Te Au Rekareka no te Aaere Anga ma te Tiratiratu

“Na Iehova te meitaki i apingaʼi te apinga, kare oki e kapiti katoaia mai te kino i te reira.”​—MASELI 10:22.

1, 2. Eaa tatou ka kopae ei i te akamanako maata roa anga ma te tuatau ki mua?

“TETAI akamanako maata roa anga no te tuatau ki mua . . . te kopae ra ia tatou mei te rekarekaanga i tei ia tatou i teianei,” i karanga ai tetai tangata Marike kite karape. E tika teia o te au tamariki e manako maata ra eaa ta ratou ka rave ei aronga mamaata e kare roa i manako atu ana i te au akameitakianga no te tamarikianga kia riro roa mai ratou ei aronga mamaata.

² Kare katoa te aronga akamori o Iehova e paruruia mei teia aerenga manako. E akamanako ana eaa te ka tupu. Te umuumu ra tatou no te akatupuanga i ta te Atua taputou kia apai mai i tetai parataito ki runga i te enua. Te tapapa maroiroi ra tatou i tetai oraanga kare e maki, ruaine, mamae, e te mamaeanga. Mei te mea e e mea tau kia tapapa atu i taua au apinga ra, akapeea me maata roa tatou i te akamanakoanga i te au akameitakianga i te pae kopapa no te tuatau ki mua e kare tatou e kite ana i ta tatou au akameitakianga pae vaerua i teia tuatau nei? Aue te akama i te reira! Ka ngoie ua tatou i te taitaiaia e ka ‘aati to tatou manava no te mea kua tavareia te apinga tapapaia ra,’ i runga ravao i ta tatou i manako ana. (Maseli 13:12) Penei te au manamanata e te au akaaoanga i roto i te oraanga ka akakeu ia tatou kia taitaia me kore kia tangi ia tatou uaorai. Kare oki i akono atu i te au tupuanga kino, ka rauka ua ia tatou i te akatupu i tetai tu koumuumu. Ka rauka teia au apinga pouroa i te kopaeia na te akamanako meitaki tikai anga ki runga i ta tatou au akameitakianga i teianei.

3. Eaa ta tatou ka akamanako atu i roto i teia atikara?

³ “Na Iehova te meitaki i apingaʼi te apinga, kare oki e kapiti katoaia mai te kino i te reira,” i karanga ai a Maseli 10:22. Kare ainei te turanga puapinga i te pae vaerua no te au tavini o Iehova i teia tuatau nei ei akameitakianga kia rekareka ia? E akamanako ana tatou i etai au tu o to tatou puapinga pae  vaerua e e akara ana eaa to te reira puapinga kia tatou uaorai. Te tuku taime anga i te akamanako i runga i te au akameitakianga ta Iehova e oronga maata maira ki ‘te tangata tuatua-tika te aaere ra ma te tiratiratu’ ka akamaroiroi tikai i ta tatou akakoroanga kia tavini rekareka tamou i to tatou Metua i te rangi.​—Maseli 20:7.

‘Au Akameitaki Anga te Akapuapinga ra ia Tatou’ i Teianei

4, 5. Ko teea apiianga Pipiria taau e rekareka tikai ana, e no teaa ra?

⁴ Te kite tika tikai no te au apiianga Pipiria. E karanga ua ana te au akonoanga o Kerititome e e irinaki ana ratou i te Pipiria. Inara, kare ratou e rotai ana i ta te reira e apii ra. Noatu te au mema e aiteite ua te pupu akonoanga e tuke putuputu ana i roto i to ratou au manako e eaa ta te au Tuatua Tapu e apii tikai maira. Mei teaa tikai te tuke i to ratou turanga mei taua ra o te au tavini o Iehova! Noatu to tatou tupuanga pa enua, pae akonoanga, me kore tu eteniki, e akamori ana tatou i te Atua e kua kite tikai tatou i tona ingoa. Kare aia i tetai atua toru tai muna. (Deuteronomi 6:4; Salamo 83:18; Mareko 12:29) Te kite katoa ra tatou e te maroanga maata no te turanga ngateitei o te Atua i te ao katoa e pini ua ake kare e roaia ka akatikatikaia e na te tamou marie anga to tatou tiratiratu kiaia, te o atura tatou tataki tai i taua maroanga. Kua kite tatou i te tuatua mou no runga i te mate e kua mataraia mei te mataku vinivini tikai o tetai Atua tei karangaia e e tamamae ana i te au tangata i roto i tetai ai era me kore e akaunga ana ia ratou ki te purukatorio.​—Koheleta 9:5, 10.

⁵ Tei runga ravao, mei teaa atura te rekareka i te kite anga e kare tatou ei tupuanga poitirere ua o tetai tupu ua mai anga akatere koreia! Mari ra, e apinga angaia tatou e te Atua, angaia i roto i tona uaorai tu. (Genese 1:26; Malaki 2:10) “Ka akameitaki au ia koe, e mea mataku e te taka ke oki toku anga angaia,” i imene ei te tata taramo ki tona Atua. “E mea vavaria taau au angaanga, kua kite pu tikai oki toku vaerua.”​—Salamo 139:14.

6, 7. Eaa te au tauianga i roto i toou oraanga me kore i roto i te oraanga o tetai ke taau i kite mai e kua riro ei akameitakianga?

⁶ Matara mai mei te au tu peu e te au akonoanga kino tikai. E maata te au akamatakiteanga no runga i te au kino o te kai avaava, te inu maata roa, e te pirianga ainga tau kore i roto i te nuti. Te maataanga i te taime, kare teia au akamatakiteanga e akarongo ia ana. Inara, eaa te tupu ana, me kite mai tetai tangata ngakau tae e e akaapa ana te Atua mou i taua au apinga e e taitaia ana aia i te aronga e rave ra i te reira? Eaa nei, kua akakeuia tera tangata kia akakore atu i taua angaanga mei tona oraanga! (Isaia 63:10; 1 Korinetia 6:9, 10; 2 Korinetia 7:1; Ephesia 4:30) Mei te mea e te tumu maata e rave ra aia i teia koia oki kia akarekareka i te Atua ko Iehova, tei iaia katoa te au akameitakianga akaou atu​—tetai oraanga kopapa meitaki e te manako au.

⁷ Te akarukeanga i te au peu kino matauia e mea ngata tikai no te manganui. E tikai, i te au mataiti ravarai e au ngauru tauatini te rave ra i te reira. Kua akatapu ratou ia ratou uaorai kia Iehova e kua papetitoia i roto i te vai, akakiteanga ki te katoatoa e kua akakore ratou mei to ratou oraanga i te au angaanga te akamareka kore ra i te Atua. Mei teaa atura te akamaroiroianga te reira kia tatou katoatoa! To tatou inangaro pakari kia vai rangatira ua mei te tuikaa ki te tu ara e te mamae kua akaketaketaia.

8. Eaa te ako akatumuia ki runga i te Pipiria e akamaroiroi ra i te tu mataora o te pamiri?

⁸ Oraanga pamiri mataora. I roto i te au enua e manganui te pururu ua ra te oraanga pamiri. Manganui te au akaipoipo kua ope i roto i te akapae anga, te akaruke putuputu mai ana i te au tamariki kua takino tikai ia i te pae manako. I roto i etai au enua Europa, vaitata rai e 20 patene o te au ngutuare tangata katoatoa e au pamiri e tai ua metua. Akapeea a Iehova i te tauturuanga ia tatou  i te aaere i te mataara no te tiratiratu i roto i teia turanga? E tatau ine ia Ephesia 5:22–6:4, e akara ana i te ako meitaki ta te Tuatua a te Atua e oronga maira ki te au tane, te au vaine, e te au tamariki. Te akonoanga eaa tei akakiteia i reira e i tetai ngai ke mai i roto i te au Tuatua Tapu e akaketaketa tikai ana i te tatua akaipoipo, e tauturu ra i te au metua kia utuutu meitaki i te tamariki, e te tauturu ra i te patu i tetai oraanga pamiri mataora. Kare ainei te reira ei akameitakianga kia rekareka?

9, 10. Akapeea to tatou akaraanga no te tuatau ki mua i tuke ei mei taua o te ao ra?

⁹ Akapapuanga e kare e roaia ka akatikatikaia te au manamanata o te ao. Noatu te kite karape no te taineti e te tekinoroti e te au tautaanga a tetai au arataki tikai, te vai nei rai te au manamanata kino pakari o teia tuatau nei kare i akatikatikaia ake. Kua karanga ua akenei a Klaus Schwab, te tangata tei akamata i te World Economic Forum, e “te papaanga o te au akaaoanga te aro atura i te ao nei te maata ua maira e te tuatau i te akara i te reira te poto ua atura.” Kua tuatua aia i te “au kino te tupu ra i roto i te au pa enua ravarai mei te tamatakuanga, te takino anga o te reva e te marikonga kore i te pae moni.” Kua taopenga a Schwab: “I teianei, tei maata rava atu, te aro atura te ao ma te au tika anga te kapiki ra no te ravenga taokotai e te tau tikai.” E te tere ra te 21 anere mataiti ki mua, te akaraanga katoa no te tuatau ki mua no te au tangata ravarai e mea taitaia rai.

¹⁰ Mei teaa tikai te rekareka i te kite e kua akanoo a Iehova i tetai akanoonooanga te ka rauka i te akatikatika i te au manamanata a te au tangata ravarai​—te Patireia Mesia no te Atua! Na roto i te reira, ‘ka akakore [te Atua mou] i te tamaki’ e ka akatupu kia “maata roa oki te au.” (Salamo 46:9; 72:7) Te Ariki akatainuia, ko Iesu Karaiti, e ‘nana ïa e akaora i tei putaua ra; i tei apikepike ra e tei akaaka ra mei te taomianga e mei te kino.’ (Salamo 72:12-14) I raro ake i te tutara Patireia, kare rava e pou te kai. (Salamo 72:16) Ka “orei [a Iehova] i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” (Apokalupo 21:4) Kua akanoo takereia te Patireia i te rangi e kare e roaia ka rave i te angaanga umuumuia i te akakeu i te angaanga katoatoa i runga nei i te enua.​—Daniela 2:44; Apokalupo 11:15.

11, 12. (a) E apai mai ana ainei te aruaruanga no te navenave i te mataora mutu kore? E akataka mai. (e) Eaa te apai maira i te mataora mou?

¹¹ Kiteanga eaa te apai maira i te mataora tikai. Eaa te apinga te apai maira i te mataora tikai? Kua karanga tetai tangata apiipii i te manako e e toru tuanga to te mataora​—te navenave, akapirianga (te piri atu anga ki roto i te au rave anga mei te angaanga e te pamiri), e te akakoroanga (angaanga atu anga ki tetai akatupuanga me kore akakoroanga maata e i te manako ia koe uaorai). O te toru, kua papa aia i te navenave e ko te mea puapinga meangiti roa atu e kua kite mai e: “E nuti maata tikai teia no te mea e manganui te au tangata te patu ra i to ratou oraanga i runga i te aruaruanga i te navenave.” Eaa to te Pipiria manako no runga i teia?

¹² Kua karanga te Ariki ko Solomona o Iseraela taito: “Kua karanga iora au ki toku uaorai ngakau, Aere mai, e timata ana i te rekareka, e kimi oki i te navenave: e i na, e puapinga kore katoa te reira. Kua karanga atura au ki te kata, Kua nenevaia koe: e te rekareka, Eaa ïa puapinga?” (Koheleta 2:1, 2) Kia tau ki te Tuatua Tapu, noatu eaa ta te navenave mataora e oronga maira e tuatau poto ua te reira. Akapeea te piri atu anga ki roto i te angaanga? Tei ia tatou te angaanga puapinga rava roa atu i te akapiri atu​—te angaanga tutu anga i te Patireia e te akariroanga i te tangata ei pipi. (Mataio 24:14; 28:19, 20) Na te oronga atu anga ma tetai ke i te karere no te ora akatakaia i roto i te Pipiria, te piri atura tatou ki roto i tetai angaanga te ka riro mai ei ora kia tatou uaorai e ki taua  aronga ra tei akarongo mai kia tatou. (1 Timoteo 4:16) Ei ‘oa rave angaanga oki no te Atua,’ te kite nei tatou e “e maata atu te mataora o te orongaanga i to te rave mai.” (1 Korinetia 3:9; Angaanga 20:35, NW) Te kapiti ra teia angaanga i tetai akakoroanga ki to tatou oraanga e te oronga ra i Tei Anga mai i tetai pauanga ki tei akakino mai iaia, ko Satani te Tiaporo. (Maseli 27:11) E tikai, te akaari maira a Iehova kia tatou e te apai maira te akamori tau i te Atua i te mataora mutu kore.​—1 Timoteo 4:8.

13. (a) Na roto i teea mataara e e akameitakianga te Apii Orometua Teokaratiki no tatou kia rekareka? (e) Akapeea koe i te puapingaia anga mei te Apii Orometua Teokaratiki?

¹³ Tetai porokaramu terenianga puapinga maata e te meitaki tikai. Te tavini ra a Gerhard ei tangata pakari i roto i tetai putuputuanga no te Au Kite o Iehova. I te akamaara anga i tona mapu anga, kua karanga aia: “Ei tangata mapu ra, e apinga tikai toku au manamanata i te tuatua anga. Me tei raro i te taomianga, aka angaanga iaku i te tuatua taka meitaki e kua akamata i te teetee. Kua manako ekoko mai au e kua taitaia mai. Kua akanoo toku nga metua kia apai iaku ki tetai apiipii tuatua, inara kare i puapinga ana ta raua tautaanga. Toku manamanata no te pae manako ia, kare no te pae kopapa. Inara, te vai ra, tetai tauturu umere tikai, no ko mai ia Iehova​—te Apii Orometua Teokaratiki. Te piri atu anga ki roto i teia apii kua oronga akaou mai kiaku i te mataku kore. Kua tauta pakari au i te taangaanga i taku i tamou mai. E kua puapinga rai te reira! Kua ngoie ua mai au i te tuatua, kare e taitaia akaou ana, e kua mataku kore roa atu i roto i te angaanga orometua. E teianei e oronga ana au i te au ako ki te katoatoa. Te akameitaki tikai nei au ia Iehova, tei oronga mai i tetai oraanga ou noku na roto i teia apii.” Kare ainei te mataara e tereni ra a Iehova ia tatou kia rave i tana angaanga ei tumuanga kia rekareka?

14, 15. I roto i te au tuatau taitaia, eaa te tauturu te rauka ngoie ua ra? E akatutu mai.

¹⁴ Tetai pirianga uaorai kia Iehova e te turuturu mei te taokotaianga taeake i te pa enua. Ko Katrin, e noo ana i Tiamani, kua reka kore tikai i te rongo anga i te au ripoti no tetai ngaueue enua kino pakari e te tunami tei tupu i Asia i te tua tonga itinga. Te atoro ra tana tamaine ia Tairani i te tupuanga te tumatetenga. E 32 ora kare teia metua vaine i kite e me te ora ra rai tana tamaine me kore koia tetai i roto i te au tangata tei mate me kore tei kinoia, e te kake ua maira te numero o teia au tangata. Mei teaa tikai te pumaana kia Katrin i te tangi mai anga te terepaoni i te openga iora tei akapapu iaia e te meitaki ua ra tana tamaine!

¹⁵ Eaa tei tauturu ia Katrin i roto i taua au tuatau apiapi? Kua tata aia: “Kua akapou au e vaitata rai te katoaanga o teia tuatau i te pure anga kia Iehova. Kua kite putuputu mai au i te maata o te maroiroi e te manako au ta teia i oronga mai kiaku. Tei runga ravao, kua atoro mai te au taeake pae vaerua aroa iaku e kua akamaroiroi mai iaku.” (Philipi 4:6, 7) Mei teaa atura te kino i tona turanga me kua akapou ua aia i taua au tuatau kino pakari ma te kore te puapinga o te pure kia Iehova e te pumaana o tetai taokotaianga taeake pae vaerua aroa! To tatou pirianga vaitata tikai kia Iehova e tana Tamaiti kapiti katoa to tatou pirianga ma te taokotaianga taeake Kerititiano e akameitakianga takake tikai, e akaperepere anga tikai kare e tau kia manako koreia.

16. Oronga mai i tetai tupuanga te akatutu ra i te puapinga o te manakonakoanga no te tuakaouanga.

 ¹⁶ Te manakonako i te kite akaou anga i te aronga akaperepere tei mate. (Ioane 5:28, 29) Kua utuutuia tetai tangata mapu ko Matthias tona ingoa ei Kite no Iehova. Inara, kare i manako roa ana i tana au akameitakianga, kua aere ke aia mei te putuputuanga Kerititiano i tona mapu anga. Kua tata aia i teianei: “Kare roa au i pukapuka oonu tikai ana ki toku metua tane. I roto i te au mataiti, e putuputu ana maua i te karo. Inara, e inangaro ua ana toku papa kia rauka iaku i tetai oraanga meitaki. E inangaro akaperepere tikai tona iaku, tetai apinga kare roa au i kite ana i taua taime ra. I te 1996, iaku e noo ra i te pae i tona roi, te mou ua ra i tona rima e te aue tataraara ra, kua akakite au kiaia e kua tataraara tikai au no te au apinga katoatoa taku i rave e e inangaro maata tikai toku iaia. Inara kare aia i rongo mai ana iaku. I muri mai i tetai maki anga tuatau poto ua, kua mate aia. Me ka ora atu au i te kite akaou i toku papa i roto i te tuakaouanga, ka tupau maua i tei kore ana i te tuatau i topa. E ka kore ei e ka mataora tikai aia i te akarongo e te tavini nei au i teianei ei tangata pakari e te tavini akaperepere ra maua ko taku vaine ei nga painia.” Mei teaa tikai te akameitakianga taua manakonakoanga no te tuakaouanga kia tatou!

‘Kare oki Aia e Kapiti Katoaia Mai te Kino i te Reira’

17. Eaa ta te akamanako oonu anga i runga i ta Iehova au akameitakianga ka rave no tatou?

¹⁷ No runga i tona Metua i te rangi, kua karanga a Iesu Karaiti: “Kia riro kotou ei tamariki na to kotou Metua i te ao ra: te akaiti nei aia i tona rā ki rungao i te kino e te meitaki, e te akatopa mai nei aia i te ua ki runga i te tangata tuatua-tika e te tangata tuatua-tika kore.” (Mataio 5:45) Me te tuku maira te Atua ko Iehova i te au akameitakianga ki runga i te tangata tuatua tika kore e te kino, mei teaa atura aia ki runga i te aronga te aaere ra ma te tiratiratu! “Kare rava [a Iehova] meitaki e tāpu i te aronga aerenga tiratiratu ra,” i karanga ai a Salamo 84:11. Me akamanako oonu tatou i runga i te akono takake e te manakoanga tana e akaari ra no te aronga tei inangaro iaia, kua akakiia to tatou au ngakau ma te ariki e te rekareka!

18. (a) Na roto i teea tu e kare a Iehova e kapiti mai ana i te kino ki tana akameitaki anga? (e) Eaa ra to te Atua aronga tiratiratu e manganui e mamae ana?

¹⁸ “Na Iehova te meitaki”​—ko te apinga ia te oronga ra i te puapinga pae vaerua ki tona au tangata. E te akapapuia ra tatou e ‘kare oki aia e kapiti katoaia mai te kino i te reira.’ (Maseli 10:22) Eaa ra, i reira, te au taomianga e te au timataanga e tupu ana ki to te Atua aronga tiratiratu e manganui, i te akatupu maata anga i te mamae e te taitaia? E toru tumu maata e tupu mai ana te au manamanata e te taitaia kia tatou. (1) To tatou uaorai au manako ngakau ara. (Genese 6:5; 8:21; Iakobo 1:14, 15) (2) Satani e tana au temoni. (Ephesia 6:11, 12) (3) Te ao kino. (Ioane 15:19) Noatu e te akatika ra a Iehova i te au apinga kino kia tupu kia tatou, kare e koia tei akamata i te reira. Ko te tika, “te au mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra.” (Iakobo 1:17) Kare ta Iehova au akameitakianga e akatupu ana i te mamae.

19. Eaa ta te aronga tei aaere tamou i roto i te tu tiratiratu e tapapa atura?

¹⁹ Te kite mai anga te tu puapinga pae vaerua e o ua mai ana te akapiri vaitata anga ki te Atua. Me akatupu tatou i tetai pirianga vaitata kiaia, ‘te akaputu marie ra tatou i te meitaki tumu no tatou uaorai a muri atu, kia rave tatou i te ora tikai’​—te ora mutu kore. (1 Timoteo 6:12, 17-19, NW) I roto i te ao ou o te Atua no te tuatau ki mua, ka iriia to tatou au apinga i te pae vaerua ma te au akameitakianga pae kopapa. Ka riro i reira te oraanga tikai ei tu oraanga kiteaia e te aronga katoatoa tei ‘akarongo i te reo o te Atua ra o Iehova.’ (Deuteronomi 28:2) Ma te tauta anga akaketaketaia, kia aaere tamou ua atu rai tatou ma te rekareka i roto i te tu tiratiratu.

Eaa Taau i Kite?

• Eaa ra ei mea pakari kore kia manako maata roa no runga i te tuatau ki mua?

• Eaa te au akameitakianga ta tatou e rekareka nei i teianei?

• Eaa ra te au tavini akarongo mou no te Atua e mamae ana?

[Au Uianga Apii]