E Mea Ora te Tuatua a Iehova

Au Manako Maata mei te Puka Rua o Salamo

EI AU tavini o Iehova, kua kite tatou e ka kite mai tatou i te au akaaoanga e te au timataanga. “E te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa,” i tata ei te apotetoro ko Paulo. (2 Timoteo 3:12) Eaa te ka tauturu ia tatou i te akakoromaki i te au timataanga e te au takinga kino anga, akapapu anga i reira i to tatou tu tiratiratu ki te Atua?

Te oronga maira te rua o te rima tuanga o te taramo i taua tauturu. Te akaari maira a Salamo 42 ki te 72 kia tatou e me ka inangaro tatou i te akakoromaki meitaki tikai i te au timataanga, kia tuku tatou i to tatou irinaki pu tikai ki roto ia Iehova e i te kite mai i te tiaki iaia no te akaoraanga. Mei teaa atura te reira ei apiianga puapinga no tatou! Te karere no te Puka Rua o Salamo, mei te katoaanga rai o te Tuatua a te Atua, ‘e mea ora oki, e te ririnui’ tikai noatu i teia tuatau.​—Ebera 4:12.

KO IEHOVA TO TATOU “AKAPUANGA E TE MAROIROI”

(Salamo 42:1–​50:23)

Kua tuikaaia tetai tangata ngati Levi. Kua mii oki e kare e rauka iaia i te aere ki te ngai tapu o Iehova kia akamori, kua akapumaana aia iaia uaorai, i te na ko anga: “Eaa koe i taitaiaʼi, e taku vaerua? eaa oki koe i ngarepurepu ei i roto iaku nei? e irinaki i te Atua.” (Salamo 42:5, 11; 43:5) Teia irava tei taiku akaouia te kapiti atura i te au pa manako e toru o Salamo 42 e te 43 ki riro mai e tai pee. Te Salamo 44 e patianga te reira no Iuda​—e pa enua tei taitaiaia, penei i raro ake i te tamatakuanga e ka tomoia e Asura i te au tuatau o te Ariki ko Hezekia.

Te Salamo 45, e imene no runga i tetai akaipoipo o tetai ariki, e totouia no te Ariki Mesia. Te au taramo e toru te aru maira te akaari ra ia Iehova ei “akapuanga e te maroiroi,” “ko te ariki maata ïa ki runga i te enua katoa nei,” e ei “akapuanga i kitea.” (Salamo 46:1; 47:2; 48:3) Mei teaa tikai te manea ia Salamo 49 i te akaari mai anga e kare e rauka i tetai tangata “kia akaora i tona taeake”! (Salamo 49:7) Te taramo mua e varu o te tuanga rua kua karangaia e na te au tamariki tamaroa a Kora. Te iva, Salamo 50, e papaanga ia na Asapha.

Pauia te Au Uianga Tuatua Tapu:

44:19​—Eaa “te ngai taae ra”? Penei te taiku ra te tata taramo ki tetai ngai tamakianga, e ko te aronga taiaia kua riro ei kai na te au taae.

45:13, 14a​—Koai te “tamaine a te ariki” te ka ‘aratakiia ki te ariki ra’? Koia te tamaine a te “Ariki mutu kore,” ko te Atua ko Iehova. (Apokalupo 15:3, NW) Te akatutu ra aia i te putuputuanga akangateiteiia e 144,000 Kerititiano, ta Iehova i angai ei tamariki nana na te akatainuanga ia ratou ki tona vaerua. (Roma 8:16) Teia “tamaine” a Iehova, “akamaneaia mei te vaine i akamaneaia no te akaipoipo anga ki tana tane ra,” ka apainaia mai ki te tane akaipoipo​—te Ariki Mesia.​—Apokalupo 21:2.

45:14e, 15​—Koai te akatutuia maira e te “au oa paretenia.”? Ko te “aronga maata rava” ratou no te aronga akamori mou, tei kapiti e tei turu atu i te toenga o te aronga akatainuia. I te mea ka ora ratou i te “aere [anga] mai mei roto i te mate maata,” tei te enua nei ratou me oti mai te akaipoipo  o te Ariki Mesia i te rangi. (Apokalupo 7:9, 13, 14) I taua atianga, ka ki ratou i te “rekareka e te pereperekavana.”

45:16​—Na roto i teea tu e katupauia mai to te ariki ai metua ra i te au tamariki? I te anau mai anga a Iesu i te enua nei, e ai metua tona no te enua nei. Ka riro ratou ei au tamariki nana me akatuakaou aia ia ratou mei te mate i te tuatau o tona Tutara Anga Tauatini Mataiti. Etai ia ratou ka riro mai e ko tetai o te aronga akatainuia ei “au tamaiti ariki i te enua katoa nei.”

50:2​—Eaa ra a Ierusalema e kapikiia e ko “te ngai i tu ke i te manea”? Kare oki teia e no te tu akaraanga o te oire. Mari ra, no te mea kua taangaanga a Iehova i te reira e kua oronga i te mekameka ki rungao i te reira na te akariroanga i te reira e ko te ngai o tona iero e te oire maata o tona au ariki akatainuia.

Au Apiianga no Tatou:

42:1-3. Mei te aili, me kore ei ua ria, i roto i tetai ngai maro e kaki vai ra, te inangaro ra te ngati Levi ia Iehova. E pakari tikai te mii o te tangata no tei kore i rauka ana iaia i te akamori ia Iehova i Tona ngai tapu e ‘tona roi-mata, tana ïa kai i te po e te ao’​—kua kore tona pongi. Kare ainei ka tau tatou kia tatanu i te ariki rekareka oonu no te akamori anga ia Iehova ma te kapiti atu anga ki te au taeake irinaki?

42:4, 5, 11; 43:3-5. Me no etai tumu e kare e rauka ia tatou i te akatere e ka akatakakeia tatou mei te putuputuanga Kerititiano no tetai tuatau poto ua, te maaraanga i te au rekareka o taua akapirianga i te tuatau i topa ka rauka i te akaora ia tatou. E noatu e penei i te akamataanga ka akakino roa atu teia i te mamae no te maromaroa, ka akamaara katoa te reira ia tatou e ko te Atua to tatou akapuanga e ka inangaroia tatou kia irinaki ki runga iaia no te tauturu.

46:1-3. Noatu eaa te tumatetenga ka kite mai tatou, kia rauka ia tatou te irinaki ngaueue kore e ko “te Atua to tatou akapuanga e te maroiroi.”

50:16-19. Tetai ua atu tangata te tuatua pikikaa ra e te rave ra i te au mea kino kare ona tikaanga i te komono i te Atua.

50:20. E kia viviki ua i te akakitekite i te au tarevake o tetai ke, ka tau tatou kia akara kore atu i te reira.​—Kolosa 3:13.

“E TAKU VAERUA, KO TE ATUA ANAKE TAAU E TATARI”

(Salamo 51:1–​71:24)

Te akamata ra teia putunga taramo ma te pure ngakau tae a Davida te aruanga mai i tona ara anga kia Bateseba. Te akaari maira a Salamo 52 ki te 57 e ka akaora a Iehova i te aronga te tuku ra i ta ratou apainga ki runga iaia e te tiaki ra iaia no te akaoraanga. Mei tei akakiteia i roto ia Salamo 58-64, i tona au manamanata pouroa, kua akariro a Davida ia Iehova ei akapuanga nona. Kua imene aia: “E taku vaerua, ko te Atua anake taau e tatari: tei iaia oki toku manako anga.”​—Salamo 62:5.

Te pirianga vaitata ki to tatou Akaora ka tau kia akakeu ia tatou kia “imene ei akakakā i tona ingoa.” (Salamo 66:2) Kua akapaapaaia a Iehova ei atua oronga aroa ua i roto ia Salamo 65, ei Atua no te au angaanga akaora i roto ia Salamo 67 e te 68, e ko te Ora i roto ia Salamo 70 e te 71.

Pauia te Au Uianga Tuatua Tapu:

51:12​—Ki toai “ngakau oronga ra” ta Davida i pati atu kia turuturuia? Kare e te taiku ra teia, ki to te Atua tu puareinga ua i te tauturu ia Davida e kare katoa ki to Iehova vaerua tapu, mari ra ki to Davida uaorai vaerua​—ki tona manako ngakau. Te pati ra aia ki te Atua kia oronga mai kiaia i te inangaro kia rave i tei tika ra.

53:1​—Akapeea tetai tangata tei patoi i te vai anga o te Atua ei “neneva”? Kare te neneva i konei e te taiku ra ki te ngere anga i te kite. Ko te tika e e neneva taua tangata ra i te tu akono tau ka kiteaia mei te akono kore anga i te tu akono  tau tei tupu akera mei tei akatakaia ia Salamo 53:1-4.

58:3-5​—I roto i teea tu e mei te ovi rai te aronga kino? Ta ratou au pikikaa e akakite ra no tetai ke mei te kavangu ovi rai. Te takino ra ratou i te ingoa meitaki o ta ratou aronga e akakino ra. “Mei to te asepi turi e momani i tona taringa,” kare te aronga kino e akarongo ana ki te aratakianga me kore te akatikatikaanga.

58:7​—Akapeea te aronga kino e ‘roroma mei te vai e roroma nei’? Penei te manako ra a Davida i te au vai o tetai au vai peka tikai i roto i te Enua Taputouia. I te mea e ka akakake tetai vaipuke poitirere ua i te au vaito vai i roto i tetai o, viviki ua teia au vai i te tae atu e ngaro ua atu. Te pure ra a Davida kia ngaro viviki atu te aronga kino.

68:13​—Akapeea te “peau kukupa i tapokiia i te ario, e tei tikotikoti aereia tona uruuru i te auro rengarenga ra”? Tetai au kukupa tikai e auika e te inaina to ratou kara e kanapanapa ana tetai uru o ratou mei te anuanua rai. To ratou uru mei te metera rai te akaraanga i roto i te ra. Penei te akaaite ra a Davida i te au toa Iseraela autu te aere maira mei tetai tamaki ki taua kukupa ra​—maroiroi i te rere anga e te manea tikai i te akaraanga. Mei ta tetai aronga apiipii e manako ra, penei ka tano katoa te akatutuanga ki tetai angaanga ati, tetai kapu, tei apainaia ei tutaki. Noatu eaa, te tuatua ra a Davida ki te au autu ta Iehova i oronga ki tona au tangata i rungao i to ratou au enemi.

68:18​—Koai ma ‘te apinga aroa no te tangata ra’? E au tangata aere teia mei roto mai i te aronga tei opuia i te tuatau o te autuanga o te Enua Taputouia. Kua tukunaia atu taua au tangata i muri akera i te tauturu i te ngati Levi i roto i ta ratou angaanga.​—Ezera 8:20.

68:30​—Eaa te aiteanga o te patianga kia ‘akamura atu i te taae o te rarokakao ra’? Te tuatua akatutuanga i te au enemi o te iti tangata o Iehova ei taae, te pati ra a Davida ki te Atua kia akamaru atu ia ratou, me kore kia tapu marie i to ratou mana i te rave i te kino.

69:23​—Eaa te aiteanga e ‘ka ruketekete oki to ratou taukupu’? Te au uaua i te ngai o te taukupu e puapingaia no te raveanga i te au angaanga pakari, mei te amo anga e te apai anga i te au apinga teiaa. Te au taukupu ngaueue ua te akakite maira e kua pou te ririnui. Kua pure a Davida kia pou te ririnui o tona au enemi.

Au Apiianga no Tatou:

51:1-4, 17. Te rave anga i te ara kare e ka akatakake ia tatou me te Atua ko Iehova. Me tataraapa tatou, ka akapapuia tatou i tona aroa.

51:5, 7-10. Me kua ara tatou, ka rauka ia tatou i te pati kia Iehova no te akakoreanga ara no te mea kua tu tatou i te ara. Kia pure katoa tatou kiaia kia tama mai ia tatou, kia akaora akaou ia tatou, kia tauturu ia tatou kia akakore i te au akakeuanga kia rave i te ara mei to tatou ngakau, e kia oronga mai kia tatou i te vaerua ngaueue kore.

 51:18. Kua tamataku te ara a Davida i te tu oraanga meitaki o te pa enua katoa. No reira kua pure aia no ta te Atua akaperepereanga no Ziona. Me rave tatou i tetai ara kino, e putuputu ana te taime e apai mai ana i te kino ki runga i te ingoa o Iehova e ki runga i te putuputuanga. Ka inangaroia tatou kia pure ki te Atua kia akakore atu i te kino ta tatou i akatupu.

52:8. Ka rauka ia tatou kia riro mai ‘mei te olive ruperupe i te are o te Atua’​—vaitata ua kia Iehova e te angaanga puapinga ra i roto i tana tavinianga​—na te akarongo anga kiaia e na te ariki puareinga ua i tana ako.​—Ebera 12:5, 6.

55:4, 5, 12-14, 16-18. Te moetapapa anga o tana uaorai tamaiti ko Abasaloma e te pikikaa o tana tangata ako irinaki roa atu ko Ahitophela kua akatupu i te mamae ngakau kino pakari tikai kia Davida. Inara, kare te reira i akameangiti mai i to Davida irinaki papu ki roto ia Iehova. Auraka tatou e tuku i te taomianga i te pae manako i te taparuparu i to tatou irinaki ki roto i te Atua.

55:22. Akapeea tatou i te titirianga i ta tatou apainga ki runga ia Iehova? Ka rave tatou i teia (1) na te pure anga kiaia no runga i te apinga te tamanamanata ra ia tatou, (2) na te uri anga ki tana Tuatua e te akaaerenga no te arataki e te turuturu, e te (3) na te rave tau anga i te ka rauka ia tatou i te akamaru i te turanga.​—Maseli 3:5, 6; 11:14; 15:22; Philipi 4:6, 7.

56:8. Kare e te kite ua ra a Iehova i to tatou turanga mari katoa i to te reira tupuanga i te pae manako ki runga ia tatou.

62:11. Kare e ka irinaki te Atua ki runga i tetai apinga ua no te ririnui. Koia tikai te no te mana. ‘Tei iaia te mana.’

63:3. ‘E meitaki maata oki to te Atua takinga-meitaki i tei te ora’ no te mea me kare te reira, e puapinga kore ua te oraanga e kare e akakoroanga. E mea pakari no tatou kia tatanu i te akataeake anga kia Iehova.

63:6. Te tuatau i te po​—muteki ua e kare e tamanamanataanga​—e tuatau meitaki tikai no te akamanako oonu anga.

64:2-4. Ka takino te urutoe kino i te ingoa meitaki o tetai tangata meitaki ua. Auraka tatou e akarongo ki taua urutoe e auraka katoa e akakitekite atu i te reira.

69:4. Kia akono tatou i te au, penei tetai taime e mea pakari kia “akaoki” na te tataraapa anga, noatu me kare tatou e irinaki ana e ko tatou tei tarevake.

70:1-5. Te akarongo maira a Iehova i ta tatou au patianga rapurapu no te tauturu. (1 Tesalonia 5:17; Iakobo 1:13; 2 Petero 2:9) Penei ka akatika te Atua i tetai timataanga kia aere ua atu, inara ka oronga mai aia kia tatou i te pakari kia akono i te turanga e te maroiroi kia akakoromaki i te reira. Kare aia e tuku ia tatou kia timataia i runga ravao i te ka rauka ia tatou i te akakoromaki.​—1 Korinetia 10:13; Ebera 10:36; Iakobo 1:5-8.

71:5, 17. Kua akatupu a Davida i te mataku kore e te maroiroi na te akariro anga ia Iehova ei irinaki nona i tona mapu anga​—i mua roa ake i aravei ei aia i te tuputupua Philiseti ko Golia. (1 Samuela 17:34-37) Ka tau meitaki te aronga mapu i te irinaki ki runga ia Iehova i roto ta ratou au apinga ravarai ka rave.

“Kia Akakiia oki te Pa Enua Ravarai ki Tona Kakā”

Te imene openga i roto i te tuanga rua o te taramo, Salamo 72, no runga te reira i to Solomona tutaraanga, te akatutu maira i te au turanga te ka tupu i raro i te tutara a te Mesia. Mei teaa tikai te au akameitakianga umere rava e akatakaia maira i konei​—te au maata, te openga o te taomianga e te kino, e maata te ua kai i runga i te enua! Ko tatou ainei tetai i roto i te aronga te ka rekareka i teia au akameitakianga e tetai atura no te Patireia? Ka rauka ia tatou me, mei te tata taramo rai, mareka ua tatou i te irinaki ki runga ia Iehova, akariroanga iaia e ko to tatou akapuanga e te maroiroi.

“Te au pure a te tamaiti a Iese ra a Davida, kua ope ïa.” Ma te au tuatua: “Kia akameitakiia te Atua, te Atua o Iseraela ko Iehova, koia anake ra tei rave i te au mea taka ke ra. Kia akameitakiia oki tona ingoa kakā e tuatau ua atu: kia akakiia oki te pa enua ravarai ki tona kakā; Amene, e Amene.” (Salamo 72:18-20) Kia akameitaki katoa rai tatou ia Iehova ma te ngakau katoa e kia akapaapaa i tona ingoa ngateitei.

[Tutu i te kapi 9]

Kua kite ainei koe e koai te akatutuia ra e te “tamaine a te ariki”?

[Tutu i te kapi 10, 11]

Kua kapikiia a Ierusalema e ko “te ngai i tu ke i te manea.” Kua kite ainei koe no teaa ra?