E Patoi Atu ia Satani, e Nana e Rere Ke Atu!

“E kauraro atu kotou i te Atua. E patoi atu i te diabolo, e nana e rere ke atu.”​—IAKOBO 4:7.

1, 2. (a) Eaa te tu o te Tiaporo te akaariia maira i roto i tetai akakiteanga tei tataia i roto ia Isaia pene 14? (e) Ka uriuri tatou i teea au uianga?

KO TE Tiaporo te akaraanga kino roa atu no te akaparau. Kua akaariia mai tona parau i roto i te au tuatua tei tataia e te peroveta a te Atua ko Isaia. Kua tere atu te anere mataiti i mua ake ka riro mai ei a Babulonia ko te mana tutara maata o te ao, kua akatutuia mai te au tangata o Iehova na te oronga anga i teia akakiteanga ki runga “i te ariki no Babulonia”: “Kua karanga ra koe i roto i toou ngakau e, E kake atu au ki runga roa i te rangi ra, ki runga ake i te au etu o te Atua [te au ariki no to Davida papaanga ariki] e akateitei ei au i toku terono . . . kia aite au i Tei Teitei ra.” (Isaia 14:3, 4, 12-15; Numero 24:17) Kua aite te parau o “te ariki no Babulonia” ki te tu o Satani, “te atua o teianei ao.” (2 Korinetia 4:4) Inara ka ope tumatetenga atu to Satani tu parau, mei te taopenga tu akama o te patireia o Babulonia.

² Inara, me ka vai ua rai te Tiaporo, penei ka manakonako tatou no runga i taua au uianga mei teia rai: Ka mataku ainei tatou ia Satani? Eaa ra aia i akakeu ei i te au tangata kia takinga kino i te au Kerititiano? Akapeea tatou i te kopae anga kia kore e autuia e te Tiaporo?

Ka Mataku Ainei Tatou i te Tiaporo?

3, 4. Eaa ra te au Kerititiano akatainuia e to ratou au oa kare e mataku atu i te Tiaporo?

³ E akaketaketaanga tikai ki te au Kerititiano teia nei au tuatua a Iesu Karaiti: “Auraka koe e mataku i te au mea ravarai e rokoia mai ei koe: i na, e uri te diabolo i tetai pae o kotou ki roto i te are tapekaanga, ei timata anga ia kotou; po ngauru kotou i te mate anga; kia mou marie ra koe e tae ua atu ki te matenga, e naku e oronga atu i te korona ora noou.” (Apokalupo 2:10) Kare te aronga akatainuia e to ratou au oa ma te manakonakoanga i te enua nei e mataku ana i te Tiaporo. Teia mataku kore nei kare i akamata mai mei te mataku kore tei akatuangaia mai. Te vai nei te reira no te mea e mataku tikai to ratou i te Atua e te ‘akaruru nei ki raro ake i te maru o tona peau ra.’​—Salamo 34:9; 36:7.

⁴ Kua akapapu akarongo mou mai te au pipi mua a Iesu Karaiti i te mataku kore e mate ua atu noatu e kua mamae ratou no te au mea ra. Kare ratou e tuku atu ki te matakuanga eaa ta Satani te Tiaporo ka rave, no te mea kua kite ratou e kare roa a Iehova e akaruke i te aronga tei akapapu i te tiratiratu Kiaia. Mei te reira katoa, i te aro atu anga i te takinga kino anga pakari i teia tuatau, te tauta nei te au Kerititiano  akatainuia e e to ratou au oa akatapuia kia kore to ratou tu tika ki te Atua e akakoreia. Inara, kua akakite mai te apotetoro ko Paulo e ka rauka i te Tiaporo i te akatupu i te mate. Kare ainei te reira e tamataku ana ia tatou?

5. Eaa ta tatou i kite mai mei ia Ebera 2:14, 15?

⁵ Kua karanga a Paulo e kua ‘rave a Iesu i te kiko e te toto’ e “na te mate aia i te akangere atu iaia nona te mate ra, koia oki te diabolo; E kia akaora oki aia i te aronga i tuikaa i te mataku i te mate, e ope ua ake to ratou ora anga nei.” (Ebera 2:14, 15) Ko tei “akangere atu iaia nona te mate ra,” kua rauka ia Satani i te akatere ia Iuda Ikariota e oti kua taangaanga i te au arataki ngati Iuda e te au Roma i te tamate ia Iesu. (Luka 22:3; Ioane 13:26, 27) Inara, na roto i tona mate atinga, kua akarangatiraia mai e Iesu te au tangata ara mei te akatereanga a Satani e te maanianga kia rauka ia tatou te ora mutu kore.​—Ioane 3:16.

6, 7. Mei teaa te maata o ta te Tiaporo au ravenga i te akatupuanga i te mate?

⁶ Eaa te maata o ta te Tiaporo au ravenga no te akatupuanga i te mate? I na, mei te akamata anga o ta Satani au angaanga kino, kua akatupu mai tana au pikikaa e te akavareanga i te mate ki te au tangata. Kua tupu mai teia no te mea kua ara a Adamu e i patiia maira i reira te ara e te mate ki te ngutuare tangata. (Roma 5:12) Kapiti atu, kua takinokino katoa te au tavini a Satani i runga i te enua nei i to Iehova aronga akamori, e i tetai au taime kia tae roa ki te mate, mei ta ratou rai i rave ana kia Iesu Karaiti.

⁷ Noatu rai, auraka tatou e manako e ka akatupu te Tiaporo i te mate ki tetai ua atu tangata tana e inangaro ra i te ta. Te paruru nei te Atua i te aronga Nona ra e kare e akatika ia Satani kia takore katoa atu i te aronga akamori mou katoa i runga i te enua nei. (Roma 14:8) E tika, te akatika nei a Iehova i te takinga kino kia aere mai ki runga i tona au tangata katoa, e te akatika nei aia i te mate kia aere mai ki tetai ia tatou nei no ta te Tiaporo au ta anga. Inara, te oronga maira te au Tuatua Tapu i te manakonakoanga umere no tetai tuakaouanga no te aronga i roto i te “buka manakoanga” a te Atua​—e kare e rauka takiri tikai i te Tiaporo i te arai i taua akaoraanga o te ora!​—Malaki 3:16; Ioane 5:28, 29; Angaanga 24:15.

Eaa ra a Satani i Takinga Kino ei ia Tatou?

8. Eaa ra te Tiaporo i apai mai ei i te takinga kino ki runga i te au tavini a te Atua?

⁸ Me e au tavini tiratiratu tatou no te Atua, e tumuanga puapinga tetai e eaa ra te Tiaporo i tuku mai ei i te takinga kino ki runga ia tatou. Tona akakoroanga koia oki kia akaoko tatou i to tatou akarongo. E pirianga akaperepere to tatou ma to tatou Metua i te rangi, e te inangaro ra a Satani i te takore atu i te reira. Kare teia e akapoitirere ia tatou. I roto ia Edene, kua akakite maira a Iehova e e kino to rotopu i tana “vaine”  akatutuia e i te “ovi” e i rotopu tikai i ta raua ‘nga uanga.’ (Genese 3:14, 15) Te akataka maira te au Tuatua Tapu i te Tiaporo e “ko taua ovi taito ra ïa” e te akaari maira e e tuatau poto ua tona i teianei e e riri maata tona. (Apokalupo 12:9, 12) E tupu ua atura te kino i rotopu i ‘nga uanga’ e rua, te tapapa atura te au tavini akarongo mou o Iehova i te takinga kino. (2 Timoteo 3:12) Kua kite ainei koe i te tumu tikai no taua takinga kino anga a Satani?

9, 10. Eaa te maroanga ta te Tiaporo i akatupu mai, e akapeea te tu akono tau o te au tangata ra i te kapitiia atu anga ki te reira?

⁹ Kua akatupu mai te Tiaporo i te maroanga no te tu ngateitei i te ao katoa e pini ua ake. Kapiti atu ki teia, kua ekoko aia i te tiratiratu o te au tangata ki Tei Anga mai ia ratou. Kua tuku mai a Satani i te takinga kino ki runga i te tangata tuatua tika ko Iobu. No teaa ra? Kia rauka oki i te aati i to Iobu tiratiratu kia Iehova. Kua akatupu te vaine a Iobu e tona “aronga akapumaana manamanata” toko toru ra i ta te Tiaporo akakoroanga i taua tuatau. Mei tei akaariia mai i roto i te puka a Iobu, kua akaao te Tiaporo i te Atua, i te karangaanga e kare e tangata e vai akarongo mou ana Kiaia me akatikaia a Satani i te timata atu i taua tangata ra. Inara kua mou ketaketa a Iobu i tona tiratiratu, na te akapapuanga ia Satani ra e e pikikaa. (Iobu 1:8–​2:9; 16:2; 27:5; 31:6) Te takinga kino nei te Tiaporo i te Au kite o Iehova i teia tuatau i te tautaanga i te aati i to ratou tiratiratu e te akapapuanga tikai i tana akaaoanga.

¹⁰ Te kite anga e te apai maira te Tiaporo i te takinga kino ki runga ia tatou no te mea te inangaro tikai ra aia i te aati i to tatou tiratiratu ki te Atua te tauturu tikai maira ia tatou kia maroiroi e kia ketaketa. (Deuteronomi 31:6) E Ngateitei i te Ao Katoa e Pini Ua Ake to tatou Atua, e ka tauturu mai aia ia tatou kia akono tamou i to tatou tiratiratu. E kimi ua atu tatou i te akarekareka i to Iehova ngakau na te riroanga mai ei aronga akono i te tiratiratu, te orongaanga kiaia ra i te pauanga ki tei akakino maata maira, kia Satani te Tiaporo.​—Maseli 27:11.

“E Akaora ra ia Matou i te Kino”

11. Eaa te aite anga no te pati anga e, “Auraka e akaruke ia matou kia timataia mai”?

¹¹ Ei aronga akono i te tiratiratu kare i te manako mama ua; te umuumuia ra te pure akatenga. E puapinga tikai te au tuatua no te pure akaraanga. I tetai tuanga, kua karanga a Iesu e: “Auraka e akaruke ia matou kia timataia mai, e akaora ra ia matou i te kino.” (Mataio 6:13) Kare a Iehova e timata ia tatou kia ara. (Iakobo 1:13) Inara, te tuatua ra te au Tuatua Tapu i tetai au taime i tona raveanga me kore te akatupuanga i te au mea, ko te tikaanga, te akatika ua anga aia i te reira. (Ruta 1:20, 21) Na te pureanga mei ta Iesu i akakite mai, te pati ra tatou kia Iehova e auraka e akaruke ia tatou kia timataia mai. E te akarongo maira aia ia tatou, no te mea tei ia tatou teia akapapuanga Tuatua Tapu e: “E tuatua-mou ra ta te Atua, e kare aia e vaoo ia kotou kia timataia, mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.”​—1 Korinetia 10:13.

12. Eaa ra tatou ka pure ei: e “E akaora ra ia matou i te kino”?

¹² I muri ake i te taiku mai anga i te timataanga i roto i te pure akaraanga, kua tuatua mai a Iesu ma te tau e: “E akaora ra ia matou i te kino.” Te tatau ra etai au urianga Pipiria e: “E akaora ia matou mei te kino” (King James Version; Revised Standard Version) me kore e “Paruru ia matou mei te kino.” (Contemporary English Version) Inara, i roto i te au Tuatua Tapu, te tuatua “akaora ra” kua taangaanga maataia ki te tangata, e te taiku ra te Evangeria a Mataio i te Tiaporo ra ei “Timata ra,” ko tetai peretana. (Mataio 4:3, 11)  No reira e puapinga maata kia pure no te akaoraanga mei “te kino ra,” ko Satani te Tiaporo. Te tauta nei aia i te akakeu ia tatou kia ara atu i te Atua. (1 Tesalonia 3:5) Me rave tatou i te patianga e, “E akaora ra ia matou i te kino,” te pati ra tatou ki to tatou Metua i te rangi ra kia arataki e kia tauturu mai ia tatou kia kore tatou e autuia e te Tiaporo.

Kia Kore e Autuia e te Tiaporo

13, 14. Eaa ra te au Korinetia i anoano ei kia taui i te tu e akono ra ratou i tetai tangata i roto i te putuputuanga tei rave ana i te tu akono tau kore?

¹³ Te raurauanga a Paulo i te au Kerititiano i Korinetia kia akakore atu i te ara, kua tata aia e: “Ko ta kotou e akakore i te ara ra, e akakore katoa oki au; e i akakore ana au i te ara ra, e ko taku i akakore ra, no kotou na i akakore ei au i mua i te aroaro o te Mesia nei: Ko te rauka mai aea ta Satani ngai ia tatou: kare oki tatou i te kite kore i tana au ravenga.” (2 Korinetia 2:10, 11) Ka rauka i te Tiaporo i te autu ia tatou na roto i te au mataara tukeke, inara eaa ra a Paulo i akakite mai ei i te tuatua tei taikuia maira?

¹⁴ Kua ako ana a Paulo i te au Korinetia no te mea kua akatika ratou i tetai tangata rave tau kore kia vai ua i roto i te putuputuanga. Penei kua akarekareka teia ia Satani, no te akakino anga tei tukunaia mai ki runga i te putuputuanga no te ariki anga i te “kanga oki kare rava i kitea ki o te etene katoa ra.” I te openga iora, kua akaateaia taua tangata rave kino ra. (1 Korinetia 5:1-5, 11-13) I muri maira kua tataraara te tangata. Me kare te au Korinetia e akakore i te ara e te akaoki mai i taua tangata ra, ka autuia ratou e te Tiaporo na roto i tetai mataara ke. Akapeea ra? Ka riririri e ka aroa kore ratou, mei ia Satani rai. Me ka ‘apuku uaia aea te tangata i tataraara ra i te aue maata’ e kua akamutu takiri ra, tei runga tikai i te aronga pakari etai apainga no runga i teia nei i mua i te Atua aroa, ko Iehova. (2 Korinetia 2:7; Iakobo 2:13; 3:1) E tikai, kare tetai Kerititiano mou e inangaro i te aru ia Satani na te rave anga i te kino, te riririri, e te aroa kore.

Paruruia e te Rakei no ko Mai i te Atua

15. Eaa te tamakianga ta tatou e tamaki nei, e tei runga i teaa te autu anga?

¹⁵ Me akaoraia mai tatou mei te Tiaporo ra, e tamaki atu tatou i te tamakianga pae vaerua i te patoi anga i te au vaerua kikino. Tei runga te autu anga i te patoi atu anga i taua au vaerua ririnui i te kakau anga tatou “i te rakei katoa a te Atua.” (Ephesia 6:11-18) Te kapiti maira ki teia rakei nei “te tapoki-umauma ra ko te tuatua tika.” (Ephesia 6:14) Kare te Ariki ko Saula o Iseraela taito i akarongo ana ki te Atua e kua mamae no te kore anga oki e vaerua tapu. (1 Samuela 15:22, 23) Inara me akono ra tatou i te tuatua tika e te aao anga i te rakei katoa i te pae vaerua, ka rauka ia tatou te vaerua tapu e te paruruanga a te Atua te inangaroia ra kia patoi atu ia Satani e i tana au angera kino, te au temoni.​—Maseli 18:10.

16. Akapeea e rauka ua ai ia tatou te paruruanga i te patoi atu i te au vaerua kikino?

¹⁶ E rauka ua ai te paruruanga i te patoi atu i te au vaerua kikino, te inangaroia nei tatou, kapiti atu ki tetai au mea ke, kia tatau e kia apii putuputu i te Tuatua a te Atua, te taangaanga meitaki anga i te au puka tei orongaia mai na roto i “te akaaere pikikaa kore.” (Luka 12:42) Te akaki ra tatou i to tatou manako ki te au tumu pae vaerua ma te tau, te rotai ra ki te ako anga a Paulo e: “E aku au taeake, ko te au mea mou ra, te au mea tau meitaki ra, te au mea tika ra, te au mea viivii kore ra, te au mea rekarekaia ra, te au mea rongo meitaki ra, te vai ra tetai meitaki, te vai ra tetai mea paapaaia ra, e akamaara i taua au mea ra.”​—Philipi 4:8.

17. Eaa te ka tauturu ia tatou kia riro mai ei aronga akakitekite tau i te tuatua meitaki?

 ¹⁷ Na Iehova e tauturu mai ia tatou kia rauka i to tatou “vaevae i te teateamamao o te evangelia o te au ra.” (Ephesia 6:15) Te piri putuputu anga ki roto i te au uipaanga Kerititiano te tauturu maira ia tatou kia akakitekite aere i te tuatua meitaki o te Patireia o te Atua. Mei teaa ra te rekareka te ka rauka mai ia tatou i te tauturuanga i tetai ke kia apii i te tuatua mou a te Atua e te kiteanga i te rangatira pae vaerua! (Ioane 8:32) Te paruru nei ‘te koke a te vaerua ra, koia te tuatua a te Atua,’ ia tatou uaorai mei te au apiianga pikikaa e te “uri anga i te au punanga ketaketa ki raro.” (Ephesia 6:17; 2 Korinetia 10:4, 5) Te taangaanga karape anga i te Tuatua tei tataia a te Atua, ko te Pipiria, te tauturu maira te reira ia tatou kia apii atu i te tuatua mou e te paruruanga ia tatou kia kore e autuia e te au ravenga kino a te Tiaporo.

18. Akapeea tatou i te ‘tu ketaketaanga i te patoi i te ravenga pakari a te Tiaporo ra’?

¹⁸ Kua akamata a Paulo i tana uriurianga no to tatou rakei vaerua i te na ko anga e: “Kia maroiroi kotou i te Atu, e i te ririnui o tona mana. E kakau i te rakei katoa a te Atua ra, kia tika ia kotou [“i te tu ketaketa,” NW] kia patoi i te ravenga pakari a te diabolo ra.” (Ephesia 6:10, 11) Te tuatua Ereni te karangaia ra kia “tu ketaketa” te akakite maira i te mou anga tetai tangata vaeau i tona taoonga. Kia vai ngaueue kore tatou i roto i te tamakianga pae vaerua, noatu e te taangaanga ra a Satani i te au ravenga tukeke i te tauta anga aia i te tamanamanata mai i to tatou taokotaianga, te akaviivii anga i ta tatou au apii, me kore te aatianga i to tatou tiratiratu ki te Atua. Inara kare te au taanga a te Tiaporo i autu ake​—e kare roa te reira e tupu mai! *

E Patoi Atu i te Tiaporo, e Nana e Rere Ke Atu

19. Eaa te mataara okotai kia patoi pakari atu i te Tiaporo?

¹⁹ Ka autu tatou i roto i ta tatou tamakianga pae vaerua i te patoi atu anga i te Tiaporo e te au vaerua kikino i raro ake i tana aratakianga. Kare e tumu anga kia mataku ruketekete atu ia Satani, no te mea kua tata mai te apotetoro ko Iakobo e: “E kauraro atu kotou i te Atua. E patoi atu i te diabolo, e nana e rere ke atu.” (Iakobo 4:7) Okotai mataara i te patoi pakari atu anga ia Satani e te au mea ora kikino ra te taokotai ra kiaia koia oki auraka e piri atu ki roto i te au angaanga purepure me kore te manamana e ki te aronga te rave ra i te reira. Te akaari taka meitaki maira te au Tuatua Tapu e kia patoi atu te au tavini o Iehova i te kimianga i te akairo me kore te piri atu anga ki roto i te akara tumurangi, te tauraatua, e te purepure. Me te angaanga maroiroi ra tatou i te pae vaerua e te vai ketaketa ua ra, kare tatou e mataku atu e ka tuku mai tetai tangata i te manamana ra ki runga ia tatou.​—Numero 23:23; Deuteronomi 18:10-12; Isaia 47:12-15; Angaanga 19:18-20.

20. Akapeea e rauka ai ia tatou i te patoi atu i te Tiaporo?

²⁰ E ‘patoi atu tatou i te Tiaporo’ na te aru anga i te au turanga o te Pipiria e te tuatua mou e na te tu ketaketaanga i te patoi atu iaia. Te rotai nei te ao kia Satani no te mea koia to te reira atua. (2 Korinetia 4:4) E kopae atu i reira tatou i te au tu o teianei ao, mei te parau, te tu karapii, te tu akono tau kore, te kino, e i te apinga i te pae kopapa. Kua kite ana tatou e kua rere ke atu te Tiaporo i te patoianga a Iesu i tana taanga na te taangaangaanga i te au Tuatua Tapu i te tuatau o te timataanga i roto i te metepara. (Mataio 4:4, 7, 10, 11) Pera katoa, ka ‘rere ke atu a Satani mei ia tatou’ no te autu kore anga me kauraro tikai tatou kia Iehova e te irinakianga ki runga Iaia na roto i te pure. (Ephesia 6:18) Ma te tauturu anga a te Atua ko Iehova e tana Tamaiti akaperepere ra, kare e rauka i tetai ua atu tangata i te akakino tikai mai ia tatou​—kare, kare katoa e rauka i te Tiaporo!​—Salamo 91:9-11.

[Tataanga Rikiriki i Raro]

Eaa Taau Pau Anga?

• Ka mataku ainei tatou ia Satani te Tiaporo?

• Eaa ra a Satani i tuku mai ei i te takinga kino ki runga i te au Kerititiano?

• Eaa ra tatou ka pure ei kia akaoraia mai mei “te kino” ra?

• Akapeea tatou e autu ei i te tamakianga pae vaerua?

[Au Uianga Apii]

[Tutu i te kapi 26]

Kua akapapu akarongo mou te au pipi mataku kore mua a Karaiti e e mate ua atura

[Tutu i te kapi 27]

Kare e rauka i te Tiaporo i te arai i te tuakaouanga o te aronga tei roto i to Iehova ra maaraanga

[Tutu i te kapi 28]

Te pure ra ainei koe i te akaoraanga mei “te kino” ra?

[Tutu i te kapi 29]

Te akakakau ra ainei koe “i te rakei katoa a te Atua”?