Akaatea Takiri Mai mei te Akamorianga Pikikaa!

“Te na ko mairā Iehova, ‘E aere mai kotou ki vao, mei roto mai ia ratou ra, kia taka ke kotou, e auraka e rave ua atu i te mea viivii ra.’”​—2 KORINETIA 6:17.

1. Te kite nei te tangata ia ratou uaorai i roto i teea turanga pae vaerua?

E MANGANUI te au tangata ngakau tae kare i kite i te tuatua mou no runga i te Atua e no runga i te tuatau ki mua no te tangata. No te kare i kitea te au pauanga ki to ratou au manamanata oonu roa atu i te pae vaerua, te noo nei ratou i roto i tetai tu kononinoni ua e te papu kore. Mirioni ua atu tei akatuikaaia ki te au irinakianga purepure, te au peu, e te au akamaaraanga e akariri ra i Tei Anga mai ia tatou. Kare e ekoko, e au taeake toou e te au kopu tangata tei irinaki i roto i te ai era, i te Atua toru tai, te tu mate kore o te meta, me kore i tetai atu au apiianga pikikaa.

2. Eaa ra ta te au arataki akonoanga i rave, e eaa tei tupu?

² Eaa ra te akatupu nei i teia poiri pae vaerua? Te mea katakata, koia oki ko te akonoanga​—te au akaaerenga akonoanga tikai e te au arataki tei apii i te au manako patoi i to te Atua au manako. (Mareko 7:7, 8) Tei tupu mai, e manganui te au tangata tei akavareia kia irinaki e te akamori ra ratou i te Atua mou, ko te tika anga tikai ra te akariri atura ratou iaia. Tei runga tikai i te akonoanga pikikaa te apainga no teia turanga taitaia nei.

3. Koai te turuturu maata o te akonoanga pikikaa, e akapeea aia i te akataka angaia mai i roto i te Pipiria?

³ Te vai nei tetai mea ora kitea koreia e turuturu nei i te akonoanga pikikaa. I te tou anga kiaia, kua akakite te apotetoro ko Paulo: “Koia te aronga i akapoiriia to ratou ngakau akarongo kore e te atua o teianei ao ra, kia kore te mārama o te evangelia kakā o te Mesia, ko te tutu o te Atua ra, kia kakā mai i roto ia ratou.” (2 Korinetia 4:4) Ko “te atua o teianei ao ra” kare atu ei mari ra ko Satani te Tiaporo. Koia te turuturu maata o te akamorianga pikikaa. “Ko Satani oki tei akatutu angela katoa iaia uaorai no te mārama,” i tata ai a Paulo. “Kare oki te mea va maata, kia akatutu tavini tona au tavini no te tuatua-tika.” (2 Korinetia 11:14, 15) Te maani ra a Satani i te au apinga kino kia akara anga meitaki e te akavare i te tangata kia irinaki i te au pikikaa.

4. Eaa ta te Ture a te Atua ki to Iseraela i taito ra e akakite ra no runga i te au peroveta pikikaa?

⁴ No reira rai te Pipiria i akaapa pakari ei i te akonoanga pikikaa! Ei akatauanga, kua akamatakite mai tikai te Ture a Mose i to te Atua iti tangata ikiia no runga i te au peroveta pikikaa. Tetai ua atu tangata e turuturu ra i te au apiianga tika kore e te akamori i te au atua pikikaa ka ‘tamate takiri ravaia ïa no te tuatua anga e akaanga ke ia Iehova.’ Kua akaueia te ngati Iseraela ‘kia akapou i te kino i roto ia ratou.’ (Deuteronomi 13:1-5) Ae, te manako ra a Iehova i te akonoanga pikikaa ei mea kino.​—Ezekiela 13:3.

5. Eaa te au akamatakiteanga ka tau tatou kia ariu atu i teia tuatau?

⁵ Kua akaata mai a Iesu Karaiti e tana au apotetoro i to Iehova manako ngakau pakari no runga i te akonoanga pikikaa. Kua akamatakite a Iesu i tana au pipi: “Kia matakite ra i te peroveta pikikaa, ko tei aere mai ia kotou ma te kakau mamoe ra, kareka i roto, e luko taae.” (Mataio 7:15; Mareko 13:22, 23) Kua tata a Paulo e “kua akakiteia mai oki te riri o te Atua mei te rangi mai, i te au akono kore katoa i te Atua, e i te tuatua-tika kore a te tangata nei, ko tei tāpu i te tuatua-mou.” (Roma 1:18) E mea puapinga tikai kia akarongo te au Kerititiano mou i teia au akamatakiteanga e kia akaatea  mai mei tetai ua atu tangata e tapu ra i te tuatua mou o te Tuatua a te Atua me kore e akatotoa ra i te au apiianga pikikaa!​—1 Ioane 4:1.

E Oro Ke Mai mei ia “Babulonia Maata”

6. Akapeea ra a “Babulonia Maata” i te akatutu angaia mai i roto i te Pipiria?

⁶ E akamanako ana e akapeea te puka Pipiria o Apokalupo i te akataka anga mai i te akonoanga pikikaa. Kua akatutuia mai te reira ei vaine akaturi kona kava tei mana ki rungao i te au patireia e manganui e to ratou au tangata. Te rave nei teia vaine akatutu i te poneia ki te ui ariki e manganui e kua kona i te toto o te aronga akamori mou i te Atua. (Apokalupo 17:1, 2, 6, 18, NW) E ingoa tona tei tataia ki runga i tona rae tei aiteite rai ki tona tu viivii e te rikarika. Ko te ingoa koia oki ko “Babulonia Maata, ko te metua vaine o te aronga poneia e o te au apinga viivii ra o te enua nei.”​—Apokalupo 17:5, NW.

7, 8. Akapeea ra te akonoanga pikikaa i te akaturi anga iaia uaorai, e eaa tei tupu mai?

⁷ Te tano meitaki ra te akatakaanga no Babulonia Maata i roto te Tuatua Tapu ki te pupu taokotaiia o te akonoanga pikikaa. Noatu kare te au tauatini ua atu au akonoanga i taokotai tikaiia ei akaaerenga okotai i teianei ao, kua taokotai ra oki raua i roto i te akakoroanga e te angaanga okotai. Mei tei akatutuia mai e te vaine tu akono tau kore i roto ia Apokalupo, e maata tikai te mana akakeu o te akonoanga pikikaa ki rungao i te au kavamani. Te aite anga mei te vaine akarongo mou kore rai ki tana au koreromotu akaipoipo, kua akaturi te akonoanga pikikaa iaia uaorai na te akatupu anga i te au pirianga ki te au mana poritiki e manganui. “E te au akaturi tane, e te au akaturi vaine, kare kotou i kite e ko te anoano i teianei ao, e enemi ïa i te Atua ra?” i tata ai te pipi ko Iakobo. “E teianei ko te anoano e ei oa aia no teianei ao, e enemi ïa tangata no te Atua.”​—Iakobo 4:4.

⁸ Kua akatupu mai teia kapiti anga i te akonoanga pikikaa ki te au kavamani i te kino maata ki te tangata. Kua akakite te tangata kimikimi no te poritiki i Aperika ko Dr. Xolela Mangcu e “kua ki ua te tuatua enua o teianei ao i te au akaraanga o te au tamateanga maata tei akatupuia no tei iroia te akonoanga e te poritiki.” Kare i roa akenei kua akakite tetai nuti pepa: “Ko te au manamanata maata roa atu te akamaringi toto e te rikarika roa atu i teia tuatau . . . no runga te reira i te akonoanga.” E mirioni ua atu te au oraanga tei tamateia i roto i te au tamakianga tei turuturuia e te akonoanga. Kua takinga kino katoa a Babulonia Maata e kua tamatemate i to te Atua au tavini mou, e kua kona i to ratou toto, i na te reira tuatua ai.​—Apokalupo 18:24.

9. Akapeea ra to Iehova makitakita i te akonoanga pikikaa i te akakite angaia mai i roto i te puka o Apokalupo?

⁹ Ko te akapapuanga e te makitakita ra a Iehova i te akonoanga pikikaa te kite meitakiia atura na roto i te ka tupu kia Babulonia Maata. Te akakite ra a Apokalupo 17:16: “E te au tara tai ngauru taau i kite ra, e te puaka taae, ka riri oki ratou i te vaine poneia e ka  akapou e ka akataaka ua iaia, e ka kai i tona kopapa e ka tutungi takiri iaia ki te ai.” (NW) Te mea mua, ka veteveteia aia e te puaka taae e mate ua atu e ka kaingaia tona kopapa. I reira, ko te ngai ka toe mai iaia ka tutungi takiriia ia. Aiteite rai ki te reira, kare e roa atu ka rave te au kavamani o teianei ao i taua au tu rai ki te akonoanga pikikaa. Ka akakeu te Atua ia ratou kia akatupu i te reira. (Apokalupo 17:17, NW) Ka akapouia a Babulonia Maata, te patireia akonoanga pikikaa o teianei ao. ‘Kore rava aia e kitea akaouia atu.’​—Apokalupo 18:21.

10. Eaa tikai to tatou turanga no runga i te akonoanga pikikaa?

¹⁰ Eaa te turanga ka tau te aronga akamori mou kia akamanako no runga ia Babulonia Maata? Na roto i te au tuatua taka meitaki ua, kua akaue mai te Pipiria: “Ka aere ke mai ana kotou ki vao, e aku au tangata, kia kore kotou e riro ei rave katoa i tana ra au ara, kia kore kotou e mate katoa i tona ra au mate.” (Apokalupo 18:4) Te aronga te inangaro ra kia akaoraia ka anoanoia kia akaatea mai ki vao i te akonoanga pikikaa i mua ake ka tureti ei. Iaia i te enua nei, kua totou a Iesu Karaiti e i te au ra openga, e manganui te ka karanga ua e te akarongo ra iaia. (Mataio 24:3-5) Ki taua aronga ra, ka karanga aia e: “Kare takiri au i kite ia kotou: ka aere ke atu kotou, te aronga rave tuatua kino.” (Mataio 7:23) Kua kopae a Iesu Karaiti, te Ariki tei akateronoia i teianei, i te akonoanga pikikaa.

Akaatea Takiri Mai​—Akapeea Ra?

11. Eaa tikai ta tatou ka rave kia akaatea takiri mai mei te akonoanga pikikaa?

¹¹ Te akaatea takiri maira te au Kerititiano mou mei te akonoanga pikikaa, ma te patoi anga atu i te au apiianga a te akonoanga pikikaa. Teia te aiteanga ka kopae tatou i te akarongorongo atu i te au porokarama akonoanga i runga i te ratio e te tivi pera katoa te au puka akonoanga e apii ra i te au pikikaa no runga i te Atua e tana Tuatua. (Salamo 119:37) E mea pakari katoa auraka e piri atu ki roto i te au akakoroanga e te au angaanga tamataora a tetai ua atu akaaerenga tei piri atu ki te akonoanga pikikaa. Kapiti katoa atu, kare tatou e inangaro i te turuturu atu i te akamorianga pikikaa na roto i tetai ua atu mataara. (1 Korinetia 10:21) Ka riro te rave anga i teia au mea nei i te paruru ia tatou mei te apai ke angaia e tetai tangata “ei pikikaa anga nana na roto i te tuatua pakari e te akavareanga puapinga kore ua kia tau i te porokiroki a te tangata, kia tau i te au mea mua o te ao nei e kare i tau i te Karaiti.”​—Kolosa 2:8, NW.

12. Akapeea ra tetai tangata me akaatea mai mei tetai ua atu pirianga ki te au akaaerenga akonoanga pikikaa?

¹² Peea me te inangaro ra tetai tangata kia riro mai ei Kite no Iehova inara kua retitaia aia ei mema no tetai akonoanga pikikaa? Te  maataanga o te taime, ka tukuia tetai reta no te akaatea mai ei akapapu e kare tetai tangata e inangaro akaou ana kia riro ei mema no tetai akonoanga pikikaa. E mea puapinga tikai kia rave tera tangata i tetai ikianga papu tikai i te kopae takiri i tetai ua atu tu taviiviianga pae vaerua mei te akonoanga pikikaa mai. Ko te au angaanga a tetai e inangaro ra kia riro mai ei Kite kia akataka meitaki mai te reira ki te akaaerenga akonoanga me kore ki te katoatoa e akara maira e kua akaruke aia i taua pirianga akonoanga ra.

13. Eaa te akoanga ta te Pipiria e oronga maira no runga i te umuumuanga kia akaatea takiri mai mei te akamorianga pikikaa?

¹³ “Auraka kotou e kapitiia ma te tau kore i te aronga akarongo kore ra,” i tata ai te apotetoro ko Paulo. “Eaa to te tuatua-tika tau anga i te tuatua-tika kore? e eaa to te mārama tau anga i te poiri? Eaa to te Mesia tau anga ia Beliala? e eaa to te tangata akarongo ra puapinga i te tangata akarongo kore? E eaa to te nao o te Atua ra aite anga atu i te idolo? . . . E teianei, te na ko mairā Iehova, ‘E aere mai kotou ki vao, mei roto mai ia ratou ra, kia taka ke kotou, e auraka e rave ua atu i te mea viivii ra.’” (2 Korinetia 6:14-17) E akarongo tatou i teia au tuatua ma te akaatea takiri mai anga mei te akamorianga pikikaa. Te umuumu maira ainei te akoanga a Paulo e kia akaatea katoa mai tatou mei te aronga akamori pikikaa?

“Ei Aerenga Akono Meitaki”

14. Ka anoanoia ainei tatou kia kopae takiri atu i te aronga i roto i te akamorianga pikikaa? E akataka mai.

¹⁴ Ka anoanoia ainei te aronga akamori mou kia kopae katoatoa i te au pirianga ki te au tangata tei roto i te akamorianga pikikaa? Ka anoanoia ainei tatou kia akamamao takiri mai ia tatou uaorai mei te aronga kare e ariki ana i to tatou akarongo? Te pauanga koia oki e kare. Te akakite ra te rua o te nga akauenga maata rava atu e: “E aroa atu koe i toou tangata tupu mei te aroa ia koe uaorai.” (Mataio 22:39) Te akaari tikai ra tatou i te aroa no to tatou tangata tupu me akakite atu tatou kia ratou i te tuatua meitaki o te Patireia. Te akaari katoaia ra to tatou aroa no ratou me apii tatou i te Pipiria kia ratou e te akamatakite ia ratou e ka anoanoia te akaatea takiri mai mei te akamorianga pikikaa.

15. Eaa ra te aiteanga e ‘kare i to teianei ao’?

¹⁵ Noatu te tutu aere nei tatou i te tuatua meitaki ki to tatou au tangata tupu, ei au pipi na Iesu ‘kare tatou i to teianei ao.’ (Ioane 15:19) Te tuatua “teianei ao” i konei te tou ra ki te taiate tangata tei takake mai mei te Atua. (Ephesia 4:17-19; 1 Ioane 5:19) Takake mai tatou mei teianei ao i roto i te tu e te kopae ra tatou i te au tu, te tuatua, e te tu e akariri ana ia Iehova. (1 Ioane 2:15-17) Pera katoa, kia rotai ki te kaveinga “e kino te tuatua meitaki i te kapiti anga kikino ra,” ka kopae tatou i te piri vaitata atu ki te aronga kare e aru ana i te au turanga Kerititiano. (1 Korinetia 15:33) Ko te riro kare i to teianei ao koia oki kia vai ua “auraka ei viivii i teianei ao.” (Iakobo 1:27) No reira, kare te aiteanga o te akatakake anga mai mei teianei ao e ka akatakake mai tikai tatou mei te au pirianga pouroa ki te au tangata ke atu.​—Ioane 17:15, 16; 1 Korinetia 5:9, 10.

16, 17. Akapeea tikai te au Kerititiano me akono atu i te aronga kare i kite i te tuatua mou o te Pipiria?

¹⁶ Akapeea, i reira, tatou me akono atu i te aronga kare i kite i te au tuatua mou o te Pipiria? Ki te putuputuanga i Kolosa, kua tata a Paulo: “Ei aerenga akono meitaki to kotou i te aronga ki vao ra, ma te taporoporo oki i te tuatau. Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa ra.” (Kolosa 4:5, 6) Kua tata te apotetoro ko Petero: “Ka akatapu ra kotou [“ia Karaiti ei Atu i roto,” NW] i to kotou ngakau; e kia tika ua rai ia kotou kia akakite atu  ki te tangata katoa e ui mai ia kotou i te manako i roto ia kotou na, ma te maru e te kauraro marie atu.” (1 Petero 3:15) Kua ako atu a Paulo i te au Kerititiano “auraka rava e akakino atu i te tangata ravarai, eiaa ei tauetono, kia maru ra, e te akono i te mea maru i te tangata katoa ra.”​—Tito 3:2.

¹⁷ Ei Au Kite no Iehova, ka kopae tatou i te tu kino e te akatietie ki etai ke. Kare rava tatou e tuatua i te au tuatua akakino me akataka mai i te tangata o tetai au akonoanga ke. Mari ra, e matakite ana tatou, noatu me takinga kino mai me kore me tuatua akakino mai te tangata kainga, te tangata tupu, me kore te oa angaanga.​—Kolosa 4:6; 2 Timoteo 2:24.

“E Tāpu Meitaki i te Akonoanga Tuatua Tikai”

18. Eaa te turanga pae vaerua kino e kiteaia nei e te aronga tei oki akaou ki te akamorianga pikikaa?

¹⁸ I muri ake i te kite anga i te au tuatua mou o te Pipiria, e mea tumatetenga tikai kia oki akaou tetai ki te akamorianga pikikaa! Te akataka maira te Pipiria i te au openga kino o taua tu arataa ra i te karanga anga e: “Kua ora oki ratou i te viivii o teianei ao, i te kite i te Atu ra, i te Ora ia Iesu Mesia, ka ii akaou atu ei, e kua vi rai ratou i te reira, e kino maata ua atu tei to ratou openga i tei muatangana. . . . Kua tupu io nei ra ia ratou te potonga tuatua tika ra e, ‘Kua oki te kuri ki tona uaorai ruaki, e te tinana i mā ki te takaviri anga i te vari.’”​—2 Petero 2:20-22.

19. No teaa ra i puapinga ai kia vai matakite ua ki tetai ua atu apinga te ka takino i to tatou tu pae vaerua?

¹⁹ Ka anoanoia tatou kia vai matakite ua i tetai ua atu apinga te ka takino i to tatou tu pae vaerua. E tika tikai teia au kino nei! Te akamatakite maira te apotetoro ko Paulo: ‘Te tuatua pu ua maira te vaerua, e kia tae ki te au tuatau a muri atu e akaruke ei tetai papaki i tei akarongoia nei, i te akono anga atu i te au vaerua pikikaa, e te tuatua o te au demoni ra.’ (1 Timoteo 4:1) Te noo nei tatou i roto i te “au tuatau a muri atu.” Ko te aronga kare e akaatea takiri mai ka ‘tauriuriia, e akapeke aereia e te matangi ra, i tera tuatua i tera tuatua, i te ravenga a te tangata nei, e te pakari i te ravenga tini o te pikikaa ra.’​—Ephesia 4:13, 14.

20. Akapeea ra tatou i te paruru anga ia tatou uaorai mei te akakeuanga kino a te akonoanga pikikaa?

²⁰ Akapeea ra tatou i te paruru anga ia tatou uaorai mei te akakeuanga kino a te akonoanga pikikaa? E akamanako ana i te au mea katoatoa ta Iehova i oronga mai. Tei ia tatou te Tuatua a te Atua, te Pipiria. (2 Timoteo 3:16, 17) E maata katoa ta Iehova kai pae vaerua i oronga mai na roto i “te tavini akono meitaki e te pakari.” (Mataio 24:45) Ia tatou e tupu atura i roto i te tuatua mou, kare ainei i te mea tau kia tatanu tatou i te kaki no te ‘kai pakari a te tangata pakari’ e te anoano kia akaputuputu mai ki te ngai ka apii ei tatou i te au tuatua mou pae vaerua? (Ebera 5:13, 14; Salamo 26:8, NW) Kia akakoro tikai tatou i te taangaanga pu tikai i ta Iehova au apinga i oronga mai kia rauka ia tatou i te “tāpu meitaki i te akonoanga tuatua tikai” ta tatou i akarongo. (2 Timoteo 1:13) I reira ka rauka ia tatou i te akaatea takiri mai mei te akamorianga pikikaa.

Eaa Taau i Kite?

• Eaa a “Babulonia Maata”?

• Eaa ta tatou ka rave kia akaatea takiri mai mei te akonoanga pikikaa?

• Eaa te au kino ki to tatou tu pae vaerua te ka tau tatou kia kopae?

[Au Uianga Apii]

[Tutu i te kapi 28]

Kua kite ainei koe no teaa a “Babulonia Maata” i akatutuia mai ei ei vaine tu akono tau kore?

[Tutu i te kapi 29]

“Babulonia Maata” kua taka no te akapouanga

[Tutu i te kapi 31]

Ka akaari tatou i “te maru e te kauraro marie” ki te aronga kare e ariki ana i to tatou au irinakianga