Te Au Angera​—Koai Ma Ratou

KUA kite atura te ariki o tetai patireia ririnui i tetai mea umere tikai. E toru tangata tei akautungaia ki roto i tetai akapouanga ai kua akaoraia mai mei te mate rikarika! Naai i akaora mai ia ratou? Kua karanga atura te ariki ki te toko toru tei akaoraia mai e: “Kia akameitakiia [to kotou Atua], ko tei tono mai i taua angela, e kua akaora i ona puke tavini i irinaki iaia ra.” (Daniela 3:28) Kua riro teia tutara o Babulonia tei tere atu e rua tauatini ua atu mataiti i topa akenei ra ei kite mata i te akaoraanga a tetai angera. E mirioni ua atu te au tangata i te tuatau i topa akenei kua irinaki ana i te au angera. E manganui i teia tuatau kare e te irinaki ua ra e te vai ua nei te au angera kareka katoa ra te manako ra e kua akakeuia to ratou uaorai oraanga na roto i etai atu tu e te au angera. Koai ma te au angera, noea mai te ngai i akamata mai ei ratou?

Kia tau ki ta te Pipiria, e au mea vaerua te au angera, mei te Atua rai ra e e Vaerua. (Salamo 104:4; Ioane 4:24) E maata te pupu angera, e kua tere atu te numero ki te mirioni. (Apokalupo 5:11) E ko ratou pouroa e “maata i te ririnui.” (Salamo 103:20) Noatu e mei te au tangata rai te au angera e tu tangata to ratou e kua orongaia te tu rangatira, kare ratou i akamata ana i to ratou au oraanga ei au tangata. Ko te tika, na te Atua i anga i te au angera i mua ake ka angaia mai ei te au tangata​—i mua ake ka angaia ai te paraneta Enua. I te ‘akatumu anga te Atua i te enua nei,’ i karanga ai te Pipiria, i “imene katoatoaʼi te au etu popongi [te au angera], e kua maeva ua te au tamariki a te Atua i te rekareka.” (Iobu 38:4, 7) I te mea e e au mea angaia te au angera na te Atua, kua tapaia ratou ei au tamariki na te Atua.

Eaa ra te akakoroanga i anga ai te Atua i te au angera? Eaa ra ta te au angera tuanga, me te vai ra, i roto i te au oraanga o te tangata? Te akakeu ra ainei ratou i to tatou oraanga i teia tuatau? Mei te mea e e au rima rave rangatira tau ratou, kua aru ainei etai o te au angera i te aerenga o Satani te Tiaporo e te akariro anga ia ratou uaorai ei au enemi no te Atua? Te oronga maira te Pipiria i te au pauanga tika ki teia au uianga.