Eaa to te Atua Akakoroanga no te Enua?

EAA ra koe i rekareka ai i te aaere anga i roto i tetai paka me kore te ori aere anga na roto i tetai ngai te kakara maira te au tiare? Eaa ra koe ka mataora ai i te kite atu anga koe i tetai roto vai manea me kore te au maunga teitei ma to ratou au take i roto i te au tiaorangi? Eaa ra koe ka tapu ua ai i te akarongo i te imene anga te au manu i ta ratou au imene reka i te ngai teitei rava o te tumu rakau? E eaa ra ei mea reka tikai i te akara atu i tetai ria manea te oro aere ra me kore i tetai anana mamoe e kaikai ra i roto i tetai ngai ngangaere?

Okotai pauanga ki teia au uianga katoatoa. Kua angaia mai tatou kia noo i roto i te Parataito! Ko te reira te ngai i akamata mai ei to tatou nga metua mua, ko Adamu raua ko Eva i to raua oraanga. No ko mai ia raua to tatou anoano kia noo i roto i te Parataito, e kua rauka mai te reira ia raua no ko mai i te Atua ko Iehova, Tei Anga mai ia raua. Kua kite aia e ka mataora tatou te tangata nei i roto i te Parataito no te mea kua anga mai aia ia tatou ma te au tu te anoanoia ra kia mataora i roto i taua kainga umere ra i runga i te enua.

Eaa ra a Iehova i anga ai i te enua? “Kua anga ra aia kia tangataia” e te au tangata ravarai. (Isaia 45:18) Kua oronga ‘Tei Anga maira i te enua’ i tetai kainga parataito e te manea kia Adamu raua ko Eva, te kainga Edene ra. (Ieremia 10:12; Genese 2:7-9, 15, 21, 22) Papu tikai e kua rekareka raua i te kauvai o reira, te au tiare o reira, te au tumu rakau o reira! Ka kiteaia atu te au manu manea i roto i te rangi, e te nekeneke aere ra te au manu tukeke i runga i te enua​—kare tetai ia ratou e akakino atu ana i te au tangata. Te kau aere ra te ika e tetai au mea ora i roto i te au vai manea e te ma o te enua. Tei puapinga roa atu, te noo kapiti ra a Adamu raua ko Eva. Ka rauka ia raua i te anau mai i ta raua uanga e te akatotoa atu i to raua kainga Parataito ma te taokotaianga rekareka ma to raua ngutuare te maata maira.

Noatu e kare te enua i te parataito i teia tuatau, ka rauka te reira i te akaaiteia atu ki tetai are manea o tetai ngutuare tangata mataora. Kua rauka i to tatou kainga i te ao katoa nei tei orongaia mai e te Atua ra ta tatou e anoano ra​—te marama, te vera, te vai, e te kai. Mei teaa ra to tatou ariki rekareka anga i te marama e te vera o te ra e te maru te mura anga o te marama i te po! (Genese 1:14-18) I roto tikai i te enua nei te vai ra te au apinga  akamura i te ai, mei te koara e te inu, ka rauka ia tatou i te taangaanga no te tamaanaana anga. No te aere anga o te vai e te akatere anga a te enua nei no te au kauvai, te au roto, e te au moana, e vai to tatou. E mei tetai moenga rai, e tapoki matie katoa to te enua.

Mei te kai rai e akaputuia ra i roto i tetai are, e maata tikai te kai o te enua. Na te akatupu anga i te one kai i roto i te kainga e te ua rakau i roto i te aua tanutanu ra, ‘te oronga maira a Iehova kia tatou i te tuatau mou, e te akaki anga i to tatou ngakau ki te kai ma te rekareka.’ (Angaanga 14:16, 17) Mei te mea e kua riro takere te enua ko taua kainga memeitaki ra, e akamanako ana mei teaa rai te tu me akariro “te Atua mataora ra,” ko Iehova, i te reira ei parataito!​—1 Timoteo 1:11, NW.

 [Au Akameitakianga no te Tutu i te kapi 2]

COVER: Earth: NASA photo; Stars: NASA, ESA and AURA/​Caltech