To te Atua Akakoroanga no te Enua​—Kare e Roa Atu ka Akatupuia

TE NOO ra rai a Adamu raua ko Eva i roto ia Parataito, kua orongaia mai kia raua teia akauenga no ko mai i te Atua: “Kia anau korua, e kia maata roa, e e akaki i te enua nei, e e akavi; e kia mana korua ki rungao i te au ika o te tai, e ki rungao i te au manu o te reva, e ki rungao i te au mea ora katoa e totoro aere ua ki rungao i te enua nei.”​—Genese 1:28.

Te akavi anga i te enua e maata atu te aite anga i te tatanu anga me kore te akono ua anga i tetai tuanga meangiti o te enua. E akatotoa a Adamu raua ko Eva e ta raua anau i te Parataito e kapi roa ake te ao katoa nei. Inara, kua ara nga tokorua mua e kua tuaruia atu ki vao mei roto mai i te kainga Edene. (Genese 3:23, 24) Inara kare te aite anga e kare roa te enua e akaviia.

No te mea e ka akameitakiia mai raua e te Atua, ka rauka i te tangata akarongo i te akavi i te enua. Te rauka anga mai i te tangata o Iseraela taito ra ta te Atua akameitakianga, kua tupu mai i roto i to ratou kainga te one kai memeitaki e e meitaki tikai te ua rakau i roto i ta ratou ngai tanutanu anga. Ka tupu rai te au turanga aiteite te riro marie mai anga to tatou enua ei parataito. Mei tei taputouia mai i roto i te Tuatua akauruia a te Atua, te Pipiria, “ei reira e ua maata mai ei te enua, e na te Atua, na to tatou uaorai Atua, e akameitaki mai ia tatou nei.” (Salamo 67:6) Te ka  tupu mai, ka pereperekavana te kainga e te au maunga o te enua, tona au rakau e te au tiare, tona kauvai e te au moana. (Salamo 96:11-13; 98:7-9) Ka ki to tatou enua i te kai ruperupe, te au manu karakara, te au animara manea roa atu, e te au tangata ngakau pumaana.

Kare e Roa Atu ko Tetai Ao Ou!

Tei roto tatou i teianei i te tapa o tetai ao ou tei taputouia mai e te Atua ko Iehova. “Te tatari nei ra tatou i te rangi ou e te enua ou tana i tuatua maira,” i tata mai ei te apotetoro ko Petero, “i te vai tika anga o te tuatua-tika ra.” (2 Petero 3:13) I muri ake i te tatau anga i taua au tuatua a Petero, penei ka manako etai e kare teia paraneta e riro akaou mai e parataito. Penei te manako ra ratou e ko te au rangi e te enua tikai ra ka mono akaouia. E tika ainei te reira?

Eaa ra te “rangi ou”? Kare te reira i te rangi tikai tei angaia mai e te Atua. (Salamo 19:1, 2) Te taiku maira a Petero i roto i te irava i mua akenei ki te “rangi” akatutuia​—te au kavamani a te tangata tei akateiteiia ki runga me kore tei akangateiteiia i runga ake i tona au tangata. (2 Petero 3:10-12) Puapinga kore ua teia “rangi” no te au tangata e ka ngaro ke atu. (Ieremia 10:23; Daniela 2:44) Te “rangi ou” te ka mono i te reira ko te Patireia o te Atua kapitiia mai te Ariki ko Iesu Karaiti e tona aronga tuangaia e 144,000 tei akatuia mai ki te ora i te rangi ra.​—Roma 8:16, 17; Apokalupo 5:9, 10; 14:1, 3.

Kare te “enua ou” ta Petero e taiku maira e e paraneta ou. Kua anga a Iehova i te enua ma te tau no te oraanga mutu kore no te tangata. (Salamo 104:5) I tetai au taime, te taangaanga ra te Pipiria i te tuatua “te ao” ki te tangata. (Genese 11:1) Te enua kare e roa atu ana ka takoreia ra te kapiti maira i te au tangata tei akariro ia ratou uaorai ei tuanga no teia ao kino. Mei te reira rai, kua mate tetai ao o te aronga akono kore i te Atua ra i roto i te Vaipuke i to Noa tuatau. (2 Petero 3:5-7) Eaa, i reira, te “enua ou”? E taiate ou no te au tangata te reira​—te aronga akamori mou o te Atua, e aronga e “tiratiratu te ngakau.” (Salamo 125:4; 1 Ioane 2:17) Pouroa te au ture o te “enua ou” ka aere mai mei ko mai i te “rangi ou.” Ka akapapu te au tangata akarongo mou i runga i te enua nei e te akonoia ra teia au ikuikuanga.

Au Mea Ou e te Umere!

Kua oronga papu tikai mai a Iehova kia tatou nei i tetai kainga manea te akapapaanga aia i te enua no te oraanga tangata. Kua karanga aia e ko tana angaanga katoa i te enua nei e “meitaki roa.” (Genese 1:31) Kua arataki atu a Satani te Tiaporo ia Adamu raua ko Eva ki roto i te meameaau. (Genese 3:1-5; Apokalupo 12:9) Inara, kare e roa atu ka akapapu mai te Atua e tei te aronga tiratiratu “te ora mutu kore.” Koia oki, “te ora mutu kore” i raro ake i te au turanga apa kore i roto i te Parataito. (1 Timoteo 6:12, 19) E akamanako ana tatou i teianei i etai o te au akameitakianga te ka rekarekaia i taua tuatau.

I te tuatau o to Karaiti Tutaraanga no te Tauatini Mataiti, ka tapekaia a Satani e kare e rauka i te apai mai i te aue ki rungao i te au tangata ravarai. I karanga ai te apotetoro ko Ioane: “Kite atura au i tetai angela [te angera maata ko Mikaela, me kore ko Iesu Karaiti] i te eke anga mai mei te rangi mai, e tei iaia te taviri o te vaarua takere kore ra, e pirianganaoa maata tei tona rima. Kua opu iora aia, i te taae, i taua ovi taito ra, koia oki te diabolo ra, ko Satani, kua tapeka iaia kia okotai tausani i te mataiti, Kua uri atura iaia ki raro i te vaarua takere kore ra, e popani atura iaia i reira, tuku iora i te akairo ki rungao, kia kore aia e pikikaa akaou i te pa enua, e kia ope rava aua nga mataiti okotai tausani ra.” (Apokalupo 20:1-3; 12:12) I te pae mai i te rangatira anga mei ta Satani akakeuanga ra iaia e tapekaia ra, e maata te au akameitakianga ta te au tangata ravarai ka rekareka i raro ake i te tutaraanga Patireia.

Te au angaanga kino, te ta, e te angaanga tamakianga ka riro e au mea taito. Te taputou  maira te Pipiria e: “E roa poto ake, e kare ua te tangata kino ra, koia tika rai, ka akara koe i tona ngai, e kare ua! Kareka te aronga maru ra, ka noo ïa i te enua, e ka rekareka ratou i te maata o te au ra. Ka riro te enua no te aronga tuatua-tika, ka noo tamou rai ratou i reira.” (Salamo 37:10, 11, 29) ‘Ka akakore te Atua ko Iehova i te tamaki e tae rava akenei ki te openga enua.’ (Salamo 46:9) E au akapapuanga umere tikai no te tinamou e te au!

Ka maata te kai meitaki e te reka i runga i ta tatou au kaingakai. “Ka maata te titona ki runga i te enua,” imene ei te tata taramo. “I te take o te au maunga ra ka ki maringiringi.” (Salamo 72:16, NW) I taua taime rai, kare tetai e matepongi akaou.

Kare tetai e mamae no te maki e e tuia e te maki. E tika, “kare oki to reira e karanga e, Kua maki au.” (Isaia 33:24; 35:5, 6) Ia Iesu Karaiti i te enua nei, kua akaora aia i te aronga repera e kua akaora i te pirikoki e te matapo. (Mataio 9:35; Mareko 1:40-42; Ioane 5:5-9) E akamanako ana eaa tana ka rave i roto i te ao ou! E akamanako ana i te tu mataora te ka tupu mai me akaoraia mai te matapo, te turi, te pirikoki, e te murare.

E tere atura te au tangata akarongo ki te tu tangata apa kore ra, ka taui akaouia te au tupu anga kino o te ruaine anga. Kare e mata titia akaou, te au tokotoko, te au tokotoko no te vaevae ati, te au pereoo oparapara, te au are maki, e te au vairakau. Mei teaa atura te au taui anga te akaoki akaouia mai anga to tatou maroiroi tu mapu ra! (Iobu 33:25) I te au popongi ravarai, ka ara mai tatou mei tetai moe meitaki i te po, kua anga te roi e te akamata anga i tetai ra ke mai no te angaanga rekareka.

Te tuakaouanga o te aronga akaperepere ra e tetai ke ra e rekareka te ka orongaia mai ki to tatou au ngakau. (Ioane 5:28, 29; Angaanga 24:15) Mei teaa ra te rekareka te reira i te turou anga mai ia Abela, Noa, Aberahama, Sara, Iobu, Mose, Ruta, Davida, Elia, Esetera, e te vai atura tetai e manganui! E au mirioni ua atu o tetai papaki ka akatu katoaia mai. Te maataanga ia ratou kare i apiiia ana no runga ia Iehova, inara ka turouia mai ratou e te au tangata te inangaro ra i te apii atu ia ratou no runga i te Atua, tona au akakoroanga, e tana Tamaiti, ko Iesu Karaiti. E kite mai ei te aronga tei akatuakaouia mai i Tei Anga ia ratou ra, ka akaki tikai te kite o Iehova ra i te enua nei.

Tei meitaki roa atu, ka rauka ia tatou i te akamori i te Atua mou anake e tuatau ua atu. Tei ia tatou te tuatau kia “akamori ia Iehova ma te pereperekavana,” e ka angaanga taokotai tatou ma te rotai ia tatou e akatu ra i te au are manea, te arote i te one, e i te tuatau tau ra, i te akavi katoa anga i te enua. (Salamo 100:1-3; Isaia 65:21-24) Mei teaa ra te rekareka kia ora mai e tuatau ua atu i roto i tetai parataito ruperupe, ponuiaau, e te manea te apai maira i te ngateitei ki to Iehova ingoa tapu ra!​—Salamo 145:21; Ioane 17:3.

Tetai Timataanga Openga no te Au Tangata

I te tuatau o tona Tutaraanga i te Tauatini Mataiti, ka taangaanga a Iesu i te au akameitaki anga o tona atinga oko ki te au tangata akarongo ravarai. Aere rai, ka akaatea pouroaia te ara, e ka akateiteiia te tangata ravarai ki te tu tangata apa kore. (1 Ioane 2:2; Apokalupo 21:1-4) Te akaatea takiri anga i te au tupu anga o ta Adamu ra ara, ka aru te au tangata apa kore i ta te Atua au turanga i te pae kopapa, manako, akono tau, e i te pae vaerua. Ka “ora akaou” mai ratou i roto i te manako tikai me taeria e ratou te tu apa kore o te ara kore. (Apokalupo 20:5) Ka akakaka teia tu apa kore nei e te enua Parataito ra ia Iehova!

 No tetai tuatau poto ua i muri ake ka ope ei to Karaiti Tutaraanga e Tauatini Mataiti, ka tukuna akaouia mai a Satani te Tiaporo e tana au temoni, me kore te au angera kino ra, mei roto mai i te vaarua takere kore te ngai i uriia atu ei ratou no etai au ngauru anere mataiti i mua atu. (Apokalupo 20:1-3) Ka akatikaia ratou kia rave i tetai tautaanga openga kia akaanga ke i te au tangata mei te Atua. Noatu e ka tuku ua atu etai au tangata ki te au anoano tarevake, kare teia meameaau e autu. Ka akapou atu a Iehova i teia aronga noinoi ma ratou katoa ko Satani e tana au temoni. Kare rava te angaanga kino e tupu akaou mai. Ka kore takiri atu te aronga rave tarevake katoatoa i reira e tuatau ua atu, e ka rauka i te aronga tuatua tika te ora mutu kore.​—Apokalupo 20:7-10.

Ko Koe Ainei Tetai i Reira?

Te vai ra i mua i te aronga tei inangaro i te Atua ko Iehova tetai tuatau mutu kore no te tu mataora. Kare e apinga maromaroa no runga i te ora mutu kore i roto ia Parataito. Ko te tika, ka meitaki aere mai te rekarekaanga te topa aere anga o te tuatau, no te mea kare e kotinga anga ki te kite o te Atua ko Iehova. (Roma 11:33) E apinga ou taau ka apii ua rai, e e maata toou tuatau i te apii i te kite. No teaa ra? No te mea ka ora koe, kare ua e 70 me kore e 80 mataiti, mari ra e tuatua ua atu.​—Salamo 22:26; 90:10; Koheleta 3:11.

Me te inangaro ra koe i te Atua, ka mataora ua atu koe i te rave i tona anoano. Kua tata te apotetoro ko Ioane e: “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.” (1 Ioane 5:3) No reira auraka e tuku i tetai apinga kia arai ia koe i te akamareka anga i te Atua ko Iehova na te rave anga i te mea tika. E akamanako ana i te manakonakoanga umere ta te Tuatua a te Atua, te Pipiria, i tuku mai ki mua ia koe. E akanoo i toou ngakau i te rave i to Iehova anoano, e auraka rava e anga ke mei taua aerenga. Ko koe oki tetai i reira me akatupuia to te Atua akakoroanga no te enua nei e ka riro mai to tatou kainga enua ra ei parataito e tuatau ua atu.

[Tutu i te kapi 4]

Ma te akameitakianga a te Atua, e maata te kai ta te au kainga o Iseraela i akatupu ana

[Tutu i te kapi 7]

Eaa te au akameitakianga taau e manakonako ra kia rekareka i roto ia Parataito?