Ae, ka Kite Koe i te Mataora

MATAORA​—i tetai au taime e mea ngata me kiteaia mai te mataora tika tikai. Tano tikai teia no te mea e manganui te au tangata te kimi putuputu ra i te mataora, te akara aere ra ratou i te ngai tarevake. Naringa rai oki e e oa irinakiia e te tau to ratou te tou atura ia ratou ki runga i te mataara tika ra!

Ko te Pipiria te tumu anga tikai o taua aratakianga te anoanoia ra. Okotai o taua au puka ta tatou ka akamanako ana koia oki​—ko Salamo. Ko teia puka nei e 150 akaputuanga imene no te akatapuanga i te Atua ko Iehova, vaitata rai e e apa o teia au imene nei na te Ariki na Davida o Iseraela taito i atu. Inara te mea puapinga maata roa atu i te kite anga e koai te tangata tata ra koia oki te kite anga e kua tataia teia puka nei i raro ake i te akauruanga a tetai Oa maata roa atu no te tangata, ko Iehova. Papu ia tatou e te vai ra i roto i reira te aratakianga a te Atua e puapingaia ai tatou e te tou ra ki te arataa e rauka ai te mataora.

Kua papu i te aronga tata o Salamo e kua tupu mai te mataora no te mea ka rauka i tetai tangata tetai pirianga tau ki te Atua. “E ao [“mataora,” NW] to te tangata i mataku ia Iehova,” i tata ei te tangata tata taramo. (Salamo 112:1) Kare e rauka i tetai pirianga tangata, tetai apinga i te pae kopapa, e tetai akatupuanga uaorai i te oronga mai i te mataora te aere maira no te pirianga ki “te aronga, ko Iehova to ratou Atua.” (Salamo 144:15) Te akapapu maira te au oraanga e manganui o te au tavini a te Atua i teia tuatau nei i teia.

Ko tetai akaraaanga ko Susanne, e 40 tu ma ona mataiti. * Kua karanga aia e: “I teia ra, e manangui te piri nei ki tetai au pupu kia rauka te au akakoroanga noa ua me kare kia piri atu ki te au inangaro anga noa ua. Inara, o te katoatoa ra i roto i te pupu, tokoiti ua ta ratou e manako ra e e oa. Tuke ake rai ra te au tangata o Iehova. No to tatou  aroa ia Iehova i rauka ai ia tatou i te aroa atu i tetai e tetai. I rotopu i te au tangata o te Atua, e maru ua to tatou ngakau, noatu e teiea tatou i taua atianga. Te akapuapinga maata nei teia taokotaianga i to tatou oraanga. Koai ua atu te karanga ra e e au oa to ratou no roto mai i tetai pupu tangata tukeke e tetai au turanga tukeke e no te au pa enua tukeke e manganui? Te rauka nei iaku i te karanga atu ma toku ngakau katoa e te pirianga ki te au tangata o Iehova e mataora te ka tupu mai.”

Kua kite katoa a Maree, tei anauia i Tekotia, e e puapinga maata tikai tetai pirianga memeitaki kia Iehova e e mataora te ka kiteaia mai. “I mua ake ka kite ei au i te tuatua mou o te Pipiria,” i akakite ei aia, “e reka ana au i te akarakara i te au teata rikarika. Inara i tetai po kare au i varea ana i te moe kare oki aku koroti i roto i toku rima i te tuaru ke atu i te au tupapaku e te mea ngotengote i te toto mei te moakirikiri rai, e e maata te au teata no runga i te reira. Inara, i toku kite anga i te tuatua mou, te akamutu anga i te akarakara i taua au teata ra, i moe meitaki ei au no toku pirianga kia Iehova e kare au e mataku akaou ana, e te mataora anga i te akamori i tetai Atua ririnui roa atu i te au temoni e te au mea ngotengote i te toto mei te moakirikiri rai tei manakoia ana.”

Irinaki Anga ia Iehova te Arataki ra ki te Mataora

Kare a tatou tumu anga i te ekoko i te mana katoatoa o Tei Anga ra e tona pakari kotinga koreia. Te kite anga e te irinaki pu tikai ra aia ia Iehova e kua akariro Iaia ra ei punanga nona ra, kua tata a Davida: “E ao [“mataora,” NW] to te tangata tei akariro ia Iehova ei irinaki anga nona.”​—Salamo 40:4.

Kua karanga a Maria: “Ko taku i kite mai i Paniora e i tetai atu au ngai ke e me rave tatou i te au mea na to Iehova arataa, noatu e te inangaro ra to tatou au manako e te au manako ngakau kia rave tatou i tetai apinga ke, ka tupu mai te au mea meitaki kia tatou. E mataora te ka tupu mai no te mea e meitaki tikai to Iehova arataa.”

Kua kite katoa a Andreas, e tangata pakari Kerititiano tei tavini ana i te au enua e manganui i Europa, mei tana uaorai i kite ana e ka rauka ia tatou i te irinaki ia Iehova. Te karanga nei aia: “Na toku tuakana ra, kare i ariki mai ana i taku akonoanga, i akakeu iaku mei toku mapu anga mai, na te akamaroiroi anga iaku kia aruaru i tetai angaanga puapinga maata i te pae moni. Reka kore tikai aia i te rave anga au i te angaanga orometua tamou, e kare au i irinaki atu ana ki runga i te manako tinamou tei orongaia mai na roto i te au parani no te moni ruaine. I te tuatau o taku angaanga painia, kare roa au i ngere ana, e kua kite mai au i te au akameitakianga ta tetai e moemoea ua ra.”

 I te mataiti 1993, kua patiia atu a Felix kia tauturu i te akamaata atu i te au opati no te opati manga o te Au Kite o Iehova i Selters, Tiamani. Te oti anga te angaanga, kua patiia atu aia kia noo mai aia ei mema no te pamiri Betela. Tona manako? “Kua ariki ekoko atu au i te patianga. Inara tei konei rai au i teianei vaitata nei e e tai ngauru mataiti, e kua papu iaku e kua pau mai a Iehova i taku pure. Kua kite aia eaa te mea meitaki noku. Na te irinaki anga tikai iaia e te tuku anga iaia kia arataki iaku, kua oronga atu au kiaia i tetai tuatau kia akaari mai kiaku e eaa tana e inangaro ra kia rave au.”

Kua inangaro a Susanne, tei taikuia mai i mua akenei, i te tavini ei painia tamou, inara e ngata tikai iaia i te kimi i tetai angaanga tuku taime. I muri ake i te tiaki anga e tai mataiti kia rauka mai tetai angaanga, kua tuku aia i tona irinaki anga ki roto ia Iehova. Te akakite nei aia: “Kua tuku atu au i taku pepa no te angaanga painia. Rava ua taku moni i akaputu ana i te tutaki i taku au kaiou e tai marama. E marama rekareka tikai te reira! Kua riro taku angaanga orometua ei tumu anga rekareka tikai, inara kare i rauka ana tetai angaanga tinamou. Mei ta Iehova i taputou mai ana, kare aia e akaruke iaku. I te ra openga o te marama, kua rauka iaku i te taina i te pepa no tetai angaanga. Kua kite au i teianei e ka rauka iaku i te irinaki tikai kia Iehova! Kua oronga mai teia tupuanga mua i roto i te angaanga painia i tetai oraanga puapinga e te mataora.”

Te Akoanga no ko Mai i te Atua te Oronga Maira i te Mataora

Kua rave te Ariki ko Davida i te au tarevake kino pakari. I tetai au taime, te anoano ra aia i te akoanga pakari. Ka ariki ainei tatou i te akoanga e te ikuikuanga mei ia Davida rai?

Kua kite ana a Aida, no Varani mai, e kua rave aia i te tarevake kino pakari. Kua maara iaia: “Ko toku manako maata te akaou anga i toku pirianga kia Iehova. Kare au i manako atu ana i tetai apinga ke.” Kua aravei atu aia i te aronga pakari Kerititiano no te tauturu. Te tavini anga e tere atu e 14 mataiti i roto i te angaanga orometua tamou, te karanga nei aia i teianei: “Rekareka tikai au i te kite anga e kua akakore mai a Iehova i taku tarevake!”

Te akarongo anga ki te akoanga no ko mai i te Atua te paruru nei ia tatou kia kore tatou e akamata i te rave i te tarevake. Te akataka nei a Judith: “I toku 20 mataiti anga, kua akainangaro au i tetai oa angaanga Tiamani tei tauta pakari ana i te akarekareka mai iaku. E tangata akangateiteiia, e e angaanga meitaki tikai tana, e kua akaipoipo takere aia! Kitea mai e au e e ikianga taku ka rave i rotopu i te akono anga i te au ture a Iehova e te kopae ke takiri anga Iaia. Kua tuatua atu au ki toku nga metua. Kua tuatua tika ua mai toku papa kiaku i te akamaara mai anga kiaku e eaa ta Iehova e inangaro maira iaku. Kua tuatua pu ua mai aia kiaku​—ko te reira taku e inangaro ra! Noatu rai, kua kimi au i tetai kotoeanga. I te au epetoma kua tuatua maua ko toku mama i te au aiai no runga i te puapinga e te akaora anga te ture a te Atua. Rekareka tikai au e kua akavaitata marieia atu toku ngakau kia Iehova. Kia akoia e kia apiiia e ia e maata te mataora tei orongaia mai kiaku​—e manganui te au mataiti i puapingaia i roto i te angaanga orometua tamou ma tetai tokorua Kerititiano memeitaki, te inangaro maira iaku e te inangaro ngakau katoa ra ia Iehova.”

Te taka meitaki ra, e te akakite maira taua au tupuanga i te au tuatua a Davida: “E ao [mataora] tona, to te akakoreia tana ara, to tei tapokiia tona kino! E ao [mataora] to te tangata, kare i tapepeia e Iehova i te ara.”​—Salamo 32:1, 2; NW.

Mataora i te Akaari Anga i te Manakoanga ki Tetai Ke

Kua tata a Davida e: “E ao [“mataora,” NW] to tei akono mai i te tangata putaua ra: ka akaoraia aia e Iehova i te tuatau tumatetenga ra. Na Iehova aia e tiaki, e akaora oki iaia, e akameitakiia aia.” (Salamo 41:1, 2) Kua riro ta Davida manakoanga aroa i akaari ana kia Mephiboseta, te tamaiti pirikoki a tona oa akaperepere ko Ionatana ra, ei akaraanga no te akamanako tikai anga i te aronga akaaka.​—2 Samuela 9:1-13.

Kua rauka ia Marlies, tei tavini ana e 47 mataiti ei mitinari, te atianga takake i te tutu aere ki te au tangata tei oro ke mai mei te au ngai tumatetenga o Aperika, Asia, e Europa Itinga. Te karanga nei aia: “Tukeke to ratou au manamanata e te manako e kare ratou e irinaki katoaia ana, e  te tika anga te akavaavaaia ra ratou. E mataora tei rauka mai i te tauturu atu anga i taua au tangata ra.”

Kua tata a Marina, e 40 tu ma ona mataiti e: “Ei vaine takaua, kua kite au i te aite anga mei tei te pae tetai aronga ia koe. Na teia i akakeu iaku kia akamaroiroi atu i te au tangata na te ringi atu anga ia ratou me kore te tata anga i te au reta kia ratou. E maata te aronga tei akakite mai i to ratou rekareka. E rekareka tei rauka mai iaku i te tauturu atu anga i tetai ke.”

Te karanga nei a Dimitar, e 20 tu ma ona mataiti, e: “Na toku mama uaorai i utuutu mai iaku. I toku rikiriki anga ra, e mataora ana au i te apai aere anga tetai akaaere Apii Puka o te Putuputuanga i te au epetoma ravarai i te tereni iaku i roto i te angaanga orometua. Te mareka nei rai au i tana aruaruanga. Kua kite au e kare i te mea mama ua i te akakeu anga iaku.” Te ariki rekareka anga i te tauturu tei rauka iaia ra, te tauturu nei a Dimitar i tetai ke: “E tauta ana au i te apai aere i tetai tangata mapu e pera katoa i tetai tangata pakarikari i roto i te angaanga orometua okotai taime i te marama.”

Kua taiku katoa mai te puka o Salamo i tetai au mea te akatupu ra i te mataora. Ko tetai mea puapinga ko te irinaki anga ki runga i to Iehova maroiroi kare i runga i to tetai uaorai: “E ao [“mataora,” NW] to te au tangata ko [Iehova] to ratou maroiroi ra.”​—Salamo 84:5.

Kua kite ana a Corinna i teia. Kua neke atu aia ki tetai enua te anoano maataia ra te tauturu i roto i te angaanga orometua. “Kua aro atu au i tetai reo ou, i tetai peu ou, e i tetai manako anga ou. Kua manako au e tei runga au i tetai paraneta ke. Kua ruketekete au i te manako anga i te tutu aere anga i roto i tetai ngai ke. Kua pati atu au i te tauturu kia Iehova, e na roto i tona maroiroi i rauka ai iaku i te tutu aere i te au ra ravarai i te ngai kare e maata roa ana te tangata. Kare i roa ana, kua rauka natura ua iaku i te rave i te reira. E maata taku au apii Pipiria i akamata, e te puapinga ua nei rai au mei teia tupuanga. Kua kite au i ta Iehova akamaroiroi anga, e ka autu ia tatou te au arai anga akara anga maata.”

Ae, e tukeke te au tumu te oronga maira i te mataora, mei te tatanu anga rai i tetai pirianga oa ki te Atua e ki tona au tangata, te irinaki tikai anga kia Iehova, te ariki anga i tana akoanga, e te akamanako anga i tetai ke. Na te aaere anga ma te arataa o Iehova e te akono anga i tana au ture, ka kite tatou ma te mataora i tona mareka anga.​—Salamo 89:15; 106:3; 112:1; 128:1, 2.

[Tataanga Rikiriki i Raro]

[Tutu i te kapi 12]

Ko Maria

[Tutu i te kapi 13]

Ko Maree

[Tutu i te kapi 13]

Ko Susanne raua ko Andreas

[Tutu i te kapi 15]

Ko Corinna

[Tutu i te kapi 15]

Ko Dimitar