Au Uianga a te Aronga Tatau

Eaa ra ta te apotetoro ko Paulo e akakite maira i te karanga anga aia e kia ‘muteki ua te au vaine i te au ekalesia’?

Kua tata a Paulo ki te putuputuanga Kerititiano i Korinetia e: “Mei tei te au ekalesia katoa ra o te aronga tapu. Kia muteki ua ta kotou au vaine i te au ekalesia: kare oki ratou e tika kia tuatua.” (1 Korinetia 14:33, 34) Kia marama meitaki tikai tatou i teia nei, e meitaki kia akamanako i te aerenga tuatua o ta Paulo ako anga.

I roto ia 1 Korinetia pene 14, te uriuri ra a Paulo i te au tumu te piri atura ki te au uipaanga a te putuputuanga Kerititiano. Kua akataka mai aia e eaa te ka uriuriia i taua au uipaanga e kua akamaroiroi mai e akapeea ratou i te raveanga i te reira. (1 Korinetia 14:1-6, 26-34) Pera katoa, kua akakite mai aia i te akakoro anga o te au uipaanga Kerititiano​—“kia tupu te meitaki i te ekalesia.”​—1 Korinetia 14:4, 5, 12, 26.

Ta Paulo ikuikuanga e “kia muteki ua” e toru taime te tataia anga i roto ia 1 Korinetia pene 14. I te taime okotai, te tuatuaia ra te reira ki tetai pupu ke i roto i te putuputuanga, inara i roto i te au turanga katoatoa, kua orongaia te reira no taua tumu rai​—e kia “rave ra i te au mea ravarai ma te tika e te manea.”​—1 Korinetia 14:40.

Te mea mua, te karanga ra a Paulo e: “Kia tuatua mai tetai tangata i te tuatua ke, kia toko rua, e kia toko toru ua, kia tuatua, e tataki tai marie ratou; e na tetai e akakite. E kare e akakite ra, kia muteki ua aia i roto i te ekalesia; e tuatua ua ra aia kiaia uaorai e ki te Atua oki.” (1 Korinetia 14:27, 28) Kare te aiteanga o te reira e kare roa taua tangata ra e tuatua i ko i te au uipaanga inara te vai ra tetai au taime kia muteki ua aia. Kia maara ra e, te akakoro anga o te au uipaanga​—kia akamaroiroi i tetai e tetai​—kare e rauka mai me ka tuatua aia na roto i tetai reo kare tetai e marama ana.

Te rua, kua akakite a Paulo e: “Kia toko rua peroveta, e kia toko toru oki, kia tuatua, e na te tangata ravarai e kimi matatio. E e tuatua tei akakiteia mai ki tetai e noo i vaitatao ra, kia muteki tei muatangana ra ka tuatuaʼi.” Te aite anga o teia, kare e kia araiia te peroveta mua ra i te tuatuaanga i ko i te au uipaanga,  mari ra kia muteki ua aia i tetai au taime. Ei reira ko tei rauka maira te akakiteanga temeio te ka tuatua atu ki te putuputuanga, e te akakoro anga o te uipaanga​—e “kia pumaana te katoatoa”​—te ka rauka mai.​—1 Korinetia 14:26, 29-31.

Te toru, ko te au vaine Kerititiano ua ta Paulo i tuatua atu, i te na ko anga e: “Kia muteki ua ta kotou au vaine i te au ekalesia: kare oki ratou e tika kia tuatua; kia kauraro marie ra.” (1 Korinetia 14:34) Eaa ra a Paulo i oronga ai i teia akauenga ki te au tuaine? Kia akono i te tu tau i roto i te putuputuanga. Kua karanga aia e: “E kia inangaro ratou i te apii ra, e ui ratou i ta ratou au tane i te ngutuare ra: e mea tau kore oki i te vaine kia tuatua i roto i te ekalesia ra.”​—1 Korinetia 14:35.

Penei ake kua akaao etai au tuaine i tei tuatuaia ana i roto i te putuputuanga. Te tauturu maira ta Paulo ako anga i te au tuaine kia kopae i taua tu kononinoni pu e kia ariki akaaka ua i to ratou turanga i roto i ta Iehova akanoonooanga no te upoko, no runga tikai i ta ratou au tane. (1 Korinetia 11:3) Kapiti atu, na te muteki ua anga, te akaari ra te au tuaine e kare ratou e kimi ana e kia riro mai ei au puapii i roto i te putuputuanga. I tona tataanga kia Timoteo, kua akaari mai a Paulo e kare e tano ana no tetai vaine kia rave mai i te tuanga ei puapii: “Kare ra e tika iaku kia apii te vaine, e kia akateitei ki runga i te tane ra, kia muteki ua ra.”​—1 Timoteo 2:12.

Ko te aiteanga o te reira e kare tetai vaine Kerititiano e tuatua i te tuatau o te uipaanga a te putuputuanga? Kare. I to Paulo tuatau, e au atianga tetai, penei ake kua akakeuia e te vaerua tapu, kia pure me kore kia totou te au vaine Kerititiano i roto i te putuputuanga. I taua au atianga, ka akaari ratou i to ratou turanga na te aaoanga i tetai tapoki upoko. * (1 Korinetia 11:5) Pera katoa, i to Paulo tuatau e i teia tuatau, kua raurauia te au tuaine pera katoa te au taeake kia akakite aere i to ratou manakonakoanga ki te katoatoa. (Ebera 10:23-25) I te pae mai i te raveanga i teia i roto i te angaanga orometua, te akakite ra te au tuaine i to ratou manakonakoanga e te akamaroiroi ra i tetai ke i te tuatau o te au uipaanga a te putuputuanga na te orongaanga i te au tuatua tei manako meitakiia me patiia atu kia rave i te reira e te arikianga i te au tukuanga angaanga kia o atu ki roto i te au akatutuanga me kore i te au tuatua na te aronga apiipii.

No reira, “kia muteki ua” te au vaine Kerititiano na te kopaeanga i te tautaanga kia rave mai i te tuanga a tetai tane e te apiianga i te putuputuanga. Kare ratou e ui atu i te au uianga taumaro te ka akaao i te mana taoonga o te aronga te apii ra. Na te akatupuanga i to ratou tuanga tau i roto i te putuputuanga, te tauturu ra te au tuaine Kerititiano i te akatupu i tetai ngai no te au e kia “rave i te au mea katoa [i ko i te au uipaanga a te putuputuanga] kia tupu te meitaki.”​—1 Korinetia 14:26, 33.

[Tataanga Rikiriki i Raro]