E Mea Ora te Tuatua a Iehova

Au Manako Maata mei te Puka a Iobu

TE NOO ra te pateriareka ko Iobu ki te enua o Uza, ko Arapia i teianei. E maata rai te numero o te ngati Iseraela e noo ra ki Aiphiti i taua taime ra. Noatu e kare aia uaorai i te ngati Iseraela, e tangata akamori a Iobu no te Atua ko Iehova. No runga iaia, te karanga ra te Pipiria: “Kare oki ona e aite i runga i te enua nei, e tangata apa kore e te tiratiratu, i te mataku anga i te Atua, e te akaruke anga i te kino?” (Iobu 1:8) Ko teia paa te tuatau i rotopu i te au oraanga o nga tavini takake rava e rua o Iehova​—te tamaiti a Iakoba ko Iosepha e te peroveta ko Mose.

Ko Mose, tei manakoia e nana i tata i te puka a Iobu, penei kua kite mai no runga ia Iobu i tona nooanga e 40 mataiti i Midiana, e tei te pae ua te reira i te enua o Uza. Penei kua rongo a Mose no runga i to Iobu au mataiti openga e tei te pae ua te ngati Iseraela ia Uza, i te pae openga o to ratou teretereanga e 40 mataiti i roto i te metepara. * Te au tupuanga o Iobu kua papa manea tikai ia i te tataia anga e kua manakoia te tataanga ei tataanga meitaki rava tikai. Inara, tei maata rava atu, te pau ra te reira i te au uianga mei te: Eaa ra te au tangata meitaki e mamae ana? Eaa ra Iehova i akatika ai i te kino kia tupu ua atu? Ka rauka ainei i te au tangata apa i te tamou marie i to ratou tiratiratu ki te Atua? Ei tuanga no te Tuatua akauruia a te Atua, te karere a te puka a Iobu e mea ora e te ririnui katoa noatu i teia tuatau nei.​—Ebera 4:12.

“KIA KORE UA TE RĀ I ANAU EI AU NEI”

(Iobu 1:1–3:26)

I tetai ra kua akaao a Satani i to Iobu tu tiratiratu i mua i te Atua. Kua ariki a Iehova i te akaaoanga e kua akatika ia Satani kia apai mai ki runga ia Iobu i te au tukuanga kino. Inara kua patoi a Iobu i te “akakino atu i te Atua.”​—Iobu 2:9.

Kua tae mai te au taeake e toru o Iobu i te “tangi iaia.” (Iobu 2:11) Kua noo ratou kiaia kare roa i tuatua ana i tetai tuatua e akamata roa ai a Iobu i te na ko anga: “Kia kore ua te rā i anau ei au nei.” (Iobu 3:3) Kua inangaro aia kia riro mai “mei te tamaiti varevare, kare i kite i te mārama,” me kore kua anau mate ia mai.​—Iobu 3:11, 16.

Pauia te Au Uianga Tuatua Tapu:

1:4​—Kua akono ainei te au tamariki a Iobu i te au ra anauanga? Kare, kare ratou i rave ana. Te au tuatua mua no te “rā ” e te “ra anau anga” e tuke rai, e aiteanga uaorai to te reira tataki tai. (Genese 40:20) Ia Iobu 1:4, te taangaangaia ra te tuatua “rā,” akairoanga i tetai tuatau mei te opunga ra ki te itinga ra. I te akaraanga kua akono te tamariki tamaroa e itu a Iobu i tetai akaputuanga no te pamiri e itu ra e tai taime i te mataiti. Ia ratou e aere takapini ra, kua riro te tamaiti tataki tai e ko te tangata akono no te umukai raveia i tona are i “tona uaorai rā.”

1:6; 2:1​—Koai ma tei akatikaia kia aere mai ki mua ia Iehova? I rotopu i te aronga tei tu ki mua ia Iehova ko te Tamaiti anau tai a te Atua, ko te Logo; te au angera tiratiratu; e te ‘tamariki [angera akarongo kore] a te Atua,’ kapiti mai a Satani te Tiaporo. (Ioane 1:1, 18) Kare a Satani e tana au temoni i tiria mai ana mei te rangi e tae roa i muri poto ua mai i te akanooanga o te Patireia o te Atua i te 1914. (Apokalupo 12:1-12) Na te akatikaanga ia ratou kia aere atu ki mua iaia, kua oronga a Iehova i mua i te au mea ora vaerua katoatoa i ta Satani akaaoanga e te au maroanga ta te reira i akatupu.

1:7; 2:2​—Kua tuatua tika atu ainei a Iehova kia Satani? Kare te Pipiria e oronga maata mai ana te akatakaanga e akapeea a Iehova i  te tuatuaanga ma te au mea ora vaerua. Inara, kua kite atu te peroveta ko Mikaia i tetai orama i tona kite atu anga i tetai angera te tuatua tika atura kia Iehova. (1 Ariki 22:14, 19-23) I te akaraanga, i reira, kua tuatua atu a Iehova kia Satani e kare e angera i rotopu.

1:21​—I roto i teea tu e rauka ai ia Iobu i te oki akaou ki roto i te “kopu o [tona] metua vaine”? Mei te mea e kua anga te Atua ko Iehova i te tangata mei “te one-pueu o te enua nei,” te tuatua “metua vaine” te taangaangaia ra i konei ei akatutuanga te tou atura ki te enua.​—Genese 2:7.

2:9​—Eaa te tu manako o te vaine a Iobu i tona akakite atu anga ki tana tane kia akakino i te Atua e ka mate atu ei? Te vaine a Iobu kua roko katoa i te ngereanga aiteite rai ki tana tane. E kua mamae aia i te kite anga i tana tane maroiroi kua takinga kinoia e tetai maki viivii tikai. Kua ngere aia i tana au tamariki akaperepere. Penei kua taitaia tikai ia aia no teia au apinga katoatoa e kua ngaropoina iaia eaa tikai te mea puapinga maata​—to raua pirianga ki te Atua.

Au Apiianga no Tatou:

1:8-11; 2:3-5. Mei tei akaariia i roto i te turanga o Iobu, kapiti katoa atu ma te angaanga e te tuatua tau meitaki, te umuumuia ra kia tano te akakoroanga no te tavinianga ia Iehova.

1:21, 22. Na te vai tiratiratu ua atu anga kia Iehova i raro i te au turanga meitaki e pera katoa i te meitaki kore, te akapapu ra tatou ia Satani ei pikikaa.​—Maseli 27:11.

2:9, 10. Mei ia Iobu rai, ka tau tatou kia vai ngaueue kore i roto i te akarongo noatu me kare te au mema pamiri e akaperepere ana i ta tatou au aruaruanga pae vaerua me kore ka maro mai ia tatou kia aati me kore kia akaruke i to tatou akarongo.

2:13. Kare a te au taeake o Iobu apinga pumaana i te tuatua no runga i te Atua e tana au taputou no te mea kua ngere ratou i te tu pae vaerua.

“KARE RAI AU E PA I TE TUATUA-TIKA NAKU RA”

(Iobu 4:1–​31:40)

Te tumu manako ta Iobu au taeake i akono i roto i ta ratou au tuatua koia oki e penei kua rave a Iobu i tetai apinga kino tikai kia rauka i tetai papaanga kino pakari mei te Atua. Na Eliphaza i akamata. Aru mai a Biladada ia Eliphaza, i te taangaanga anga i tetai reo e kakati atu. E kino roa atu ta Zophara.

Kare a Iobu i ariki i te akamanakoanga tarevake a tona aronga atoro. Kare i marama ana eaa te Atua i akatika ai i tona mamae anga, kua maata roa aia i te manakoanga i te akatikatika anga iaia uaorai. E tikai, e inangaro to Iobu i te Atua e kua aue e: “E mate ua atu au, kare rai au e pa i te tuatua-tika naku ra.”​—Iobu 27:5.

Pauia te Au Uianga Tuatua Tapu:

7:1; 14:14​—Eaa te aiteanga o te ‘angaanga maroia’ me kore te ‘tuanga angaanga maroia’? Kua kino pakari roa to Iobu taitaia e kua manako mai aia i te oraanga ei angaanga pakari, e roiroi e te maroia. (Iobu 10:17) Mei te tuatau e akapou ana tetai i roto ia Teoro​—mei te taime o tetai mateanga ki te tuakaouanga​—e tuatau maroia, kua akaaite a Iobu i taua taime ra ki te tuanga angaanga maroia.

7:9, 10; 10:21; 16:22​—Te akakite maira ainei teia au tuatua e kare a Iobu i irinaki ana i roto i te tuakaouanga? Teia au tuatua no runga ia i to Iobu tuatau ki mua e vaitata mai nei. Eaa, i reira, te aiteanga o tana tuatua? Tetai akamanakoanga e e ua ake ka mate aia, kare tetai o tona au taeake e kite akaou iaia. Mei to ratou akaraanga, kare aia e oki atu ki tona kainga e kare katoa e rauka akaou atu i te arikianga e tae roa ki to te Atua tuatau ikiia. Penei kua manako katoa a Iobu e kare e rauka i tetai tangata i te oki mai mei Teoro ma te kare e tauturu. E kua manakonako a Iobu i roto i tetai tuakaouanga no te tuatau ki mua te taka meitaki ra mei ia Iobu 14:13-15.

10:10​—Akapeea a Iehova i te ‘riringi anga ia Iobu mei te u ra, e kua tatoka iaia mei te u toka ra’? E akatakaanga pee teia e akapeea a Iobu i te angaia mai anga i roto i te kopu o tona metua vaine.

19:20​—Eaa te aiteanga i te tuatua a Iobu “e kua ora io nei au ma toku kiri nio anake ra”? Na te tuatua anga e kua ora aia ma te pakiri o tetai apinga i te akaraanga e kare o te reira pakiri, penei te tuatua ra a Iobu e kua ora mai aia ma te kare takiri e apinga.

 Au Apiianga no Tatou:

4:7, 8; 8:5, 6; 11:13-15. Auraka tatou e viviki i te manako e te tangata tei taitaia te kokoti ra i tana i tatanu e te ngere ra i to te Atua akaperepereanga.

4:18, 19; 22:2, 3. Kia tumuia ta tatou ako ki runga i te Tuatua a te Atua, kare ki runga i to tatou uaorai au manako.​—2 Timoteo 3:16.

10:1. Kua akapoiri te riri otooto ia Iobu, e kare aia i akamanako atu ana i tetai au tumu ke no tona mamae anga. Auraka tatou e riri maata me te tamamaeia ra, koia tikai e tei ia tatou te maramaanga taka meitaki no te au maroanga te o maira.

14:7, 13-15; 19:25; 33:24. I roto i tetai ua atu timataanga e penei ka pei mai a Satani ki runga ia tatou, ka rauka te manakonakoanga no te tuakaouanga i te akaora ia tatou.

16:5; 19:2. Kia akamaroiroi e kia akaketaketa ta tatou au tuatua i tetai ke, kare e ka akariri atu ia ratou.​—Maseli 18:21.

22:5-7. Te akoanga orongaia i runga i te tumuanga no te akaapaanga te ngere ra i te akapapuanga tika tikai e puapinga kore ua e e kino tikai.

27:2; 30:20, 21. Te tamou marie anga i te tu tiratiratu kare e umuumuia te tu apa kore. Kua tarevake a Iobu i te avirianga i te Atua.

27:5. Ko Iobu anake ua te ka apai ke i tona uaorai tu tiratiratu no te mea te tu tiratiratu tei runga te reira i to tetai inangaro no te Atua. Kia tatanu tatou i reira i te inangaro pakari no Iehova.

28:1-28. Kua kite te tangata e teiea te au apinga nui o te enua. Iaia e kimikimi ra i te reira, kua taki atu tona kite karape iaia ki te au ara mataara i raro i te enua e kare tetai manu noni kite mamao e kite. Te pakari tau i te Atua, ra, e aere mai ana mei Iehova.

29:12-15. Kia inangaro ua tatou i te oronga i te takinga meitaki ki te aronga e inangaro ra i te tauturu.

31:1, 9-28. Kua akanoo a Iobu i tetai akaraanga no tatou mei tera e kua kopae aia i te akameamea anga, te akaturi, te akonoanga tau kore e te aroa kore i tetai ke, te tu materia, e te akamori itoro.

“TE TATARAARA NEI AU I RARO I TE ONE-PUEU E TE REU”

(Iobu 32:1–​42:17)

Tetai tangata mapu e tu ra i te pae ko Eliu tona ingoa te akarongo marie ua ra ki te taumaroanga. I teianei kua tuatua atu aia. Kua akatano aia ia Iobu e tona aronga takinokino e toru.

I te akamutu roa mai anga a Eliu, kua pau mai a Iehova mei roto mai i tetai puaioio. Kare aia i oronga ana i tetai akatakaanga no to Iobu mamaeanga. Inara, na te uianga i te au putunga uianga, kua maani te Mana Katoatoa ia Iobu kia kite mai i Tona mana umere rava e te pakari maata. Kua akatika rai a Iobu e kua tuatua aia ma te marama kore e kua na ko atu: “E teianei te akaviivii nei au iaku uaorai, e te tataraara nei au i raro i te one-pueu e te reu.” (Iobu 42:6) E te ope maira to Iobu au timataanga, kua akameitakiia tona tu tiratiratu.

Pauia te Au Uianga Tuatua Tapu:

32:1-3​—Inaea a Eliu i tae mai ei? Mei te mea e kua rongo pouroa a Eliu i te au tuatuaanga, te noo ra paa aia i te pae ua mai e rauka ai iaia i te akarongo atu i etai taime i mua ake i tuatua ai a Iobu e kua akaope i tona au taeake e toru i te noo muteki ua anga e itu ra.​—Iobu 3:1, 2.

34:7​—Akapeea a Iobu mei te tangata rai “ko tei inu i te akavaavaa mei te vai ra”? I roto i tona turanga taitaia, kua tuku ua a Iobu i te aviri a tona aronga atoro e toru e te tuatua tikaia maira kiaia, noatu e te tuatua ra ratou i te Atua. (Iobu 42:7) No reira, te ariki ua ra aia i te taitoito mei tetai tangata e inu vai ra ma te rekareka.

Au Apiianga no Tatou:

32:8, 9. Kare te pakari e aere ua mai ana ma te pakari anga i te mataiti. Te umuumuia ra te  maramaanga no te Tuatua a te Atua e te aratakianga o tona vaerua.

34:36. Na roto i tetai tu te akapapuia ra te tu tiratiratu na to tatou ‘timata tikaia e ope rava akera.’

35:2. Kua akarongo meitaki a Eliu e kua akataka meitaki i te maroanga tikai i mua ake i tuatua ai aia. (Iobu 10:7; 16:7; 34:5) I mua ake i te oronga anga i te ako, kia akarongo meitaki te aronga pakari Kerititiano, kia kite meitaki i te au tika, e kia marama meitaki i te au maroanga te tau ra.​—Maseli 18:13.

37:14; 38:1–​39:30. I te akamanako anga ki runga i te angaanga umere a Iehova​—te au akakiteanga o tona mana e te pakari​—e taakaaka ana ia tatou e e tauturu ana ia tatou i te kite mai e te akakiteanga i tona tu ngateitei e puapinga maata roa atu i tetai ua atu o to tatou au inangaro uaorai.​—Mataio 6:9, 10.

40:1-4. Me te akakeuia ra tatou i te koumuumu atu i te Mana Katoatoa, ka tau tatou kia ‘tapoki i to tatou rima ki runga i to tatou vaa.’

40:15–​41:34. Mei teaa tikai te mana o Behemota (te hippopotamus) e te Leviatana (te araketa)! Kia akakoromaki i roto i ta Iehova angaanga, ka inangaro katoa tatou i te maroiroi mei Tei Anga mai i teia au taae ririnui, tei oronga mai i te mana kia tatou.​—Philipi 4:13.

42:1-6. Te akarongo anga i ta Iehova tuatua e te akamaara ua anga i te akaarianga o tona mana kua tauturu ia Iobu kia ‘akara i te Atua,’ me kore kia kite mai i te tuatua mou no runga iaia. (Iobu 19:26) Kua taui teia i tona manakoanga. Me akatanoia mai e te Tuatua Tapu, kia maroiroi tatou i te ariki i ta tatou tarevake e kia akono i te au tauianga.

Tatanu “i te Akakoromaki o Iobu”

Te akaari taka meitaki maira te puka a Iobu e kare no te Atua te apa no te mamaeanga o te tangata. No Satani. To te Atua akatikaanga i te kino i te enua nei te oronga maira kia tatou i te atianga kia oronga i te pauanga uaorai e teiea tatou no runga i te au maroanga no to Iehova turanga ngateitei e to tatou tu tiratiratu.

Mei ia Iobu rai, pouroa te aronga tei inangaro ia Iehova ka timataia. Te oronga maira te tataanga o Iobu kia tatou i te akapapuanga e ka rauka ia tatou i te akakoromaki. Te akamaara ra te reira e kare to tatou au manamanata e aere ua e tuatau ua atu. “Kua kite kotou i te akakoromaki o Iobu ra, e kua kite oki kotou i ta te Atu i rave i te openga ra,” i karanga ai a Iakobo 5:11. Kua akameitaki a Iehova ia Iobu no te tamou marie anga ei tangata akono tiratiratu. (Iobu 42:10-17) Mei teaa tikai te manakonakoanga meitaki rava tei tukuia mai ki mua ia tatou​—te ora mutu kore i roto i te Parataito i runga nei i te enua! Mei ia Iobu rai, kia tauta ua atu rai tatou kia tamou marie i to tatou tu tiratiratu.​—Ebera 11:6.

[Tataanga Rikiriki i Raro]

[Au Tutu i te kapi 16]

Eaa ta tatou ka kite mai mei “te akakoromaki o Iobu ra”?