Au Uianga a te Aronga Tatau

Eaa te aiteanga o ta Iesu tuatua kia Nikodemo: “Kare rava e tangata i tae ki runga i te rangi, mari ra ko tei aere mai ki raro mei runga mai i te rangi ra, ko te Tamaiti a te tangata i runga i te rangi ra”?​—Ioane 3:13.

Tei runga nei a Iesu i te enua i taua taime ra, e kare rai aia i aere ake, me kore i oki ake, ki te rangi. Inara, ta tatou ka kite mai no runga ia Iesu e te aerenga manako o tana au tuatua ka tauturu ia tatou i te marama i te aiteanga.

Kua “aere mai [a Iesu] ki raro mei runga mai i te rangi ra” mei tera oki e kua noo ana aia i mua atu ana ma tona Metua i te ngai vaerua, inara i tetai tuatau ikiia, kua tauiia te oraanga o te Tamaiti ki roto i te kopu o Maria, taki atura i reira ki te anau mai anga a Iesu ei tangata. (Luka 1:30-35; Galatia 4:4; Ebera 2:9, 14, 17) I muri ake i tona mate anga, ka akatu akaouia a Iesu ei mea ora vaerua e ka oki atu aia i ko ia Iehova. No reira, i mua poto ua ake i tamateia ai aia, kua rauka ia Iesu i te pure: “E taku Metua, ka akakakā mai koe iaku i mua i toou aroaro na, i te kakā noku ia koe ou ua teianei ao.”​—Ioane 17:5; Roma 6:4, 9; Ebera 9:24; 1 Petero 3:18.

I te tuatuaanga a Iesu kia Nikodemo, e Pharisea e e puapii i Iseraela, kare ake rai a Iesu i oki ake ki te rangi. E tikai, kare ake rai e tangata i mate ake e kua aere atu ki te ngai vaerua, ki te rangi. Kua akakite a Iesu uaorai e kare e tangata i aite atu kia Ioane Papetito ei peroveta no te Atua, inara “ko te iti rava ra i te basileia o te ao ra, e maata atu ïa iaia.” (Mataio 11:11) E kua akataka mai te apotetoro ko Petero e kua mate katoa te ariki tiratiratu ko Davida e tei roto rai i tona tanumanga; kare a Davida i aere ana ki runga i te rangi. (Angaanga 2:29, 34) E tumu rai tetai i kore ei tetai aronga tei mate i mua ake ia Iesu, mei ia Davida, Ioane Papetito, i aere ei ki te rangi. Kua mate ratou i mua ake i akatuera ai a Iesu i te mataara me kore te tikaanga no te au tangata kia akatuakaouia ki te oraanga i te rangi. Kua tata te apotetoro ko Paulo ia Iesu, mei tetai momua, “i akatapuia . . . taua ara ou nei ïa e te ora” i te rangi.​—Ebera 6:19, 20; 9:24; 10:19, 20.

I te mea e kare a Iesu i mate ake, e i akatuakaouia ake, eaa te aiteanga i te tuatuaanga aia kia Nikodemo: “Kare rava e tangata i tae ki runga i te rangi, mari ra ko tei aere mai ki raro mei runga mai i te rangi ra, ko te Tamaiti a te tangata i runga i te rangi ra”? (Ioane 3:13) Akamanako ana i te aerenga manako, me kore eaa ta Iesu e uriuri ra kia Nikodemo.

I te aere mai anga taua tutara ngati Iuda kia Iesu i raro i te marumaru o te po, kua karanga atura Iesu kiaia: “Tika, tika tikai taku e karanga atu kia koe, Kia kore te tangata e anau akaou ra, kare aia e kite i te basileia o te Atua ra.” (Ioane 3:3) Ei pauanga, kua ui atu a Nikodemo: ‘Eaa ïa au mea e tikaʼi? Akapeea e anau akaou mai ei tetai tangata?’ Kare aia i marama ana i teia apiianga tu-Atua no te nooanga ki roto i te Patireia o te Atua. E ravenga ainei tetai e rauka ai iaia i te kite mai no runga i teia? Mei te akaraanga a te tangata nei kare e rauka; kare e rauka i tetai tangata i te ikuiku iaia no runga i te reira no te mea kare ake e tangata i aere ake ki te rangi e rauka ai i reira i te akataka atu i tetai apinga no te tomo anga ki roto i te Patireia. Ko Iesu anake ua taua tangata ra. Ka rauka iaia i te apii atu ia Nikodemo e tetai atura no te mea kua eke mai Aia mei te rangi mai e kua tau i te ikuiku i te au tangata no runga i taua apinga ra.

No reira te akatutu maira te uianga no runga i teia irava i tetai tumu puapinga no runga i te apiianga i te Tuatua a te Atua. Kare e tau kia ekoko koe i tetai irava no te mea ua nei e akaraanga ngata te reira i te marama. Ta te Pipiria e tuatua ra i tetai ngai kia akamanakoia ma te tauturu o tetai au irava ke mai e kia rotai ma te reira. Pera katoa, te aerenga manako​—te turanga me kore eaa te uriuriia ra​—e putuputu ana i te tauturu ia tatou i te kite mai i tetai aiteanga tau, e te tano meitaki no tetai irava ngata tikai.