Tua Oraanga

Tavini Rekarekaanga Noatu te Au Tu Apikepike

AKAKITEIA E VARNAVAS SPETSIOTIS

I te 1990, e 68 mataiti, kua ngoru takiriia au. I na, no etai 15 mataiti i teianei, kua rekareka au i te tavinianga ei orometua tamou i runga i te airani o Kupero. Eaa tei oronga mai i te maroiroi kiaku kia noo tamou ua atu rai i roto i ta Iehova tavinianga noatu toku au tu apikepike?

KUA anauia au i roto i tetai pamiri e iva tamariki—​e a tamaroa e rima tamaine​—ia Okotopa 11, 1922. Kua noo matou i roto i te oire i Xylophagou, i Kupero. Noatu e e aronga moni rai toku nga metua, kua o mai te utuutuanga i tetai pamiri maatamaata i te angaanga pakari i roto i te one kai.

Toku papa, ko Antonis, e tangata apiipii e te uiui. I muri poto ua mai i toku anau mai anga, kua kite mai a Papa, iaia e atoro ra i tetai puapii apii o te oire, i tetai aenga pepa tei tapaia Peoples Pulpit, neneiia e te Aronga Apiipii Pipiria (tei kiteaia te Au Kite o Iehova i taua taime ra). Kua akamata aia i te tatau i te reira, e kare i roaia ana e inangaro tikai tona i roto i ta te reira e tuatua ra. Tei tupu, kua riro mai a Papa e tetai taeake ona, ko Andreas Christou, ko tetai o te aronga mua i runga i te airani tei akapiri atu ia ratou uaorai ma te Au Kite o Iehova.

Tupuanga Noatu te Patoianga

Aere rai, kua maata ta raua au puka i rauka mai tei akatumuia ki runga i te Pipiria mei te Au Kite o Iehova. Kare i roa ana, kua akakeuia a Papa raua ko Andreas kia akakite atu ki to raua au taeake i roto i te oire i te au tuatua mou Pipiria ta raua i kite mai. Kua akakoko ta raua angaanga tutu anga i te patoi pakari mei te pupu  orometua Otototi Ereni e tetai atura tei manako mai e e akakeuanga kino tikai te Au Kite o Iehova.

E manganui te au tangata i reira tei akangateitei i teia nga puapii Pipiria e rua. Kua kite meitakiia toku papa no tona takinga meitaki e te aroa ua. E maata te taime e oronga ana aia i te rima tauturu ki te au pamiri putaua. Tetai taime i te roaanga po e aere ana aia ki vao e e akaruke ana i te titona me kore i te varaoa i te ngutupa o te au pamiri te ngere ra. No taua tu Kerititiano karapii kore ra kua akariro te karere a teia nga orometua e rua kia rekareka maata roa ia atu.​—Mataio 5:16.

Tei tupu i reira mei etai tatini tangata tei ariu mai ki te karere a te Pipiria. E te tupu atura to ratou arikianga no te tuatua mou, kua kite mai ratou i te inangaro kia uipa i roto i te au kainga tukeke ei pupu tangata i te apii i te Pipiria. Mei te 1934 aere, kua tae mai a Nikos Matheakis, e orometua tamou mei Ereni, ki Kupero e kua aravei atu i te pupu i Xylophagou. Ma te akakoromakianga e te tautaanga, kua tauturu te Taeake Matheakis i te akapapa i te pupu e kua tauturu atu ia ratou kia rauka i tetai maramaanga meitaki atu no te au Tuatua Tapu. Na teia pupu i akatupu i te tumuanga o te putuputuanga mua no te Au Kite o Iehova i Kupero.

E te tere atura te angaanga Kerititiano ki mua e kua maata mai te au tangata tei ariki i te tuatua mou Pipiria, kua kite mai te au taeake i te inangaro no tetai ngai tinamou no ta ratou au uipaanga. Kua oronga mai toku tuakana, ko George, e tana vaine, ko Eleni, i tetai ngai ta raua e taangaanga ra ei ngai vairanga anga apinga. Teia ngai, i te pae ua mai i to raua kainga, kua akaouia e kua tauiia ei ngai tau meitaki no te au uipaanga. I tu ei i reira te au taeake i to ratou Are Uipaanga Patireia mua i runga i te airani. Kua rekareka tikai ratou! E kua riro teia ei akakeuanga no tetai tupuanga akaou mai!

Akariroanga i te Tuatua Mou e Naku Uaorai

I te 1938, e 16 mataiti, kua manako mai au kia riro mai ei kamuta. E no reira, kua tono atu a Papa iaku ki te oire maata o Kupero, ko Nicosia. Ma te akara mamao anga, kua akanoo aia kia noo au ki ko ia Nikos Matheakis. Te maaraaraia nei rai teia taeake tiratiratu e te manganui  i runga i te airani no tona tu maroiroi e te oaoa. Tona maroiroi kitea uaia atu e te mataku kore tiratiratu e au tu umuumuia te reira ki tetai ua atu Kerititiano i Kupero i taua au tuatau akamataanga.

Kua tauturu maata tikai te Taeake Matheakis iaku kia rauka i tetai tumuanga ketaketa i roto i te kite Pipiria e kia tere meitaki ua ki mua i te pae vaerua. Iaku e noo ra i ko iaia, kua aere au ki te au uipaanga pouroa tei raveia i tona kainga. Ka tai nei taime, kua kite mai au e te tupu ra toku inangaro no Iehova. Kua akatupu au i tetai akakoroanga kia akatupu i tetai pirianga puapinga tikai ki te Atua. I roto i nga mea marama ua, kua pati atu au i te Taeake Matheakis me ka rauka iaku i te piri atu kiaia ki runga i te angaanga koro. Kua tupu teia i te 1939.

I muri ake i etai tuatau, kua oki atu au ki te kainga i te atoro i toku pamiri. Te nooanga ki toku papa no tetai manga taime ua kua akaoonu roa atuia toku irinaki e kua kite mai au i te tuatua mou e te akakoroanga no te oraanga. Ia Tepetema 1939, kua akamata te Tamaki II o te Ao. E maata te au tane mapu i toku uki kua oronga ua i te aere ki te tamaki, inara te aruanga i te aratakianga a te Pipiria, kua iki mai au kia vai neutara ua. (Isaia 2:4; Ioane 15:19) I taua mataiti tikai, kua akatapu au iaku uaorai kia Iehova e kua papetitoia i te 1940. Ka tai nei taime, kua kite mai au e kare au e mataku akaou ana i te tangata!

I te 1948, kua akaipoipo au ia Efprepia. Kua akameitakiia maua e a tamariki. Kare i roa ana kua kite mai maua e ka inangaroia maua i te angaanga pakari i te utuutuanga ia ratou “i te ako anga e te akatikatikaanga manako a Iehova.” (Ephesia 6:4, NW) Kua akamouia ta maua au pure e te au tautaanga i te tatanuanga i roto i ta maua tamariki i te inangaro oonu no Iehova e te akangateitei no tana au ture e te au kaveinga.

Tuku Mai te Au Manamanata i te Pae Kopapa i Tetai Akaaoanga

I te 1964, e 42 mataiti, kua akamata au i te kite mai e kare aku apinga e kite ana i te tua katau o toku rima e toku vaevae. Aere ua rai, kua neke marie atu teia ki toku tua kaui. Kua kiteaia mai e kua tuia au i te maki akamate, e maki kare e rapakau anga e taopenga mai ka taki atu ki te akangoru takiri. Kua taitaia tikai au no runga i te nuti. Viviki ua teia au mea i te tupu mai e te poitirere rai! Kua kiia e te au manako riri e te rikarika, kua manako mai au: ‘Eaa ra teia i tupu ei kiaku? Eaa taku i rave i tupu mai ei i teia?’ Inara, aere rai, kua rauka iaku i te autu  i te poitirere i te akamataanga no tei kiteaia mai. I muri mai kua rokoia au e te au manako apiapi e te papu kore. E maata te au uianga te takapini ua ra i roto i toku manako. Ka akangoru takiriia ainei au e ka irinaki pu tikai ainei ki runga i tetai ke? Akapeea au i te akakoromaki anga? Ka rauka ainei iaku i te akono i toku pamiri​—taku vaine e ta maua tamariki e a? Kua vinivini tikaiia au i taua au manakoanga.

I teia tuatau puapinga tikai i roto i toku oraanga, tei maata rava atu i to mua ana, kua kite mai au i te inangaro kia uri kia Iehova na roto i te pure e kia akakite pouroa atu kiaia i toku au manamanata e te au apiapi ma te ngakau tae tikai. Kua pure au i te po e te ao ma te au roimata i toku mata. Kare i roaia ana kua kite mai au i te pumaana. Kua riro te au tuatua pumaana ia Philipi 4:6, 7 ei tika anga tikai ki toku turanga: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”

Akakoromaki i te Maki Akangoru

Kua kino ua atu toku turanga. Kua kite mai au e ka inangaroia au kia viviki i te taui ki toku turanga ou. I te mea e kare e rauka akaou iaku i te angaanga ei kamuta, kua iki mai au i te kimi i tetai angaanga kare e pakari roa ana tei tau ki toku turanga i te pae kopapa e kua rauka rai iaku i te akono i toku pamiri. I te akamataanga, te okooko aiti kirimi ra au mei tetai toroka meangitika ua. Mei te ono mataiti toku rave anga i teia. E oti kua taui atu au ki tetai au angaanga mama ua iaku i te rave.

Mei te 1990 mai kua kinokino toku oraanga i te pae kopapa e aere rai kare takiri e rauka akaou iaku i te rave i tetai angaanga. I teianei, kua irinaki takiri au ki runga i tetai ke kia tauturu iaku i te rave i te au angaanga ua nei ka rauka ua i tetai tangata maroiroi i te rave. Ka inangaro tauturu au no te aere anga i te moe, te pai iaku, e kia akamanea. Kia aere ki te au uipaanga Kerititiano, ka oparaia au i roto i tetai pereoo ki te motoka e oti ka amoia ki roto i te motoka. Me tae ana au ki te Are Uipaanga Patireia, ka takinaia au mei roto mai i te motoka ki roto i te pereoo. I te tuatau o te uipaanga, e apinga tamaana uira toku i te pae mai iaku kia maana ua toku vaevae.

Inara, noatu te maki akangoru, e tae putuputu ana au ki te au uipaanga pouroa. Kua marama oki au e ko teia te ngai e apii mai ana a Iehova ia tatou, e iaku i rotopu i toku au taeake e te au tuaine e akapuanga tikai e e tumuanga no te turuturu e te akamaroiroi. (Ebera 10:24, 25) Te au atoro putuputu a te au taeake irinaki pakari kua riro ei tauturu tamou kiaku. Kua manako tikai au mei ia Davida rai: “Te ki nei taku kapu.”​—Salamo 23:5.

E tauturu meitaki tikai taku vaine akaperepere i roto i teia au mataiti ravarai. Kua tauturu maata katoa mai rai taku tamariki. No te au mataiti e manganui i teianei, kua tauturu mai ratou iaku ma te au umuumuanga no te au ra ravarai. Ta ratou e rave ra kare i te mea ngoie ua, e i te aereanga o te au mataiti, kua ngata roa mai i te akono iaku. E akaraanga meitaki tikai ratou i te tatanuanga i te akakoromaki e i te oronga anga ia ratou uaorai, e te pure nei au e ka akameitaki ua atu rai a Iehova ia ratou.

Ko te pure tetai tauturu meitaki akaou mai mei ia Iehova kia akaketaketa i tona au tavini. (Salamo 65:2) Ei pauanga ki taku au patianga ngakau tae, kua oronga mai a Iehova i te maroiroi kiaku kia akakoromaki ua rai i roto i te akarongo i roto i te au mataiti i aereia mai. Koia tikai me paruparu ana au, te oronga maira te pure i te akapuanga e te tauturu maira iaku kia tamou marie i toku rekareka. Te tuatua putuputu anga kia Iehova e akaoraora ana iaku e e akaou ana i toku akakoroanga kia aere ua atu. Papu tikai iaku e te akarongo maira a Iehova i te au pure a tona au tavini e e oronga ana kia ratou i te manako au te apinga ta ratou e inangaro ra.​—Salamo 51:17; 1 Petero 5:7.

Te apinga maata rava atu, e akamaroiroi uaia ana au i te au taime ravarai e maara ana iaku e i te openga iora ka akaora te Atua i te katoatoa te ka akameitakiia ma te oraanga i roto i te  Parataito i raro i te tutara Patireia o tana Tamaiti, ko Iesu Karaiti. E taetae ua ana toku mata i te au roimata rekareka iaku e tapapa atura i taua manakonakoanga umere rava.​—Salamo 37:11, 29; Luka 23:43; Apokalupo 21:3, 4.

Tavinianga ei Orometua Tamou

Mei te 1991 aere, kua kite mai au i muri ake i te akara matatioanga i toku turanga e te mataara meitaki roa atu kia kore au e tangi roa iaku koia oki te angaanga maroiroi ua anga i te oronga anga ki tetai atu i te tuatua meitaki akaperepereia no te Patireia. I taua mataiti rai, kua akamata au i te tavini ei orometua tamou.

I te mea e e pirikoki au, te maataanga i taku tutu anga e raveia ana na roto i te tata reta. Inara, kiaku, kare te tataanga ei angaanga ngoie ua; ka umuumuia te tautaanga pakari. E ngata iaku i te mou meitaki i te peni i roto i toku rima, kua akaparuparuia te reira e te maki akamate. Inara, na roto i te akakoromaki e te pure, kua tutu aere au i teianei e 15 mataiti e tere atu na te tataanga reta. E taangaanga katoa ana au i te terepaoni i te tutu anga ki te au tangata. Kare roa e atianga e topa ana iaku i te tuatua anga no runga i toku manakonakoanga no te ao ou e te enua Parataito ki toku au kopu tangata, au taeake, e te au tangata tupu tei atoro mai ana iaku i toku kainga.

Tei tupu mai, kua rekareka au i te au tupuanga akamaroiroi e manganui. Mataora tikai au i te kite anga i tetai utaro aku, i apii ana au i te Pipiria mei etai 12 mataiti i topa akenei, i te tereanga ki mua i te pae vaerua e i te akaari anga i te ariki rekareka no te tuatua mou Pipiria. Akakeuia e tona akava ngakau tereniia e te Pipiria, kua vai tiratiratu ua aia e kua tamou marie i runga i te maroanga no te tu neutara Kerititiano.

E rekareka tikai toku me ui mai ana te au tangata taku e tata atu ana kiaku no tetai akakiteanga akaou atu no runga i te Pipiria. Tetai taime, e pati akaou mai ana tetai pae i tetai au puka Pipiria. Ei akatauanga, kua ringi mai tetai vaine e kua akameitaki mai iaku no taku reta akamaroiroi i tuku atu ei ki tana tane. Kua kite mai aia i te au manako i roto i te reta ei mea meitaki tikai. Kua taki atu teia ki te au uriurianga Pipiria e manganui kiaia e ki tana tane i toku kainga nei.

E Manakonakoanga Manea Tiaki

I roto i te au mataiti, kua kite mai au e kua maata mai te numero o te aronga tutu Patireia i roto i teia tuanga o te ao nei. Te Are Uipaanga Patireia meangiti ua i te pae mai i te are o toku tuakana ko George, e maata rai te taime kua akaouia e kua akatoroia. E ngai manea tikai te reira no te akamori anga, e e rua nga putuputuanga no te Au Kite o Iehova e taangaanga ra i te reira.

Kua mate a papa i te 1943, e 52 ona mataiti. Inara e tuanga pae vaerua tana i akaruke mai! E varu ana tamariki tei ariki i te tuatua mou e te tavini nei rai ia Iehova. I roto i te oire i Xylophagou, te ngai i anauia a Papa, e i roto i te au oire i te pae ua mai, e toru putuputuanga i teianei, e 230 papuritia Patireia i te katoatoa!

Kua riro taua au tupuanga meitaki tikai ei tumu anga rekareka maata kiaku. I teianei, e 83 oku mataiti, te tuatua nei au ma te irinaki papu i te au tuatua a te tata taramo: “Kua ngere te au liona ou, e kua mate i te pongi; kareka tei kimi ia Iehova ra, kare rava e ngere i te meitaki.” (Salamo 34:10) Te tapapa rekareka ua nei au i te tuatau e tupu ei te totou tei rekotiia ia Isaia 35:6: “Ei reira te pirikoki e rererere aere ei mei te aili.” I mua ake i te reira tuatau, te akakoro nei au i te tavini tamou ua atu rai ia Iehova ma te rekareka noatu toku au apikepike.

[Mapu i te kapi 17]

(No runga i teia, akara i te puka)

TUREKI

SURIA

LEBANONA

KUPERO

Nicosia

Xylophagou

Tai Metiterenia

[Tutu i te kapi 17]

Te Are Uipaanga Patireia mua i Xylophagou, te taangaangaia nei rai i teia tuatau

[Au Tutu i te kapi 18]

Maua ko Efprepia i te 1946 e i teia tuatau

[Tutu i te kapi 20]

Kua kite mai au i te rekareka i te tutuanga na runga i te terepaoni e na te tata reta