Te Au Angera​—Peea Ratou te Akakeu Anga ia Tatou

TE AKATAKAANGA mai i te orama tei rauka mai iaia te piri mai anga te pamiri o te Atua te au angera ra, kua tata te peroveta ko Daniela e: “Kua tausani oki te tausani anga [au angera] i te tavini anga [i te Atua], e kua ngauru oki te tausani anga i te manotini i te tu anga ki mua iaia.” (Daniela 7:10) Te akaari maira teia irava i to te Atua akakoroanga i te anga mai anga i te au angera. Ka tavini ratou iaia e kua papa ua i te rave i tana au ikuikuanga.

Kua taangaanga te Atua i te au angera kia rave i tetai au angaanga te kapitiia maira te au tangata. Ka akamanako ana tatou e akapeea aia i te taangaangaanga ia ratou i te akamaroiroianga e te paruruanga i tona au tangata, kia oronga i te karere ki te au tangata, e kia tuku i tana akavaanga ki runga i te aronga kino.

Akamaroiroiia e e Paruruia e te Au Angera

Mei te taime mai i kite ei te au mea ora vaerua ra te angaia anga te enua e te tangata mua, kua akaari mai ratou i te manako inangaro i roto i te au tangata. Te tuatua anga mei te pakari tutu tangata ra, i mua ake ka riro mai ei aia ei tangata ra, kua tuatua a Iesu Karaiti e: “Te au apinga tei akaperepereia e au ra tei te tamariki ia a te tangata nei.” (Maseli 8:31, NW) E te akakite maira te Pipiria kia tatou e “ta te au angela e arōrō mai” i te au tikaanga no runga ia Karaiti e te tuatau ki mua tei akaariia mai ki te au peroveta a te Atua.​—1 Petero 1:11, 12.

E ope ua atura te tuatau, te akara maira te au angera e e maata te au tangata kare e tavini ana i Tei Anga aroa mai ia ratou. Mei teaa atura te tamaromaroa anga teia i te au angera akarongo mou ra! I tetai tua, me tataraara te tangata rave ara e te ariu maira kia Iehova, e ‘tu rekareka to te au angela.’ (Luka 15:10) E manako oonu to te au angera no te oraanga o te aronga te tavini ra i te Atua, e e taangaanga putuputu ana a Iehova ia ratou kia akamaroiroi e kia paruru i tona au tavini akarongo mou i runga i te enua nei. (Ebera 1:14) E akamanako ana i etai au akaraanga.

E rua angera tei tauturu ia Lota tuatua tika e i tana nga tamaine kia akaoraia mai mei te akapouanga o nga oire kino o Sodoma raua ko Gomora na te arataki mai anga ia ratou mei roto mai i taua ngai ra. * (Genese 19:1, 15-26) I te au anere mataiti  i muri mai, noatu e kua peiia te peroveta ko Daniela ki roto i te vaarua o te riona ra, kare aia i taia ia. No teaa ra? “Kua tono mai taku Atua i tana angela, e kua topiri i te vaa o te au liona,” i akakite mai ei aia. (Daniela 6:22) Kua turu te au angera ia Iesu i te akamata anga i tana angaanga orometua i te enua nei. (Mareko 1:13) E i mua ua ake i to Iesu mate anga, kua mama mai tetai angera kiaia e “kua akamaroiroi maira iaia.” (Luka 22:43) Mei teaa atura te akameitakianga te turu anga a taua angera ra kia Iesu i taua au tuatau puapinga ra i roto i tona oraanga! Kua akarangatira katoa tetai angera i te apotetoro ko Petero mei roto mai i te are tapekaanga.​—Angaanga 12:6-11.

Te paruru ra ainei te au angera ia tatou i teia tuatau? Me akamori tatou ia Iehova tei tau ki tana Tuatua, kua akapapuia mai kia tatou e te oronga maira tana au angera ririnui kitea koreia kia tatou nei i te paruruanga. Te taputou maira te Pipiria e: “Te patia nei te Angela a Iehova i te puakapa, e pini ua ake te aronga i mataku iaia, e kua akaora ia ratou.”​—Salamo 34:7.

Inara, e mea tau kia kite tatou e te rave ra te au angera i te angaanga a te Atua, kare i ta te tangata nei. (Salamo 103:20, 21) Te ariu maira ratou ki te aratakianga a te Atua, kare ki te au akauenga me kore ki te au patianga a te tangata. No reira, ko te Atua ko Iehova ta tatou ka kapiki atura no te tauturu, kare ko te au angera. (Mataio 26:53) E tikai, no te mea e kare tatou e kite atu ana i te au angera, kare e rauka ia tatou i te akamanako e mei teaa ra te maata te taangaangaanga te Atua ia ratou i te tauturu anga i te au tangata ma te au manako tukeke. Inara kua kite tatou e te “oronga [maira a Iehova] i te maroiroi ki te aronga i tika te ngakau iaia.” (2 Paraleipomeno 16:9; Salamo 91:11) E tei ia tatou te akapapuanga e “kia pati ua atu tatou i te au mea ravarai i tau iaia ra, te akarongo maira aia [te Atua] ia tatou.”​—1 Ioane 5:14.

Te akakite katoa maira te au Tuatua Tapu kia tatou e kia tuku atu i ta tatou au pure e te akamori anga ki te Atua anake ra. (Exodo 20:3-5; Salamo 5:1, 2; Mataio 6:9) Te akamaroiroi maira te au angera akarongo mou ia tatou kia rave i te reira. Ei akaraanga, te titau anga te apotetoro ko Ioane i te akamori i tetai angera, kua ako mai taua mea ora vaerua ra iaia, i te na ko anga e: “Auraka koe e akapera . . . e akamori i te Atua.”​—Apokalupo 19:10.

Kua Oronga Mai te Au Angera i te Au Karere a te Atua

Te aite anga o te tuatua “angera” e “karere,” e ko tetai mataara ia e tavini ra te au angera i te Atua​—e e au karere nana ki te au tangata. Ei akatauanga, “kua tonokia maira e te Atua te angela ko Gaberiela, ki tetai oire i Galilea, ko Nazareta te ingoa.” No teaa ra? I te akakite atu anga ki te vaine mapu ko Maria te ingoa e noatu e paretenia aia, ka to oki aia e ka anau mai i tetai tamaiti kia tapaia te ingoa ko Iesu. (Luka 1:26-31) Kua tono katoaia mai tetai angera ki te au tiaki mamoe i roto i te au koro kia akakite atu kia ratou e kua anauia te “Mesia ra ko te Atu.” (Luka 2:8-11) Mei te reira katoa, kua oronga atu te au angera i te au karere no ko mai i te Atua kia Aberahama, Mose, Iesu, e tetai ke tei tataia i roto i te Pipiria.​—Genese 18:1-5, 10; Exodo 3:1, 2; Luka 22:39-43.

Akapeea te au angera i te tavini anga ei au karere na te Atua i teia tuatau? E akamanako ana i te angaanga ta Iesu i akakite e ka rave tana au pipi i mua ake ka ope ei teia akatereanga o te au mea nei. Kua karanga aia e: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:3, 14) I te au mataiti ravarai, e maata atu i te pirioni au ora ta te Au Kite o Iehova e akapou ra i te tutu aere anga i te tuatua meitaki o te Patireia o te Atua. Inara kua kite ainei koe e kua o katoa mai te au angera ki roto i teia angaanga? Te tuatua ra te apotetoro ko Ioane no tetai orama tana i kite atu, i te na ko anga e: “Akara atura au i tetai angela . . . , ma te evangelia mutu  kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata.” (Apokalupo 14:6, 7) Te akakite maira teia irava i te angaanga puapinga maata a te au angera no te au tangata i teia tuatau.

Te kite nei te Au Kite o Iehova i te tika anga o ta te angera aratakianga ia ratou e rave ra i ta ratou angaanga tutu anga mei tera ngutupa ki tera ngutupa. E aravei putuputu ana ratou i te aronga tataki tai tei pure ua akera no tetai tangata kia tauturu mai ia ratou kia marama i ta te Atua au akakoroanga. Tei tupu mai no te aratakianga a te angera e te angaanga a te Au Kite ra, i kite mai ei te anere e te tauatini ua atu ia Iehova i te au mataiti ravarai. Kia puapingaia koe no teia angaanga akaoraanga ora tei raveia i raro ake i te aratakianga a te angera.

Te Rave nei te Au Angera i ta te Atua Akavaanga

Noatu e kare ratou i akamanaia kia akava atu i te au tangata, kare te au angera e e aronga akara mata ua. (Ioane 5:22; Ebera 12:22, 23) Te tavini anga ei au akava, kua rave ratou i ta te Atua au akavaanga i te au tuatau i topa. Ei akaraanga, kua taangaanga te Atua i te au angera i roto i tana tamaki anga ia Aiphiti taito ra, tei mou tuikaa i te ngati Iseraela. (Salamo 78:49) E e tai ua po kua ta iora “te Angela a Iehova” okotai anere e varu ngauru ma rima tauatini vaeau i roto i te puakapa o tetai enemi o te au tangata a te Atua.​—2 Ariki 19:35.

I te tuatau ki mua, ka rave katoa te au angera i ta te Atua akavaanga pakari. Ka aere mai a Iesu “ma tana au angela mana katoa ra, Ma te ai mura ra, i te tuku anga mai i te mate i te aronga kare i kite i te Atua, e tei kore i akarongo i te evangelia o to tatou Atu o Iesu Mesia.” (2 Tesalonia 1:7, 8) Inara, ka tukunaia mai taua akapouanga ki runga ua i te aronga kare i ariu mai ana ki te karere te tutu aereia ra i teianei i te ao katoa ma te turu anga a te au angera. Te aronga i kimi i te Atua e te aru ra i te au apiianga Tuatua Tapu kare e akakinoia.​—Zephania 2:3.

Mei teaa atura to tatou mareka anga no te au angera akarongo mou, te rave ua ra i te au ikuikuanga a te Atua! Te taangaanga nei a Iehova ia ratou kia tauturu e kia paruru i tona au tavini tiratiratu i runga i te enua nei. E akapumaana anga tikai teia kia tatou no te mea te vai ra te au mea ora vaerua kino tei tapaia ko te au temoni te inangaro ra i te akakino ia tatou.

Te Au Temoni​—Koai Ma Ratou?

I te 15 anere mataiti i muri ake i te pikikaa anga a Satani ia Eva i Edene, kua kite mai te pamiri o te Atua te au angera ra e kua autu a Satani te Tiaporo i te akaanga ke mai anga mei te Atua ra i te au tangata ravarai kare ra ko tetai aronga akarongo mou tokoiti ua, mei ia Abela, Enoka, e Noa ra. (Genese 3:1-7; Ebera 11:4, 5, 7) Kua aru katoa etai o te au angera ia Satani. Te tuatua ra te Pipiria ia  ratou ei au vaerua kare i akarongo ana “i te tuatau ia Noa ra.” (1 Petero 3:19, 20) Akapeea e kiteaia mai ei to ratou tu akarongo kore?

I to Noa tuatau e maata te au angera meameaau tei akaruke i to ratou ngai i roto i te pamiri o te Atua i te rangi, kua aere mai ki te enua nei, e kua rave mai i te au kopapa akatutu tangata. No teaa ra? Kua akatupu ratou i tetai anoano kia rave i te au pirianga ainga ki te au vaine. Kua taki atu teia i te anau mai anga ratou i te tamariki tei tapaia ko te Nepirimi, tei riro mai e aronga tuputupua kino. Tei runga ravao, “e kino maata to te tangata i te enua nei, e kua kino anake te au manako katoa, e te akakoroanga katoa o to ratou ngakau i te au rā katoa ra.” Inara, kare te Atua ko Iehova i akatika ana i teia kino ki te tangata ra kia tupu ua atu. Kua tuku mai aia i tetai Vaipuke i te ao katoa, i te takore atu anga i te au tangata kino ravarai ma te Nepirimi ra. Te au tangata tei akaora uaia mai ra ko te au tavini akarongo mou a te Atua.​—Genese 6:1-7, 17; 7:23.

Kua ora mai te au angera meameaau i te akapouanga i te tuatau o te Vaipuke. Kua akaruke ratou i to ratou kopapa tangata e kua oki atu ki te ngai vaerua ei au mea ora vaerua. Mei reira mai, kua karangaia ratou e ko te au temoni. Kua turu ratou i te tua o Satani te Tiaporo, tei kapikiia ko “te mana o te demoni maata.” (Mataio 12:24-27) Mei to ratou tutara rai, te inangaro ra te au temoni i te akamorianga a te au tangata.

E kino tikai te au temoni, inara kare tatou e mataku atu ia ratou. Kua kotingaia to ratou mana. Te oki atu anga te au angera akarongo kore ra ki te rangi, kare ratou i akatika akaouia ki roto i to te Atua pamiri o te au angera akarongo mou. Inara, kua araiia ratou mei te akamaramaanga pae vaerua no ko mai i te Atua, ma te akara anga puapinga kore ua no te tuatau ki mua. E tikai, kua kotingaia ratou i roto i tetai turanga poiri i te pae vaerua tei kiteaia ko Tateraiti. (2 Petero 2:4, NW) Kua tapu a Iehova ia ratou ma te “pirianganaoa matara kore,” kia noo ua ratou i roto i te poiri i te pae vaerua. Pera katoa, kare e rauka ia ratou i te oki akaou mai i roto i te au kopapa akatutu tangata.​—Iuda 6.

Eaa Taau ka Rave?

Te tuku ra rai ainei te au temoni i te akakeu anga ki rungao i te au tangata? Ae, te rave ra ratou i te reira na te rave akaou anga i te “ravenga pakari,” mei ta to ratou tutara i taangaanga ana, ko Satani te Tiaporo ra. (Ephesia 6:11, 12) Inara, na te akonoanga i te ako anga no te Tuatua a te Atua, ka rauka ia tatou i te patoi ngaueue kore atu i te au temoni. Tei runga ravao, te aronga te inangaro ra i te Atua ka aere mai i raro ake i te paruruanga a te au angera ririnui.

E puapinga tikai kia apii koe i te au umuumuanga a te Atua tei akanooia i roto i te au Tuatua Tapu e kia taangaanga i taau i kite mai! E maata atu taau ka kite mai no runga i te au apiianga Pipiria na te aravei atu anga i te Au Kite o Iehova i toou ngai me kore na te tata atu anga ki te aronga nenei o teia makatini. Te mataora nei te Au Kite o Iehova i te apii atu i te Pipiria kia koe kare e tutaki anga e i te tuatau te tau ra kia koe.

[Tataanga Rikiriki i Raro]

[Pia i te kapi 6]

TE AU ANGERA​—AKAPEEA RATOU I TE AKAAEREIA ANGA

Te akaaere nei a Iehova i tona pamiri maata o te au angera mei teia rai:

Te angera maata rava i roto i te ririnui e te mana ko Mikaela te angera maata, me kore ko Iesu Karaiti. (1 Tesalonia 4:16; Iuda 9) Tei raro ake iaia te au terapi, te au kerupi, e tetai au angera.

Te tu ra te au terapi i mua i te terono o te Atua. Te tavini ra ratou ei aronga raverave i mua i te terono o te Atua. Ta ratou tukuanga angaanga tikai ko te akakiteanga i to te Atua tu tapu e te akonoanga i tona iti tangata kia vai ma ua i te pae vaerua.​—Isaia 6:1-3, 6, 7.

Te taokotai ra te au kerupi ma te terono o te Atua e te turu ra i to Iehova tu ngateitei.​—Salamo 80:1; 99:1; Ezekiela 10:1, 2.

E au rima rave tetai au angera na Iehova, e te rave nei ratou i te anoano tu-Atua.

[Tutu i te kapi 4]

Kua arataki akaora mai te au angera ia Lota e tana nga tamaine

[Tutu i te kapi 5]

Te titau anga te apotetoro ko Ioane i te akamori i te angera, kua akakiteia atu kiaia e: “Auraka koe e akapera.”

[Tutu i te kapi 6]

Na te au angera e rave i ta te Atua akavaanga

[Tutu i te kapi 7]

Te puapingaia ra ainei koe mei te angaanga tutu anga te raveia ra i raro ake i te aratakianga a te au angera?