Au Uianga a te Aronga Tatau

Eaa te akatupu ra i “tei inangaroia e te au enua katoa ra” kia tae mai ki roto i te “are” o te akamorianga mou?​—Hagai 2:7.

Na roto i te peroveta ko Hagai, kua totou a Iehova: “E naku e akangaueue i te au enua katoa ra, e e tae mai tei inangaroia e te au enua katoa ra: e akaki oki au i teianei are ki te kakā.” (Hagai 2:7) Te akatupu ra ainei te akangaueue anga “i te au enua katoa ra” i “tei inangaroia” e te au pa enua katoa ra—​te aronga ngakau tika​—kia ariki i te akamorianga mou? Te pauanga koia oki e kare.

E akamanako ana eaa te akangaueue ra, me kore te ruru ra, i te au enua e eaa ta teia ruru anga ka akatupu mai. Te karanga ra te Pipiria e ‘kua oripu ua te au etene, e te au tangata nei kua manako ua i te mea puapinga kore.’ (Salamo 2:1) Te “mea puapinga kore” ta ratou “i manako ei,” me kore i akamanako ana no runga, koia oki ko te akono anga kia vai ua atu rai ta ratou uaorai turanga ngateitei. Kare e apinga e ruru maata atu ia ratou mari ra ko te tamatakuanga ki ta ratou uaorai tutaraanga.

Te angaanga tutuanga o te Patireia akatumuia o te Atua i te ao nei e raveia nei e te Au Kite o Iehova kua riro ei tamatakuanga tikai ki te au enua. Ko te tika, na te Patireia Mesia o te Atua i roto i te rima o Iesu Karaiti e “akapueurikiriki e e akapou i taua au basileia [ta te tangata i maani] katoa ra.” (Daniela 2:44) Te karere akautungaanga i kapitiia atu ki roto i ta tatou angaanga tutuanga te akatupu nei i te rutetetete ki rotopu i te au enua. (Isaia 61:2) E ka pakari ua atu rai te ruru anga i te angaanga tutuanga e maata ua atura te totoaanga e te pararauare anga. E akaataanga te akangaueue anga tei totouia i roto ia Hagai 2:7 no teaa?

Ia Hagai 2:6, ka tatau tatou: “Te na ko maira oki a Iehova Sabaota ra, Okotai toe, kare e mamia, e akangaueue ei au i te au rangi, e te enua, e te moana, e te one marō.” I te taiku anga i teia irava, kua tata te apotetoro ko Paulo: “I teianei ra kua tuatua mai ïa aia, kua na ko maira, ‘Okotai aku akangaueue anga toe, kare oki te enua anake ra, ko te rangi katoa ra.’ E ko taua tuatua nei, ‘Okotai aku akangaueue anga toe,’ no te akakore anga ïa i te au mea e ngaueue ua ra, mei te au mea i angaia ra, kia vai rai te au mea ngaueue kore [te Patireia] ra.” (Ebera 12:26, 27) Ae, ka ruruia teia akatereanga katoa o te au mea nei kia pou takiri kia vai te ngai no te ao ou ta te Atua i maani.

Te akavaitataia mai nei te au tangata ngakau tika ki te akamorianga mou inara kare no te mea e te akangaueueia nei, me kore te ruruia nei te au enua. Ko te angaanga e akavaitata mai nei ia ratou kia Iehova e ki tana akamorianga ko taua angaanga rai e akangaueue ra i te au enua, koia oki ko te angaanga tutuanga o te Patireia akatumuia o te Atua. Ko te akakiteanga o te ‘au nuti mataora o te tuatua meitaki mutu kore’ te akavaitata maira i te aronga i inangaro tikai i te akamorianga a te Atua mou.​—Apokalupo 14:6, 7, NW.

E karere akautungaanga e te akaoraanga to te Patireia. (Isaia 61:1, 2) E rua tupuanga no te tutu anga i te reira i te ao katoa: te akangaueue anga i te au enua e te tae mai anga o tei inangaroia e te au enua ki te kaka o Iehova.