Marama Anga i te Pipiria​—Eaa te ka Tauturu ia Koe?

“KO KOE i uuna ke atu i teianei au mea i te aronga pakari e te kite, e kua akakite mai ki te tamariki nei.” (Luka 10:21) Te akakite maira teia au tuatua ta Iesu i tuatua atu ki tona Metua i te rangi e kia marama i te Pipiria, ka anoanoia kia rauka ia tatou te tu tau. Kua akaariia mai to Iehova pakari i te mea kua oronga mai aia i tetai puka e ko te aronga akaaka anake ua, te au tangata ngoie ua i te apii te ka marama tika tikai.

Kare te tu akaaka e aere ngoie ua mai ana ki te maataanga ia tatou. Kua anauia mai tatou katoatoa ma te tu parau. Kapiti katoa mai, te noo nei tatou i roto i “taua tuatau openga ra,” i rotopu i te au tangata e “akaperepere ia ratou uaorai, . . . ei māro, ei ngakau akateitei.” (2 Timoteo 3:1-4) Ko teia te au tu te arai ra ia tatou mei te marama o te Tuatua a te Atua. I tetai tua, ko te mea taitaia te akakeuia nei tatou e te au mea takapini ia tatou. Akapeea, i reira, e rauka ai ia koe te tu e anoanoia ra kia marama i te Pipiria?

Akonokono Anga i te Ngakau e te Manako

Ko Ezera, e arataki no te iti tangata o te Atua i muatangana, ‘kua akonokono ua ana i tona ngakau e kimi, i te ture a Iehova.’ (Ezera 7:10) E mataara ainei tetai e rauka ai ia tatou i te akonokono i to tatou ngakau? Ae. Ka rauka ia tatou kia akamata na te akatupu anga i te manako tau no te au Tuatua Tapu. Ki te au oa Kerititiano, kua tata te apotetoro ko Paulo: “Ka āriki mai ei kotou i te tuatua a te Atua ta kotou i kite ia matou nei, kare kotou i āriki ei tuatua na te tangata, ei tuatua ra na te Atua.” (1 Tesalonia 2:13) Noatu kua taangaangaia te tangata ei tata i te au Tuatua Tapu, ko ta ratou i tata no ko mai ia Iehova. Ka riro te kite anga i taua tika ra i te tauturu ia tatou kia ariki maata atu i ta tatou e tatau ra.​—2 Timoteo 3:16.

Tetai mataara ke atu i te akonokono anga i to tatou ngakau koia oki na roto i te pure. No te mea e kua akauruia te Pipiria e te vaerua tapu, ka marama roa atu tatou i ta te reira karere ma te tauturu a taua vaerua ra. Kia pure tatou no taua tauturu ra. Akara ana ra e ko te manako teia o te tata taramo ko tei tata: “E apii mai koe iaku kia akono au i taau ture, ka akono rai au i te reira ma te ngakau katoa ra.” (Salamo 119:34) Ka anoanoia tatou kia pure kare no te tu kite manako anake ua i te marama i tei tataia mari katoa ra no te tu ngakau te ka akatika ia tatou kia ariki i te reira. Kia marama i te Pipiria, ka anoanoia tatou kia ariki i te mea tika tikai.

Ia koe e manakonako ra kia rauka te tu manako tau, e akamanako e eaa ta te apii anga i te Pipiria ka rave noou. E maata te au tumu memeitaki ka tatau ei tatou i te Tuatua a te Atua, tei puapinga maata roa atu ra koia oki ka tauturu te reira ia tatou kia akavaitata atu ki te Atua. (Iakobo 4:8) Ia tatou e tatau ra e mei teaa to Iehova tu ki te au turanga tukeke, mei teaa tana akaperepere anga i te aronga tei inangaro iaia, e akapeea aia i  te aronga tei akaruke iaia, ka kite ia tatou e mei teaa tona tu ei peretana. To tatou akakoroanga maata no te tatau anga i te Pipiria koia oki kia akamatau meitaki atu ki te Atua e na teia mataara ka akaketaketaia to tatou pirianga kiaia.

Au Araianga ki te Rauka Anga te Tu Tau

Eaa ra te ka arai ia tatou mei te marama anga i te Tuatua a te Atua? Tetai arai koia oki ko te tu manako ngakau tiratiratu tarevake. Ei akaraanga, penei te akangateitei ra koe i te au irinakianga e te au manako o tetai aronga. Inara, peea i reira me kare teia aronga nei e turu ana me kore e akaperepere ana i te tuatua mou o te Tuatua a te Atua? I raro i taua au turanga ra, penei ka riro te marama anga i ta te Pipiria tikai e apii maira i te akatupu i tetai akaaoanga. No reira, te akamaroiroi maira te Pipiria ia tatou kia makitoro marie i tei apiiia mai kia tatou.​—1 Tesalonia 5:21.

Kua aro ana a Maria, te mama o Iesu, i taua tu akaaoanga. Kua utuutuia mai aia kia tau ki te ikuikuanga ngati Iuda. Kua akono marie aia i te Ture a Mose e kare e ekoko e aere ana ki te tunako. I muri mai kua kite aia e kare te Atua e ariki mai i te tu akamorianga ta tona nga metua i apii mai iaia. I te openga, kua ariki a Maria i te au apiianga a Iesu e koia tetai i roto i te au mema mua o te putuputuanga Kerititiano. (Angaanga 1:13, 14) Kare ra teia e akaari ana i te tu akangateitei kore ki tona nga metua me kore ki ta raua au ikuikuanga; mari ra, e akakiteanga no tona inangaro i te Atua. Kia puapingaia ai tatou mei te Pipiria, ka anoanoia tatou mei ia Maria rai kia tiratiratu ki te Atua na mua ake ka tiratiratu ei ki tetai ke atu.

Te mea mii ra, e manganui te tangata kare e akaperepere ana i te tuatua mou o te Pipiria. Te mareka ua ra tetai papaki i te aru i te au ikuikuanga akonoanga tei akanooia ki runga i te pikikaa. Te akaari ua maira etai i te akangateitei kore no te tuatua mou na roto i ta ratou tuatua e to ratou oraanga. Mei te reira rai, te ariki anga i te tuatua mou o te Pipiria ka umuumuia te akaatinga: Penei ka akatuke te reira ia koe mei te au oa, te au tangata tupu, te au oa angaanga, e pera katoa toou pamiri. (Ioane 17:14) Noatu rai, kua tata te tangata pakari: “E oko i te tuatua-mou, e auraka e oko akaouia atu.” (Maseli 23:23) Me akangateitei koe i te tuatua mou, ka tauturu a Iehova ia koe kia marama i te Pipiria.

Tetai arai ke mai i te marama anga i te karere a te Pipiria koia oki ko te inangaro puareinga kore i te akono i ta te reira e akakite maira. Kua akakite a Iesu ki tana au pipi: “No te mea kua orongaia mai te kite ia kotou i te tuatua ngaro o te basileia o te ao ra, kare ra i orongaia ia ratou. Kua matorutoru oki te ngakau o teianei aronga, kua turi o ratou taringa.” (Mataio 13:11, 15) Kare te maata anga i te aronga a Iesu i tutu atu ei i ariu mai ana, kare i inangaro ana i te taui. Kare tikai i aite ki te tangata oko ta Iesu i tuatua mai i roto i te akatutuanga! E kitea iora te poe meitaki maata roa ra, kua oko viviki atura te tangata oko i tana au apinga katoa ei oko mai i te reira. Kia akapera rai te puapinga o te marama anga i te Pipiria kia tatou.​—Mataio 13:45, 46.

Te Akaaoanga o te Rauka Anga te Tu Ngoie kia Apiiia

Tetai akaaoanga maata o te marama anga i te Pipiria koia oki ko te rauka anga te tu ngoie kia apiiia. Penei ka ngata i tetai tangata kia ariki i te au manako ou mei tetai tangata tei akara anga akaaka ua. I na, ko te au apotetoro a Iesu Karaiti e au tangata ‘apii koreia ratou e te kite kore oki.’ (Angaanga 4:13) I te akamarama anga i te tumu, kua tata a Paulo: “Te kite na oki kotou, e aku au taeake, i to kotou kapiki angaia e, kare e rai te tangata pakari i te akonoanga i te kopapa nei, kare e rai te tangata mana, kare e rai te tangata ngateitei anau i kapikiia: Kua iki ra te Atua i te au mea neneva o te ao nei, ei taakama atu i te aronga pakari.” (1 Korinetia 1:26, 27) Me kite koe e te riro ra te apii angaia e tetai tangata akaaka ua i te akangata noou kia akaari i te tu akaaka, e akamaara e te taangaanga ra te Atua iaia ei mataara ua no te apii anga ia koe. Kare atu ei e akangateiteianga maata atu mari ra kia apiiia e Iehova, to tatou “Pu Ikuiku Maata Rava Atu”?​—Isaia 30:20, NW; 54:13.

Ko te rangatira vaeau Suria ko Naamana tetai tei ngata i te ariki i te ikuikuanga mei tetai tangata akaaka ua. Te kimi anga i tetai rapakau no tona maki repera, kua aere atu aia i te aravei i te peroveta o Iehova ko Elisaia. Inara kua tukuia  mai ta te Atua au ikuikuanga no te rapakauanga kia Naamana na roto i tetai tavini. Kua riro te karere e te mataara i orongaia mai ei te reira ei akangata i to Naamana tu akaaka, no reira i te akamataanga kare aia i inangaro ana i te akarongo i te tuatua a te peroveta o te Atua. I muri mai ra, kua taui a Naamana i tona tu e kua akaoraia atura. (2 Ariki 5:9-14) Te aro atu nei rai tatou i tetai akaaoanga mei te reira me apii tatou i te Pipiria. Penei ka apii tatou e kia akaoraia i te pae vaerua e te pae akono, ka anoanoia tatou kia aru i tetai arataa ou o te oraanga. Ka akaari ainei tatou i te tu akaaka kia akatika i tetai tangata kia apii ia tatou i tei anoanoia kia rave tatou? Ko te aronga ua rai tei inangaro kia apiiia te ka rauka te marama o te Pipiria.

Kua akaariia mai tetai akaraanga meitaki e te tangata mana i raro ake ia Kanedake, te ariki vaine o Etiopia. Te oki ra aia ki Aperika na runga i tona kariota i te oro anga atu te pipi ko Philipa na te pae e kua akapiri atura kiaia. Kua ui atura a Philipa ki te tangata ra e me te marama ra aia i tana e tatau ra. E tu akaaka tikai to te opita i te pau anga atu e: “Eaa au e kite ei, naringa e tangata te akakite mai kiaku?” I te rauka anga te marama o te Tuatua a te Atua, kua papetitoia iora taua tangata ra. I muri ake i te reira, e “aere atura aia i tona aerenga ma te rekareka.”​—Angaanga 8:27-39.

Ko te Au Kite o Iehova e au tangata noa ua nei. I te au epetoma ravarai e rave ana ratou i te au apiianga Pipiria i roto i te au kainga o te au tangata tei tere atu i te ono mirioni. No te mea te apii maira te Pipiria i te mataara meitaki roa atu no te oraanga, te akamarama maira i te manakonakoanga papu anake ua rai no te tangata, e te tou maira e akapeea i te akamatau atu ki te Atua, e mirioni ua atu tei kite i te rekareka maata i te apii anga i te Pipiria e te marama anga i ta te reira e tuatua maira. E rekarekaanga te reira te tuera atu nei kia koe.

[Tutu i te kapi 7]

Ngata tikai ia Naamana i te ariki i te au ikuikuanga mei tetai tavini akaaka

[Tutu i te kapi 7]

Ka akapumaana te marama anga i te Pipiria i to tatou ngakau