Marama Anga i te Pipiria​—E Rekarekaanga te Tuera Atu nei kia Koe

TEI roto i te Pipiria te au tuatua mou akaperepereia mei ko mai i te Atua. Te akakite maira te reira kia tatou no runga i te akakoroanga o te oraanga, te tumu e mamae nei te tangata, e te tuatau ki mua no te tangata ravarai. Te apii maira te reira ia tatou e ka akapeea e kitea ai te mataora, akapeea me akataeake atu, e ka akapeea e manuia ai te akono anga i te au manamanata. Puapinga atu i te reira, ka kite tatou no runga i to tatou Metua i te rangi, Tei Anga mai ia tatou, ko Iehova. Ka apai mai taua tu kite ra i te rekareka e ka oronga mai i te aiteanga ki to tatou au oraanga.

I roto i te Pipiria kua akaaiteia te rauka anga te kite i te Atua ki te kaikai. Kua karanga a Iesu: “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.” (Mataio 4:4; Ebera 5:12-14) Mei te kai anga rai i te kai meitaki i te au ra ravarai e anoanoia ra no tatou kia ora, te anoano katoaia ra te tatau putuputu i te Tuatua a te Atua kia puapingaia tatou mei te taputou a te Atua no te ora mutu kore.

E rekareka ana tatou i te kaikai no te mea kua angaia mai tatou kia pera e no te mea te akatupu ra te reira i tetai anoano puapinga. Inara, e anoano puapinga ke mai to tatou te ka anoanoia tatou kia akono me ka inangaro tatou kia mataora. Kua karanga a Iesu: “E mataora to te aronga tei manako i to ratou anoano i te pae vaerua.” (Mataio 5:3, NW) Ka rauka oki te mataora no te mea ka rauka ua i te akatupu i taua anoano ra na roto i te marama anga i te Tuatua a te Atua.

E tika, te manako ra tetai aronga e e ngata kia marama i te Pipiria. Ei akaraanga, penei ka anoano koe i te tauturu no tetai au irava e tuatua ra no runga i tetai au akonoanga kare i matauia me kore e taangaanga ra i te au tuatua akatutu. Pera katoa, te vai ra tetai au totou tei tataia na roto i te tuatua akaaiteanga te ka marama anake uaia na roto i te akara anga i tetai  au irava Pipiria ke atu no runga i taua tumu tuatua rai. (Daniela 7:1-7; Apokalupo 13:1, 2) Noatu rai, ka rauka ia koe kia marama tikai i te Pipiria. Peea koe e papu ei e ka rauka rai te reira?

E Rekarekaanga te Tuera Atu nei ki te Katoatoa

Ko te Pipiria e Tuatua na te Atua. I roto i reira te akakite maira te Atua i tona anoano no tatou. Ka oronga mai ainei te Atua i tetai puka kare e rauka kia maramaia me kore ko te aronga apii teitei anake ua te ka marama? Kare, kare roa e tika ia Iehova kia pera. Kua akakite a Iesu Karaiti: ‘Koai ïa metua i o kotou nei, e apai atu i te toka na tana tamaiti, kia pati mai aia i te manga? e kia pati mai i te ika, e apai atu aina i te ovi nana ei ika? E kia pati aia i te ua moa, e apai atu aina i te sekopio? E te tika na ia kotou, kino ua rai, kia oronga i te mea meitaki no ta kotou tamariki, ka tangaʼi oki i to kotou Metua i te ao ra, i te oronga i te vaerua tapu i te aronga e pati atu aia ra.’ (Luka 11:11-13) No reira, kia papu ia koe e ka rauka ua ia koe te marama no runga i te Pipiria e me pati koe ki te Atua ma te ngakau tae, ka oronga mai aia i te tauturu e anoano ra koe kia marama i tana Tuatua. Te tika, ka rauka ua i te tamariki kia marama e kia ariki i te au apiianga tumu o te Pipiria!​—2 Timoteo 3:15.

Noatu oki e ka anoanoia te tautaanga kia marama i te Pipiria, me raveia ka akatupu te reira i te akakeuanga ririnui, e te maroiroi ki runga ia tatou. I muri ake i tona tuakaouanga, kua mama atu a Iesu ki e tokorua o tana au pipi e kua tuatua atu kia raua no runga i te au totou Pipiria. Te karanga ra te papaanga a Luka: “Akakite maira aia kia raua i te au tuatua katoa nona, i tataia ra, mei ia Mose e tae rava akera ki te au peroveta katoa.” Eaa ra tei tupu mai? I taua aiai ra, ia raua e akamanako ra no runga i ta raua i kite, kua tuatua akera nga pipi ki tetai e tetai: “Kare aina i maana rava to taua ngakau, ka tuatua mai ei aia kia taua i te arataa ra, ka akataka mai ei aia i te tuatua i tataia ra?” (Luka 24:13-32) Kua riro te marama anga i te Tuatua a te Atua i te oronga i te rekarekaanga no raua no te mea kua akaketaketa te reira i to raua akarongo i roto i te au taputou a te Atua e kua oronga mai i te manakonakoanga papu no runga i te tuatau ki mua.

Kare i riro ei apainga, kua riro ra te marama anga i te Tuatua a te Atua ei mea inangaroia e te puapinga maata, ei mea rekareka mei te kai anga rai i tetai kai reka. Eaa taau ka rave kia rauka mai taua tu marama ra? Te akaari maira te atikara e aru mai nei e ka akapeea e rauka ai ia koe kia rekareka i “te kite i te Atua.”​—Maseli 2:1-5.

[Tutu i te kapi 4]

Mei te metua aroa rai, te oronga maira a Iehova i te vaerua tapu ei tauturu ia tatou kia marama i te Pipiria