‘Aere e Akariro ei Pipi, Bapetizo Atu ia Ratou’

“E teianei, ka aere kotou, e akariro i to te pa enua katoa ei pipi; ka bapetizo atu ei ia ratou . . . ; ma te apii atu ia ratou, kia akono i te au mea katoa taku i akaue atu kia kotou.”​—MATAIO 28:19, 20.

1. Eaa te ikianga ta te iti tangata o Iseraela i rave i raro ake i te Maunga Sinai?

I ETAI 3,500 mataiti i topa, kua rave tetai iti tangata katoa i tetai tia ki te Atua. Te akaputuputu anga i raro ake i te Maunga Sinai, kua akakite te ngati Iseraela ki te ngai tangata e: “Te au tuatua ravarai ta Iehova i tuatua, ka rave ïa matou.” Mei taua taime mai, kua riro mai a Iseraela ei au tangata akatapuia ki te Atua, tana “apinga akaperepere maata.” (Exodo 19:5, 8; 24:3) Kua tatari tapapa ratou te rauka anga mai tona paruruanga e te noo anga mei tera uki ki tera uki i roto i tetai enua “taʼe a vai ua te u, e te meli.”​—Levitiku 20:24.

2. Eaa te pirianga ma te Atua ta te au tangata i teia tuatau ka rekareka?

² Inara, mei ta te tata taramo ko Asapha i akakite mai, ko te ngati Iseraela ra “kare ïa i akono i te koreromotu a te Atua, kare akera i tika ia ratou kia aaere i tana ra ture.” (Salamo 78:10) Kare i rauka ana ia ratou i te akono i te tia ta to ratou ui tupuna i maani ana kia Iehova. I te openga iora, kua ngere i te iti tangata taua pirianga takake ma te Atua. (Koheleta 5:4; Mataio 23:37, 38) No reira, te Atua i ‘akara aroa mai i te etene, e rave i tetai papaki tangata i roto ia ratou ra no tona ingoa.’ (Angaanga 15:14) E i teia tuatau openga nei, te akaputu mai nei aia i te “aronga maata rava, kare takiri e pou kia tatau, no te pa enua ravarai, e te au kopu ravarai, e te au iti-tangata ravarai, e te au reo katoa oki,” tei ariki rekareka: “No to tatou Atua te ora, tei noo ki rungao i te terono, e no te Punua-mamoe.”​—Apokalupo 7:9, 10.

3. Eaa ra te au takainga ta tetai ka rave kia rekareka i tetai pirianga akaperepere ma te Atua?

³ E o atu ei ki roto i te aronga te rekareka ra i taua pirianga akaperepereia ma te Atua, e rave tetai i tetai akatapuanga kia Iehova e te akatutu anga i te reira ki te katoatoa na roto i te  papetitoanga ki roto i te vai. E tu akarongo anga teia ki ta Iesu akauenga tika ki tana au pipi e: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20) Kua akarongo te ngati Iseraela ki tetai tatau anga i “te buka koreromotu ra.” (Exodo 24:3, 7, 8) No reira, kua marama ratou no ta ratou au apainga kia Iehova. Pera katoa i teia tuatau, e puapinga maata te kite tika tikai no to te Atua anoano tei kiteaia i roto i tana Tuatua, te Pipiria, i mua ake ka rave ei tetai i te takainga no te papetitoanga.

4. Eaa ta tetai ka rave kia tau no te papetitoanga? (Kapiti mai i te pia i runga akenei.)

⁴ Te taka meitaki ra, kua inangaro a Iesu i tana au pipi kia rauka tetai tango ketaketa no to ratou akarongo i mua ake ka papetitoia ai ratou. Kua akaue atu aia i tana au pipi e auraka e aere ua e kia akariro i te tangata ra ei pipi mari katoa ra kia apii atu ia ratou ‘kia akono i te au mea katoa tana i akaue atu.’ (Mataio 7:24, 25; Ephesia 3:17-19) No reira, te aronga tei tau no te papetitoanga kua apii ana i te Pipiria no etai au marama me kore e tai mataiti me kore e rua mataiti, kia kore oki ta ratou ikianga ei mea rapurapu ua e ei mea manako kore ua. I te ngai papetito anga uaorai, ka pau te aronga ka papetitoia e ae ki nga uianga puapinga maata e rua. I te mea e kua akakite mai a Iesu e ‘kia riro ta tatou Koia, ei koia, e ta tatou Kare, ei kare,’ e mea meitaki no tatou katoatoa kia akara meitaki akaou i te puapinga o teia nga uianga e rua no te papetitoanga.​—Mataio 5:37.

Tataraaraanga e te Akatapuanga

5. Eaa nga takainga puapinga maata e rua ta te uianga mua no te papetitoanga e akakite maira?

⁵ Te uiia ra te uianga mua no te papetitoanga ki te tangata ka papetitoia e me kua tataraara aia i tona aerenga oraanga mua e kua akatapu i tona oraanga kia Iehova kia rave i tona ra anoano. Te akakite maira teia nga uianga e rua i nga takainga puapinga maata te ka raveia i mua ake te papetitoanga, koia oki te tataraaraanga e te akatapuanga.

6, 7. (a) Eaa ra i anoanoia ai te tataraara no te aronga katoatoa te ka papetitoia? (e) Eaa te au tauianga ka raveia i muri ake te tataraaraanga tetai?

⁶ Eaa ra tetai tangata ka tataraara ai i mua ake ka oronga atu ei iaia uaorai no te papetitoanga? Te akataka maira te apotetoro ko Paulo e: “Ko tatou katoa oki te kapiti katoa anga i roto ia ratou i muatangana i te anoano o te kopapa nei.” (Ephesia 2:3) I mua ake ka kite mai ei tatou i te kite tika tikai no to te Atua ra anoano, kua noo rotai ana tatou ma teianei ao, tei tau ki to te reira au puapinga e te au turanga. Tei raro ake to tatou aerenga oraanga i te akatere anga a te atua o teia akatereanga nei, ko Satani. (2 Korinetia 4:4) Inara, te kite anga i to te Atua ra anoano, kua iki tatou i te akono ‘kare i te anoano o te tangata, ma te akono ra i te inangaro o te Atua.’​—1 Petero 4:2.

⁷ Te oronga maira teia aerenga ou i te au akameitakianga e manganui. Tei runga ravao, te akatuera maira te reira i te mataara ki tetai pirianga akaperepere kia Iehova, ta Davida ia i akaaiteite  ki tetai patianga kia tomo atu ki roto i to te Atua ra “puakapa” e te “maunga tapu”​—e akangateiteianga mekameka tikai. (Salamo 15:1) Ma te tau, kare a Iehova e pati atu i tetai ua atu inara ko te “tangata aerenga tiratiratu [anake ra], ko tei akono i te tuatua-tika ra; e ko tei tuatua i te tuatua-mou i roto i [to ratou] ra ngakau.” (Salamo 15:2) No runga i to tatou au turanga i mua ake ka kite ei tatou i te tuatua mou, te akono anga i teia au umuumuanga penei ko te aite anga e mea tau kia rave tatou i tetai au taui anga​—i roto i te tu e te tu tangata. (1 Korinetia 6:9-11; Kolosa 3:5-10) Te akakeuanga no taua au tauianga koia oki te tataraaraanga​—te tataraapa oonu anga no runga i to tatou aerenga oraanga o mua ana e te tauta pakari anga i te akamareka ia Iehova. Te taki atura teia ki tetai tauianga katoa​—te akaruke anga i tetai tu noinoi o te oraanga o teianei ao e te aruaru anga i tetai aerenga te mareka maira te Atua.​—Angaanga 3:19.

8. Akapeea tatou i te rave anga i ta tatou akatapuanga, e eaa ra te pirianga o te reira ki te papetitoanga?

⁸ Te tuanga rua no te uianga mua no te papetitoanga te ka uiia atu ki te aronga ka papetitoia e me kua akatapu ratou ia ratou uaorai kia Iehova kia rave i tona ra anoano. E takainga puapinga maata te akatapuanga te ka raveia i mua ake te papetitoanga. Ka raveia te reira na roto i te pure, te akakite anga tatou i te anoano kia oronga i to tatou oraanga kia Iehova na roto ia Karaiti. (Roma 14:7, 8; 2 Korinetia 5:15) Riro mai i reira a Iehova ei Pu e te Ona no tatou, e mei ia Iesu rai te rekareka ra tatou i te rave anga i to te Atua anoano. (Salamo 40:8; Ephesia 6:6) Okotai ua taime e raveia ana teia taputou anga ngateitei kia Iehova. Inara, no te mea e ka rave tatou i ta tatou akatapuanga i rotopu ua ia tatou e te Atua, ko tetai akakiteanga ki te katoatoa i te ra no te papetitoanga ka riro ei akakite anga ki te katoatoa e kua rave tatou i teia akatapuanga ngateitei ki to tatou Metua i te rangi.​—Roma 10:10.

9, 10. (a) Eaa te o maira i te rave anga i to te Atua ra anoano? (e) Akapeea ra te au opita Nazi te marama katoa anga i ta tatou akatapuanga?

⁹ Eaa te o maira i te aru anga i to Iesu akaraanga i te rave anga i to te Atua ra anoano? Kua karanga a Iesu ki tana au pipi e: “Ko tei inangaro i te aru mai iaku, e akaruke aia iaia uaorai, e rave i tana [“rakau tamamae e ka aru tamou,” NW] mai ei iaku.” (Mataio 16:24) I konei te akataka maira aia e toru apinga ta tatou ka rave. Te mea mua, e “akaruke” tatou ia tatou uaorai. Tera te tu, e karanga tatou e kare ki to tatou au manako noinoi e te apa ua e ae ra ki ta te Atua akoanga e te aratakianga. Te rua, e ‘rave tatou i ta tatou rakau tamamae.’ I to Iesu tuatau e akatutu anga no te taakama e te mamae tetai rakau tamamae anga. Ei au Kerititiano, te ariki ra tatou i ta tatou tuanga no te mamae no te tuatua meitaki nei. (2 Timoteo 1:8) Noatu e ka aviri mai teianei ao me kore ka akakino mai ia tatou, mei ia Karaiti rai ‘kare tatou e akono i te akama,’ i te kite mataora anga e te akamareka ra tatou i te Atua. (Ebera 12:2) I te openga iora, e aru “tamou” tatou ia Iesu.​—Salamo 73:26; 119:44; 145:2.

¹⁰ Ma te umere, kua marama katoa etai aronga patoi i te akatapuanga ta te Au Kite o Iehova i rave ana ki te Atua i te tavini anga iaia ma te tapupu kore. Ei akaraanga, i roto i te puakapa tapekaanga i Buchenwald Nazi Tiamani, ko te Au Kite tei patoi i te akakore i to ratou akarongo te umuumuia ra kia taina i te tuatua tei tataia te aru maira e: “E Tangata Apiipii Pipiria rai au e kare rava e aati i te taputou taku i taputou atu kia Iehova.” Papu tikai e te akakite meitaki maira teia i te tu o te au tavini akatapuia e te akarongo mou o te Atua!​—Angaanga 5:32.

 Akatakaia Anga ko Tetai o te Au Kite o Iehova

11. Eaa te akameitakianga te aere maira ki te tangata ka papetitoia?

¹¹ Te rua o te uianga te uiia ra ki te tangata ka papetitoia, te mea mua oki, me kua marama aia e te riro ra tona papetitoanga ei akataka anga iaia ra e ko tetai o te Au Kite o Iehova. I muri ake i te papetitoanga, riro mai aia ko tetai orometua akataoongaia tei apai i to Iehova ingoa. E akameitakianga maata teia e e apainga pakari tikai. Te tuku katoa ra te reira i te tangata i papetitoia no te ora mutu kore, tera ra kia vai akarongo mou aia kia Iehova.​—Mataio 24:13.

12. Eaa te apainga te aru maira i te ngateitei no te apai anga i to Iehova ra ingoa?

¹² Papu tikai e, e ngateitei anga umere tikai i te apai i te ingoa o te Atua mana katoatoa, ko Iehova. Kua karanga te peroveta ko Mika e: “Kia aaere ua te tangata ravarai i te ingoa o tona uaorai atua, ka aaere ra tatou i te ingoa o Iehova, o to tatou Atua, e tuatatau ua atu.” (Mika 4:5) Noatu rai, te aru maira tetai apainga i teia ngateitei anga. E tauta tatou i te akono i to tatou oraanga na roto i tetai tu te apai maira i te ngateitei ki te ingoa ta tatou e apai ra. Mei ta Paulo i akamaara ki te au Kerititiano i Roma ra, me kare tetai tangata e rave i tana i tutu aere ra, ka “akakinoia” te ingoa o te Atua, me kore ka akavaavaaia.​—Roma 2:21-24.

13. Eaa ra te au tavini akatapuia o Iehova i rave ei i te apainga kia akakitekite no runga i to ratou Atua?

¹³ Me riro mai tetai tangata ko tetai o te Au Kite o Iehova, ka ariki katoa aia i te apainga kia akakitekite no runga i tona Atua. Kua pati a Iehova i te iti tangata akatapuia o Iseraela kia riro mai ei au kite nona kia akakitekite i tona Atua anga mutu kore. (Isaia 43:10-12, 21) Inara kare i rauka ana i te iti tangata i te akatupu i teia tuanga, e i te openga iora kua ngere ia ratou to Iehova mareka anga katoa. I teia tuatau, te mataora nei te au Kerititiano mou te rauka mai anga te akameitakianga no te akakite anga no runga ia Iehova. E rave tatou i te reira no te mea e inangaro to tatou iaia e te anoano ra kia akatapuia tona ingoa. Eaa ua ra tatou ka muteki ua ai i to tatou kite anga i te tuatua mou no runga i to tatou Metua i te rangi ra e tana akakoroanga? Te manako ra tatou mei te apotetoro ko Paulo rai te karanga anga aia e: “Kare oki au e tika kia kore: e ae oki toku kia kore au e tutu i te evangelia!”​—1 Korinetia 9:16.

14, 15. (a) Eaa te tuanga ta te akaaerenga a Iehova e rave ra i roto i to tatou tupuanga i te pae vaerua? (e) Eaa te au apinga te rauka ra i te tauturu mai ia tatou i te pae vaerua?

¹⁴ Te akamaara katoa maira te rua o te uianga ki te tangata ka papetitoia i tana apainga kia angaanga ma te akaaerenga a Iehova tei aratakiia e te vaerua. Kare ko tatou anake ua te tavini ra i te Atua, e te inangaro ra tatou i te tauturu, te turu anga, e te akamaroiroianga o “te kapiti anga katoa o te au taeake.” (1 Petero 2:17, NW; 1 Korinetia 12:12, 13) E tuanga maata ta te akaaerenga o te Atua i roto i to tatou tupuanga i te pae vaerua. Te oronga maira te reira i tetai au putunga puka Pipiria te tauturu maira ia tatou kia tupu i roto i te kite tika tikai, kia akono ma te pakari me aro atu tatou i te au manamanata, e kia tatanu i tetai pirianga vaitata ki te Atua. Mei tetai metua vaine tei akapapu ra e kua angai meitakiia tana tamaiti e kua akonoia, te oronga maira “te tavini akono meitaki e te pakari” i tetai aka kai i te pae vaerua i te ora mou no to tatou tere anga ki mua i te pae vaerua.​—Mataio 24:45-47; 1 Tesalonia 2:7, 8.

¹⁵ I ko i te au uipaanga i te epetoma, kua rauka mai i te au tangata o Iehova te terenianga te anoanoia ra e te akamaroiroianga kia riro mai ei Au Kite akarongo mou no Iehova. (Ebera 10:24, 25) Te apii maira te Apii Orometua Teokaratiki ia tatou kia tuatua ki te katoatoa, e te tereni ra te Uipaanga Tavini Anga ia tatou kia oronga tau ua i ta tatou karere. I ko i ta tatou au uipaanga e na  roto i ta tatou uaorai apii i te au puka Pipiria, e kite ei tatou i to Iehova vaerua i te angaanga anga, te aratakianga i tana akaaerenga. Na roto i teia au apinga oronga putuputuia mai, te akamatakite maira te Atua ia tatou i te au kino, te tereni maira ia tatou kia riro mai ei au orometua tau, e te tauturu mai anga ia tatou kia ara ua i te pae vaerua.​—Salamo 19:7, 8, 11; 1 Tesalonia 5:6, 11; 1 Timoteo 4:13.

Te Akakeuanga i Muri Ake i te Ikianga

16. Eaa te akakeu ra ia tatou kia akatapu ia tatou uaorai kia Iehova?

¹⁶ No reira te akamaara maira nga uianga e rua no te papetitoanga i te aronga ka papetitoia i te puapinga o te papetitoanga ki roto i te vai e te au apainga ta te reira ka oronga mai. Eaa, i reira, te ka akakeu ia ratou kia rave i te ikianga kia papetitoia? Riro mai tatou ei au pipi papetitoia, kare e no te mea na tetai tangata i maro mai ia tatou, inara no te mea na Iehova i “akatae mai” ia tatou. (Ioane 6:44) I te mea e ko te “Atua oki te aroa,” te tutara ra aia i te ao katoa e pini ua ake na roto i te aroa, kare na te maro anga. (1 Ioane 4:8) Te piri vaitata atura tatou kia Iehova no tona au tu takinga meitaki e no te tu tana e akono ra ia tatou. Kua oronga mai a Iehova i tana Tamaiti anau tai no tatou e te oronga maira kia tatou i te tuatau meitaki roa atu ki mua. (Ioane 3:16) Aru mai, kua akakeuia tatou kia oronga kiaia​—kia akatapuia kiaia​—to tatou oraanga.​—Maseli 3:9; 2 Korinetia 5:14, 15.

17. Kare tatou i akatapu ua ia tatou uaorai ki teaa?

¹⁷ Kua akatapu tatou ia tatou uaorai, kare ki tetai tumu anga me kore ki tetai angaanga, inara kia Iehova uaorai. Ka taui ta te Atua angaanga i oronga mai no tona au tangata, inara ka vai ua rai ta ratou akatapuanga kiaia. Ei akaraanga, tana i akakite ana kia rave a Aberahama e tuke tikai mei tana i akakite kia rave a Ieremia. (Genese 13:17, 18; Ieremia 1:6, 7) Inara, kua rave raua roa rai i te angaanga takake ta te Atua i oronga kia rave raua no to raua inangaro ia Iehova e kua inangaro akarongo mou i te rave i tona ra anoano. I teia tuatau openga nei, te tauta pouroa ra te au pipi papetitoia a Karaiti i te rave i ta Karaiti akauenga kia tutu aereia te tuatua meitaki o te Patireia e kia akariro ra ei pipi ra. (Mataio 24:14; 28:19, 20) Te rave ngakau katoa anga i taua angaanga ra ko tetai mataara memeitakiia i te akaari e te inangaro ra tatou i to tatou Metua i te rangi e kua akatapu tikaiia tatou kiaia.​—1 Ioane 5:3.

18, 19. (a) Eaa te tuatua ki te katoatoa ta tatou ka rave na roto i to tatou papetitoanga? (e) Eaa te ka akamanakoia i roto i te atikara te aru maira?

¹⁸ Kare ekokoanga, te akatuera maira te papetitoanga i te mataara ki te au akameitakianga e manganui, inara auraka te reira takainga kia manakoia e e manga apinga ua. (Luka 14:26-33) Te akakite ra te reira i te ikianga e mea puapinga maata atu i tetai ua atu apainga. (Luka 9:62) Me papetitoia tatou, te akakite tikai ra tatou i te akakiteanga ki te katoatoa e: “Ko te Atua nei rai oki to tatou Atua e tuatau e tuatau ua atu: e arataki rai oki aia ia tatou e mate ua atu.”​—Salamo 48:14.

¹⁹ Ka akara matatio te atikara te aru maira i tetai au uianga ke atu te ka tupu mai te piri ra ki te papetitoanga ki roto i te vai. E au tumu anga tau ke atu ainei tetai i kore ei tetai tangata e papetitoia? Ko te mataiti ainei tetai tumu anga? Akapeea ra te katoatoa te oronga anga i te tapunui ki te atianga no te papetitoanga?

Ka Rauka Ainei ia Koe te Akataka?

• Eaa ra te Kerititiano tataki tai ka anoanoia ai kia tataraara i mua ake ka papetitoia ai?

• Eaa te o maira ki te akatapuanga ki te Atua?

• Eaa te au apainga te o maira ma te ngateitei no te apai anga i to Iehova ingoa?

• Eaa te ka akakeu ia tatou kia rave i te ikianga kia papetitoia?

[Au Uianga Apii]

[Pia/Tutu i te kapi 22]

Te Nga Uianga e Rua no te Papetitoanga

Kia tau ki te atinga o Iesu Karaiti, kua tataraara ainei koe no taau au ara e kua akatapu ia koe uaorai kia Iehova no te rave i tona anoano?

Kua marama ainei koe e te akakite ra toou akatapuanga e te papetitoanga ia koe e ko tetai o te Au Kite o Iehova i te taokotaianga atu ki ta te Atua akaaerenga tei akatereia e te vaerua?

[Tutu i te kapi 23]

E taputou anga ngateitei te akatapuanga te orongaia ra kia Iehova na roto i te pure

[Tutu i te kapi 25]

Te akaari maira ta tatou angaanga tutu anga i ta tatou akatapuanga ki te Atua