Te Puapinga o “te Āriki Paruparu”

“KOIA katoa oki kotou, e te au tane, e noo [i ta kotou au vaine] ma te kite,” i tata mai ei te apotetoro ko Petero, “i te akangateitei anga i te vaine, i te āriki paruparu.” (1 Petero 3:7) Teia taikuanga Tuatua Tapu i te vaine ei “āriki paruparu” te akakino ra ainei te reira i te vaine i roto i tetai ua atu tu? Ka akara ana tatou eaa te aiteanga mua ta te tangata tata akauruia i akakoro i te oronga mai.

Te nomena Ereni tei uriia e “akateitei” te aite anga “puapinga, okomaata, . . . ngateitei.” No reira, kia akono te tane Kerititiano i tana vaine ma te akaperepere, te akaari anga i te manakoanga tau kiaia ei ariki paruparu, akaperepereia. Kare teia i te taakamaanga. Ei akaraanga, e akamanako ana i te mori riri vai a Tiffany. Ka tau tikai kia karangaia teia mori manea tikai e e angiangi ua. Ka takore ainei te tu angiangi ua o te mori i tona puapinga? Kare rava! I te 1997 kua okoia atu te mori riri vai mua a Tiffany i ko i tetai ngai okookoanga apinga e 2.8 mirioni tara! Kua riro tona tu angiangi ua ei akamaata atu i tona puapinga, kare i takore i te reira.

Mei koia katoa rai, kare te akangateitei anga i te vaine ei ariki paruparu e akameangiti mai me kore e taakama iaia. Te noo anga ki tana vaine “ma te kite” ko te aiteanga kia akara te tane i tona au ngai maroiroi e te au kotinga, te au mea inangaro e te inangaro koreia, te manakonakoanga e te au manako ngakau. Te tane akono ka kite e ka akangateitei i te au tu tuke uaorai i rotopu iaia e tana vaine. Ka akaari aia i te akamanakoanga i tau nona “kia kore [tana] pure e topa.” (1 Petero 3:7) Tetai tane kare e rauka i te akangateitei i te au tu tau o tana vaine te takino ra i tona uaorai pirianga ki te Atua. Te taka meitaki ra e, kare te Tuatua a te Atua e akakino ra i te vaine. Mari ra, te akangateitei ra e te akateitei ra te reira ia ratou.

[Akameitakianga no te Tutu i te kapi 32]

© Christie’s Images Limited 1997