Mate​—E Mea Rikarika Anga Tikai!

“MEI te taime i anauia mai ei te vai ra te manako anga putuputu e penei ka mate te tangata a tetai tuatau,” i tata mai ei te tangata tata tuatua enua Peritane ko Arnold Toynbee. Kua akakite mai aia: “E i te openga iora ka riro mai teia manako ra ei tika anga tikai.” Mei teaa atura te mii ta te mate ka apai mai ki runga ia tatou me takake tetai mema akaperepereia o te ngutuare tangata me kore tetai oa piri vaitata ra!

Kua riro te mate ei mea rikarika anga tikai no te au tangata no tetai au tauatini mataiti. Ka tupu mai tetai manako puapinga kore ua kia tatou me mate tetai tangata ta tatou e akaperepere ra. Kare tetai tangata e ora mai no teia tumatetenga. Kare e rauka i tetai tangata i te kopae ke i te mate. “Te akariro ra te mii ia tatou pouroa ei tamariki akaou​—te takore katoa anga i te au tukeke anga no te kite. Te aronga pakari roa atu kare i kite ana i tetai apinga.” I tata mai ei tetai tangata tata tua o te 19 anere mataiti. Mei te tamariki rikiriki rai tatou​—ma te tauturu kore, kare e rauka i te taui i te turanga. Kare e rauka i te aronga apinganui e te aronga mana i te taui i te mate. Kare a te aronga pakari e a te aronga kite pauanga. E aue ana te aronga ketaketa, mei te aronga paruparu rai.

Kua kite te Ariki ko Davida o Iseraela taito i taua tu taitaia te mate anga tana tamaiti ko Abasaloma. I te akarongo anga i te nuti o tona mate, kua aue te ariki e kua tuatua iora e: “Aue koe, e taku tamaiti, e Abasaloma e! e taku tamaiti, e taku tamaiti, e Abasaloma e! naringa ko au tei mate ei tupau ia koe, e Abasaloma, e taku tamaiti, e taku tamaiti e!” (2 Samuela 18:33) Kare i rauka ana i tetai ariki tei autu atu i te au enemi ririnui i te rave i tetai apinga inara te inangaro ua ra e koia uaorai tei tukunaia atu ki “taua enemi openga ra, ko te mate,” ei tupau atu i te ngai o tana tamaiti.​—1 Korinetia 15:26.

E rapakau anga ainei tetai no te mate? Me koia ia, eaa te manakonakoanga no tei mate ra? Ka kite akaou ainei tatou i to tatou aronga akaperepere? Te oronga maira te atikara e aru maira i te au pauanga Tuatua Tapu ki teia au uianga.