Te Akakite Maira a Iehova ‘i te Openga mei Muatangana Mairai’

‘Ko [Tei] akakite maira i te openga mei muatangana mairai, e mei te au tuatau taito mairai i te au mea e kare i tupu ra.’​—ISAIA 46:10.

1, 2. Eaa te mea umere tikai no runga i te au tupuanga te piri atura ki te inga anga o Babulonia, e eaa ta teia tika anga e akakite maira no runga ia Iehova?

I TE poiri anga tikai, kua aere marie atura te au vaeau enemi na raro ake i te Kauvai Eupharati ki te ngai ta ratou e akakoro ra, ki te oire maata o Babulonia. Ia ratou e aere atura ki te ngutupa o te oire, kite atura ratou i tetai mea poitirere tikai. Te maeu ua ra te nga pa mamaata e rua i roto i te patu o Babulonia! Mei roto mai i te kauvai, kake atu ratou; ki roto i te oire, tomo atu ratou ki roto. Opu vivikiia te oire. Kua rave viviki a Kuro, to ratou arataki, i te akaaere i te enua tei autuia e kua tuku maira i tetai akauenga i muri mai i te tatara anga mai i te au tangata tuikaa ngati Iseraela. E tauatini ua atu te au tuikaa tei oki atu ki te enua i te akaou i te akamori anga a Iehova ki Ierusalema.​—2 Paraleipomeno 36:22, 23; Ezera 1:1-4.

² Kua akapapu meitakiia mai taua au tupuanga i teianei no te au mataiti 539-537 M.T.N. e te au tata tuatua enua. Te mea umere tikai kua kite takereia i etai 200 mataiti te au tupuanga. Kua akauru takere a Iehova i tana peroveta ko Isaia kia akataka mai i to Babulonia inga anga. (Isaia 44:24–​45:7) Kare te Atua i akakite ua mai i te au turanga te piri vaitata ra ki te inga anga o Babulonia kareka katoa ra te ingoa o te arataki te ka upokotu. * Te tuatua anga ki te ngati Iseraela, ei au kite nona ra i te reira taime, kua karanga a Iehova e: “E akamaara i tei muatangana ra au mea i tei taito ra; ko au oki te Atua, e kare atu; ko au te Atua, e kare atu e aite iaku nei: I te akakite anga i te openga mei te muatangana mairai, e mei te au tuatau taito mairai i te au mea e kare i tupu ra.” (Isaia 46:9, 10a) E Atua tikai a Iehova tei kite takere e eaa te ka tupu mai.

3. Eaa te au pauanga ki teea au uianga te ka akamanakoia i teianei?

³ Mei teaa te maata to te Atua kite no runga i te tuatau ki mua? Kua kite takere ainei a Iehova eaa ta tatou tataki tai ka rave? E tika,  kua akakoro takereia ainei to tatou tuatau ki mua? Ka akamanako ana tatou i te au pauanga a te Pipiria no teia au uianga e te au uianga te piri maira i roto i teia atikara e te atikara te aru maira.

Iehova​—E Atua no te Totou

4. Koai te Tumu o te au totou tei tataia i roto i te Pipiria?

⁴ Te rauka anga i te kite i te tuatau ki mua, kua akauru a Iehova i tana au tavini i te tuatau o te Pipiria kia tata i te au totou e manganui, te tuku ra ia ratou kia kite i mua ake e eaa ta Iehova i akakoro ana i te rave. “Tei muatangana iora au tuatua, i na, kua tupu ïa te reira,” i akakite ei a Iehova. “E te akakite nei au i te tuatua ou: kare i tupu, te akakite atea nei au ia kotou i te reira.” (Isaia 42:9) Mei teaa ra te akameitakianga ki te au tangata o te Atua e!

5. Eaa te apainga te ka tupu mai no te kite takere anga eaa ta Iehova ka rave?

⁵ Te akapapu maira te peroveta ko Amosa kia tatou e: “Kare a te Atu ra a Iehova mea i rave, mari ra kia akakite i tana tuatua ngaro ki tona ra au tavini ki te au peroveta.” Ko teia kite takere nei e apainga ta te reira i tuku mai. E akara i te akatutuanga ririnui ta Amosa e tuatua maira i muri akera: “Kua ngunguru te liona, koai te ka kore e mataku?” Mei ta tetai riona ngunguru ra e akatupu maira i tetai ariu anga viviki no ko mai i te tangata e te puaka i te au ngai i te pae mai, i akakite viviki mai ei te au peroveta mei ia Amosa rai ra i ta Iehova au tuatua. “Kua tuatua te Atu ra ko Iehova, koai te ka kore e totou?”​—Amosa 3:7, 8.

“E Manuia oki” ta Iehova “Tuatua”

6. Na roto i teea tu i autu ei ta Iehova “tuatua” te kapiti anga ki to Babulonia inga anga?

⁶ Na roto i tana peroveta ko Isaia, kua karanga a Iehova e: “Ko taku te tuatua te ka mou, e tei inangaroia e au ra, ko taku ïa e rave.” (Isaia 46:10e) Ta te Atua “tuatua,” koia oki, tona anoano me kore tona akakoroanga no runga ia Babulonia, te piri maira i te kapiki anga ia Kuro mei roto mai ia Peresia kia aere e autu ia Babulonia e te akatupu anga i tona inga anga. Kua akakite takere a Iehova i taua akakoroanga. Mei tei kite takereia, kua tupu tikai te reira i te mataiti 539 M.T.N.

7. Eaa ra tatou ka irinaki ei e ka manuia ua rai ta Iehova “tuatua”?

⁷ Vaitata e e a anere mataiti i mua ake i to Kuro autu anga ia Babulonia, kua aere atu te Ariki ko Iehosaphata o Iuda i te tamaki i te nga vaeau o Amona raua ko Moabi. Kua pure irinaki tikai aia: “E te Atua o to matou ai metua e, e Iehova e, kare ainei koe i te Atua i runga i te rangi? ko tei tutara ki rungao i te au basileia katoa o te ao nei? kare ainei tei to rima te mana e te ririnui, e kare rava e tangata e tika kia patoi atu ia koe?” (2 Paraleipomeno 20:6) Kua akakite katoa mai a Isaia i taua irinaki anga i te akakite anga aia e: “Kua akakoro oki a Iehova Sabaota ra, e naai oki e akakore? tona rai te rima i akatikaia, e naai e akaoki mai?” (Isaia 14:27) I muri mai, te rako tangataia mai anga aia i muri mai i te tuatau no te tu neneva ra, kua akakite taakaaka te Ariki ko Nebukanesa o Babulonia e: “Kare e tika i tetai kia tāpu atu i [to te Atua] rima, kare oki e karanga ua atu kiaia e, Te akapeea ua ana koe?” (Daniela 4:35) Ae, kua akapapu a Iehova ki tona au tangata e: “Koia katoa taku tuatua . . . kare e oki puapinga kore ua mai kiaku nei, e tupu ra tei akakoroia e au ra; e manuia oki te  mea i akaue atu ei au ra.” (Isaia 55:11) E irinaki anga pu tikai to tatou e ka tupu ua rai ta Iehova “tuatua.” E pikikaa kore ta te Atua akakoroanga.

Ta te Atua ‘Akakoroanga mei Muatangana Mai’

8. Eaa ra to te Atua ‘akakoroanga mei muatangana mai’?

⁸ I roto i tana reta ki te au Kerititiano i Ephesia, kua taiku atura te apotetoro ko Paulo ki te Atua ra e kua rauka mai tetai ‘akakoroanga mei muatangana mai.’ (Ephesia 3:11) Kare e e mea parani ua teia no te angaanga, mei te mea rai e kua parani mai te Atua i te tu o tana angaanga. Mari ra, te akakite maira te reira i to Iehova manako pakari i te akatupu anga i tana i akakoro i muatangana ra no te au tangata ravarai e no te enua. (Genese 1:28) E tauturu ei ia tatou kia ariki rekareka i te tu pikikaa kore o tana akakoroanga, e akamanako ana i te totou mua tei tataia i roto i te Pipiria.

9. Akapeea a Genese 3:15 i piri ei ki ta te Atua akakoroanga?

⁹ Te akaari maira te taputou i Genese 3:15 e i muri ua ake te ara anga a Adamu raua ko Eva, kua akakoro a Iehova e kia anau mai tana vaine akatutu ra i tetai uanga, me kore i tetai tamaiti. Kua kite takere katoa a Iehova te tupu anga no te ke anga i rotopu i tana vaine e ia Satani e i rotopu i ta raua uanga patoitoi. Noatu e ka akatika a Iehova i te Uanga o ta te Atua vaine ra kia akaparuparuia e te pooavae ra, i to te Atua tuatau tau, ka akaparuparu te Uanga i te mimiti o te ovi, me kore ia Satani te Tiaporo. I taua taime rai, kua tere ua atu rai ta Iehova akakoroanga na roto i te papaanga tupuna ikiia e tae ua atu te mama anga mai a Iesu ei Mesia taputouia.​—Luka 3:15, 23-38; Galatia 4:4.

Ta Iehova i Kite Takere

10. Kua akakoro takere ainei a Iehova mei muatangana ra e ka ara a Adamu raua ko Eva? E akamarama mai.

¹⁰ Te tuatua anga no runga i ta Iesu tuanga i roto i ta te Atua akakoroanga, kua tata te apotetoro ko Petero e: “Ko [Iesu] tei tou na takereia na, ou ua te tumu o teianei ao, i teianei ra au tuatau openga i akakiteia mai ei no kotou.” (1 Petero 1:20) Kua akakoro takere ainei a Iehova mei muatangana e ka ara a Adamu raua ko Eva e ka anoanoia te atinga oko tei orongaia mai na roto ia Iesu Karaiti ra? Kare. Kua uriia te tuatua ‘akatumu anga’ mei roto mai i tetai tuatua Ereni e te aite anga tikai te titiri anga ki raro o tetai ua. Kua tupu ana ainei tetai to anga no te anaunga tangata i mua ake ka ara ai a Adamu raua ko Eva? Kare. I muri ake i ta raua ravenga akarongo kore i akamata ai a Adamu raua ko Eva i te anau mai i te tamariki. (Genese 4:1) I muri ake te meameaau anga e na mua ake ka anau mai ei a Adamu raua ko Eva i te tamariki, kua akono takere a Iehova te mama anga mai o te “uanga.” Kua oronga mai to Iesu mate e te tuakaouanga i te akanoonooanga aroa no te oko, kareka ra ko te ara tei akatuangaia mai e  te au tautaanga katoa a Satani ra ka puapinga kore ua.​—Mataio 20:28; Ebera 2:14; 1 Ioane 3:8.

11. Eaa te tupu anga ta Iehova i akono takere i te akatupuanga i tona akakoroanga?

¹¹ Kua akono takere te Atua i tetai tupuanga ke i te akatupuanga i tana akakoroanga. Kua akakiteia mai teia i ta Paulo i tata atu ki to Ephesia, koia oki ka “tavaitai te [Atua] i te au mea katoatoa i te Mesia ra, to te rangi, e to te ao katoa nei.” E oti, te taikuanga ki ‘te au mea katoa i te rangi,’ koia oki, te aronga tei ikiia ei aronga tuangaia ma Karaiti, kua akamarama maira a Paulo: “E e tuanga oki ta matou i rauka iaia, ko matou ko tei akono takereia i te akakoro nana, na tei rave i te au mea katoa kia tau i te akakoro a tona anoano.” (Ephesia 1:10, 11) Ae, kua akono takere a Iehova e ka riro mai tetai pupu meangiti o te au tangata ra ei tuanga rua na te uanga a te vaine a te Atua e ka piri taokotai atu kia Karaiti i te oronga anga i te au akameitakianga no te oko. (Roma 8:28-30) Te taiku ra a Petero ki teia aronga nei e “e iti-tangata tapu.” (1 Petero 2:9) Tei te apotetoro ko Ioane te akameitakianga no te kiteanga i roto i tetai orama te numero o te aronga ka riro mai ei aronga tuangaia na Karaiti​—te 144,000. (Apokalupo 7:4-8; 14:1, 3) Te turuanga ia Karaiti ei Ariki, te tavini ra ratou “ei akameitaki anga i [to te Atua] kakā.”​—Ephesia 1:12-14.

12. Akapeea tatou i kite ei e kare te aronga tataki tai o te 144,000 i akakoro takereia?

¹² Te iki takere anga o te 144,000 kare te aite anga e kua akakoro takereia tetai aronga tataki tai kia tavini akarongo mou i te Atua na roto i teia mataara. E tikai, kua tataia te ako anga i roto i te au Tuatua Tapu Ereni Kerititiano kia arataki e kia akaketaketa i te aronga tei akatainuia kia akono tamou i te tiratiratu e kia akono tau ua ia ratou uaorai no te kapikiia anga mai ratou ki te rangi. (Philipi 2:12; 2 Tesalonia 1:5, 11; 2 Petero 1:10, 11) Kua kite takere a Iehova e ka tau te aronga tataki tai e 144,000 i te rave i tana akakoroanga. Koai ma tikai teia aronga nei ra tei runga ua te reira i te ikianga a taua aronga tataki tai tei patiia mai kia akono i to ratou oraanga, ka rave ratou tataki tai i te ikianga na ratou uaorai.​—Mataio 24:13.

Ta Iehova i Kite Takere

13, 14. Te tu e akono ra a Iehova i tona kite momua te rotai ra ki te aa, e no teaa ra?

¹³ I te mea e e Atua a Iehova no te totou e te akakoroanga, akapeea aia i te taangaanga anga i tona kite momua? Te mea mua, kua akapapuia mai kia tatou e e tuatua mou, e tuatua tika, e e aroa te au aerenga katoa a te Atua. Te tata anga ki te au Kerititiano Epera o te anere mataiti mua T.N., kua akapapu mai te apotetoro ko Paulo riro maira ta te Atua tia e tana taputou i “aua nga tuatua tu ke kore e rua ra, ko tei kore e tika i te Atua kia pikikaa ra.” (Ebera 6:17, 18) I roto i tana reta ki te pipi ko Tito, kua akakite katoa a Paulo i teia manako i te tata anga aia e ‘kare te Atua e pikikaa.’​—Tito 1:2.

¹⁴ Pera katoa, noatu e kare i kotingaia to Iehova mana, kare roa aia e angaanga tau kore ana. Kua akataka mai a Mose ia Iehova e e “Atua tuatua-mou, e te kino kore ra, e tuatua-tika tana, e te tiratiratu.” (Deuteronomi 32:4) Ko ta Iehova e rave ra te rotai ra ki tona tu peretana  umere. Te akaari maira tana au angaanga i te rotai apa kore o tona au tu maata o te aroa, te pakari, te tuatua tau, e te mana.

15, 16. Eaa ra te manakonako anga ta Iehova i tuku ki mua ia Adamu i roto i te kainga Edene?

¹⁵ E akamanako ana e i akapeea teia au tu nei i piri atu ei ki te au tupuanga i roto i te kainga i Edene. Ei Metua aroa, kua oronga a Iehova i te au mea pouroa ta te tangata e anoano ra. Kua oronga aia kia Adamu i te kite kia manako, kia manakonako no runga i tetai tumu manako, e kia rauka te manako taopenga. Kare mei te au manu i angaia tei akaaereia e te tu kite manu ra, kua rauka ia Adamu te kite i te rave i te au ikianga. Tei tupu mai no teia nei kua akara mai te Atua mei tona terono i te rangi ra e kua kite maira e “te au mea katoa tana i anga, e i na, te meitaki roa ra.”​—Genese 1:26-31; 2 Petero 2:12.

¹⁶ Te iki anga a Iehova i te tuku i tetai akauenga kia Adamu e auraka e kai i “te rakau e kite ei i te meitaki e te kino,” kua oronga tau ua mai Aia i te ikuikuanga kia rauka ia Adamu i te iki eaa te ka raveia. Kua akatika aia ia Adamu kia kai mei te “au rakau katoa o te kainga” kareka ra okotai ua rakau e kua akamatakite atura i te au tupuanga kino no te kai anga i te ua o te rakau tei tureia. (Genese 2:16, 17) Kua tuku aia ki mua ia Adamu i te au tupuanga no tana au angaanga. Eaa ra ta Adamu ka rave?

17. Eaa ra tatou ka karanga ai e te taangaanga anga a Iehova i te kite momua e mea iki meitakiia?

¹⁷ I te akara anga kare a Iehova i iki ana kia kite e eaa ta Adamu​—ta Eva​—ka rave, noatu e tei Iaia takere te karape i te kite i te au mea ravarai. No reira te vai ra tetai uianga e, kare me ka kite a Iehova i te tuatau ki mua, mari ra me ka iki aia i te rave i te reira. Pera katoa, ka rauka ia tatou i te akamarama e, ei Atua no te aroa, kare a Iehova i akakoro takere mai ana ma te kite kore e te kino kia tupu mai​—taua meameaau​—ma te au tupuanga mii katoa ra. (Mataio 7:11; 1 Ioane 4:8) No reira, ta Iehova taangaanga anga i te kite momua, e mea iki meitakiia.

18. Te taangaanga anga a Iehova i te mea iki meitakiia no te kite momua ra eaa ra e kare teia e akakite maira i tona ngere anga i te mana?

¹⁸ I to Iehova taangaanga anga i te mea iki meitakiia no tona kite momua ra e ko te aite anga ainei ia e te ngere ra aia i te mana? Kare. Kua akakite mai a Mose ia Iehova e ko “te Mato,” te tuatua anga e: “Tika rava tana angaanga.” Kare e tei iaia te apa no te au tupuanga ara a te tangata. No ko mai teia au tupu anga kino ta tatou e kite pouroa nei i teia tuatau no te angaanga tika kore o te akarongo kore. Kua akamarama meitaki mai te apotetoro ko Paulo e “no te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.”​—Deuteronomi 32:4, 5; Roma 5:12; Ieremia 10:23.

19. Eaa te au uianga te ka akamanakoia i roto i te atikara te aru maira?

¹⁹ I roto i ta tatou uriurianga, kua kite ana tatou e kare o Iehova tu tau kore. (Salamo 33:5) Kareka ra, te turu ra to Iehova au tu, te au tu tau, e te au turanga i tana akakoroanga. (Roma 8:28) Ei Atua no te totou, na Iehova e ‘akakite maira i te openga mei te muatangana mairai, e mei te au tuatau taito mairai i te au mea e kare i tupu ra.’ (Isaia 46:9, 10) Kua kite katoa ana tatou e tona akono anga i te kite momua e mea ikiia. Ka o i reira tatou kiea? Akapeea i papu ei ia tatou e te aru ra ta tatou au ikianga ki ta te Atua akakoroanga aroa? E eaa te au akameitakianga te ka orongaia mai kia tatou no te rave anga i teia? Na te atikara e aru maira e akamanako ana i teia au uianga.

[Tataanga Rikiriki i Raro]

Ka Rauka Ainei ia Koe te Akataka?

• Eaa te au akaraanga taito te akakite maira e kua ‘manuia ua rai oki’ ta te Atua “tuatua”?

• Eaa ta Iehova i akono takere te kapiti atura ki tona ‘akakoroanga mei muatangana mai’?

• Na roto i teea tu i taangaanga ai a Iehova i tona kite momua?

[Au Uianga Apii]

[Tutu i te kapi 22]

Kua irinaki a Iehosaphata ia Iehova

[Tutu i te kapi 23]

Na te Atua i akakite i to Iesu mate e te tuakaouanga

[Tutu i te kapi 24]

Kua akakoro takere ainei a Iehova e eaa ta Adamu raua ko Eva ka rave?