Aratakianga Papu ki te Mataora

“TE ARUARU anga i te Mataora” ko te tikaanga ia no te au tangata ravarai. Ko te manakoia o te aronga tei akanoo i te Tika Anga no te Akatakake Anga o Marike. Inara kare e aiteite ana te aruaru anga i tetai akakoroanga ki te itae anga i te reira. Noatu e te aruaru ra te aronga mapu e manganui i te au mea i roto i te tamataoraanga e te au tarekarekaanga, eia aronga taau i kite ana e kua rauka mai tikai te puapinga ta ratou e anoano maata tikai ra? “Penei kare e rauka ia koe,” i karanga ai tetai tangata imene rongonui tei matau i te putoto anga kia riro mai ei tangata puapinga i te akatangi anga imene.

Me te manako ra koe mei tera rai no runga i te kimi anga i te mataora, e tumu anga meitaki e auraka koe e taitaia. Me aruaru koe i te mataora na roto i te mataara tau, ka rauka ia koe te reira. No teaa ra teia i tikai? Te akakite maira te atikara i mua akenei i “te Atua mataora,” ko Iehova. (1 Timoteo 1:11, NW) I roto i te Pipiria, kua oronga mai te Atua i te aratakianga kia kore taau aruaru anga i te mataora e taki atu kia akatupu mai te reka kore. Ka rauka ia Iehova i te tauturu ia koe kia autu i te au tupuanga matauia no te reka kore. Ei akaraanga, e akamanako ana i te pumaana tana i oronga mai kia koe me mate tetai tangata taau e akaperepere ra.

Me Mate Tetai Tei Akaperepereia

E apinga meitaki ainei tetai no runga i te mate? Te akatakake ra te mate i te au metua mei te tamariki e te tamariki mei te au metua. Te akatakake ra te reira i te au oa piri vaitata e te apai maira i te tinamou kore ki te au tapere piri vaitata. Me tupu mai te mate, penei ka rokoia te ngutuare tangata mataora e te maromaroa.

 Kare e rauka i tetai ua atu tangata i te karanga mai kia koe e e tumatetenga oki te mate. Inara, kare tetai au tangata e akatika ana i te reira e kua akatutu mai i te mate ra ei akameitakianga. E akamanako ana eaa tei tupu ana i muri ua ake te tupu mai anga te Uriia Katrina i te Ava o Meiko i roto ia Aukute 2005. I ko te tanumanga o tetai tangata tei mate, kua karanga te orometua e: “Kare na Katrina i tamate iaia. Na te Atua i kapiki mai iaia ki te rangi.” I tetai tuatau ke atu, kua akakite tetai karaka manako meitaki no te are maki ki tetai tamaine e eiaa e manamanata, no te mea kua apainaia e te Atua tona metua vaine ki te rangi. Kua aue te tamaine: “Eaa ra aia i apai atu ei iaia mei iaku nei?”

Te taka meitaki ra, kare taua au manako tarevake no runga i te mate e akapumaana ana i te aronga e aue ra. No teaa ra? No te mea kare teia au manako nei e akatutu maira i te tikaanga no runga i te mate. Te mea kino roa atu, te akatutu maira te reira i te Atua te rave anga i te aronga akaperepereia mei te ngutuare tangata e te au oa na roto i tetai ravenga kino e te mamae. Kare i riro ana ei tumuanga no te pumaana, kua akatutuia mai te Atua ei peretana kino roa atu no te mate tumatetenga. Inara te akakite maira te Tuatua a te Atua i te tikaanga no runga i te mate.

Te kapiki ra te Pipiria i te mate e e enemi. Te akaaite ra te reira i te mate ki tetai ariki tei tutara i rungao i te tangata ravarai. (Roma 5:17, NW; 1 Korinetia 15:26) E enemi te mate no taua mana kare e rauka i te au tangata i te patoi atu, e ko te aronga akaperepere katoa tei mate ra e aronga tei tamateia e kare e rauka i te tareia. Te akakite tikai maira teia tikaanga o te Pipiria i te aue e te puapinga kore ua ta tatou e manako ra me mate tetai o to tatou aronga akaperepereia. Te akapapu maira te reira e te tau ua ra taua au manako. Noatu rai, te taangaanga ra ainei te Atua i te enemi o te mate ra kia apai atu i to tatou aronga akaperepereia ki te rangi? Na te Pipiria e pau mai i taua uianga.

Te karanga nei a Koheleta 9:5, 10 e: “Kare ra a te aronga i mate ra e tuatua i kitea . . . kare oki e angaanga, kare e kimianga, kare oki e kite, kare oki e pakari, i roto i te vaarua taau e aere na.” I roto i te vaarua kare takiri tei mate ra e angaanga, kare e aere ana, kare e kite ana, me kore kare e manako anga. Kua akaaiteia te reira mei te mea rai e te moe ua ra ratou. Te akataka maira i reira te Pipiria e kare te Atua e apai ana i to tatou aronga akaperepereia kia noo kiaia i te rangi. Ko ta te mate e akatupu ra te akaruke ora kore ra ia ratou i roto i te vaarua.

Kua akapapu mai a Iesu i teia tikaanga i muri ake te mate anga tona oa ko Lazaro. Kua akaaite a Iesu i te mate ki te moe. Me i aere ana a Lazaro ki te rangi ki te Atua Mana Katoatoa ra, e te akatuakaou mai anga a Iesu iaia ra ki te enua nei e mate akaou atu ei aia ra kare ia i te angaanga aroa. Te akakite maira te papaanga tei akauruia e i ko i te ngai tanumanga, karanga atura a Iesu na roto i tetai reo maata e: “E Lazaro, ka aere mai ki vao!” Te karanga ra te Pipiria e: “Kua aere maira taua tangata i mate ra ki vao.” Kua ora akaou mai a Lazaro. Kua kite a Iesu e kare a Lazaro i akaruke ana i te enua. Te vai ora kore ua ra aia i roto i te vaarua.​—Ioane 11:11-14, 34, 38-44.

Te tauturu maira teia tupuanga tei tataia i roto i te Pipiria e kia marama tatou e kare te mate ei ravenga na te Atua kia apai i te au tangata mei te enua nei ki te rangi. No reira ka rauka ia tatou i te  akavaitata atu ki te Atua, i te kite anga e kare nana i akatupu i to tatou maromaroa. Ka rauka katoa ia tatou i te irinaki e kua marama pu tikai aia i te mii e te kino ta te mate te enemi i tuku mai ki runga ia tatou. E te akapapu maira te tikaanga o te Pipiria no runga i te turanga o te mate e kare roa tei mate e mamae ana i roto i te ai vera me kore i te ngai i akautungaia ai kia tamamaeia inara te vai ora kore ua ra i roto i te vaarua. No reira, auraka roa te akamaara anga o to tatou aronga akaperepereia kia riro mai ei titoutou anga na te akamanako rikarika anga i te Atua me kore te mataku anga e kare i kiteaia mai e teiea ra ratou. Pera katoa, i roto i te Pipiria, te oronga maira a Iehova i tetai atu akapumaanaanga kia tatou.

Arataki ra te Manakonakoanga ki te Mataora

Te au irava ta tatou i uriuri ana te tou ra ki te manakonakoanga, e tuanga puapinga maata no te mataora mou. Te tuatua no te “manakonakoanga” tei tataia i roto i te Pipiria te akakite maira i te tapapa irinaki anga i te meitaki. E kite ei e akapeea te manakonakoanga i te arataki anga ki te mataora i teianei, e oki tatou ki te papaanga te akatuakaouanga mai a Iesu ia Lazaro.

Vaitata rai e e rua nga tumu anga i rave ei a Iesu i taua temeio. E tai te akaatea anga i te maromaroa o Mareta ratou ko Maria, e te au oa te aue ra. Ka piri taokotai akaou atu ratou ma te rekareka ki to ratou aronga akaperepereia. Inara kua taiku a Iesu i te rua o te tumuanga puapinga maata roa atu kia Mareta: “Kare au i karanga kia koe e, Kia akarongo koe ra, ka kite koe i te kakā o te Atua?” (Ioane 11:40) Te uri ra The New Testament in Modern English, na J. B. Phillips, i te tuatua openga e “te mea umere ta te Atua ka rauka i te rave.” I te akaoraanga mai ia Lazaro, kua oronga mai a Iesu i tetai akaraanga na mua e eaa ta te Atua ko Iehova ka rauka i te rave i te tuatau ki mua. Teia tetai akakiteanga no runga i teia “mea umere ta te Atua ka rauka i te rave.”

I roto ia Ioane 5:28, 29, te karanga ra a Iesu e: “Auraka e poitirere i teia, no te mea te aere mai nei te ora ka rongo te aronga katoa i roto i te au menema akamaara anga i tona reo e ka aere mai ki vao.” (NW) Te aiteanga o teia e pouroa te aronga tei mate i roto ia Teoro, kapitiia mai to tatou aronga akaperepereia, ka akaora akaouia mai. E maata atu ta Angaanga 24:15 e akaari maira no runga i teia tupuanga umere, te karanga anga e: “E tuakaouanga to tei mate, te aronga tuatua-tika e te aronga tuatua-tika kore.” Pera katoa ka rauka i “te aronga tuatua-tika kore,” te aronga e manganui kare i kite ana e i tavini ana ia Iehova, tetai atianga no te tuatau ki mua kia rauka mai to te Atua mareka anga.

Kiea e tupu mai ei teia tuakaouanga? Te akakite ra a Salamo 37:29 e: “Ka riro te enua no te aronga tuatua-tika, ka noo tamou rai ratou i reira.” E akamanako ana e eaa te aite anga o te reira! Ka aravei akaou te au ngutuare tangata e te au oa tei akatakakeia e te mate i runga i te enua nei. Ia koe e akamanako ra i te au tuatau rekareka na te kapiti anga atu ki te au oa taau i akaperepere ana, e mea tau kia ki ua toou ngakau i te mataora.

Inangaro a Iehova kia Mataora Koe

E akamanako ana tatou e rua nga mataara e akamaata ai a Iehova i toou mataora noatu toou au manamanata. Te mea mua, na roto i te Pipiria, te oronga maira aia i te kite e te aratakianga e tauturu ei ia koe kia aro meitaki atu i te au kino. I te pae mai i te tauturu anga ia tatou kia akakoromaki i to tatou mii no tei mate ra, ka rauka katoa i te akoanga Pipiria i te tauturu ia tatou kia akatikatika i te au manamanata no te moni e no te oraanga kopapa. Ka oronga mai te reira i te maroiroi kia koe kia akakoromaki i te ravenga tika kore o te tangata e te oripu anga a te poritiki. E me akono koe i tana aratakianga i roto i toou oraanga, ka tauturu mai te reira ia koe kia akatikatika i tetai au manamanata.

Te rua, na te apii anga i te Pipiria, ka rauka ia koe tetai manakonakoanga tei maata atu i tetai apinga ta te taiate tangata ka oronga mai. E tuanga no te manakonakoanga te akatuakaouanga o te au oa e te pamiri ta te Pipiria e apii maira. E maata te au akakiteanga ta Apokalupo 21:3, 4 i oronga mai: “E noo te Atua ki rotopu [i te au tangata ravarai], ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” Te aite anga o teia ka ngaro ke atu te tumu anga no te mii i roto i toou oraanga e tuatau ua atu. Ka tupu te au taputou a te Pipiria, e ka rekareka koe i ta te reira ka akatupu mai. Te kite ua anga e e tuatau meitaki tetai i mua ua atu te  orongaia maira te tauturu. E tumuanga no te mataora te kite anga e kare koe e aro tikai atu i te mamae i muri ake i te mate.

Ei akatutuanga: I etai mataiti i topa akenei kua kite atu a Maria i te mate anga tana tane no te maki akakakai. Iaia e nakunaku ra rai i tana tane tupu mai ei te manamanata i te pae moni i akaruke ei ratou ko tana tamariki tamaine e toru i to ratou kainga. E rua mataiti i muri mai, kua kiteaia mai e Maria e e maki akakakai rai tona. E rua ona vaiia anga e te akakoromaki anga i te kino pakari o te mamae i te au ra ravarai. Noatu teia au manamanata nei, papu tikai iaia i roto i tona manako e te akakeuia ra aia kia akamaroiroi atu i tetai au tangata. Akapeea aia i te akono tamou anga i tona mataora?

Te karanga nei a Maria: “Me e manamanata toku, kare au e manako roa atu ana iaku uaorai. E kopae ana au i te ui i te au uianga mei teia rai: ‘Eaa ra e ko au? Eaa ra au i mamae ei mei teia rai? Eaa ra au i maki ei?’ Te kaimoumou ra te manako anga papu kore i te maroiroi. Kareka ra, kua tuku au i toku maroiroi i te tavini anga ia Iehova e te tauturu anga i tetai ke. Kua tupu mai te mataora kiaku.”

Eaa ra te tuanga o te manakonakoanga i roto i to Maria oraanga? Kua tuku aia i tona manako ki te tuatau ki mua me akakore a Iehova i te au maki e tetai au manamanata mei te au tangata. Me aere atu aia ki te are maki no te rapakauanga, e oronga ana aia i taua manakonakoanga ki te aronga maki tei tuia e te maki akakakai, penei e kare o ratou manakonakoanga. Eaa ra te puapinga o teia kia Maria? Te karanga nei aia e: “E manako putuputu ana au i ta te Pipiria e karanga ra i roto ia Ebera 6:19, i te ngai e akataka maira a Paulo i te manakonakoanga e e tutau no te ora. Me kare oki taua tutau, ka papanu aere ua koe i roto i te uriia i roto i tetai poti kare i tapekaia. Inara me kua tapekaia koe ki taua tutau, ka tinamouia koe noatu te au manamanata pakari taau ka aro atu.” Kua tauturu tikai taua “irinaki i te ora mutu kore, i ta te Atua, ta te kore e tika kia pikikaa” ia Maria kia noo mataora ua. Ka pera rai kia koe.​—Tito 1:2.

Na roto i tetai apii Pipiria, ka kite rai koe i te mataora mou noatu e e au manamanata toou. Inara, penei e au uianga taau no te au turanga tau no runga i teia. Te mataora nei te Au Kite o Iehova i te akaari atu kia koe i te au pauanga Tuatua Tapu taau e anoano ra i te kite kia mataora tikai koe. Ia koe e tiaki ua ra i te akatupuanga no te manakonakoanga ta Iehova ka oronga mai, ka rauka e ko koe tetai i rotopu i te aronga tei akatakaia na roto i teia tu nei e: “E rauka ia ratou te rekareka e te pereperekavana; ko te aue ra, e te mii, e rere ke atu ïa.”​—Isaia 35:10.

[Tutu i te kapi 5]

Na te tikaanga Pipiria anake ra e akakore i te mii

[Tutu i te kapi 7]

Te oronga maira te manakonakoanga Pipiria no te tuakaouanga i te mataora