Akono Anga i te Au Umuumuanga no te Papetitoanga ei Kerititiano

“Eaa au nei e kore ei e bapetizoia?”​—ANGAANGA 8:36.

1, 2. Akapeea a Philipa i te akamata anga i tetai tuatua ki tetai tangata opita Etiopia, e eaa te akaari maira e te inangaro tikai ra teia tangata i te manako pae vaerua?

E TAI me kore e rua mataiti i muri ake i to Iesu matenga, te aere ra tetai tangata opita no te kavamani ki te tua tonga na runga i te mataara mei Ierusalema ki Gaza. E akaoro anga roiroi na runga i tetai kariota penei ake e 1,500 kiro mita te mamao te vai maira ki mua. Kua aere mai teia tangata akamori nei no Etiopia mai ki Ierusalema i te akamori ia Iehova. I te oki anga ra, kua taangaanga meitaki aia i tona tuatau na te tatau anga i te Tuatua a te Atua​—e akapapu anga teia i to te tangata akarongo. Kua akara mai a Iehova i teia tangata ngakau tae, e na roto i tetai angera, kua arataki atu Aia i te pipi ko Philipa kia tutu aere kiaia.​—Angaanga 8:26-28.

² Mama ua ia Philipa i te akamata i tetai tuatua, i te mea e te tatau maata ra te tangata opita Etiopia, tei matauia i taua tuatau. No reira, kua rongo atu a Philipa e te tatau ra aia mei roto mai i te pokaikai tuatua a Isaia. Okotai ua uianga mama no ko mai ia Philipa i akakeu ei i te inangaro o te tangata: “Te kite na koe i taau e tatau na?” Kua taki atu teia ki tetai uriurianga o Isaia 53:7, 8. I muri mai, kua “akakite atura [a Philipa] i te tuatua no Iesu kiaia.”​—Angaanga 8:29-35.

3, 4. (a) No teaa ra a Philipa i kore ei i taroaroa i te papetito anga i te tangata Etiopia? (e) Eaa te au uianga ta tatou ka akamanako i teianei?

³ I roto i tetai tuatau poto ua, kua marama i te tangata Etiopia ta Iesu tuanga i roto i to te Atua akakoroanga, pera katoa te anoano kia riro mai ei pipi papetitoia na Karaiti. “Eaa au nei e kore ei e bapetizoia?” i ui ei aia kia Philipa i te kite atu anga i tetai ngai vaitata ua atu ki te vai. E tika, e au turanga takake teia. E tangata akarongo teia tei akamori takere ana i te Atua ei tangata poroteraita  ngati Iuda. Penei kare e tuatau ke atu kia papetitoia aia. E puapinga roa atu, kua marama i teia tangata nei eaa ta te Atua e umuumu maira iaia, e kua inangaro aia i te ariu tapupu kore atu. Kua ariki rekareka a Philipa i tana pati anga, e ko te tangata Etiopia ra, i muri ake i te papetitoia anga, “aere atura aia i tona aerenga ma te rekareka.” Kare ekokoanga e kua riro mai aia ko tetai tangata tei tutu maroiroi aere i te tuatua meitaki i tona ra enua.​—Angaanga 8:36-39.

⁴ Noatu e kare te au takainga no te akatapuanga e te papetitoanga kia manakoia e e manga apinga ua me kore kia rapurapuia, te akaari maira te akaraanga o te tangata opita Etiopia ra e te vai ra te au atianga e kua papetitoia te aronga tataki tai i muri ua ake i te akarongo anga i te tika no runga i te Tuatua a te Atua. * E mea tau i reira kia akamanako i te au uianga te aru mai nei: Eaa te akapapaanga ka raveia i mua ake ka papetitoia ai? Eaa ra te ka akamanakoia no te mataiti? Eaa te tere anga pae vaerua ka kiteaia i mua ake ka papetitoia ai tetai tangata? Tei runga ravao, eaa ra a Iehova i umuumu ei i tana au tavini kia rave i teia takainga?

Tetai Papau Anga Ngateitei

5, 6. (a) Akapeea te au tangata o te Atua i te tuatau i topa i te ariu anga ki to Iehova aroa? (e) Eaa te pirianga vaitata ma te Atua ta tatou ka rekareka me papetitoia tatou?

⁵ I muri ake i te akaora mai anga i te ngati Iseraela mei Aiphiti, kua ariki puareinga ua a Iehova ia ratou ei “apinga akaperepere maata” nana, kia aroa atu e kia paruru ia ratou e kia oronga kia ratou i te turanga “ei iti tangata tapu.” Inara, e rauka mai ei taua au akameitakianga ra, kia ariu atu te au tangata ki to te Atua aroa na roto i tetai mataara papu. Kua rave ratou i teia na te ariki anga i te rave i te “au tuatua ravarai ta Iehova i tuatua” e te akanoo anga i tetai koreromotu kiaia. (Exodo 19:4-9) I te anere mataiti mua, kua akaue a Iesu i tana au pipi kia akariro i te au tangata o te pa enua katoa ei pipi, e te aronga tei ariki mai i tana apii ra kua papetitoia. Te vai ra tetai pirianga meitaki ma te Atua i runga i te akarongo ia Iesu Karaiti e aru mai oki te papetitoanga.​—Mataio 28:19, 20; Angaanga 2:38, 41.

⁶ Te akaari maira teia au papaanga Tuatua Tapu e te akameitaki ra a Iehova i te aronga tei rave e tei akono i tetai papau anga ngateitei kia tavini iaia. No te au Kerititiano, e au takainga anoanoia te akatapuanga e te papetitoanga te taki atura ki ta Iehova akameitakianga. E iki papu tatou i te aru i tana au turanga e te kimi i tana aratakianga. (Salamo 48:14) Aru mai, te mou akatutu maira a Iehova ia tatou ma te nga rima e te arataki anga ia tatou i roto i te tu ka aaere ei tatou.​—Salamo 73:23; Isaia 30:21; 41:10, 13.

7. No teaa ra te akatapuanga e te papetitoanga e ikianga na tatou uaorai?

⁷ Te akakeuanga ia tatou kia rave i teia au takainga nei ko te aroa ia Iehova e te anoano kia tavini iaia. Auraka tetai tangata e papetitoia no te mea ua nei e na tetai tangata i akakite atu kiaia e kua roa aia i te apiianga me kore ka papetitoia tona au oa. Tei matauia, penei na te nga metua e tetai atu au Kerititiano pakari e akamaroiroi atu i tetai tangata kia akamanako no runga i te akatapuanga e te papetitoanga. Kua raurau te apotetoro ko Petero i te aronga tei akarongo mai kiaia i Penetekote e “kia bapetizoia.” (Angaanga 2:38) Noatu rai, e tumu anga na tatou uaorai te akatapuanga, e kare e rauka i tetai ua atu i te maani i te reira na tatou. Na tatou uaorai te ikianga kia rave i to te Atua ra anoano.​—Salamo 40:8.

Akapapaanga Tau no te Papetitoanga

8, 9. (a) Eaa ra te papetitoanga i te pepe kare e rotai ana ki te Tuatua Tapu? (e) Eaa te tere anga ki mua i te pae vaerua ta te aronga mapu ka rave i mua ake te papetitoanga?

⁸ Ka rauka ainei i te tamariki i te rave i tetai akatapuanga tau? Kare te au Tuatua Tapu i oake mai ana i te au umuumu anga no te mataiti no te papetitoanga. Noatu rai, ko te au pepe tikai ra kare e rauka kia riro mai ei aronga irinaki, te akono anga i te akarongo, me kore te maani anga i tetai akatapuanga ki te Atua. (Angaanga 8:12) No runga i te au Kerititiano i te anere mataiti mua, kua akakite mai te tangata tata tuatua enua  ko Augustus Neander i roto i tana puka General History of the Christian Religion and Church: “Kua akamataia te papetitoanga na mua ki te aronga mamaata ua, no te mea kua marama te au tane i te papetitoanga e te akarongo ei mea pirianga vaitata tikai.”

⁹ I roto i te tu o te au mapu, kua marama tikai etai i te au mea puapinga pae vaerua mei te tamariki mai anga, ko tetai papaki ra ka roa atu. Inara, i mua ake ka papetitoia ai, kia rauka i tetai mapu tetai pirianga uaorai kia Iehova, te marama meitaki anga i te au apiianga no te au Tuatua Tapu, e te nakirokiro meitaki anga e eaa te o maira ki te akatapuanga, mei te turanga o te aronga mamaata.

10. Eaa te au takainga na mua ake i te akatapuanga e te papetitoanga?

¹⁰ Kua ikuiku atura a Iesu ki tana au pipi kia apii ki te aronga ou i te au mea katoa tana i akaue atu. (Mataio 28:20) No reira te mea mua, te anoanoia ra te aronga ou kia rauka tetai kite tika tikai no te tuatua mou, ka riro i reira ei tauturu ia ratou kia akatupu i te akarongo i roto ia Iehova e tana Tuatua. (Roma 10:17; 1 Timoteo 2:4; Ebera 11:6) E oti, me akakeuia te ngakau o tetai tangata e te tuatua mou o te Tuatua Tapu, te akakeu ra te reira iaia kia tataraara e kia anga mai mei tona tu i mua ana o te oraanga. (Angaanga 3:19) I te openga iora, kua taeria e te tangata te tuatau e inangaro ei aia i te akatapu iaia uaorai kia Iehova e kia papetitoia, mei ta Iesu i akaue mai.

11. Eaa ra i puapinga ai kia o putuputu atu tatou ki roto i te angaanga tutu anga i mua ake te papetitoanga?

¹¹ Ko tetai takainga puapinga maata te tere anga ki mua ki te papetitoanga koia oki te o atu anga i te tutu aere i te tuatua meitaki o te Patireia. Ko te angaanga maata teia ta Iehova i tuku mai ki tona au tangata i teia au ra openga. (Mataio 24:14) Ka rauka i reira i te au papuritia kare i papetitoia ake te rekareka i te tuatua anga no runga i to ratou akarongo ki tetai ke. Te o atu anga ki roto i teia angaanga te tauturu katoa maira ia ratou kia piri putuputu e te maroiroi ki roto i te angaanga orometua i muri ake i te papetitoanga.​—Roma 10:9, 10, 14, 15.

Te Arai ra Ainei Tetai Mea ia Koe kia Papetitoia?

12. Eaa ra te mea te tapupu ra i tetai mei te papetitoanga?

¹² Penei ka tapupu tetai aronga kia kore e papetitoia no te mea kua emiemi ratou i te ariki atu i te apainga ta te reira e oronga maira. Kua kite ratou e te akono anga i ta Iehova au turanga, e tauianga maata ta ratou ka rave i roto i to ratou oraanga. Me kore te matakutaku ra ratou e ka kiteaia mai e ratou e e mea ngata i te akono i te au umuumu anga a te Atua i muri ake i te papetitoanga. Penei ka tuatua katoa etai e, “Penei a tetai ra ka rave au i tetai apinga kino e ka akaateaia mai mei te putuputuanga.”

13. I to Iesu tuatau, eaa ra tei tapupu ana i tetai aronga i te riro anga mai ei au pipi na Iesu?

¹³ I to Iesu tuatau, kua tuku etai i to ratou uaorai au inangaro e te au pirianga ngutuare tangata kia arairai ia ratou i te riro anga mai ei pipi nana. Kua akakite tetai tata tuatua e ka aru aia ia Iesu i te ngai ka aere ei Aia. Inara kua tou maira a Iesu e i te au atianga e manganui, kare katoa ona ngai takoto anga i te po. Te pati anga a Iesu i tetai tangata te akarongo maira kia riro mai ei pipi nana, kua pau atu teia tangata e te inangaroia ra aia kia “tanu” na mua i tona metua tane. Penei ake, kua inangaro aia i te noo i te kainga e te tiaki anga e mate ua atu tona metua tane i te aru atu ia Iesu e te akono anga i taua apainga na te ngutuare me ka umuumuia te reira. I te openga iora, kua karanga te toru o te tangata e i mua ake ka aru atu ei ia Iesu, te inangaroia ra aia kia “poroaki ana” i  tona kopu tangata. Kua akataka mai a Iesu i taua tavarevare anga ei ‘akara anga ki muri.’ No reira, i te akara anga e ko te aronga te inangaro ra i te rave i te reira ka kitea uaia mai te kotoeanga no te kopae ke anga i ta ratou apainga Kerititiano.​—Luka 9:57-62.

14. (a) Akapeea a Petero, Anederea, Iakobo, e Ioane te ariu atu anga te pati anga a Iesu ia ratou kia riro mai ei aronga ravakai tangata? (e) Eaa ra tatou i kore ei e emiemi i te ariki i ta Iesu amo?

¹⁴ E tuke tikai te akaraanga o Petero, Anederea, Iakobo, e Ioane. Te pati anga a Iesu ia ratou kia aru mai iaia e kia riro mai ei aronga ravakai tangata, te akakite maira te Pipiria e: ‘Akaruke iora ratou i ta ratou puke kupenga i reira, e kua aru maira iaia.’ (Mataio 4:19-22) Na te rave viviki anga i taua ikianga, kua kite tikai ratou i ta Iesu i akakite ana i muri maira kia ratou: “Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua. Te maru nei taku amo, e te māmā nei taku apainga.” (Mataio 11:29, 30) Noatu e te oronga maira te papetitoanga i tetai amo no te apainga, te akapapu maira a Iesu kia tatou e e maru e e mama te amo te ka akaangaroi maata tikai ia tatou.

15. Akapeea te au akaraanga o Mose raua ko Ieremia i te akaari mai anga e ka rauka ia tatou i te irinaki ki te turuanga ta te Atua e oronga maira?

¹⁵ E tika, e matauia ana te au manako no te tukatau kore. I te akamata anga kua manako a Mose raua ko Ieremia e kare e rauka ia raua i te akono i te au tukuanga angaanga ta Iehova i oronga kia raua. (Exodo 3:11; Ieremia 1:6) Akapeea te Atua i te akaketaketa atu anga ia raua? “Ei vaitata katoa ïa au ia koe,” tana i akakite kia Mose. “Ei vaitata katoao au ia koe ei akaora, ia koe,” tana i taputou kia Ieremia. (Exodo 3:12; Ieremia 1:8) Ka rauka katoa ia tatou te irinaki anga i te turuanga tu-Atua. Ka rauka te aroa no te Atua e te irinaki anga iaia i te tauturu mai ia tatou kia autu i te au manako ekoko tavarevare ra me ka rauka ia tatou i te akono i ta tatou akatapuanga. “Kare o te aroa ra e mataku,” i tata mai ei te apotetoro ko Ioane, “e peke te mataku i te aroa meitaki rava.” (1 Ioane 4:18) Penei ka mataku tetai manga tamaiti me aaere aia koia anake ua, inara e irinaki tona me aaere aia na te mou anga i te rima o tona metua tane. Pera katoa, me irinaki tatou kia Iehova ma to tatou ngakau katoa, te taputou maira aia i te ‘akatikatika i to tatou au arataa’ ia tatou e aaere ra i te pae iaia.​—Maseli 3:5, 6, NW.

Tetai Atianga Tapunui

16. Eaa ra te papetitoanga i o mai ei ki te taruku takiri anga ki roto i te vai?

¹⁶ E aru ua mai ana te papetitoanga uaorai i tetai ako anga Tuatua Tapu te akataka maira i te puapinga o te papetitoanga Kerititiano. I te openga o teia tuatua, ka patiia atu te aronga ka papetitoia kia rave i tetai akakiteanga ki te katoatoa no to ratou akarongo na te pau mai anga i nga uianga e rua no te papetitoanga. (Roma 10:10; akara i te pia i te kapi 22.) Ka tarukuia i reira te aronga ka papetitoia i roto i te vai, te aru anga i te  akaraanga ta Iesu uaorai i akanoo mai. Te akaari maira te Pipiria e i muri ake i te papetitoia anga, kua “kake maira [a Iesu] ki runga mei raro mai i te vai” me kore “mei raro i te vai.” (Mataio 3:16; Mareko 1:10) Te taka meitaki ra, kua taruku takiri tikai a Ioane Papetito ia Iesu. * Te akatutu meitaki maira te taruku takiri anga i te taui anga maata ta tatou ka rave i roto i to tatou oraanga​—te akatutu maira e kua mate tatou i to tatou tu oraanga i mua ana e te akamata akaou ra i tetai oraanga ou i roto i te angaanga a te Atua.

17. Akapeea te aronga ka papetitoia e te aronga te akarakara ra i te akatupu anga i te tapunui no te atianga?

¹⁷ E atianga puapinga maata e te rekareka te papetitoanga. Te akakite maira te Pipiria e te pure ra a Iesu i te taruku anga a Ioane iaia i roto i te Kauvai Ioridana. (Luka 3:21, 22) Kia rotai ki teia akaraanga, e mea tau kia akaari te aronga ka papetitoia i teia tuatau i te tu tau. E i te mea e te raurau maira te Pipiria ia tatou kia kakau ma te tau i te au ra ravarai o te oraanga, mei teaa atura kia akarongo tatou ki teia ako anga i te ra o to tatou papetitoanga! (1 Timoteo 2:9) Ka rauka katoa i te aronga te akarakara ra i te akaari i te ngateitei tau na te akarongo meitaki anga ki te ako anga no te papetitoanga e na te akara anga i te tupu anga na roto i tetai tu tau.​—1 Korinetia 14:40.

Au Akameitakianga te Rekarekaia ra e te Au Pipi Tei Papetitoia

18, 19. Eaa te au atianga umere ta te papetitoanga e oronga maira?

¹⁸ I to tatou akatapuanga ia tatou uaorai ki te Atua e kua papetitoia, i riro mai ei tatou ei tuanga no tetai pamiri takake. Te mea mua, kua riro mai a Iehova ei Metua no tatou e ei Oa no tatou. Kua akatakakeia ana tatou mei te Atua i mua ake ka papetitoia ai tatou, i teianei kua akaongiia tatou. (2 Korinetia 5:19; Kolosa 1:20) Na roto i te atinga o Karaiti, kua akavaitata atu tatou ki te Atua e kua akavaitata mai aia kia tatou. (Iakobo 4:8) Te akataka maira te peroveta ko Malaki e akapeea a Iehova i te manako mai anga e te akarongo mai anga ki te aronga tei akono e tei apai i tona ingoa, e kua kapiti mai aia i to ratou au ingoa i roto i tana puka manakoanga. “E ka riro ratou noku,” i karanga ai te Atua, “e naku e akaperepere ia ratou, mei te tangata e akaperepere i tana uaorai tamaiti kia tavini atu kiaia ra.”​—Malaki 3:16-18.

¹⁹ Te tauturu katoa maira te papetitoanga ia tatou kia riro mai ko tetai tuanga no te taokotaianga taeake i te ao katoa. Te uianga te apotetoro ko Petero e eaa te au akameitakianga te ka rauka mai i te au pipi a Karaiti no te au atinga ta ratou i rave ana, kua taputou a Iesu e: “E te tangata katoatoa no toku nei ingoa i akaruke ei i te are, e te au taeake, e te au tuaine, e te metua tane, e te metua vaine, e te vaine, e te tamariki, e te enua, e anere ua atu tana e ka rauka, e e rauka oki iaia te ora mutu kore.” (Mataio 19:29) I te au mataiti i muri mai, kua tata a Petero no runga i “te kapiti anga katoa o te au taeake” tei tupu mai “i te ao nei.” Kua kite tikai a Petero i te turuanga e te au akameitakianga o tetai taokotaianga taeake aroa, e ka rauka katoa ia tatou.​—1 Petero 2:17, NW; 5:9.

20. Eaa te manakonako anga akameitakiia ta te papetitoanga e oronga maira?

²⁰ Pera katoa, kua akakite mai a Iesu e ko te aronga tei aru iaia ka ‘rauka oki te ora mutu kore.’ Ae, te oronga maira te akatapuanga e te papetitoanga i te manakonako anga kia rauka mai “te mouranga ketaketa ki runga i te oraanga tikai”​—te ora mutu kore i roto i to te Atua ao ou. (1 Timoteo 6:19, NW) Eaa ua nei te tango meitaki no te tuatau ki mua te ka rauka ia tatou i te patu no tatou uaorai e no to tatou ngutuare tangata? Na teia manakonako anga akameitakiia e tauturu mai ia tatou kia “aaere ra tatou i te ingoa o Iehova, o to tatou Atua, e tuatatau ua atu.”​—Mika 4:5.

[Au Tataanga Rikiriki i Raro]

Ka Rauka Ainei ia Koe te Akataka?

• Akapeea e eaa ra tatou ka ariu atu ei ki te aroa o Iehova?

• Eaa te tere anga ki mua i te pae vaerua ka raveia i mua ake te papetitoanga?

• Eaa ra tatou i kore ei e akatika atu i te mataku anga e ka poka me kore te emiemi ra i te ariki atu i te apainga kia tapupu ia tatou mei te papetitoanga?

• Eaa ra te au akameitakianga takake ta te au pipi tei papetitoia na Iesu Karaiti e rekareka ra?

[Au Uianga Apii]

[Tutu i te kapi 26]

“Eaa au nei e kore ei e bapetizoia?”

[Au Tutu i te kapi 29]

E atianga puapinga maata e te rekareka te papetitoanga