i te mate ta tangata.” (1 Petero 4:15) No reira ei au tavini na Iehova, kare tatou e rave i te ta anga. Inara, ka apa tatou i mua i te aroaro o te Atua me te makitakita ra tatou i tetai taeake Kerititiano e te inangaroanga e kia mate atu aia. “Ko tei makitakita i tona taeake, e ta tangata ïa,” i tata mai ei te apotetoro ko Ioane, “kua kite oki kotou e, kare o te ta tangata ra e ora mutu kore e vai i roto iaia.” (1 Ioane 3:15) Kua akaueia te ngati Iseraela e: “Auraka koe e riri ua i to taeake i roto i to ngakau.” (Levitiku 19:17) Kia viviki ua tatou i te akatikatika i tetai manamanata te tupu maira i rotopu ia tatou e tetai taeake irinaki, kia kore oki a Satani ta tangata ra e akakore i to tatou taokotaianga Kerititiano.​—Luka 17:3, 4.

E Tu Ngaueue Kore i te Patoi Atu i te Pikikaa Maata

10, 11. Eaa ta tatou ka rave i te patoi ngaueue kore atu anga i te pikikaa maata, ko Satani ra?

¹⁰ E pikikaa te Tiaporo. “Kia tuatua aia i te pikikaa ra,” na Iesu ei, “kua tuatua aia i tei tau iaia uaorai: e pikikaa aia, e e metua oki no te pikikaa.” (Ioane 8:44) Kua pikikaa a Satani kia Eva, kareka ra kua aere mai a Iesu ki te ao nei i te akakite i te tuatua mou. (Ioane 18:37) Me tu ngaueue kore tatou i te patoi atu i te Tiaporo ei au pipi na Karaiti, kare tatou e tuatua i te pikikaa e te akavareanga. ‘E tuatua-mou ta tatou ka tuatua.’ (Zekaria 8:16; Ephesia 4:25) Ko tona Au Kite mou anake ra ta te ‘Atua tuatua-mou ko Iehova’ e akameitaki. Kare o te aronga kino tikaanga i te komono iaia.​—Salamo 31:5; 50:16; Isaia 43:10.

¹¹ Me akaperepere tatou i to tatou rangatira i te pae vaerua mei te au pikikaa a Satani ra, ka  mou tatou i te Akonoanga Kerititiano ra, ko “te arataa tuatua-mou ra.” (2 Petero 2:2; Ioane 8:32) Te au apiianga katoa a te Kerititiano kua akatumuia ki runga i te “tuatua-mou o te evangelia.” (Galatia 2:5, 14) Tei runga to tatou ora tikai i to tatou ‘akono anga i te tuatua-mou’​—te aru anga i te reira e te patoi ngaueue kore anga i te “metua oki no te pikikaa.”​—3 Ioane 3, 4, 8.

Patoi i te Apoteiti Maata Rava

12, 13. Akapeea tatou i te manako atu anga i te au apoteiti?

¹² No roto ana te mea ora vaerua tei riro mai ko te Tiaporo ra i te tuatua mou. Inara “kare aia i mou i te tuatua-mou,” i karanga ai a Iesu, “no te mea kare e tuatua-mou o roto iaia.” (Ioane 8:44) Kua aruaru tuku kore teia apoteiti maata rava i tetai mataara no te patoianga i “te Atua tuatua-mou.” Kua topa atu etai au Kerititiano i te anere mataiti mua ki roto “i te ereere a te diabolo ra,” i te akaraanga kua riro mai ei aronga opuia nana no te mea kua akavareia e kua anga ke mei te tuatua mou. No reira kua raurau atura a Paulo i tona oa angaanga ko Timoteo kia apii atu ia ratou ma te tu maru kia akaoraia mai ratou i te pae vaerua e kia akarangatiraia mai mei ta Satani ereere ra. (2 Timoteo 2:23-26) E tikai, e meitaki atu i te mou ketaketa ki te tuatua mou e auraka e opuia e te au manako apoteiti.

¹³ No te akarongoanga ki te Tiaporo e kare i kopae ana i tana pikikaa ra, kua riro mai nga tangata mua ei apoteiti. No reira, ka akarongo atu ainei tatou ki te au apoteiti, ka tatau atu ainei i ta ratou au puka, me kore ka akara atu ainei i te au Web site na ratou i roto i te Internet? Me te inangaro ra tatou i te Atua e te tuatua mou, kare tatou e rave i te reira. Auraka tatou e akatika i te au apoteiti ki roto i to tatou au are me kore te aroa atu anga ia ratou, ka akariro taua au angaanga ra ia tatou kia ‘kapiti atu ki ta ratou au tuatua kikino.’ (2 Ioane 9-11) Auraka tatou e tuku ua atu ki te au ravenga kino a te Tiaporo na te akarukeanga i te “mataara no te tuatua mou” Kerititiano ra kia aru atu i te au puapii pikikaa te kimi ra i te “tuku mai anga i te au manako kino” e te tauta ra i te ‘akanauru ia tatou ma te au tuatua reka tikai ra.’​—2 Petero 2:1-3, Byington.

14, 15. Eaa te akamatakiteanga ta Paulo i oronga ki te aronga pakari i Ephesia e ki tona oa angaanga ko Timoteo?

¹⁴ Kua akakite atura a Paulo ki te aronga pakari i Ephesia e: ‘E teianei, e matakite ia kotou uaorai, e te anana katoa i akariroiaʼi kotou e te vaerua tapu ei tiaki i rungao ra, kia akaangai oki kotou i te ekalesia a te Atua, ko tana i oko i tona uaorai toto. Kua kite oki au kia riro ke atu au, ka o mai ei te luko taae ki roto ia kotou na, kare e akaperepere i te anana. E ka tu mai oki te tangata mei roto ia kotou uaorai, e tuatua mai i te tuatua mingi, kia aruia ratou e te pipi.’ (Angaanga 20:28-30) Kare i roa ana, kua mama mai taua au apoteiti e kua “tuatua mai i te tuatua mingi.”

¹⁵ Mei te 65 T.N., kua raurau atura te apotetoro ia Timoteo kia ‘tika i te tua i te tuatua-mou ra.’ “Kareka te tuatua rikiriki puapinga kore ra,” i tata ei a Paulo, “e patoi atu ïa; ko te tuatua kino oki te tupu i te reira, e e maata atu oki. E te kakai oki ta ratou tuatua mei te maki kakai ra; no ratou oki a Humenaio e ko Phileto; Ko tei ariu ke akenei i te tuatua-mou, i te māro anga e, kua oti te tuakaouanga; e kua akatatipoki i te akarongo o tetai papaki ra.” I akamata mai ei te  apoteiti! “Kareka te tumu o te Atua ra,” i akakite mai ei a Paulo, “te vai keukeu kore nei ïa.”​—2 Timoteo 2:15-19.

16. Noatu te au kino a te apoteiti maata ra, eaa ra tatou i tiratiratu ua ai ki te Atua e ki tana Tuatua?

¹⁶ E taangaanga putuputu ana a Satani i te au apoteiti i te tauta anga i te akataero i te akamorianga mou​—inara kare i autu ana. Mei te mataiti 1868, kua akamata a Charles Taze Russell i te akara matatio meitaki i te au apiianga tei ariki roaia e te au akonoanga a Kerititome e kua kiteaia mai e e au manako tarevake no te au Tuatua Tapu. Kua akanoo a Russell e tetai aronga tei kimi i te tuatua mou ra i tetai pupu apii Pipiria i Pittsburgh, Pennsylvania, i Marike. Vaitata atu i te 140 mataiti mei reira mai, kua maata mai te kite o te au tavini o Iehova e te inangaroanga i te Atua e tana Tuatua. Noatu te au kino a te apoteiti maata ra, no te tu matakite i te pae vaerua a te pupu tavini akono meitaki e te pakari i tauturu mai ei i teia au Kerititiano mou kia vai tiratiratu kia Iehova e ki tana Tuatua.​—Mataio 24:45.

Auraka Rava e Tuku i te Tutara o Teianei Ao kia Akaaere ia Koe

17-19. Eaa ra te ao tei raro ake i te mana a te Tiaporo, e eaa ra tatou kare e anoano atu i te reira?

¹⁷ Ko tetai akaou mataara ta Satani e kimi ra i te opu ia tatou koia oki na te akakeuanga ia tatou kia anoano atu i to teianei ao​—e taiate tangata tika kore tei takake mai mei te Atua ra. Kua kapiki a Iesu i te Tiaporo ra ko “te tutara o teianei ao” e kua karanga e: “E kare ana mou anga iaku.” (Ioane 14:30, NW) Auraka rava tatou e opuia mai e Satani! E tika, te kite nei tatou e “te vai ua nei rai to te ao ravarai i raro ake i taua vaerua kino ra.” (1 Ioane 5:19) No reira i rauka ai i te Tiaporo i te oronga atu kia Iesu “te au basileia katoa o te ao nei” no te ravenga apoteiti okotai ra no te akamorianga​—e apinga ta te Tamaiti a te Atua i patoi pakari atu. (Mataio 4:8-10) Te riri nei teia ao ko Satani oki te tutara i te au pipi a Karaiti. (Ioane 15:18-21) No reira rai te apotetoro ko Ioane i akamatakite mai ei ia tatou e auraka e anoano atu i teianei ao!

¹⁸ Kua tata a Ioane e: “Auraka e anoano i teianei ao, e te au mea ravarai o teianei ao. Ko te tangata i anoano i teianei ao ra, kare te anoano o te Metua i roto iaia ra. Ko te au mea ravarai oki o teianei ao, ko te anoano tika kore o te kopapa  nei, e te anoano tika kore o te mata nei, e te akatietie o te ora anga nei, kare ïa i to ko mai i te Metua ra, no teianei ao anake ïa. Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.” (1 Ioane 2:15-17) Auraka tatou e anoano atu i ta teianei ao, no te mea te marekaia ra to te reira tu oraanga ki to kopapa ara nei e te patoi takiri ra i te au turanga a te Atua ko Iehova.

¹⁹ Akapeea ra me te vai ra te anoano o teianei ao i roto i to tatou ngakau? Ei reira e pure tatou i ta te Atua tauturuanga kia autu atu i teia anoano nei e te au anoano kopapa te kapiti maira ki te reira. (Galatia 5:16-21) Papu tikai ka tauta tatou i te akono ia tatou uaorai e “auraka ei viivii i teianei ao” me oki tatou i te akamaara e ko te “au vaerua kikino” ra te “au tutara o teianei ao” kitea koreia i rungao i te taiate tangata tika kore ra.​—Iakobo 1:27; Ephesia 6:11, 12; 2 Korinetia 4:4.

20. Eaa ka karangaia ai e ‘kare tatou i to teianei ao’?

²⁰ No runga i tana au pipi, kua karanga a Iesu e: “Kare ratou i to teianei ao, mei iaku nei rai oki, kare i to teianei ao.” (Ioane 17:16) Te tauta nei te au Kerititiano akatainuia e to ratou au oa akatapuia i te akono tamou ma i te tu akono tau e i te pae vaerua, te akatakakeanga mai mei teia ao. (Ioane 15:19; 17:14; Iakobo 4:4) Te riri ra teia ao tika kore ia tatou no te mea kua takake mai tatou mei te reira e e ‘au tangata i ako i te tuatua-tika ra.’ (2 Petero 2:5) E tika rai, te noo nei tatou i rotopu i te taiate tangata, te kapiti maira i te aronga poneia, te akaturi, te akakino, te akamori itoro, te keia, te pikikaa, e te kona kava. (1 Korinetia 5:9-11; 6:9-11; Apokalupo 21:8) Inara auraka tatou e akaea i te ‘vaerua o teianei ao,’ no te mea kare tatou i akaaereia e teia mana akakeuanga no te tu ara.​—1 Korinetia 2:12.

Auraka e Tuku i ta te Tiaporo Ngai kia O Mai

21, 22. Akapeea koe i te akonoanga i ta Paulo akoanga tei tataia ia Ephesia 4:26, 27?

²¹ Kare e akakeuia e te ‘vaerua o teianei ao,’ te arataki nei te vaerua o te Atua ia tatou, i te akatupuanga i roto ia tatou i taua au tu mei te aroa e te akatere-uaorai. (Galatia 5:22, 23) Te tauturu maira teia ia tatou kia autu i te au akakinoanga a te Tiaporo no runga i to tatou akarongo. Te inangaro ra aia ia tatou kia “tae roa ki te rave i te mea kino,” inara te tauturu maira te vaerua o te Atua ia tatou kia “akapakia te makitakita, e akaruke i te riri otooto.” (Salamo 37:8) E tika rai, penei i tetai au taime e tumuanga tikai to tatou i te riri atu, inara te ako maira a Paulo ia tatou e: “Kia riri kotou ra, auraka kia araia: auraka e topa te rā i to kotou riri anga: Auraka e tuku i ta te diabolo ngai kia o mai.”​—Ephesia 4:26, 27.

²² Ka tupu mai te ara no to tatou riri me tei roto rai tatou i te turanga kinokino. Me ka vai ua rai tatou i roto i teia manako nei te orongaia ra ki te Tiaporo tetai atianga kia akatupu i te taokotai anga kore i roto i te putuputuanga me kore i te akakeu anga ia tatou kia o atu ki roto i te au angaanga kino. No reira, te anoano vivikiia ra tatou kia akatikatika i te au tukeanga ma tetai ke na roto i tetai mataara te arikiia maira e te Atua. (Levitiku 19:17, 18; Mataio 5:23, 24; 18:15, 16) No reira, e tuku kia aratakiia tatou e te vaerua o te Atua, te akono anga i te akatere-uaorai e auraka e tuku ua atu i te riri tika ua kia kino roa atu kia akatupu mai i te riri otooto, te akakinoanga, e te makitakitaanga.

23. Eaa te au uianga ta tatou ka akamanako i roto i te atikara te aru maira?

²³ Kua uriuri ana tatou i tetai au tu o te Tiaporo kare e tau kia aru atu tatou. Inara penei te manako ra etai aronga tatau e: Ka mataku ainei tatou ia Satani? Eaa ra aia i akatupu ei i te takinga kino ki te au Kerititiano? E akapeea tatou i te kopae atu anga kia kore e itaeia mai e te Tiaporo?

[Tataanga Rikiriki i Raro]

Eaa Taau Pau Anga?

• Eaa i tau ei e auraka tatou e akakino atu i tetai tangata?

• Kia tau kia 1 Ioane 3:15, akapeea tatou i te kopae atu anga kia kore e riro mai ei ta tangata?

• Akapeea tatou i te manako atu anga i te au apoteiti, e no teaa ra?

• Eaa ra tatou i kore ei e anoano atu i teianei ao?

[Au Uianga Apii]

[Tutu i te kapi 23]

Auraka rava tatou e tuku i te Tiaporo kia akakore i to tatou taokotaianga Kerititiano

[Au Tutu i te kapi 24]

Eaa ra a Ioane i raurau mai ei ia tatou e auraka e anoano i teianei ao?