“Akakite ua Mai kia Matou!”

I Nezlobnaya, i Rutia, te apii ra tetai pupu aronga apii tata puka i te au angaanga a te tangata tata puka i Rutia ko Mikhail Bulgakov. I roto i taua au angaanga ra koia oki ko tetai puka te akataka maira ia Iesu Karaiti na roto i te tu akakino, inara te akaari maira te reira ia Satani ei toa. I muri ake i te uriurianga a te pupu apii, kua tuku mai te puapii i tetai tarere tataanga na te pupu apii tei akanooia ki runga i teia tu puka nei. Inara, kua pati meitaki ua atu tetai o te aronga apiipii, e Kite no Iehova e 16 mataiti tona ingoa ko Andrey, kia kore aia e piri atu ki roto i te tarere no te mea kare e tika ana i tona akava ngakau kia apii i teia tu puka nei. Inara kua pati aia kia tata i tetai tua te ka akamarama mai e eaa tona manako no runga ia Iesu Karaiti. Kua akatika mai te puapii.

I roto i tana tua, kua akamarama a Andrey e noatu te akangateitei ra aia i te manako o etai ke, kua kite ra aia e ko te mataara meitaki roa atu kia kite no runga ia Iesu koia oki kia tatau i te papaanga o te au Evangeria e a. Na te rave anga i te reira, “ka kite koe i reira no runga i to Iesu oraanga e te au apiianga tei akanooia ki runga i te au papaanga o te aronga kite mata.” Kua kapiti atu a Andrey: “Tetai manako ke mai koia oki ko te tu i akatutuia mai ei a Satani. Penei ka katakata roa tetai aronga i te tatau i tetai puka e ko Satani te toa i roto, kiaku ra kare.” Kua akamarama atu aia e ko Satani e mea ora vaerua ririnui kino tikai tei ariu ke mei te Atua, te apai mai anga i te kino, te taitaia, e te mamae ki te pamiri o te tangata nei. Kua taopenga a Andrey i tana tua e: “Kare au e irinaki ana e ka riro te tatau anga i teia puka ei puapinga noku. E tika e, kare au e riri ana ia Bulgakov. Inara kiaku uaorai, e ngari ake au i te tatau i te Pipiria kia kite i te tuatua enua tika tikai no runga ia Iesu Karaiti.”

Kua rekareka tikai te puapii o Andrey i te tua e kua pati aia iaia kia akapapa i tetai ripoti akakite vaa ua no runga ia Iesu Karaiti. Kua ariki vave ua atu a Andrey. I roto ta ratou pupu apii i aru mai, kua tatau atu a Andrey i tana ripoti ki mua i te pupu apii katoatoa. Kua akamarama atu aia i te tumu i manako ei aia e ko Iesu te tangata maata rava atu tei ora ana. I reira kua tatau atu aia i tetai pene no runga i to Iesu matenga mei roto i te puka Pipiria a Mataio. I te mea te pou atura te taime tei akatakaia no te ripoti, kua inangaro a Andrey i te akaoti i te reira, inara kua raurau mai tona au oa apii iaia e: “Akakite ua mai kia matou! Eaa tei tupu?” I reira kua tatau atu rai aia i te papaanga a Mataio no runga i te tuakaouanga o Iesu.

I te oti anga a Andrey, e maata tikai te au uianga ta tona au oa apii i ui atu no runga ia Iesu e ia Iehova. “Kua pure au kia Iehova no te pakari, e kua pau mai aia i taku pure,” i karanga ai a Andrey. “Kua rauka iaku i te pau i ta ratou au uianga pouroa!” I muri ake i te apii, kua oronga atu a Andrey i tetai kopi o te puka Te Tangata Maata Rava Atu Tei Ora Ana na tona puapii, * tana i ariki rekareka mai. Kua karanga a Andrey: “Kua oronga mai aia i te au maka teitei naku no taku ripoti e kua akameitaki mai iaku no toku uaorai au irinakianga e no te kore e akama i te reira. Kua akakite katoa mai aia e te ariki ra aia i tetai o toku au irinakianga.”

Kua rekareka tikai a Andrey e kua iki aia kia aru i tona akava ngakau tei tereniia e te Pipiria na te kore anga e tatau i te au tuatua e akangateitei kore ra ia Iehova e tana Tamaiti, ko Iesu Karaiti. Kua riro taua turanga ra kare anake ua ei paruru iaia mei te au manako kare i tau i te tuatua tapu kua akatuera katoa ra i tetai tuatau umere roa kia akakite i te au tuatua mou puapinga o te Pipiria ki etai ke.

[Tataanga Rikiriki i Raro]