“Ko te Atua ta Matou e Akarongo e Tikaʼi Auraka te Tangata”

Akaoraia e te “Toto Apinga Maata Ra”

KO TA Iehova ravenga maata roa atu no te aroa koia oki te tono mai anga i tana Tamaiti anau tai kia oronga i tona oraanga tangata apa kore ra ei oko. Ei au tangata ara, te anoano tikai ra tatou i taua akaoraanga, i te mea e kare “e rauka [i te tangata apa ra] i te akaora noatu i tetai taeake, kare katoa e oronga ki te Atua i tetai oko nona ra . . . e kia ora ua atura aia e tuatau ua atu.” (Salamo 49:6-9, NW) Mei teaa ra to tatou mareka anga e ‘kua oronga mai te Atua i tana Tamaiti anau tai, kia kore e mate te akarongo iaia, kia rauka ra te ora mutu kore’!​—Ioane 3:16.

Akapeea te oko i te oronga mai anga i te akaora anga? Ka akamanako ana tatou e a mataara e rauka ai ia tatou te rangatira tei tupu ana no teia ravenga maata o te aroa i te tua o te Atua ko Iehova.

Tataraia Mai Anga e te Oko

Te mea mua, ka rauka i to Iesu atinga i te akaora ia tatou mei te ara tei akatuangaia mai. Pouroa tatou kua anauia mai i roto i te ara. Ae, e aronga ara tatou i mua roa ake ka aati atu ei tatou i te ture a Iehova. Akapeea ra? Te karanga ra a Roma 5:12 e: “No te tangata okotai ra [ko Adamu] i o mai ei te kino i te ao nei, e no te kino oki te mate.” Ei tamariki ara na Adamu, kua akatuangaia mai kia tatou nei tona tu apa. Inara, na te tutaki anga o te oko i rauka ai ia tatou kia akarangatiraia mai mei te mouranga a te ara tei akatuangaia mai. (Roma 5:16) Kua ‘tongi atura a Iesu i te mate no te tangata ravarai nei,’ te apai anga i te au tumatetenga o te ara no ta Adamu uanga.​—Ebera 2:9, akaaite ia NW; 2 Korinetia 5:21; 1 Petero 2:24.

Te rua, ka rauka i te oko i te akarangatira ia tatou mei te au tu kino pakari o te ara. “E utunga te mate no te ara.” (Roma 6:23) Na roto i tona mate akaatinga ra, kua rauka i te Tamaiti a te Atua i te oronga mai i te ora mutu kore no te au tangata akarongo. E tikai, “ko te akarongo i te Tamaiti ra, e ora mutu kore tona: e te kore e akarongo i te Tamaiti ra, kare aia e kite i te ora.”​—Ioane 3:36.

Ka akara ana e ka akaoraia mai tatou mei te au tu kino o te ara me akono ua tatou i te akarongo na roto i te Tamaiti a te Atua. Te piri maira teia i te rave anga i te au taui anga i roto i to tatou oraanga e te apai mai anga i te reira kia rotai ki to te Atua anoano. E kopae ke atu tatou i tetai aerenga tarevake ta tatou i aruaru ana e kia akono atu i te mea te akamareka ra i te Atua. Te karanga ra te apotetoro ko Petero e te anoanoia ra tatou kia ‘tataraara e e ariu mai kia taparaia ta tatou au ara.’​—Angaanga 3:19.

Te toru, te atinga ta Iesu i oronga mai te akarangatira ra ia tatou mei tetai akava ngakau apa. Pouroa te aronga tei rave i tetai akatapuanga kia Iehova e kua riro mai ei au pipi papetitoia no tana Tamaiti ra te kite ra i te pumaana. (Mataio 11:28-30) Noatu to tatou tu apa, ka kite tatou i te oonu o te rekareka te tavini anga i te Atua ma tetai akava ngakau ma. (1 Timoteo 3:9; 1 Petero 3:21) Na te aaki anga i ta tatou au ara e te akaruke anga i te reira, ka akaariia mai kia tatou te akaaroa e ka rauka mai te akamaru anga mei tetai akava ngakau taitaia.—​Maseli 28:13.

Oronga Mai Anga i te Tauturu e te Manakonakoanga

I te openga ra, na te akono anga i te akarongo na roto i te oko, te akaoraia ra tatou mei te mataku no runga i to tatou turanga i mua i te Atua. Kua tata te apotetoro ko Ioane: “Kia rokoia atura tetai tangata i te ara, e Tika to tatou tei ko i te Metua ra, ko Iesu Mesia tuatua-tika ra.” (1 Ioane 2:1) No runga i ta Iesu tuanga ei tauturu, kua tata  te apotetoro ko Paulo: “E tika meitaki rava atu iaia kia akaora i te aronga e na reira atu iaia ra i te aere ki te Atua ra, e tika oki aia i te ora anga e tuatau ua atu ei pati i ta ratou.” (Ebera 7:25) Me te vai ua nei rai kia tatou tetai akairo o te ara, ka inangaro tatou i te au angaanga a te Taunga Maata ko Iesu Karaiti kia tauturu mai ia tatou kia rauka tetai turanga tika ma te Atua. Akapeea a Iesu te riro anga mai ei taunga maata no tatou?

E 40 ra i muri ake i tona akatuia mai anga i te 33 T.N., kua kake atu a Iesu ki te rangi, i te ngai i oronga atu ei aia i te puapinga o tona “toto apinga maata ra” ki te Atua. Tei tupu mai, kare e roa atu ka akarangatira mai a Iesu i te au tangata akarongo mei te ara e te mate. * (1 Petero 1:18, 19) No reira, kare ainei koe e ariki ana e te tau tikai ra ia Iesu Karaiti to tatou aroa e te akarongo?

Kapiti atu, e tau tikai i te Atua ko Iehova to tatou aroa e te akarongo. Kua rauka iaia i te oronga aroa mai kia tatou nei i te “tataraia mai anga e te oko.” (1 Korinetia 1:30, NW) Kare anake ua e ko te ora ta tatou ka kaiou kiaia mari katoa ra tetai manakonako anga te rauka ra ia tatou kia rekareka i te oraanga mutu kore. No reira, e tumu anga ravarai to tatou e ko te ‘Atua ta tatou e akarongo e tikaʼi auraka te tangata.’​—Angaanga 5:29.

[Tataanga Rikiriki i Raro]

[Pia/Au Tutu i te kapi 9]

KUA KITE AINEI KOE?

• Kua kake atu a Iesu ki te rangi mei te Maunga o Oliveta.​—Angaanga 1:9, 12.

• Ko te au apotetoro akarongo mou ua a Iesu tei kite i tona kake anga.​—Angaanga 1:2, 11-13.