Kua Papa Ainei Koe no te Ora?

“Ka aere koe ma toou kopu-tangata katoa ki roto i te araka; ko koe oki te tangata tuatua-tika taku i kite i teianei uki, i mua i toku aroaro.”​—GENESE 7:1.

1. Eaa te akanoonooanga no te ora ta Iehova i akono i te au tuatau o Noa?

KUA ‘apai mai ei Iehova i te tiruvi ki teianei ao akono kore i te Atua ra’ i te tuatau o Noa, inara kua rave katoa Aia i te akanoonooanga no te ora. (2 Petero 2:5) Kua oronga mai te Atua mou kia Noa tuatua tika i te au ikuikuanga akataka tikaiia e akapeea i te patu anga i tetai araka no te akaoraanga i te oraanga i roto i tetai vaipuke i te ao katoa. (Genese 6:14-16) Mei ta tatou e tapapa atura i tetai tavini manako tau no Iehova, “Kua pera oki a Noa; i te au mea katoa ta te Atua i akaue mai iaia ra.” E tikai, “ko tana ïa i rave marie.” No te akarongo o Noa tetai tumu rai, e ora nei tatou i teia tuatau.​—Genese 6:22.

2, 3. (a) Akapeea te uki o Noa i te ariu atu anga ki te angaanga a Noa? (e) Ma teaa te tu irinaki papu i tomo atu ei a Noa ki roto i te araka?

² Kare i te angaanga ngoie ua i te patu anga i te araka. I te akaraanga, kua umere te au tangata e manganui i tei akatupuia e Noa e tona pamiri. Inara, kare te reira i rava ana i te akapapu kia ratou e tei runga te ora i to ratou tomo atu anga ki roto i te araka. I te openga iora, kua pou te akakoromaki o te Atua no taua ao kino ra.​—Genese 6:3; 1 Petero 3:20.

³ I muri ake i te au ngauru mataiti o te angaanga pakari i te tua o Noa e tona pamiri, kua karanga a Iehova kia Noa: “Ka aere koe ma toou kopu-tangata katoa ki roto i te araka; ko koe oki te tangata tuatua-tika taku i kite i teianei uki, i mua i toku aroaro.” Ma te akarongo e te irinaki papu i roto i te au tuatua a Iehova, “Kua tomo aturā Noa, e tana au tamariki, e tana vaine, e te au vaine katoa a nga tamariki nana ra.” Kua topiri a Iehova i te ngutupa e rauka ai i te paruru i tona aronga akamori. I te aere anga mai te Tiruvi ki runga i te enua, kua riro te araka ei akanoonooanga irinakiia no te ora.​—Genese 7:1, 7, 10, 16.

Au Tu Aiteite i Teia Tuatau ki te Tuatau o Noa

4, 5. (a) Ki teaa ta Iesu i akaaite atu ei i tona tuatau parutia? (e) Eaa te au tu aiteite te tupu ra i rotopu i te tuatau o Noa e to tatou tuatau?

⁴ “E mei te tuatau ia Noa ra, koia katoa te aerenga mai o te Tamaiti a te tangata nei.” (Mataio 24:37) Ma teia au tuatua, kua akakite mai a Iesu e ka aiteite te tuatau o tona parutia kitea koreia ki te au tuatau o Noa, e ko te reira tikai ia. Mei te 1919 mai tikai, te akakiteia ra te karere akamatakite tei aite ki te karere orongaia e Noa ki te au tangata i te pa enua ravarai. Te maataanga, kua aiteite to ratou ariu anga ki taua ra o te au tangata i te tuatau o Noa.

⁵ Na roto i te Vaipuke, kua akautunga a Iehova i te ao ‘ki i te takinga-kino.’ (Genese 6:13) I te tikaanga kare oki a Noa e tona pamiri i piri atu ana ki roto i taua kino ra mari ra kua akono au ua i te angaanga i te patu anga i tetai araka tei kitea uaia e te katoatoa tei kite atu ia ratou. I konei, katoa, te kite ra tatou i tetai tu aiteite ki to tatou tuatau. Ei reira te au tangata ngakau tae i teianei “e kite akaou ei i te tu ke anga i te tangata tuatua-tika e te tangata kino, i te tangata i akamori i te Atua, e i tei kore i akamori iaia.” (Malaki 3:18) Te tu tika, te aroa ua, te au, e te maroiroi tei akaariia e te Au Kite o Iehova e rekarekaia ana e te aronga papakitai kore e kite maira, e te akataka ra teia au tu i te au tangata o te Atua mei te ao nei. E kopae ana te Au Kite i te au tu kino ravarai e kua tuku atu ia ratou  uaorai kia akakeuia e te vaerua o Iehova. No reira ratou e akameitakiia ai e te au e no reira ratou i aruaru ei i tetai oraanga tuatua tika.​—Isaia 60:17.

6, 7. (a) Eaa ta te au tangata i te tuatau o Noa i poka i te ariki, e akapeea te reira i aiteite ei ki teia tuatau? (e) Eaa te au akaraanga te akaari ra e te kitea uaia ra te Au Kite o Iehova e e tuke rai?

⁶ Kua poka te uki o Noa i te kite meitaki e te turu ra te Atua ia Noa e te angaanga ra ma ta te Atua aratakianga. E no reira kare ratou i irinaki tikai ana i tana tutu anga e i te taangaanga i tana karere akamatakite. Akapeea i teia tuatau? Noatu e e umere ana te manganui i te angaanga e te tu akono o te Au Kite o Iehova, kare te maataanga e irinaki tikai ana i te tuatua meitaki e te akamatakiteanga a te Pipiria. Penei e akapaapaa meitaki ana te au tangata tupu, au pu angaanga, me kore te au kopu tangata i te au tu meitaki o te au Kerititiano mou, inara e mii ana e, “Naringa ua ake e kare ratou i te Au Kite o Iehova!” Ta teia aronga akarakara e akangaropoina ana koia oki e e akaari ana te Au Kite i taua au tu mei te aroa, te au, takinga meitaki, meitaki, maru, e te akatere uaorai no te mea te akatereia ra ratou e te vaerua tapu o te Atua. (Galatia 5:22-25) Na teia e kapiti atu ki te tu irinakiia o ta ratou karere.

⁷ I Rutia, ei akatauanga, te patu ra te Au Kite o Iehova i tetai Are Uipaanga Patireia. Tetai tangata tei tapu mai i te tuatua ki tetai o te aronga angaanga kua karanga atu: “E tuke ake rai teia ngai akatuanga are—​kare e kai avaava, kare e tuatua viivii, e te rangi marie ua ra te katoatoa! Ko kotou ainei tetai o te Au Kite o Iehova?” Kua ui atu te tangata angaanga kiaia, “Me karanga atu au e kare, ka irinaki ainei koe iaku?” Kua pau viviki mai te tangata, “Kare paa.” I roto i tetai atu oire maata i Rutia, kua umere maata tikai te akaaere maata i te kite atu anga i te Au Kite e patu ra i to ratou Are Uipaanga Patireia ou. Kua karanga aia e noatu e kua manako ana aia i te taime mua e aiteite ua te au pupu akonoanga katoatoa, i te kite anga i muri mai i te tu karapii kore ngakau tae o te Au Kite o Iehova i te angaanga anga, kare aia i manako akapera akaou ana. Ko nga mea akaraanga e rua ua teia te akaari ra e e tuke rai te au tangata o Iehova mei te aronga kare e aru ana i te au turanga Pipiria.

8. Tei runga i teaa to tatou ora atu anga i te openga o teia ao kino?

⁸ I roto i te tuatau openga o te “ao taito ra” tei akapouia i roto i te Vaipuke, e ‘tangata ako i te tuatua-tika ra’ a Noa. (2 Petero 2:5) I roto i teia au tuatau openga o te akatereanga o te au mea nei, te akakitekite ra to Iehova au tangata i to te Atua au turanga tuatua tika e te akakitekite ra i te tuatua meitaki no runga i te manakonakoanga no te ora atu anga ki roto i te ao ou. (2 Petero 3:9-13) Mei ia Noa rai e tona pamiri mataku i te Atua i akaoraia i roto i te  araka, te ora atu anga o te au tangata tataki tai tei runga te reira i to ratou akarongo e to ratou akapiri tiratiratu anga ki te tuanga i te enua nei o ta Iehova akaaerenga i te ao katoa e pini ua ake.

Umuumuia te Akarongo no te Ora

9, 10. Eaa ra e umuumuia ai te akarongo kia ora atu tatou i te openga o to Satani akatereanga o te au mea nei?

⁹ Eaa ta tetai tangata ka rave e rauka ai i te ora atu i te akapouanga te ka tupu ki teia ao e noo ra i raro ake i te mana o Satani? (1 Ioane 5:19) Kia kite aia na mua i te umuumuanga no te paruruanga. E oti kia akono aia iaia uaorai ki taua paruruanga. Kua rave aere ua te au tangata i te tuatau o Noa i ta ratou au angaanga i te au ra i roto i te mataara matauia e ratou e kare i kite atu ana i te umuumuanga no te paruruanga mei te tumatetenga e aere maira. E apinga ke atu ta ratou e ngere ra​—te akarongo ki roto i te Atua.

¹⁰ I tetai tua ra, kua kite a Noa e tona pamiri i to ratou umuumuanga no te paruruanga e te akaora. Kua taangaanga katoa ratou i te akarongo i roto i te Ngateitei i te Ao Katoa e Pini Ua Ake, ko te Atua ko Iehova. “Kare ra e akarongo ra kare rava [a Iehova] e mareka,” i tata ei te apotetoro ko Paulo, “ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” Kua karanga katoa a Paulo: “No te akarongo oki to Noa, ka akakiteia mai ei aia e te Atua i te au mea kare rai i kitea maira, e rokoia iora e te mataku, i tarai ei i te pai, kia ora tona ngutuare; akaapa iora i to te ao, e riro atura oki aia ei atu i te tuatua-tika e rauka i te akarongo ra.”​—Ebera 11:6, 7.

11. Eaa ta tatou ka kite mai e akapeea a Iehova i te oronga anga i te paruruanga i te au tuatau i topa?

¹¹ Kia ora atu i te openga o te akatereanga kino o te au mea nei, e maata atu ta tatou ka rave e kia irinaki ua e ka takoreia te reira. Kia akono tatou i te akarongo, te akono meitaki tikai anga i te au akanoonooanga a te Atua no te ora. E tikai, ka inangaroia tatou kia akono i te akarongo ki roto i te atinga oko o te Tamaiti a te Atua, ko Iesu Karaiti. (Ioane 3:16, 36) Inara, ka tau tatou kia akamaara e ko te aronga ua i roto tikai i te araka tei ora mai i te Vaipuke. Mei te reira katoa, te au oire akapuanga i roto ia Iseraela taito kua oronga mai i te paruruanga no te tangata kare i akakoro ana i te ta me oro ua aia na mua ki tetai o taua oire ra e kia noo ua ki roto i reira e mate ua atu te taunga maata. (Numero 35:11-32) I roto i te ngauru o te mate i runga ia Aiphiti i te tuatau o Mose, kua tamateia te tama mua a te au Aiphiti, inara ko ta te ngati Iseraela kua akaoraia. No teaa ra? Kua ikuiku a Iehova ia Mose: “E ka rave ratou [te ngati Iseraela] i te toto [o te mamoe Pasa],  ka pîpî ei i nga kopa ngutupa, e te uri i rungao i te au are, ta ratou e kai i taua punua mamoe ra. . . . e auraka roa tetai o kotou e tomo ki vao i tona ngutupa are e ao ua ake.” (Exodo 12:7, 22) Koai tama mua i rotopu i te ngati Iseraela ka timata i te kopae i taua ikuikuanga orongaia mai e te Atua na te aere anga ki vao i tetai are akairoia ki te toto pipiia i runga i nga kopa ngutupa e uri i rungao i te au are?

12. Eaa te uianga ka tau tatou tataki tai kia ui iaia uaorai, e no teaa ra?

¹² E tumu to tatou i reira i te akamanako meitaki i to tatou uaorai turanga. Tei roto tikai ainei tatou i ta Iehova akanoonooanga no te paruruanga pae vaerua? Me tupu ana te mate maata, ka maringi ua te au roimata rekareka e te akameitakianga mei te au mata o te aronga tei kimi i taua paruruanga. No tetai ke ra, e au roimata mii ua e te tataraapa.

Te Au Tauianga Tere ki Mua te Akapapa ra ia Tatou

13. (a) Eaa te akakoroanga tei akatupuia e te au tauianga akaaerenga? (e) Akataka mai etai o te au tauianga tere ki mua.

¹³ Kua akono marie a Iehova i te au tauianga i roto i tana akaaerenga i te tuanga nei o te enua. Kua riro teia ei akamanea, ei akatinamou, e te akamaroiroi i tana akanoonooanga no to tatou paruruanga pae vaerua. Mei te 1870 ki te 1932, te aronga pakari e te au tiakono kua ikiia e te au mema o te putuputuanga. I te 1932 kua monoia te aronga pakari ikiia ki tetai kumiti tavini anga ikiia e te putuputuanga kia tauturu i te akaaere tavini akataoongaia. I te 1938, kua akonoia te au akanoonooanga no te akataoongaanga teokaratiki no te au tavini katoatoa i roto i te putuputuanga. I raro ake i te arataki a te Pupu Akaaere no te Au Kite o Iehova, mei te 1972, kua akonoia te au ikianga e me akatikaia teia kua tukuia mai te au reta ki te putuputuanga te akataoonga teokaratiki ra i te au akaaere e te au tavini orometua. I roto i te au mataiti, kua maata mai te tuanga angaanga a te Pupu Akaaere e kua akonoia te au tauianga kia rauka i te akono i ta te reira angaanga.

14. Eaa te porokaramu terenianga tei akamataia i te 1959?

¹⁴ I te 1950, kua taki atu te akamanako meitaki anga ia Salamo 45:16 ki tetai porokaramu terenianga tamou. Te tatau ra tera irava: “E tupauia mai to ai metua ra i te au tamariki naau, ko taau ïa e akaariki i te pa enua katoa ra.” Te aronga pakari te arataki ra i roto i te putuputuanga i teianei te tereniia ra no te au angaanga teokaratiki i teia taime nei e no te tuatau i muri ake ia Aramakito. (Apokalupo 16:14, 16) Kua akamataia te Apii Orometua Patireia i te 1959. I taua taime ra, kua orongaia mai tetai apii ikuikuanga e tai marama i te roa no te au tavini putuputuanga tikai, ko tei kapikiia ana te au akaaere akatere i taua taime ra. I teianei kua akamaataia teia apii kia oronga i te ikuikuanga ki te au akaaere e te au tavini orometua katoatoa. I muri akera, kua akono teia au taeake, i te arataki i te terenianga i te Au Kite tataki tai no Iehova i roto i to ratou au putuputuanga tataki tai. E no reira, kua tauturuia te katoatoa i te pae vaerua kia akamaata i te tu puapinga o ta ratou angaanga orometua ei aronga akakitekite i te tuatua meitaki no te Patireia.​—Mareko 13:10.

15. Eaa te nga mataara e rua e paruruia ra te tu ma o te putuputuanga Kerititiano?

¹⁵ Te aronga tataki tai te inangaro ra kia riro mai ei tuanga no te putuputuanga Kerititiano  ka inangaroia kia akatupu i tetai au umuumuanga tikai. E mea tau, kare e akatikaia te aronga taitoito, e kare katoa rai taua tutu aronga ra i akatikaia ana i roto i te araka o Noa. (2 Petero 3:3-7) Mei te 1952 tikai, kua oronga te Au Kite o Iehova i te turuanga maata ki tetai akanoonooanga te tauturu ra i te paruru i te putuputuanga​—koia oki, te akaateaanga o te aronga ara tataraara kore. E tikai, te tauturu aroaia ra te aronga rave kino tei tataraara kia ‘akatika ua oki i te ara o to ratou vaevae.’​—Ebera 12:12, 13; Maseli 28:13; Galatia 6:1.

16. Eaa te turanga pae vaerua o te au tangata o Iehova?

¹⁶ Te turanga ruperupe i te pae vaerua o te au tangata o Iehova kare i te mea poitirere e kare katoa ei apinga tupu poitirere ua mai. Na roto i te peroveta ko Isaia, kua karanga a Iehova: “E teianei te na ko maira te Atu ra ko Iehova, I na, e kaikai toku aronga tavini, e pongi ra kotou; i na, e inu toku ra aronga tavini, e mate ra kotou i te kaki vai: i na, e rekareka toku ra aronga tavini, e akama ra kotou: I na, e imene toku au tavini i te rekareka ngakau ra, e pukaoa ra kotou i te mamae ngakau ra, e evakaku oki i te atiati anga o te vaerua.” (Isaia 65:13, 14) Te oronga ua maira Iehova kia tatou tetai aka putunga kai pae vaerua tau e te meitaki tikai te akaketaketa ua ra ia tatou i te pae vaerua.​—Mataio 24:45.

Kia Papa ua no te Ora

17. Eaa te ka tauturu ia tatou kia akapapa no te ora?

¹⁷ Kare mei te taime mua rai, ko teia te tuatau e “akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra.” (Ebera 10:23-25) Te piri vaitata anga e te noo maroiroi anga ma tetai o te 98,000 putuputuanga e tere atu no te Au Kite o Iehova ka tauturu ia tatou kia akapapa ia tatou uaorai no te ora. Ka rauka ia tatou te turuanga a te au taeake irinaki ia tatou e tauta ra i te akaari i ‘te tangata ou’ e kia tuku i te tautaanga ngakau katoa i te tauturu i tetai ke kia kite mai i ta Iehova akanoonooanga no te ora.​—Ephesia 4:22-24; Kolosa 3:9, 10; 1 Timoteo 4:16.

18. Eaa koe i inangaro ei i te noo vaitata mai ki te putuputuanga Kerititiano?

¹⁸ Te inangaro pakari ua ra a Satani e tona ao kino i te arataki ke ia tatou mei te putuputuanga Kerititiano. Inara, ka rauka ia tatou kia riro ua atu rai ei tuanga no te reira e ka ora atu i te openga o te akatereanga kino o te au mea i teianei. Kia akakeu te aroa no Iehova e te arikianga o tana au akanoonooanga aroa ia tatou kia patoi i te au tautaanga a Satani. Te akamanako oonuanga i runga i to tatou au akameitakianga i teia tuatau nei ka akamaroiroi i to tatou akakoroanga. Tetai o teia au akameitakianga ka uriuriia i roto i te atikara e aru mai nei.

Eaa Taau Au Pauanga?

• Akapeea to tatou au tuatau i te aite anga ki te tuatau o Noa?

• Eaa te tu e umuumuia ra no te ora?

• Eaa te au tauianga tere ki mua tei akamaroiroi i ta Iehova akanoonooanga no to tatou paruruanga?

• Akapeea tatou uaorai i te akapapa anga no te ora?

[Au Uianga Apii]

[Tutu i te kapi 22]

Kare te au uki o Noa i irinaki tikai ana ia Noa

[Tutu i te kapi 23]

E mea puapinga kia irinaki tikai i te au karere akamatakiteanga a te Atua

[Tutu i te kapi 24]

Eaa te akakoroanga ta te Apii Orometua Patireia e akatupu ra?

[Tutu i te kapi 25]

Ko teia te tuatau kia noo vaitata mai ki te putuputuanga Kerititiano