Tavini Anga ma Tetai Putuputuanga Reo Ke

“AKARA atura au i tetai angela i te rere anga na rotopu i te mareva nei,” i tata ei te apotetoro ko Ioane, “ma te evangelia mutu kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata.” (Apokalupo 14:6) I te akatupuanga i teia orama totou, te tutu aereia nei te tuatua meitaki no te Patireia o te Atua takapini i te ao katoa i roto i te au tu reo tukeke. Te manganui o teia au reo te tuatuaia ra e te aronga ou te noo mamao ra mei to ratou enua anau. Te akarongo katoa ra teia aronga i te tuatua meitaki mei te Au Kite maroiroi no Iehova tei apii i tetai reo ke.

Ko koe ainei tetai i rotopu i taua Au Kite te tavini ra ma tetai putuputuanga e tuke te reo? Me kore penei te manako ra ainei koe i te rave anga i te reira? Kia puapingaia i roto i taau tautaanga, ka inangaroia te tu karapii kore ia koe e tetai tu manako tau meitaki. Mei te mea taau akakoroanga e kia tauturu i tetai ke kia kite mai i te tuatua mou mei te Tuatua a te Atua, tei ia koe te akakoroanga meitaki rava​—te inangaro no te Atua e no te tangata tupu. (Mataio 22:37-39; 1 Korinetia 13:1) Te inangaro kia tauturu i tetai ke kia kite mai i te Atua te oronga maira i te akakeuanga pakari roa atu e i te rekareka ua anga i te pirianga, te kai, e te peu akonoanga a te au tangata o tetai pa enua me kore pupu ke. I te akaraanga kua riro ainei te manakonakoanga no te apiianga i tetai reo ke e e maata roa kia koe? Me ko te reira ia, e mea puapinga te akaraanga tau meitaki. “Auraka e tuku i te reo i te tamataku ia koe,” i karanga ai a James, tei apii i te reo Tiapani. I te kiteanga e kua autu te aronga e manganui i mua atu ia koe ka tauturu te reira ia koe i te akakoromaki e te tamou marie i tetai tu papu. Akapeea, i reira, e rauka ai ia koe i te apii i tetai reo ke? Eaa te ka tauturu ia koe i te taui atu ki tetai putuputuanga e te taangaangaia ra tera reo? E eaa taau ka rave kia vai ketaketa ua i te pae vaerua?

Tauta Anga i te Reo

E manganui te au mataara i te apii anga i tetai reo. E tuke aere te aronga apiipii e te au puapii i roto i ta ratou au ravenga. Inara, no te maataanga o te aronga apiipii, te aere atu anga ki tetai nga mea apii apiiia e tetai puapii tau ka viviki mai te apiianga e e ngoie katoa. Te tatauanga i te Pipiria e te au puka tumuia ki runga i te Pipiria i roto i toou reo ou e te akarongo anga ki tetai ua atu au rekotianga te vai ra ka tauturu ia koe kia akamaata atu i taau tuatua e ka akamaata atu i toou kite no te au tuatua teokaratiki. Te ratio, te tivi, e te au porokaramu vitio ma te au akakiteanga tau ka akatuera katoa ia koe ki te reo e te peu akonoanga. E ki te roa o te au tuatau apii anga, tei matauia te apii marie anga i te au ra ravarai e meitaki roa atu ia i te akakoromaki roiroianga i te au tuatau roa e kare e apii putuputu ana.

Te apiianga i tetai reo mei te apiianga rai i te kau. Kare e rauka ia koe i te apii i te kau na te tatau ua anga i tetai puka. Ka inangaroia koe kia tomo ki roto i te vai e oti patupatu aere i roto i te reira. Mei te reira rai te apiianga i tetai reo. E ngata teia i te rave anga na te apiipii ua anga. Ka inangaroia koe kia kapiti atu ki te au tangata me rauka ana ia koe​—akarongo ki ta ratou tuatua, akapiri atu kia ratou, e me ka rauka, e tuatua atu! Te oronga maira te au angaanga Kerititiano i te atianga meitaki tikai no teia. Te maata anga te taime, ka rauka ia koe i te taangaanga viviki i  taau i kite mai i roto i te angaanga orometua. “Penei i te akaraanga e mea mataku ia,” i karanga ai a Midori, te apii ra i te reo Tinito, “inara te kite maira te tangata ngutuare e te tauta pakari nei tatou ei Au Kite. Ka akakeu teia i te au ngakau. Ka karanga ua tatou, ‘Te mataora nei au i te aravei ia koe’ i roto i to ratou reo, e kua katakata mai to ratou mata!”

E tauturu maata katoa te au uipaanga Kerititiano. I te au uipaanga ravarai, e tauta kia pau ua atu e tai taime. Noatu mei teaa rai te tamatakuanga ka riro te reira i te akamataanga, auraka e manamanata. Ka inangaro te putuputuanga ia koe kia autu! Ko Monifa, te apii ra i te reo Korea, kua karanga e: “E rekareka maata tikai toku i te tuaine e noo ana i te pae mai iaku i te tuatau o te au uipaanga, te tataanga naku i te aiteanga o tetai au tuatua tikai. Tona turuturuanga pumaana e te akakoromaki kua tauturu tikai iaku.” E te maata maira taau au tuatua, ka akamata i reira koe i te akamanako i roto i te reo ou​—akapiri tika atu anga i te au tuatua ki ta te reira e akatutu maira kare oki e ka uri i te au tuatua takitai i roto i toou manako.

Taau akakoroanga mua no te reo koia oki kia “tuatua i te tuatua kitea uaia ra.” (1 Korinetia 14:8-11) Noatu e penei ka marama ua te au tangata, penei ka arataki ke te au tarevake e te tangi anga pakari o te reo ia ratou mei te akarongo anga ki taau karere. Te oronga anga i te akamanako ki te akatangi anga e te karama tau meitaki mei te akamataanga roa mai penei ka tapu ia koe mei te akatupuanga i te au peu kino e aka angaanga i te akamutu mai. Te karanga maira, a Mark, tei apii i te reo Swahili e: “E ui atu i te aronga tu katau i te reo kia akatano mai i taau au tarevake kino roa, e oti e akameitaki atu ia ratou no te rave anga i te reira!” E tika, e akamanako i te taime e te maroiroi o te aronga te tauturu maira ia koe na roto i teia mataara. E penei ka ui atu koe i tetai tangata kia akara mai i taau tataanga, e tauta i te akapapa i taau au ako e te au tuatua na te taangaanga anga i te au tuatua kua kite takere mai koe me kore kua akara ana koe. Ka akaviviki teia i te ravenga no te apiianga e ka tauturu ia koe kia tuatua ma te papu tikai.

Kia Aere ua Atu ki Mua

“Te apiianga i tetai reo ke ko te angaanga pakari roa atu ia taku i rave ana,” i karanga ai a Monifa. “E au taime aere toku i inangaro ana au i te akamutu. Inara e maara ana au i te tangata apii Pipiria e inangaro ua ana i te akarongo ki te au tuatua mou oonu i roto i taku tuatua Korea mama ua e te rekareka akaariia e te au taeake me te tere marie ra au ki mua.” Te apinga maata koia oki, auraka e tuku viviki roa i te au. Taau akakoroanga koia oki kia rauka i te apii atu i te au tuatua mou Tuatua Tapu akaora ki tetai ke. (1 Korinetia 2:10) No reira, te kite anga i te apii i te Pipiria i roto i tetai reo ke te umuumuia ra te tautaanga akamou meitaki, no te tuatau roa. Ia koe e tere ra ki mua, e kopae i te vaitoanga i toou tereanga ki mua na te akaaite tau kore anga ia koe uaorai ma tetai ke. E tuke te au tu e e tuke katoa te au mataara no te tere anga ki mua o te aronga te apii ra i tetai reo ke. Inara, e mea meitaki i te matakite i toou uaorai tere anga ki mua. (Galatia 6:4) “I te reo, te aerenga o te apiianga mei te ara kakenga rai,” i karanga ai a Joon, te apii ra i teianei i te reo Tinito. “I te taime tikai e manako ra koe e kare koe e meitaki mai ana, kua kite viviki mai koe e te tere ra koe ki mua.”

Te apiianga i tetai reo ke e angaanga ia no te tuatau oraanga. E no reira, kia rekareka i te aere anga, e auraka e manako e ka meitaki ua rai. (Salamo  100:2) Ka tupu rai te au tarevake. E tuanga te reira no te ravenga apiianga. I tona akamataanga i te tutu aere i roto i te reo Itaria, kua ui atu tetai Kerititiano i tetai tangata ngutuare, “Kua kite ainei koe te purumu no te oraanga?” Tano tikai ka karanga aia te “akakoroanga no te oraanga.” Tetai Kite te ou ua ra ki te reo Porani kua pati atu i te putuputuanga kia imene i te puakaoa e kare oki i te imene. E na tetai manga taui ua anga o te taki anga reo, kua raurau atu tetai tangata te apii ra i te reo Tinito i te katoatoa kia tuku i te akarongo i roto i te paata puka a Iesu e kare oki i te oko. Te ngai meitaki o te au tarevake koia oki te au tuatua tano tei tamouia kare e viviki i te ngaropoinaia.

Angaanga Anga ma te Putuputuanga

Kare te au reo tuke e ko te au apinga ua te akapae ra i te au tangata. Te au tuke i te peu akonoanga, te iti tangata, e te pa enua e putuputu ana i te akapae maata roa i te au tangata ravarai. Teia au araianga, ra, kare i te mea maata roa. Tetai tangata apii te apii ra i te au pupu akonoanga reo Tinito i Europa kua kite mai e e “pa enua runga ravao” te Au Kite o Iehova.” I rotopu i te Au Kite, kua kite mai aia, “kare o te tu eteniki tuanga, e kare katoa te reo mari ra ei ravenga ua ki te marama anga i te tuatua a te Atua.” E tikai, te akonoanga i te au kaveinga Pipiria ko te apinga ia te tauturu ra i te au Kerititiano mou kia autu atu i te au tukeanga pa enua. No te aronga tei kakau i te ‘akatangata ou, Kare oki e Eleni e te ngati Iuda, kare e tangata maori.’​—Kolosa 3:10, 11.

Ka tau i reira te katoatoa i roto i te putuputuanga kia angaanga i te akamaroiroi i te taokotaianga. Te umuumuia ra teia i te akatueraanga o tetai ra manako e te ngakau ki te au mataara ou no te manakoanga, te manako ngakau, e te rave anga i te au apinga. Ka rauka ia koe i te kopae i te au tukeanga mei te tauianga ei au akapaeanga na te oronga kore anga i te akamanakoanga maata ki te au inangaro uaorai. (1 Korinetia 1:10; 9:19-23) E apii i te rekareka i te au tu meitaki rava o te au peu akonoanga katoatoa. E maara, ko te aroa karapii kore te taviri ki te au pirianga meitaki e te taokotaianga tikai.

Te maataanga o te au putuputuanga reo ke e akamata mai ana ei au pupu rikiriki aere, te maataanga ko te aronga te apii ra i te reo ou, kapiti katoa mai tetai pae tei akamata ua akenei i te apii i te au kaveinga Pipiria. E no reira, ka tupu maata atu te au manako tarevake i roto i taua au pupu ra e i roto i tetai putuputuanga maatamaata, akanooia. Kia aruaru i reira te au Kerititiano pakari kia riro mai ei akakeuanga no te tu ngaueue kore. Te akaarianga i te aroa e te takinga meitaki na roto i te au tuatua e te au angaanga te tauturu ra i te akatupu i tetai turanga tau meitaki e rauka ai i te aronga ou i te tupu i te pae vaerua.

Te aronga tei oronga aroa ua i te tauturu i roto i tetai putuputuanga e reo ke kia tau meitaki katoa i roto i ta ratou e umuumu ra i tetai ke. Ko Rick, tetai tangata pakari i roto i tetai o taua putuputuanga, kua akataka mai: “Penei tetai Au Kite ou kare i tereni meitaki roaia ana i roto i te au tu karape no te akaaereanga e i te aronga i roto i te au putuputuanga no te reo i te reira ngai. Inara ta ratou e ngere ra i te pae kite, kua tupau putuputu ratou i roto i te aroa e te tu maoraora. E e manganui te aronga te inangaro ra te aere maira ki roto i te tuatua mou.” Na te vai papa ua anga e na te oronga anga ia koe uaorai i roto i taau ua ka rauka i te oronga, ka akapuapinga tikai koe i te putuputuanga, noatu e te apii ra rai koe i te reo. Na te angaanga kapitianga, ka rauka te katoatoa i te tauturu ki te tereanga o te putuputuanga i te pae vaerua.

Tamou Marie Anga i te Maroiroi Pae Vaerua

Tetai taeake te ou ua ra i roto i tetai putuputuanga reo ke kua rongo atu i tetai metua vaine te tauturu ra i tana tamaiti i te akapapa i tetai pauanga. “E Mami, kare e rauka kia tapotoia mai te reira?” i maro atu ei te tamaiti. “Kare, e te tamaiti,” i pau atu ei te Mama. “Ka vao tatou i te au mea poto aere na te aronga e apii ra i te reo.”

No tetai tangata maatamaata, te kore anga e rauka i te tuatua meitaki no te au marama me kore au mataiti ua atu ka riro ei paruparu anga i te pae manako, pae manako ngakau, e te pae vaerua. “Kua ngoie ua au i te taitaiaia e toku au kotinga,” i maara ei a Janet, tei tu katau i teianei e i te tuatua Paniora. Ko Hiroko, tei apii i te reo Papaa, kua maara i te akamanakoanga: ‘E kite  atu te au puakaoa e te au kiore ngiao i roto i te oire i te reo Papaa e iaku nei.’ E kua karanga a Kathie: “I toku neke atu anga ki tetai putuputuanga Paniora, kua aere au mei te tu anga i te au apii Pipiria e manganui e tetai puka tata tei ki i te au atoro akaouanga ki te kare. Kua manako mai au e kare aku angaanga e rave ana.”

Ko teia te ngai e umuumuia ra te tu papu. I tona taitaia anga, kua manako mai a Hiroko: “Me ka rauka i tetai pae i te rave i te reira, ka rauka katoa iaku.” Kua karanga a Kathie: “Kua manako mai au i taku tane, te meitaki aere ua maira e te angaanga maata ra i roto i te putuputuanga. Ko te reira te apinga tei tauturu iaku i te autu i te manamanata. E aka angaanga rai te reira, inara te rauka marie ua maira iaku i te kite i te tutu aere e te apii, e e mataora ana au i te reira.” Kua karanga katoa mai, tana tane, ko Jeff: “E manamanata tikai me kare e maramaia ana te au apinga katoatoa te tuatuaia ra i roto i te au akakiteanga e i te au uipaanga a te aronga pakari. Kia akakite tika oki au e kia akaaka i te ui atu anga no te au akatakaanga, inara e mataora ana te au taeake i te tauturu.”

Kia kopae i te tu paruparu pae vaerua e te angaanga ra ma tetai putuputuanga reo ke, auraka koe e poka i te oronga i te manako maata ki toou oraanga pae vaerua. (Mataio 5:3) Ko Kazuyuki, e no te au mataiti e manganui kua tavini ana i roto i te angaanga orometua i Potukara, kua karanga e: “E mea puapinga kia rauka meitaki ia tatou i te kaikaianga pae vaerua. No reira te tumu e apii ana matou ei pamiri e e akateatea mamao ana no te au uipaanga i roto i to matou uaorai reo e pera katoa i roto i te reo Potukara.” E taime ua ake e aere ana tetai pae ki te au uipaanga i roto i to ratou uaorai reo. Tei runga ravao, e puapinga maata kia rauka i te akaangaroi meitaki.​—Mareko 6:31.

Tare i te ka Pou

Me te manako ra koe i te neke atu ki tetai putuputuanga e e taangaangaia ana tetai reo ke, ka tau koe kia tare i te ka pou no te raveanga i te reira. (Luka 14:28, NW) No runga i teia turanga, te au ngai puapinga maata rava atu kia akamanakoia koia oki ko toou turanga pae vaerua e toou pirianga kia Iehova. Ma te pure e akara meitaki i toou turanga. E akamanako i toou tokorua e te tamariki. E ui kia koe uaorai, ‘Tei iaku ainei te au turanga e te maroiroi inangaroia i te pae vaerua e i te pae manako ngakau kia akono i tetai angaanga tuatau roa?’ Te raveanga i tei meitaki rava noou e no toou pamiri i te pae vaerua ko te mataara ia no te pakari. E maata te inangaroia ra kia raveia e e maata te rekareka ka kiteaia mai noatu eaa taau ngai ka tavini atu ei tangata akakitekite i te Patireia.

No te aronga te ka rauka i te tavini i roto i tetai putuputuanga e reo ke, e maata te au akameitakianga. “Ko teia tetai tupuanga mataora roa atu i toku oraanga,” i karanga ai a Barbara, koi neke ua atu ma tana tane ki tetai putuputuanga Paniora. “Mei te mea rai e te akamata akaou maira i te aere mai ki roto i te tuatua mou. Te akameitaki nei tikai au no te atianga, koia tikai mei te mea e kare e rauka ia maua i te angaanga ei nga mitinari i roto i tetai enua ke.”

Takapini i te ao nei, e au tauatini ua atu tangata e tukeke te au mataiti te apai ra i te akaaoanga no te apiianga i tetai reo ke e rauka ai i te akamaata atu i te tuatua meitaki. Me ko koe tetai i rotopu ia ratou, e akono i toou akakoroanga kia tika ua e toou tu manako kia papu. Tei runga ravao, e irinaki ki roto ia Iehova kia akameitaki i taau au tautaanga.​—2 Korinetia 4:7.

[Tutu i te kapi 18]

Te aere atu anga ki te au pupu apii no te reo apiiia e tetai puapii tau ka viviki mai te apiianga e e ngoie katoa

[Tutu i te kapi 20]

Auraka toou oraanga i te pae vaerua e takinoia ia koe e apii ra i tetai reo ke