Kite Mai i te Tu Mareka ua na te Akonoanga i te Au Kaveinga Pipiria

KA KORE ei kua kite ana koe i tetai kiore ngiao te takoto amingi ua ra e te ngunguru ra​—e tutu no te tu mareka ua tei kitea uaia atura. Mei teaa tikai te rekareka kia takoto amingi ua mei iaia rai e kia rekareka i taua rai tu mareka ua! Inara, no te manganui, e aka angaanga i te kite mai i te tu mareka ua, e e tuatau poto ua te reira. No teaa ra te reira?

No to tatou tu apa ua e putuputu ana tatou i te rave i te tarevake, e ka umuumuia tatou kia akakoromaki i te au tarevake o tetai ke. Pera katoa, te noo nei tatou i roto i te tuatau e kapiki ana te Pipiria “te au ra openga ra,” tei akatutuia e te “au tuatau kikino tei ngata roa no te akono atu.” (2 Timoteo 3:1-5, NW) Noatu me te akaperepere ra tatou i tetai au akamaaraanga rekareka tikai no te tu mareka ua i te tuatau tamariki anga, te maataanga ia tatou i teianei te kite ra i te taomianga ngata tikai o teia “au tuatau kikino.” Ka rauka ainei i te kite mai i te tu mareka ua i to tatou tuatau nei?

E akara ana e te tuatua ra te au Tuatua Tapu e ko teia au tuatau kikino ra, kare e ka autu koreia, mari ra ka ngata roa i te akono atu. Ka rauka ia tatou i te akono i te reira na te akonoanga i te au kaveinga Pipiria. Penei kare e rauka ua rai ia tatou i te akatikatika i to tatou au manamanata, inara ka kite mai tatou i tetai tuanga no te tu mareka ua. E akara matatio ana tatou i taua au kaveinga e toru.

Tamou i Tetai Akaraanga Tika Tikai

Kia kite mai i te tu mareka ua, ka umuumuia tatou kia akono i tetai akaraanga tika tikai o to tatou uaorai au kotinga e taua ra o tetai ke. I roto i tana reta ki to Roma, te tou maira te apotetoro ko Paulo e: “Kua rave katoatoa oki i te ara, e kua ngere i te akameitaki a te Atua.” (Roma 3:23) Te au tu e manganui o te kaka o Iehova kua pati ravao i to tatou kite. Ko tetai akaraanga ko te tikaanga ngoie ua tei akakiteia mai ia Genese 1:31: “Akara akera te Atua i te au mea katoa tana i anga, e i na, te meitaki roa ra.” Me akamaara ua ana a Iehova i tana i rave i topa akanei, ka rauka ua iaia i te karanga e “te meitaki roa ra.” Kare e rauka i tetai tangata i te karanga mei tera katoa rai. Te arikianga i to tatou au kotinga ko te mataara mua ia i te rauka anga i te tu mareka ua. Inara, e maata atu te ka inangaroia. Kia inangaro tatou kia marama e kia ariki i to Iehova akaraanga i te au apinga aere.

Te tuatua Ereni tei uriia e “ara” kua aere mai mei tetai tumuanga te aiteanga “kia aere ke mei te akairo.” (Roma 3:9) Kia akatutu: E akamanako ana i tetai tangata te inangaro ua ra kia peke i te re na te ana anga i tetai takete ma tetai kakao. E toru ana kakao ka taangaanga aia. Kua ana aia i te mea mua e kua aere ke e tai mita. Kua akatano meitaki atu aia i te rua o te kakao inara kua aere ke rai e 30 teni mita. Ma te akamanako katoa kua tuku aia i te kakao openga kia taa e kua aere ke katoa e 2 ua rai teni mita. Te vaitata tikai ra oki, inara kua tareia e kare i puta ana.

Mei taua tangata ana taitaia katoa rai tatou katoatoa. Tetai taime i te akaraanga e mamao tikai  tatou i te “aere ke mei te akairo.” I tetai atu taime kua vaitata ua tatou inara kua aere ke rai mei te akairo. Kua riri tatou no te mea kua tauta pakari tikai tatou, inara kare rai e meitaki roa ana. I teianei, e akamanako akaou ana tatou i te tangata ana.

Kua uri marie ua atu aia, kare i mataora ana no te mea kua inangaro tikai aia i tera re. Ma te poitirere, kua kapiki atu te tangata maata iaia kia oki mai e kua oronga atu i te re kiaia, te na ko anga: “Te inangaro nei au i te oronga atu i teia kia koe no te mea e reka toku ia koe, e kua kite au ia koe i te tauta pakari anga.” Kua rekareka maata te tangata ana!

Kua rekareka maata! Pouroa te au tangata tei rauka i te “mea oronga uaia” mei te Atua no te ora mutu kore ma te apa kore ka manako akapenei rai. (Roma 6:23) I muri akera, pouroa te au apinga ka rave ratou e mea meitaki​—kare ratou e aere ke akaou mei te akairo. Ka mareka tikai ua ratou. I taua taime rai, me akono tatou i teia manako, ka manako meitaki tatou ia tatou uaorai e te aronga takapini ia tatou.

Kiteanga e e Tuatau to te Au Apinga Katoatoa

E tikaanga e e tuatau to te au apinga katoatoa. Inara, kua kite ana ainei koe, i te tu ngata kia vai mareka ua atu rai me te tiaki ra koe i tetai apinga e i te akaraanga kua roa roa i te tiakianga i taau i manako ei me kore i te akaraanga kua roa roa tetai turanga mareka koreia i te aere ua anga i taau i manako mai? Noatu rai, kua rauka i tetai i te tamou i te tu mareka ua i roto i taua au turanga. E akamanako ana i te akaraanga o Iesu.

I mua ake i te aere anga mai ki te enua, e akaraanga meitaki a Iesu no te akarongo iaia i te rangi ra. Inara, i runga nei i te enua i “kite aia i te akamoraro.” Akapeea? “I tona au mate.” I mua atu ana, kua kite aere aia i te mamae anga inara kare aia uaorai i kite tikai ana i te reira. Iaia i te enua nei, mei tona papetitoanga tikai i roto i te Ioridana ki tona mateanga i Golagota, e manganui te au turanga ngata tei tupu kiaia. Kare tatou i kite i te au apinga pouroa i riro mai ei a Iesu ei “apa kore” no runga i teia turanga, inara kua kite tatou e no te rave anga i teia kua pou rai tetai tuatau.​—Ebera 5:8, 9.

Kua autu a Iesu no te mea kua akamanako oonu aia i runga i “te meitaki i tukuia mai ki mua i tona aroaro,” te tutaki no tona tu akarongo mou. (Ebera 12:2) Noatu rai, i tetai au taime ‘kua tuku oki aia i te pure, i te pati anga atu . . . ma te aue maata e te roi-mata.’ (Ebera 5:7) Penei ka kite mai tatou ia tatou uaorai i te pureanga mei taua tu rai. Akapeea a Iehova i te manakoanga i teia? Te akaari maira taua irava rai e kua “akarongoia” a Iesu e Iehova. Ka rave akapera rai te Atua kia tatou. No teaa ra?

No te mea kua kite oki a Iehova i to tatou au kotinga, ka tauturu aia ia tatou. E au kotinga to te katoatoa i tana ka rauka i te akakoromaki. Te au tangata i Benin, Aperika, e karanga ana e: “Aere rai ka maremo katoaia rai te au rana me maata roa te vai.” E kite meitaki atu a Iehova e ia tatou uaorai me te vaitata ua ra tatou ki to tatou au kotinga. Te oronga aroa maira aia i te “aroa ua e . . . te meitaki ei tauturu mai ia tatou i te tuatau e tau ei ra.” (Ebera 4:16) Kua rave aia i teia no Iesu, e kua rave katoa aia i te reira no tetai atu aronga e manganui. Akamanako ana e akapeea a Monika i te kite mai anga i teia.

E tangata mataora ua a Monika i tona tupuanga mai e te oraora e e iti ua ona manamanata. I te 1968, te ou ra rai aia i tona 20 mataiti, kua  poitirere aia i te kite anga mai e kua tuia aia e te maki multiple sclerosis, e maki matauia e taopenga mai ka akangoruia tetai tuanga o te kopapa. Kua taui takiri teia i tona oraanga e kua umuumuia te au tauianga maata i roto i tana angaanga orometua tamou. Kua kite oki a Monika i teia maki e ka roa te tuatau. E 16 mataiti i muri mai, kua karanga aia: “Kare rai toku maki e rauka i te rapakauia e penei ka akapera ua atu rai e akaou ua atu ta te Atua akatereanga ou o te au mea nei i te au apinga katoatoa.” Kua akatika rai aia e kare oki i mama ua ana: “Noatu e karanga mai ana toku au taeake e te vai ra rai toku tu katakata ua e te mataora ra rai au, . . . kua kite tetai au taeake piri vaitata kiaku e i tetai au taime ka tae ua te roimata no te tuatau roa.”

Inara, kua karanga aia: “Kua kite mai au i te akakoromaki e kia rekareka i te au tupuanga meitaki ki toku oraanga noatu me e meangiti ua te reira. Kua akamaroiroiia toku pirianga uaorai kia Iehova i toku kiteanga i te tu puapinga kore o te tangata i tona tamakianga i te maki. Ko Iehova anake te ka rauka i te apai mai i te rapakau anga katoa. Ma ta Iehova tauturu, kua tamou marie a Monika i te tu mareka ua e kua rauka i teianei i te akamanako no runga i te 40 mataiti e tere atu i roto i te angaanga tamou.”

E tika, te au turanga mei to Monika rai kare e mama ua ana. Inara e mea papu, ka mareka roa atu koe me kite mai koe e i tetai au apinga aere penei ka maata atu te taime ka pou i taau i manako atu. Mei ia Monika rai, ka akapapuia koe i ta Iehova ‘tauturu i te tuatau e tau ei ra.’

Auraka e Akaaite Atu​—Akanoo i te Au Akakoroanga Tau

E tangata tuke tikai koe. Kare atu e tangata mei ia koe tikai. Te akakite ua maira tetai tuatua i roto i te reo Gun o Aperika i teia tikaanga: “Kare e aiteite pouroa ana te roaroa o te au mangamanga rima.” E mea tarevake i te akaaite i tetai mangamanga rima ki tetai. Kare roa koe e inangaro ia Iehova i te akaaite atu ia koe ki tetai tangata, e kare roa aia e rave i te reira. Inara, i rotopu i te au tangata te akakeuanga kia akaaite atu kua kite ateaia e ka rauka i te akameangiti i te tu mareka ua o te au tangata. Akara ana e akapeea a Iesu i te akatutu ririnui maira i teia, ia tatou e tatau ra ia Mataio 20:1-16.

Kua tuatua a Iesu no tetai “tangata kainga ra” te inangaro ra i te aronga rave angaanga no tana kainga vine. Kua kite mai aia i tetai aronga kare e angaanga ana e kua rave mai ia ratou i te “popongi metua,” penei i te ora 6 i te popongi. Kua akatika ratou ki te moni matauia i te tutaki i te ra i taua tuatau ra, e tai tenari e tai ra angaanga e 12 ora. Ka kore ei kua mataora te au tangata i te kite mai anga i tetai angaanga e te tutaki katoaia ra ki tei matauia. I muri mai, kua kite atu te tangata kainga i tetai au pupu tangata akaou mai kare e angaanga ana e kua tuku atu ia ratou kia angaanga i te ora 9 i te popongi, 12:00 i te avatea, ora 3 i te aiai, e aiai roa atu i te ora 5. Kare e tangata i roto i teia au pupu e angaanga e tai ra katoa. No te tutaki, kua taputou te tangata kainga kia ratou i “te tika ra,” e kua akatika rai te aronga angaanga.

I te openga o te ra, kua akaue atu te tangata kainga i tana tangata akaaere kia tutaki i te au moni. Kua karanga aia kia kapiki i te aronga angaanga e kia tutaki na mua i te aronga tei rave openga ia mai. Kua angaanga teia aronga e tai ua rai ora, inara ma te poitirere kua tutakiia ratou e tai ra katoa. Ka rauka ua ia tatou i te akamanako i te pukapukaanga oraora tei aru mai. Te aronga tei angaanga i te 12 ora katoa kua taopenga oki e me akaaiteia ka maata atu ta ratou. Inara, kua aiteite katoa ta ratou moni i te tutakiia.

To ratou manako? “E tei te rave anga ra, kua urutoe iora ratou i te tangata kainga ra, Na ko maira, Okotai ua a teianei aronga openga ora i te angaanga anga, e kua akaarite koe ia ratou kia matou nei, tei akakoromaki i te roiroi e te veravera o te rā.”

Inara, te tangata kainga, kua tuke tana akaraanga i te au apinga. Kua tou atu aia e kua tutakiia ratou i ta ratou i akatika, e kare i raro mai. No tetai atura, kua manako mai aia i te oronga kia ratou i te tutaki e tai ra katoa, ka kore ei kua maata atu i ta ratou i tapapa ei. Ko te tikaanga kare tetai i tutakiia ana i raro mai i tana i akatika atu; ko te tika, e manganui, kua maata atu tei rauka i ta ratou i tapapa atu ei. No reira i te taopenga anga, kua ui atu te tangata kainga: “Auraka au e akono i toku inangaro i taku uaorai nei?”

E akamanako ana i teianei me kua tutaki te tangata akaaere i te pupu mua tikai e kua aere viviki atu teia pupu. Kua mareka ua ai ratou. Kua tupu  te tu mareka kore ua i to ratou kite atu anga e kua aiteite ua te moni tutakiia ki tera aronga e meangiti ua te angaanga. Kua akariri teia ia ratou, aere rava atu e kua urutoe i te tangata kainga, te tangata ta ratou i akameitaki i te akamataanga no te mea kua rave mai aia ia ratou.

Te akatutu meitaki maira teia eaa te ka tupu me akono tatou i te au akaaiteanga. Me akamanako oonu koe i runga i toou uaorai pirianga kia Iehova e kua ariki rekareka i te akameitaki anga mai aia ia koe, ka mareka ua koe. Auraka e akaaite i toou turanga ki taua ra o tetai ke. Me i te akaraanga e kua rave a Iehova i tetai apinga akaou mai no tetai atu, kia mataora koe ia ratou e kia rekareka kapiti atu kia ratou.

Inara, e apinga rai ta Iehova e inangaro ra mei ia koe. Eaa te reira? Te karanga ra a Galatia 6:4 e: “Ka timata te tangata ravarai i tana uaorai angaanga, ei reira aia e rekarekaʼi iaia uaorai.” I tetai tuatuaanga, e akanoo i te au akakoroanga tau noou uaorai. E parani eaa tikai te ka rauka ia koe i te rave, e oti e aru i te reira. Me kua tau ua te akakoroanga e kua taeria ia koe te reira, “ei reira [koe] e rekarekaʼi.” Ka kite mai koe i te tu mareka ua.

Ka Aere Mai te Au Akameitakianga

Te nga kaveinga e toru ta tatou i akamanako mai te akaari maira e te akonoanga i te au kaveinga Pipiria ka taki atu tikai ki te kite mai anga i te tu mareka ua noatu i roto i teia au tuatau openga e noatu te tu apa. I taau tatau anga i te Pipiria i te au ra ravarai, kore koe e kimi atu i taua au kaveinga, penei te akataka tika uaia maira me kore kua uunaia i roto i te au tataanga e te au akatutuanga?

Me te kite maira koe e te ngaro ke atura toou tu mareka ua, e tauta i te akataka i te tumu tikai. E oti e kimi i te au kaveinga ka rauka ia koe i te akono i te akatano atu i te turanga. Ei akatauanga, penei ka akarakara koe i te kapi 22-23 o te puka “Te Au Tuatua Tapu Katoa”​—Tika Tikai e te Meitaki. (2 Paraleipomeno​–Isaia) * I reira, te uriuriia ra te puka a Maseli, e ka kite mai koe i tetai tuanga maata o te au kaveinga e te ako papaia i raro i te au tumu tuatua e 12. The Watch Tower Publications Index * e te Watchtower Library i runga i te CD-ROM * e au tumuanga meitaki tikai te reira no te akakitekiteanga. Na te taangaanga putuputu anga i te reira, ka tu katau mai koe i te kimi anga i te au kaveinga tau.

Te aere maira te tuatau e oronga ei a Iehova ki te aronga tau ua i te ora mutu kore i roto i te tu apa kore i runga i tetai enua parataito. Ka ki meitaki tikai to ratou au oraanga ma te tu mareka ua.

[Au Tataanga Rikiriki i Raro]

[Tataanga i te kapi 12]

“Kua rave katoatoa oki i te ara, e kua ngere i te akameitaki a te Atua.”​—Roma 3:23

[Tataanga i te kapi 13]

“Kite [a Iesu] i te akamoraro i tona au mate.”​—Ebera 5:8, 9

[Tataanga i te kapi 15]

“E i reira e rauka ai iaia te tumu no te rekareka nona anake rai, e kare no te akaaite anga ki te tangata ke.”​—Galatia 6:4