Au Uianga a te Aronga Tatau

Eaa ta tatou ka tamou mai mei te araianga tei kiteaia ia Exodo 23:19: “Auraka koe e tunu i te punua puakanio i te u o tona ra tinana”?

Teia akauenga no te Ture a Mose, tei kiteaia e toru taime i roto i te Pipiria, ka tauturu ia tatou i te marama i to Iehova turanga no runga i te tu tau, tona tangi aroa, e tona tu maru. Te akaketaketa katoa ra te reira i tona rikarika no te akamori pikikaa.—​Exodo 34:26; Deuteronomi 14:21.

Kia tunu i tetai punua puakanio me kore tetai manu ke atu i roto i te u o tona ra tinana te patoi ra i ta Iehova akanoonooanga natura no te au mea ravarai. Kua oronga te Atua i te u o te tinana kia angai i te punua e i te tauturu i te reira kia tupu. Te tunu anga i te punua ki roto i te u o to te reira uaorai tinana, i roto i te au tuatua a tetai tangata apii te akaari ra i, “tetai akangateitei kore anga no te pirianga ta te Atua i akanoo e i akatapu i rotopu i te tinana e te punua.”

Pera katoa, kua manako etai e ko te tunu anga i tetai punua ki roto i te u o tona ra tinana penei e akonoanga peikani teia tei raveia kia rauka mai te ua. Me ko te reira ia, kua akonoia te araianga kia paruru i te au Iseraela mei te au angaanga akonoanga manako kore ua e te kino pakari o te au pa enua takapini ia ratou. Kua arai tikai te Ture a Mose i te au Iseraela kia aaere i roto i te au ture a taua au pa enua.​—Levitiku 20:23.

I te openga ra, te kite ra tatou i roto i teia ture tikai i to Iehova ngakau aroa. E tikai, i roto i te ture te vai ra te au numero akauenga aiteite ua te patoi ra i te tu kino ki te au manu e te paruru ra i te aere ke anga mei te tu natura o te au apinga nei. Ei akatauanga, te kapiti maira i roto i te Ture te au akauenga tei patoi i te oronga anga i te manu ei atinga kia pou roa e itu ra iaia ma tona tinana, te tamate anga i te manu e tana anaunga katoa i taua ra rai, e te rave anga mei tetai koanga manu te tinana e tana au ua me kore anaunga.​—Levitiku 22:27, 28; Deuteronomi 22:6, 7.

Te taka meitaki ua ra, e kare te Ture i tetai au putunga akauenga e te au araianga ua nei. Kapiti atu i roto i tetai au mea ke mai, ka tauturu ta te reira au kaveinga i te tatanu i roto ia tatou i tetai tu akono tau akateiteiia te akaata tikai ra i to Iehova tu manea tikai.​—Salamo 19:7-11.

[Akameitakianga no te Tutu i te kapi 31]

© Timothy O’Keefe/​Index Stock Imagery