Ka Rauka Ainei ia Koe te Tuatua ma te Tapupu Kore e te Mataku Kore?

TERE atu i te ono mirioni tangata i roto i te 235 enua te tuatua ra ma te tapupu kore e te mataku kore na roto i tetai tu tei akatakaia mai i roto i te Pipiria. (Philipi 1:20) Eaa te o maira ki te tuatua ma te tapupu kore e te mataku kore? Eaa te ka tauturu kia rauka ia tatou te reira? I roto i teea au atianga no te komunikeitianga ta teia tu rangatira ka akatika ia tatou kia tuatua ma te kore e tamanamanataia?

Inara, auraka taua tuatua tikatika ua kia akapiriia atu ki te tu manako kore me kore te tu tau kore. “Ei tuatua aroa ua anake ta kotou,” i akakite mai ei te Pipiria. (Kolosa 4:6) Ko te tuatua ma te tapupu kore e te mataku kore ka o mai te manako tau ma te kore e akatika i te au turanga taitaia me kore te mataku i te tangata kia arai i ta tatou tuatua.

E tikaanga akatuangaia ainei no tatou te tuatua ma te tapupu kore e te mataku kore? E akamanako ana i ta te apotetoro ko Paulo i tata ki te au Kerititiano i Ephesia. Kua karanga aia: “Ko au nei rai, ko te iti rava i te iti i te aronga tapu ravarai, tei orongaia mai taua aroa ua nei, kia tutu aere au ki rotopu i te etene i te meitaki maata ope kore o te Mesia kia kimi ra.” Kua kapiti atu a Paulo e na roto oki ia Iesu Karaiti ra “tatou e tuatua uaʼi, e te o oki ma te mataku kore i te akarongo iaia.” (Ephesia 3:8-12) Kare i te akameitakianga mari ra e tikaanga anauia mai to tatou kia tuatua ma te tapupu kore e te mataku kore, tei tupu mai mei to tatou pirianga ma te Atua ko Iehova tei akatumuia ki runga i te akarongo i roto ia Iesu Karaiti. Ka akara ana tatou eaa te ka tauturu ia tatou kia rauka teia tu rangatira e akapeea tatou me akaari i te reira me tutu aere tatou, me apii, e me pure.

Eaa te Tauturu ra ia Tatou kia Tutu Aere ma te Mataku Kore?

Ko Iesu Karaiti oki te akaraanga maata roa atu o tetai tei taangaanga i te tuatua ma te tapupu kore e te mataku kore. Kua akakeu tona maroiroi iaia kia taangaanga i te au atianga no te tutu aere. Noatu te akangaroi ra, te kaikai ra i ko i te kainga o tetai tangata, me kore te aere ra i runga i te mataara, kare roa aia e tuku ua ana i tetai atianga ma te kore e tuatua no runga i te Patireia o te Atua. Kare katoa te taitoito me kore te patoianga e tamataku ana ia Iesu kia muteki ua. Mari ra, kua akakite pu ua aia ma te tu maroiroi i te au arataki akonoanga pikikaa i tona tuatau. (Mataio 23:13-36) Pera katoa i te opu angaia e e te akava angaia, kua tuatua atu rai a Iesu ma te mataku kore.​—Ioane 18:6, 19, 20, 37.

 Kua rauka katoa i te au apotetoro a Iesu taua tu tuatua tikatika ua ra. I Penetekote 33 T.N., kua tuatua a Petero ma te tapupu kore e te mataku kore ki mua i tetai urupu tei tere atu i te 3,000 tangata. Te mea umere, i tetai taime poto ua i muao, kua mataku ua aia i te akataka angaia e tetai tamaine tavini. (Mareko 14:66-71; Angaanga 2:14, 29, 41) I te apaina angaia ki mua i te au arataki akonoanga, kare a Petero raua ko Ioane i emiemi ana ma te mataku. Ma te emiemi kore, kua akakitekite mataku kore ua raua no runga ia Iesu Karaiti tei akatuakaouia mai. Ko te tika, na teia tuatua tikatika ua anga o Petero raua ko Ioane i kite ei te au arataki akonoanga e ia Iesu katoa ana eia nga tangata. (Angaanga 4:5-13) Eaa i rauka ai ia raua kia tuatua atu ma te mataku kore?

Kua taputou a Iesu ki tana au apotetoro e: ‘Kia tuku ra ratou ia kotou, auraka e taitaia i te tu o ta kotou ka karanga atu; e akakiteia mai kotou i te tuatua i reira ra. Kare oki ko kotou tei karanga atu, ko te vaerua ra o to kotou Metua tei tuatua i roto ia kotou na.’ (Mataio 10:19, 20) Kua tauturu te vaerua tapu ia Petero e etai atu kia autu i te akama me kore i te mataku te ka riro ei tamanamanata i ta ratou tuatuaanga rangatira. Ka riro katoa te akakeuanga a taua mana ririnui ra ei tauturu ia tatou.

Tetai katoa, kua oronga a Iesu ki tana au pipi i ta ratou angaanga kia akariro i te tangata ei au pipi. Kua tau rai teia, i te mea koia oki Tei orongaia “te mana katoa . . . to te rangi e te ao katoa nei.” E tei ‘vaitata ua ra aia ia ratou.’ (Mataio 28:18-20) Kua riro te kite anga i ta Iesu turuturuanga i te oronga i te tu papu tikai ki te au pipi mua i to ratou aro anga atu i te aronga mana tei akakoro tikai i te arai i ta ratou tutuanga. (Angaanga 4:18-20; 5:28, 29) Ka akapera rai taua tu kite anga ra no tatou.

I te akataka anga i tetai tumu ke mai no te tuatua tikatika ua, kua akapiri atu a Paulo i te manakonakoanga ma te tuatua tapupu kore e te mataku kore. (Philipi 1:20) No te tu umere roa o te karere o te manakonakoanga kia tapuia kia ratou uaorai, kua anoano te au Kerititiano i te akakite atu ki etai ke no runga i te reira. Tika rava e, ko to tatou manakonakoanga te tumu ka taangaanga ai tatou i te tuatua ma te tapupu kore e te mataku kore.

Tutu Aere Anga ma te Mataku Kore

Akapeea tatou me tutu aere ma te mataku kore noatu e tei raro ake i te au turanga tamatakuia? E akamanako ana i te akaraanga a te apotetoro ko Paulo. Iaia i roto i te are auri i Roma, kua pati aia ki tona au taeake akarongo kia pure e ‘kia orongaia mai kiaia te kite kia tuatua tona vaa, kia tuatua ua atu aia ma te mataku kore tei tau kia tuatua atu aia.’ (Ephesia 6:19, 20) Kua paunaia mai ra taua au pure ra? Ae! Iaia e mouauri ra, kua rave atu rai a Paulo i te “tuatua maira i te basileia o te Atua . . . ma te mataku kore, e kare rava e tangata i akakore atu.”​—Angaanga 28:30, 31.

Te taangaanga anga i te au atianga ravarai kia oronga i tetai akakiteanga i te ngai angaanga, i te apii, me kore i te teretere aere anga ka riro ei timata i ta tatou tuatua ma te tapupu kore e te mataku kore. Penei ka riro te akama, te mataku me patoiia mai tatou, me kore te ngere i te tu papu tikai i roto i to tatou tu kite ei akamuteki ia tatou. Te oronga akaou maira te apotetoro ko Paulo i tetai akaraanga meitaki. “I maroiroi ra matou i to matou Atua i te tuatua anga atu ia kotou i te evangelia a te Atua i roto rai i te taumāro maata,” i tata mai ei aia. (1 Tesalonia 2:2) No tona irinaki ua anga ia Iehova ra i rauka ai ia Paulo i te rave i tana uaorai i rauka kare e no runga i tona uaorai au kite.

Na roto i te pure i tauturuia ai tetai vaine ko Sherry te ingoa kia rauka te mataku kore me tupu mai tetai atianga no te akakitekiteanga ua. I tetai ra iaia e tiaki ra i tana tane kia oki mai mei tetai akakoroanga, kua kite atu aia i tetai vaine te tiaki katoa ra. “Ma te aka ru,” i karanga ai a Sherry, “kua pure au kia Iehova no te maroiroi.” Ia Sherry e akavaitata atura ki ko i te vaine, kua tae mai tetai orometua Baptist. Kare oki a Sherry i manako atu ana kia aravei i tetai orometua. Inara, kua pure akaou aia e kua rauka i te oronga atu i tetai akakiteanga. Kua rauka iaia i te oronga i tetai puka ki te vaine e kua akanoonoo no te oki i te atoro. Me taangaanga tatou i te au atianga kia oronga i tetai akakiteanga,  papu ia tatou e ka riro te irinakianga ki runga ia Iehova i te tauturu ia tatou kia mataku kore i te tuatua.

Me Apii

E pirianga vaitata to te tuatua ma te tapupu kore e te mataku kore ki te apiianga. No runga i “te au tangata te tavini ra na roto i te tu memeitaki” i roto i te putuputuanga, te karanga ra te Pipiria e: “Te rauka nei ia ratou uaorai tetai turanga meitaki e te tuatua maata ma te tapupu kore i roto i te akarongo ia Iesu Karaiti.” (1 Timoteo 3:13, NW) Kua rauka mai ia ratou teia tuatua ma te tapupu kore e te mataku kore na te taangaanga anga kia ratou uaorai i ta ratou e apii ra i etai ke. Te pera anga ratou kua riro ei paruru e ei akaketaketa i te putuputuanga.

Me rauka ia tatou te tuatua ma te tapupu kore e te mataku kore na roto i teia mataara, ka puapinga maata atu ta tatou akoanga e ka akonoia. Me kare tetai akaraanga kino e tamanamanata mai, ka akamaroiroiia te aronga e akarongo maira me kite i te aiteanga tau tikai no ta ratou e apii ra. Ka tauturu teia tuatua ma te tapupu kore e te mataku kore i te aronga tu tau i te pae vaerua kia ‘akatikatika i to ratou au taeake’ i mua ake ka kino roa atu ei te manamanata. (Galatia 6:1, NW) Ei tukeanga, penei ka emiemi te tangata e tuku ra i tetai akaraanga kino i te tuatua mai, no te mea kua kite aia e kare ona tikaanga kia tuatua atu. Penei ka arataki atu te taroaroa anga i te oronga i tetai akoanga ki tetai au openga kino.

Kare te aiteanga i ta tatou tuatua ma te mataku kore e kia akaapaapa, taumaro, me kore kia marokiakia. Kua ako a Paulo ia Philemona “no te aroa ra.” (Philemona 8, 9) E kua rauka mai te pauanga tau tikai ki te au tuatua a te apotetoro. Tika rava e, kia riro ko te aroa te akakeuanga i muri i tetai ua atu akoanga ta tetai tangata pakari ka oronga!

E mea puapinga tikai te tuatua ma te tapupu kore e te mataku kore me orongaia tetai akoanga. E puapinga maata katoa te reira i tetai atu au taime. Kua tata a Paulo ki te putuputuanga i Korinetia: “Te mataku kore ua nei taku tuatua ia kotou, e paapaa maata taku ia kotou.” (2 Korinetia 7:4) Kare a Paulo i tapupu ana i te oronga i te akameitakianga no tona au taeake e te au tuaine i te tuatau tau. Kua akakeuia aia e te aroa kia akara tamou ki runga i te au tu memeitaki o tona au taeake akarongo, noatu te kite ra aia i to ratou au tarevake. Ka akamaroiroi katoaia te putuputuanga Kerititiano i teia tuatau me akameitaki ua e me akamaroiroi te aronga pakari i to ratou au taeake e te au tuaine.

Kia puapingaia i roto i ta ratou apiianga, ka anoanoia te au Kerititiano katoatoa kia rauka te tuatua ma te tapupu kore e te mataku kore. Ko Sherry, tei taikuia i mua akenei, kua inangaro i te akamaroiroi i tana au tamariki kia akakitekite i te apii. “Noatu i utuutuia au i roto i te tuatua mou,” i akakite ei aia, “taime ua ake ka akakitekite au i te apii. E kare au e akakitekite ua ana. Kua ui au kiaku uaorai, ‘Eaa ra te tu akaraanga taku e  tuku nei no taku tamariki?’” Kua akakeu teia ia Sherry kia tauta maata atu i te akakitekite ua.

Ae, te akara maira etai i ta tatou au angaanga e te kite maira me kare e rauka ana ia tatou i te taangaanga i ta tatou e apii ra. Ka rave ana tatou, i reira, kia rauka te tuatua ma te tapupu kore e te mataku kore na te tauta anga kia aiteite ta tatou au raveanga ki ta tatou au tuatua.

Roto i te Pure

E puapinga tikai te tuatua ma te tapupu kore e te mataku kore me pure tatou kia Iehova. Ma te kore e araianga, kia tuatua tatou ma to tatou ngakau katoa kia Iehova ma te papu tikai e te akarongo maira aia i ta tatou au pure e ka pau mai i te reira. Ka rekareka i reira tatou i tetai pirianga pumaana tikai ma to tatou Metua i te rangi. Auraka rava tatou e emiemi i te akavaitata atu kia Iehova, te manako anga e e puapinga kore ua tikai tatou. Peea me riro to tatou akava ngakau no tetai tarevake me kore te arai ra te au ara i ta tatou au tuatua ngakau tae? Ka rauka ainei rai ia tatou i te akavaitata atu ki te Ngateitei o te ao katoa e pini ua ake ma te kore te arairaianga?

Te oronga maira to Iesu turanga akateiteiia ei Taunga Maata i tetai tumuanga akaou atu no te tu papu tikai i roto i te pure. Ia Ebera 4:15, 16, ka tatau tatou: “Kare oki to tatou i te taunga maata e kore e tika kia aroa mai ia tatou i to tatou au paruparu nei; i rokoia katoa oki aia i te au timataanga katoa, mei ia tatou katoa nei rai, kare rava ra e ara. E teianei e akavaitata ua atu tatou i te terono o te aroa ua ma te mataku kore, kia aroaia mai tatou nei, e kia rauka te meitaki ei tauturu mai ia tatou i te tuatau e tau ei ra.” E puapinga tikai te mate o Iesu e tana tuanga angaanga ei Taunga Maata.

Me kimi pakari tatou i te akarongo ia Iehova, e tumuanga tau to tatou kia tapapa atu e ka akarongo aroa mai aia i ta tatou pure. Kua tata te apotetoro ko Ioane: “E aku au akaperepere e, kia kore to tatou ngakau e akaapa ia tatou, kare o tatou e taitaiaanga i reira i te Atua ra. E ta tatou e pati atu iaia ra, e rauka ïa ia tatou, no te mea te akono nei tatou i tana au akauenga, e te rave nei i te au mea e marekaʼi aia ra.”​—1 Ioane 3:21, 22.

Ko te akavaitataanga arai koreia kia Iehova na roto i te pure tera te aiteanga ka rauka ia tatou i te akakite i tetai ua atu apinga kiaia. Noatu to tatou mataku, noatu te au manamanata, noatu te au apiapianga, me kore te au tu ekoko e takino ra ia tatou, ka rauka ia tatou kia akakite i te reira kia Iehova, ma te papu tikai e kare rava tona taringa e ariu ke i ta tatou au pure akatenga. Pera rai me kua rave tatou i tetai ara viivii tikai, kare te akava ngakau kino e arai i ta tatou au tuatuaanga na roto i te pure me tataraara ngakau tae tikai tatou.

E mea akaperepere maata tikai te apinga aroa ua no te tuatua ma te tapupu kore e te mataku kore. Ka rauka ia tatou i te akakaka i te Atua ki te reira i roto i ta tatou angaanga tutuanga e te apiianga e te akavaitata roa atu kiaia na roto i te pure. Ko tatou nei, “auraka e akaruke i [“ta tatou tuatua ma te mataku kore,” NW], e tutaki maata oki te oko i te reira”​—te tutaki o te ora mutu kore.​—Ebera 10:35.

[Tutu i te kapi 13]

Kua tuatua te apotetoro ko Paulo ma te mataku kore

[Au Tutu i te kapi 15]

Kia puapingaia te apiianga ka umuumuia te tuatua ma te tapupu kore e te mataku kore

[Tutu i te kapi 16]

E puapinga tikai te tuatua ma te tapupu kore e te mataku kore i roto i te pure